1-2. O le ā le mea mataʻina na tupu i le aso o le Penetekoso 33 T.A.?

O LE taeao o le Aso Sa i Ierusalema. O le tausaga 33 T.A., ma o le aso o le Penetekoso. Ua faapotopoto faatasi ai le pe ā o le 120 soo i le potu pito i luga o se fale. (Galu. 1:13-15; 2:1) I nai aso na muamua atu, na faatonuina e Iesu i latou e nonofo pea i Ierusalema, talu ai o le a latou mauaina se meaalofa faapitoa. (Galu. 1:4, 5) O le ā na sosoo ai?

² “Ona faafuaseʻi mai lea ona taalili mai i le lagi [o se leo] e pei o le agi o se matagi malosi.” Ua faatumulia le fale i lenā leo. Ona vaaia lea i luga o ulu o soo “o ni laulaufaiva e pei o le afi,” ma ua ʻfaatutumuina i latou uma i le agaga paia.’ (Galu. 2:2-4) Na liligi ifo e Ieova lona agaga paia i lenā vaega i se auala mataʻina. (Galu. 1:8) O i latou nei na muamua faauuina e le agaga paia, * ma tuu i ai le faamoemoe o le pule faatasi ma Iesu i le lagi.

3. Aiseā e leʻi masalosalo ai i latou na iai i le Penetekoso, pe na faauuina i latou e le agaga paia?

³ Pe ana faapea o oe o se tasi o soo ia na faapotopoto i le potu pito i luga i lenā aso, e lē galo iā te oe le mea na tupu. O se laulaufaiva e pei o se afi na faapepepepe i luga o lou ulu,  ma ua amata ona e tautala i isi gagana! (Galu. 2:5-12) E mautinoa e te lē masalosalo pe na faauuina oe e le agaga paia. Ae pe na faauuina i se auala mataʻina i latou uma na faauuina i le agaga paia, ma pe na faauuina uma i se taimi se tasi? E leai. E faapefea ona tatou iloa?

4. Pe na faauuina Kerisiano faauuina uma o le uluaʻi senituri i le taimi e tasi? Ia faamatala.

⁴ Seʻi manatu i le taimi e faauuina ai se tasi. O le vaega lea e pe ā ma le 120, e lē na o le pau na o Kerisiano na faauuina e le agaga paia i le Penetekoso 33 T.A. Mulimuli ane i lenā aso, na faauuina foʻi isi tagata e pe ā ma le 3,000 ina ua latou maua le agaga paia. Na faauuina i latou ina ua papatisoina. (Galu. 2:37, 38, 41) Ae i tausaga na sosoo ai, e lē o Kerisiano faauuina uma na faauuina e le agaga paia i taimi na papatiso ai. Na faauuina Kerisiano Samaria e le agaga paia, i se taimi mulimuli ane ina ua mavae lo latou papatisoga. (Galu. 8:14-17) Ae na faauuina Konelio ma lona aiga a o leʻi papatisoina, o se tulaga e lē masani ai.​—Galu. 10:44-48.

5. E tusa ai o le 2 Korinito 1:21, 22, o le ā e tupu pe a faauuina se tagata e le agaga paia?

⁵ Seʻi manatu i le mea e tupu pe a faauuina se tasi i le agaga paia. O nisi ua faauuina, atonu i le uluaʻi taimi, e faigatā ona latou taliaina ua filifilia i latou e Ieova. E latou te ono taumānatu, ʻAiseā na filifili ai aʻu e le Atua?’ Ae o isi e lē faapena o latou faalogona. Po o le ā lava le tulaga, na faamatala e Paulo le mea e tupu iā i latou uma ua faauuina: “Ina ua outou talitonu, ona faamaufaailogaina * ai lea o outou e ala iā te ia i le agaga paia lea na folafolaina mai, o le faamaoniga lea na tuuina mai muamua o lo tatou tofi.” (Efe. 1:13, 14) O lea, e faaaogā e Ieova lona agaga paia e matuā faamautinoa atu i nei Kerisiano, ua ia filifilia i latou. O lenei auala, ua avea ai le agaga paia o se “faamaoniga” [o se faamaufaailoga po o se folafolaga] ua tuuina atu e faamautinoa ai i le ʻaufaauuina, o le a latou  ola e faavavau i le lagi ae e lē i le lalolagi.​—Faitau le 2 Korinito 1:21, 22.

