1. Aiseā e faigatā ai ona malamalama pe a faapea mai se tasi: “Ua ou faamagaloina oe”?

 E PEI e matuu ese atu se avega mamafa pe a faapea mai se tasi: “Ua ou faamagaloina oe.” O se mea e faamāfanafanaina ai, aemaise pe afai na tatou faia se tala po o se gaoioiga e tigā ai se tasi. Ae o le ā tonu lava le uiga o le faaupuga, “Ua ou faamagaloina oe”? Po o le uiga o le tala a lenā tagata, ua toe lelei la oulua faauōga? Po o le mea e lē manaʻo e toe talanoa i le mea na tupu? O le auala e faamagalo ai tagata, e faigatā ona malamalama i ai.

 2. Ua faapefea ona faamatalaina i le Tusi Paia le auala e faamagalo ai e Ieova tagata? (Tagaʻi foʻi i le faamatalaga pito i lalo.)

² E matuā ese lava le auala e faamagalo ai e Ieova i tatou o tagata lē lelei atoatoa, mai i le auala e tatou te faamagaloina ai isi. E leai se tasi e faamagalo e pei o Ieova. Ua faapea mai le faisalamo e faatatau iā Ieova: “O oe e te faamagaloina lava agasala, ina ia matataʻu ai tagata iā te oe.” a (Sala. 130:4) O le mea moni, pe a faamagalo Ieova e na te matuā “faamagaloina lava.” Ua ia faataatia se tapulaa maualuga i le auala e faamagalo ai. I nisi tulaga, na faaaogā e i latou na tusia le Tusi Paia se upu Eperu e faamatala ai le auala e faamagalo ai e Ieova se tagata, ae e lē mafai ona faaaogā e faamatala ai le auala e faamagalo ai e le tasi tagata le isi.

 3. Aiseā e mataʻina ai le auala e faamagalo ai e Ieova i tatou? (Isaia 55:​6, 7)

³ Pe a faamagalo e Ieova se tasi, ua ia soloia atoatoa le agasala a lenā tagata, ma ua toe faaleleia atoatoa le faiā lea na faaleagaina. E tatou te maofa i le faamagaloga a Ieova, ona e  lē gata e atoatoa ae e faaauau pea.—Faitau le Isaia 55:​6, 7.

 4. Ua faapefea ona fesoasoani mai Ieova ina ia tatou malamalama i le uiga moni o lana faamagaloga?

⁴ Pe afai e ese le faamagaloga a Ieova mai iā i tatou, e faapefea la iā i tatou o ni tagata lē lelei atoatoa ona malamalama i le uiga moni o lana faamagaloga? Ua faaaogā e Ieova talafaatusa faaoso naunau, e fesoasoani iā i tatou ia malamalama ai i le auala e na te faamagaloina ai i tatou. O le a tatou iloiloina i lenei mataupu nisi o na talafaatusa, ma malamalama ai i le auala e soloia ai e Ieova a tatou agasala, ma toe faaleleia ai la tatou faiā ma ia. O le iʻuga, o le a faalolotoina ai lo tatou lotofaafetai i lo tatou Tamā alofa, o lē e na te faamagaloina i tatou i le tele o auala.

E AVEESE MAMAO E IEOVA A TATOU AGASALA

 5. O le ā e tupu pe a faamagalo e Ieova a tatou agasala?

⁵ I le Tusi Paia, e masani ona faatusa atu agasala i avega mamafa. O le auala lenei na faamatalaina ai e le tupu o Tavita ana agasala: “Ua oo i luga aʻe o loʻu ulu oʻu sesē; e pei o se avega mamafa, ua faigatā tele ona ou tauave.” (Sala. 38:4) Ae e faamagalo e Ieova agasala a i latou ua faaalia le salamō. (Sala. 25:18; 32:5) O le upu Eperu ua faaliliuina ai le “faamagalo,” e uiga atu i le “sii ese” po o le “tauave.” I se uiga faafaatusa, e tatou te ono manatu iā Ieova o se tagata malosi, o loo ia sii ese a tatou agasala ma ave i se mea mamao.

