O LOO i le falemataʻaga e taʻua o le Bible Lands i Ierusalema, se maa o loo tusia ai se faaupuga mai le vaitausaga o le 700-600 T.L.M. O lenei maa na aumai i se ana na faaaogā e tuu ai tagata oti, i se nofoaga e latalata i Heperona i Isaraelu. O tusitusiga o loo tusia i lenei maa e faapea: “Cursed be Hagaf son of Hagav by Yahweh Sabaot.” E faapefea ona lagolagoina e nei tusitusiga le Tusi Paia? O loo faaalia i nei tusitusiga le suafa o le Atua o Ieova, lea o loo tusia i mataʻitusi Eperu anamua o le YHWH. Ua faailoa mai ai sa lauiloa ma faaaogā e tagata i aso uma i le taimi o le Tusi Paia lenei suafa. O isi tusitusiga o loo tusia i totonu o ana na faaaogā e tuu ai tagata oti, ua faailoa mai ai e masani ona tusia le suafa o le Atua ma igoa o tagata e fesootaʻi i le suafa o le Atua e i latou na faaaogāina na ana e feiloaʻi ma lalafi ai.

Na faapea mai Dr. Rachel Nabulsi o le Iunivesite o Georgia e faatatau i nei tusitusiga: “E tāua tele le iloa, sa masani ona faaaogā le suafa YHWH. . . . O na faamatalaga ma tusitusiga ua faailoa mai ai le tāua o le suafa YHWH i olaga o tagata Isaraelu ma Iuta.” Ua lagolagoina e nei tusitusiga le Tusi Paia lea o loo tusia ai le suafa o le Atua i mataʻitusi Eperu YHWH i le faitau afe o taimi. O loo tusia ai foʻi i le Tusi Paia igoa o tagata e fesootaʻi i le suafa o le Atua.

O le faaupuga o loo tusia i le maa “Yahweh Sabaot,” e uiga atu iā “Ieova o ʻau.” E foliga mai la, e lē na o le suafa o le Atua na masani ona faaaogā i taimi o le Tusi Paia, ae na masani foʻi ona faaaogā le faaupuga “Ieova o ʻau.” O le faaupuga “Ieova o ʻau,” e 283 taimi o loo tusia ai i Tusitusiga Paia Eperu, aemaise lava i tusitusiga a Isaia, Ieremia ma Sakaria.