6. O le ā e tatau ona fai e se Kerisiano faauuina ina ia maua ai lona taui faalelagi?

⁶ Pe a faauuina se Kerisiano, po o le a otometi ona ia mauaina lona taui faalelagi? E leai. Ua ia mautinoa ua filifilia o ia e alu i le lagi. Peitaʻi, e tatau ona ia manatua lenei lapataʻiga: “Le ʻauuso e, ia outou saga finafinau ai ina ia faamautinoa le valaauina ma le filifilia o outou; auā a faaauau ona outou faia o nei mea, e tou te lē paʻuʻū lava.” (2 Pete. 1:10) E tusa pe ua filifilia pe valaauina e alu i le lagi se Kerisiano faauuina, ae faatoʻā ia maua lona taui pe a tumau faamaoni.​—Fili. 3:12-14; Epe. 3:1; Faaa. 2:10.

7. E faapefea ona iloa e i latou ua faauuina ua valaauina i latou mo le lagi?

⁷ Ae e faapefea ona iloa e se tagata ua valaauina o ia mo le lagi? E manino le tali i upu a Paulo iā i latou “o ē ua valaauina e avea ma le ʻaupaia” i Roma. Na ia faapea atu iā i latou: “Tou te leʻi maua le agaga o pologa e toe fefefe ai, ae ua outou maua le agaga o ataliifai, o le agaga foʻi lea ua tatou alalaga atu ai: ʻAva, le Tamā e!’ Ua molimau le agaga lava lea faatasi ma o tatou agaga, o i tatou o fanau a le Atua.” (Roma 1:7; 8:15, 16) E ala mai i lona agaga paia, ua faamautinoa atu e le Atua i le ʻaufaauuina ua ia valaauina i latou mo le lagi.​—1 Tesa. 2:12.

8. Ua faapefea ona faaalia mai i le 1 Ioane 2:20, 27, e lē manaʻomia e Kerisiano faauuina ona faamautinoa mai i isi lo latou faauuina?

⁸ E lē tuua e Ieova se mea e tuufesili ai mafaufau ma loto o i latou ua ia valaaulia mo le lagi. (Faitau le 1 Ioane 2:20, 27.) Ioe, e manaʻomia ona aʻoaʻoina e Ieova Kerisiano faauuina i faapotopotoga, e pei lava ona ia aʻoaʻoina isi. Ae e lē manaʻomia e le ʻaufaauuina ona faamautinoa mai i se isi, o i latou ua faauuina. Ua faaaogā e Ieova le mana e sili ona malosi i le vateatea, o lona agaga paia, e faamautinoa manino atu ai ua faauuina i latou!

9. Pe a faauuina se tasi, o le ā le suiga e oo iā te ia e pei ona taʻua i le Efeso 1:18?

⁹ O le toʻatele o auauna a le Atua i aso nei, e ono faigatā mo i latou ona malamalama i le mea e tupu i se tagata pe a faauuina e le Atua. O se tulaga masani lenei mea auā e leʻi faauuina i latou. Na foafoaina e le Atua tagata e ola e faavavau i le lalolagi ae lē o le lagi. (Kene. 1:28; Sala. 37:29) Peitaʻi, ua filifilia e Ieova nisi e ola i le lagi. O lea, pe a ia faauuina i latou, e na te suia atoatoa lo latou faamoemoe ma le auala e mafaufau ai, ina ia latou tulimataʻia le ola i le lagi.​—Faitau le Efeso 1:18.