 6. O le ā le mamao e ave i ai e Ieova a tatou agasala?

⁶ O loo faaaogā i le Tusi Paia se isi talafaatusa e faaalia ai le mamao ua ave i ai e Ieova a tatou agasala. Ua faapea mai le Salamo 103:12: “E pei ona vavamamao o le mea e oso aʻe ai le lā mai i le mea e goto ifo ai, e faapea foʻi ona faamamao e ia o a tatou solitulafono mai iā i tatou.” E matuā vavamamao lava sasaʻe mai i sisifo ma e lē taitai fetaiaʻi nei itulagi e lua. I se isi faaupuga, e matuā mamao lava le mea e ave i ai e Ieova a tatou agasala. Maʻeu se faamautinoaga o le auala e faamagalo ai e Ieova i tatou!

 7. Ua faapefea ona faamatalaina i le Tusi Paia le gaoioiga e faia e Ieova i a tatou agasala? (Mika 7:​18, 19)

⁷ E ui e aveese mamao e Ieova a tatou agasala i se uiga faafaatusa, ae po o lona uiga la e na te teulotoina? E leai. Na tusi le tupu o Esekia e faatatau iā Ieova: “Ua e lafoaʻiina aʻu agasala uma i ou tua.” O loo taʻua foʻi i le faamatalaga pito i lalo o le mau: “Ua e aveesea aʻu agasala uma mai i ou luma.” (Isa. 38:​9, 17; fpl.) O lenei talafaatusa ua faaalia ai, e aveesea e Ieova agasala a i latou ua faaalia le salamō ma lafoaʻi, e lē mafai ona ia toe iloa atu. E mafai foʻi ona toe faaupu lenā mau e faapea: “Ua e faia [aʻu agasala] e peiseaʻī e leʻi tupu.” Ua toe faamatilatila i le Tusi Paia lenei manatu i se isi talafaatusa o loo faamauina i le Mika 7:​18, 19. (Faitau.) O loo taʻua i lenā mau, e peiseaʻī ua lafoina e Ieova a tatou agasala i le sami loloto. I aso anamua, o so o se mea e lafoina i le sami loloto, e lē mafai ona toe maua mai.

 8. O le ā ua tatou aʻoaʻoina?

⁸ O nei talafaatusa ua tatou aʻoaʻoina ai, pe a faamagalo i tatou e Ieova ua ia tuusaʻoloto i tatou mai i lagona nofosala. Ua moni ai upu a Tavita: “E fiafia i latou o ē e faamagaloina a latou solitulafono ma ua ufitia a latou agasala; e fiafia foʻi le tagata e lē faitaulia e Ieova ana agasala.” (Roma 4:​6-8) O le uiga moni lenā o le faamagalo.

E SOLOIESEA E IEOVA A TATOU AGASALA

 9. O ā talafaatusa ua faaaogā e Ieova e faamatala ai le auala e na te faamagaloina atoatoa ai i tatou?

⁹ O loo faaaogā e Ieova isi talafaatusa e fesoasoani iā i tatou, e talisapaia ai le taulaga  togiola lea ua soloia ai agasala a i latou e faaalia le salamō. I se uiga faafaatusa, e tai pei ua fufulu ese ma faamamā e Ieova a latou agasala. O le iʻuga, ua mafai ai ona faamamāina le tagata agasala. (Sala. 51:7; Isa. 4:4; Iere. 33:8) Ua faamatalaina e Ieova le iʻuga o lenei gaoioiga e faapea: “E ui ina pei o le ʻie mūmū sesega a outou agasala, ae o le a paʻepaʻe e pei o le kiona; e ui foʻi e pei o le ʻie mūmū pāuli, ae o le a avea e pei o fulufulu mamoe.” (Isa. 1:18) E matuā faigatā lava ona aveese se pisia e mūmū sesega pe pāuli mai i se ofu. Peitaʻi, o lenei talafaatusa ua faamautinoa mai ai e Ieova, e mafai ona faamamāina atoatoa a tatou agasala ma e lē mafai ona toe iloa atu.

10. O le ā se isi talafaatusa ua faaaogā e Ieova e faataʻitaʻi mai ai le tele e na te faamagalo ai?

¹⁰ E pei ona taʻua i le mataupu ua mavae, ua faatusa a tatou agasala i “aitalafu.” (Mata. 6:​12, fpl.; Luka 11:4) O taimi uma la e tatou te agasala ai iā Ieova, o le atili telē foʻi lenā o le aitalafu. E matuā telē lava la tatou aitalafu! Ae pe a faamagalo i tatou e Ieova, e tai pei ua ia soloia le aitalafu lea sa tatau ona totogi. E na te lē toe tāpā ni totogi o agasala ua ia faamagaloina. Maʻeu le faamāfanafanaloto o le auala ua faataʻitaʻi mai ai le lotofaamagalo o Ieova!

11. I le Tusi Paia, o le ā e uiga i ai le “soloiesea” o a tatou agasala? (Galuega 3:19)

¹¹ E lē gata e faalēaogā e Ieova a tatou aitalafu po o agasala, ae e na te soloiesea foʻi. (Faitau le Galuega 3:19.) Pe a faalēaogā se aitalafu, e tatou te mafaufau i ai ua kolosi ese. Peitaʻi, o loo iloa atu pea fuainumera o le aitalafu. Ae e ese pe a soloiesea se mea. Ina ia malamalama i lenei talafaatusa, e ao ona manatua o vaitusi na faaaogā e tagata i aso anamua, na faigofie lava ona tapē ese i le vai. Na faaaogā e tagata se omomi susū e tapē ese ai. O lea, pe a “soloiesea” se aitalafu, ua matuā aveesea atoatoa. Ua lē toe mafai ona iloa atu mea na tusia ai, e tai pei lava e leʻi iai se aitalafu. E matuā faalaeiauina i tatou i le iloa, e lē gata e faalēaogā e Ieova a tatou agasala ae e na te soloiesea atoatoa foʻi.—Sala. 51:9.

12. O le ā e tatou te aʻoaʻoina mai i le talafaatusa i se ao mafiafia?

¹² E iai se isi talafaatusa ua faaaogā e Ieova e faamatala ai le auala e na te faamagaloina atoatoa ai a tatou agasala. Na fetalai o ia: “O le a ou ufitia au solitulafono e pei ua ufitia i se ao, ma au agasala e pei ua ufitia i se ao mafiafia.” (Isa. 44:22) Pe a faamagalo e Ieova i tatou, e tai pei ua ia faaaogā se ao mafiafia e ufitia ai a tatou agasala ma lē toe iloa atu.

13. O ā ni o tatou faalogona pe a faamagalo e Ieova a tatou agasala?

¹³ O le ā e tatou te aʻoaʻoina mai i nei talafaatusa? Pe a faamagalo e Ieova a tatou agasala, e lē tatau ona iā i tatou faalogona nofosala i le olaga atoa. E ala i le toto o Iesu Keriso, ua soloiesea atoatoa a tatou agasala e tai pei lava e tatou te leʻi agasala. O le uiga moni lenei o le faamagaloga a Ieova, pe a tatou salamō mai i a tatou agasala.

E TOE FAALELEIA E IEOVA LA TATOU FAIĀ

14. Aiseā e tatou te talitonuina ai le faamagaloga a Ieova? (Tagaʻi foʻi i ata.)

¹⁴ Pe a faamagalo e Ieova i tatou, o le a mafai ona tatou maua se faiā lelei ma ia. E fesoasoani foʻi iā i tatou e ʻalofia ai le lofitūina i faalogona nofosala. E lē tatau ona tatou fefefe ma manatu o loo faaauau pea ona lē fiafia le finagalo o Ieova iā i tatou, ma o loo ia saʻili se auala e faasala ai i tatou. E lē taitai ona faia e Ieova lenā mea. Aiseā e mafai ai ona tatou talitonuina Ieova pe a ia fetalai o le  a ia faamagaloina i tatou? Ua sii mai e le perofeta o Ieremia le fetalaiga a Ieova e faapea: “Ou te faamagaloina a latou mea sesē, ma ou te lē toe manatuaina a latou agasala.” (Iere. 31:34) E tai faapena foʻi faaupuga na faaaogā e le aposetolo o Paulo ina ua ia faapea mai: “Ou te lē toe manatuaina a latou agasala.” (Epe. 8:12) Ae o le ā tonu le uiga o lenā faaupuga?