10. O le ā le uiga o le “toe fanau mai”? (Tagaʻi foʻi i le faaopoopoga i le pito i lalo.)

¹⁰ Pe a faauuina Kerisiano e le agaga paia, o lona uiga ua “toe fanau mai” pe ua “fanau mai i lugā.” * Na taʻua foʻi e Iesu, e lē mafai e se tasi ua “toe fanau mai” po ua “fanau mai i le agaga,” ona faamatalaina atu ona faalogona moni i se tasi e leʻi faauuina.​—Ioa. 3:3-8.

11. Faamatala suiga o le auala e mafaufau ai se tasi pe a faauuina.

¹¹ O le ā le auala ua suia ai mafaufau o Kerisiano ua faauuina? A o leʻi faauuina e Ieova nei Kerisiano, na tāua iā i latou le faamoemoe o le ola e faavavau i le lalolagi. Na latou tulimataʻia ma le naunau le taimi o le a  tafiesea ai e Ieova amioga leaga uma, ae fai le lalolagi ma parataiso. Atonu na latou mafaufau e faafeiloaʻi se tagata o le aiga po o se uō ua maliu. Ae ina ua faauuina, ua sui le auala e mafaufau ai. Aiseā? E lē faapea ua lē faamalieina i latou i le faamoemoe o le ola i le lalolagi. E leʻi suia o latou mafaufau ona o faalogona faanoanoa, po o le lotomafatia. E leʻi faapea ua faafuaseʻi ona iā i latou lagona lē fiafia, i le faamoemoe o le ola e faavavau i le lalolagi. Nai lo o lea, na faaaogā e Ieova lona agaga paia e suia ai le auala e latou te mafaufau ai, ma sui le faamoemoe e latou te faatāuaina.

12. E tusa ai ma le 1 Peteru 1:3, 4, o ā faalogona o Kerisiano faauuina i lo latou faamoemoe?

¹² Atonu e lagona e se tasi ua faauuina lona faatauvaa mo lenei faaeaga. Peitaʻi, e matuā leai ma se masalosalo o lenei tagata i le faauuina o ia e Ieova. Ua faatumulia lona loto i le olioli ma talisapaia lona faamoemoe e ola i le lagi.​—Faitau le 1 Peteru 1:3, 4.

13. O ā faalogona o le ʻaufaauuina i o latou olaga o loo iai i le lalolagi?

¹³ Po o lona uiga la o loo mananaʻo le ʻaufaauuina e feoti? O loo tali e le aposetolo o Paulo lenā fesili. Na ia faatusaina tino o le ʻaufaauuina i se faleʻie ma ia faapea mai: “O i tatou o loo i lenei faleʻie, ua feoi ma mafatia; auā tatou te lē fia toesea lenei ofu ae oofu i le isi, ina ia suia ai le tino e mafai ona oti i le ola.” (2 Kori. 5:4) E lē faapea ua lē fiafia nei Kerisiano i le olaga lenei, ma mananaʻo e vave feoti. Nai lo o lea, latou te fiafia i le olaga ma mananaʻo e faaaogā aso taʻitasi e auauna ai ma aiga ma uō iā Ieova. Peitaʻi, po o le ā lava o loo latou faia, e latou te manatua pea le faamoemoe mamalu ua iā i latou mo le lumanaʻi.​—1 Kori. 15:53; 2 Pete. 1:4; 1 Ioa. 3:2, 3; Faaa. 20:6.