15. O le ā le uiga o le lē toe manatuaina e Ieova o a tatou agasala?

¹⁵ I le Tusi Paia, e lē o taimi uma e faasino atu ai le upu “manatua” i se tasi o loo mafaufau pea i se mea na tupu. Ae e mafai foʻi ona faasino atu i se tasi o loo faia se gaoioiga. Na talosaga atu le tagata solitulafono na faatautau i autafa o Iesu e faapea: “Iesu e, ia e manatua mai aʻu pe a e oo i lou Malo.” (Luka 23:​42, 43) E leʻi tau ina talosaga atu o ia iā Iesu ia manatua o ia i lenā taimi. O le tali a Iesu ua faaalia ai, o le a ia gaoioi e toe faatūina mai lenā tamāloa. O lea, pe a fetalai Ieova o le a ia lē toe manatua a tatou agasala, o lona uiga o le a lē gaoioi o ia e faasala i tatou. O le a ia lē faasalaina i tatou i se taimi i le lumanaʻi mo agasala ua uma ona ia faamagaloina.

16. O le ā le auala o loo faamatalaina ai i le Tusi Paia le saʻolotoga e maua ona o le faamagaloga a Ieova?

¹⁶ O loo faaaogā i le Tusi Paia se isi talafaatusa, e fesoasoani iā i tatou e malamalama ai i le saʻolotoga e maua pe a faamagaloina i tatou e Ieova. Ona o lo tatou tulaga lē lelei atoatoa ma le faanaunauga e faia le mea sesē, ua pei ai i tatou o “pologa a le agasala.” Ae e tatou te lotofaafetai i le faamagaloga a Ieova, ua pei ai i tatou o pologa ua ʻtuusaʻoloto mai i le agasala.’ (Roma 6:​17, 18; Faaa. 1:5) Ioe, o le faamagaloga a Ieova, e tatou te lagona ai le matuā lotofaafetai ona ua tuusaʻoloto i tatou mai i le faapologaina i le agasala.

17. E faapefea i le faamagaloga a Ieova ona faamālōlōina ai i tatou? (Isaia 53:5)

¹⁷ Faitau le Isaia 53:5. O le talafaatusa mulimuli o le a tatou talanoaina, ua faatusaina  ai i tatou i tagata ua maua i se faamaʻi oti. O le taulaga togiola ua saunia e Ieova e ala mai i lona Alo, ua mafai ai ona faamālōlōina i tatou i se uiga faafaatusa. (1 Pete. 2:24) O le togiola ua mafai ai ona toe faaleleia atoatoa la tatou faiā ma Ieova, lea na faaleagaina ina ua tatou mamaʻi faaleagaga. E pei lava ona olioli se tasi pe a faamālōlōina mai i se maʻi tugā, e faapena foʻi ona tatou matuā olioli pe a faamālōlōina faaleagaga i tatou, ma toe maua le finagalo malie o Ieova ona o lana faamagaloga.

LE UIGA O LE FAAMAGALOGA A IEOVA MO I TATOU

18. O le ā ua tatou aʻoaʻoina mai i talafaatusa o loo i le Tusi Paia e faatatau i le faamagaloga a Ieova? (Tagaʻi foʻi i le pusa “E Faapefea Ona Faamagalo e Ieova i Tatou?”)

¹⁸ O le ā ua tatou aʻoaʻoina mai i talafaatusa o loo i le Tusi Paia e faatatau i le faamagaloga a Ieova? Pe a faamagalo e Ieova a tatou agasala, e na te faamagaloina atoatoa ma e na te lē toe manatuaina. Ua mafai ai ona tatou maua se faiā lelei ma lo tatou Tamā i le lagi. Ia tatou manatua foʻi, o se meaalofa le faamagaloga a Ieova. E māfua ona o le alofa ma le agalelei faifua o Ieova ua ia faaalia i tagata agasala, ae e lē faapea o se mea e tatau ona tatou mauaina.—Roma 3:24.

19. (a) O le ā e tatau ona tatou lotofaafetai i ai? (Roma 4:8) (e) O le ā o le a tatou talanoaina i le mataupu o loo sosoo mai?

¹⁹ Faitau le Roma 4:8. Maʻeu lo tatou lotofaafetai iā Ieova o le Atua e na te matuā “faamagaloina lava” agasala! (Sala. 130:4) Peitaʻi, e iai se mea tāua e faalagolago i ai le faamagaloina o i tatou e Ieova. Na fetalai Iesu: “Afai tou te lē faamagaloina mea sesē e fai mai e tagata, e lē faamagaloina foʻi e lo outou Tamā a outou mea sesē.” (Mata. 6:​14, 15) E manino mai, e tāua ona tatou faaaʻoaʻo i le auala e faamagalo ai Ieova. Ae o le ā le auala e tatou te faia ai faapea? O le a talanoaina lenā manatu i le mataupu o loo sosoo mai.