14. O ā mea e lē avea o ni faamaoniga ua faauuina se tasi e le agaga paia?

¹⁴ Atonu e te tau mafaufau pe ua faauuina oe e le agaga paia. Afai o lea, seʻi mafaufau i fesili nei: Po o iā te oe se faanaunauga malosi e faia le finagalo o Ieova? Pe e te lagona e te matuā maelega i le galuega talaʻi? Po o oe o se tagata e naunau e suʻesuʻe le Afioga a le Atua, ma fiafia e aʻoaʻoina “mea loloto a le Atua”? (1 Kori. 2:10) Pe e te lagona le faamanuia a Ieova i lau galuega talaʻi, ma maua iʻuga lelei? Po o iā te oe se faanaunauga malosi e fesoasoani i isi i le itu faaleagaga? Po o e iloa faamaoniga o le fesoasoani a Ieova i ni vala patino o lou olaga? Afai o lau tali i nei fesili o le ioe, po o ua faamaonia ai ua e mauaina le valaaulia mo le lagi? E leai. Aiseā? Talu ai o lagona na e oo i auauna uma a le Atua, e tusa pe e faauuina pe e leai. E ala i lona agaga paia, e foaʻi atu e Ieova le mana lava lea e tasi i ana auauna uma, po o le ā lava lona faamoemoe. O le mea moni, pe afai e te tau mafaufau po ua faauuina oe e le agaga paia pe leai, o lenā masalosaloga ua faailoa mai ai e leʻi faauuina oe. O i latou ua valaauina e Ieova, e lē masalosalo pe ua faauuina pe leai! E latou te iloa lelei!

15. E faapefea ona tatou iloa e lē o tagata uma ua mauaina le agaga o le Atua ua filifilia mo le lagi?

¹⁵ I le Tusi Paia atoa, o loo iai le tele o faaaʻoaʻoga o tane faatuatua na mauaina le agaga paia; peitaʻi, e latou te leʻi mauaina le faamoemoe o le ola i le lagi. Na taʻitaʻia Tavita e le agaga paia. (1 Samu. 16:13) Na fesoasoani le agaga paia iā te ia e malamalama ai i mea loloto e uiga iā Ieova, ma uunaʻia o ia e tusia nisi o vaega o le Tusi Paia. (Mare. 12:36) E ui i lea, na faapea mai le aposetolo o Peteru, “e leʻi alu aʻe Tavita i le lagi.” (Galu. 2:34) Na  “faatumuina o ia [Ioane le Papatiso] i le agaga paia.” (Luka 1:13-16) Na fetalai Iesu e leai lava se tagata e sili atu nai lo o Ioane. Peitaʻi, na ia toe faapea mai e lē o aofia Ioane i le Malo i le lagi. (Mata. 11:10, 11) Na faaaogā e Ieova lona agaga paia, e foaʻi atu i nei tane le malosi e fai ai mea mataʻina, ae e na te leʻi faaaogāina e filifili ai i laʻua mo le lagi. Po o lona uiga la, e itiiti lo la faamaoni nai lo o ē ua filifilia e pule mai i le lagi? E leai. O lona uiga e toe faatutūina mai e Ieova i laʻua e ola i le Parataiso i le lalolagi.​—Ioa. 5:28, 29; Galu. 24:15.

16. O le ā le taui o loo tulimataʻia e le toʻatele o auauna a le Atua i aso nei?

¹⁶ E lē o maua e le toʻatele o auauna a le Atua i aso nei o loo i le lalolagi, le faamoemoe o le ola i le lagi. E pei o Aperaamo, Sara, Tavita, Ioane le Papatiso, ma le tele o isi tane ma fafine i taimi o le Tusi Paia, e latou te tulimataʻia le ola i le lalolagi pe a pule mai le Malo o le Atua iā i latou.​—Epe. 11:10.

17. O ā fesili o le a tatou taliina i le suʻesuʻega o loo sosoo mai?

¹⁷ Talu ai o loo iai pea nisi o le ʻaufaauuina faatasi ma tagata o le Atua i aso nei, e ono iai la fesili patino e lāgā ai. (Faaa. 12:17) O se faaaʻoaʻoga, o le ā le auala e vaai ai le ʻaufaauuina iā i latou lava? Pe a amata ona tagofia e se tagata o lau faapotopotoga le areto ma le uaina o le Faamanatuga, o le ā le auala e te feutagaʻi ai ma lenā tagata? Ae a pe afai e faatupulaʻia pea le fuainumera o i latou e faauuina? Pe e manaʻomia ona tatou popole i ai? O le a tatou taliina na fesili i le suʻesuʻega o loo sosoo mai.