1. O le ā le fesili a le tupu o Tavita lea e ono fesili ai nisi?

E TATOU te mananaʻo uma e ola i se olaga toʻafilemu. E leai se tasi e fiafia pe a maua i faalogona popole. Ae e iai taimi e tatou te tauivi ai ma popolega. O lea, e ono fesili ai nisi o auauna a Ieova i le fesili na fesili ai le tupu o Tavita iā Ieova: “O le ā le umi ou te popole ai iā te aʻu, e faanoanoa ai loʻu loto i aso taʻitasi?”​—Sala. 13:2, NWT.

2. O le ā o le a tatou talanoaina i lenei suʻesuʻega?

² E ui e lē mafai ona tatou saʻoloto atoatoa mai i faalogona popole, ae e iai mea e mafai ona tatou faia e faaitiitia ai na faalogona popole. I lenei suʻesuʻega, o le a tatou talanoaina ai nisi o mea e māfua ai ona tatou popole. O le a tatou talanoaina foʻi auala aogā e ono e mafai ona faatoʻafilemu ai pea i tatou a o fesagaʻia faafitauli.

3. O ā faafitauli o loo tatou fesagaʻia ma pe e mafai ona tatou puleaina na faafitauli?

³ Atonu e itiiti pe leai foʻi se mea e mafai ona tatou faia i nisi o mea e māfua ai ona tatou popole. O se faaaʻoaʻoga, e lē mafai ona tatou puleaina le siitia o le tau o meaʻai, o lavalava ma fale i tausaga taʻitasi. E lē mafai foʻi ona tatou pulea pe e faafia ona faaosoosoina i tatou e tagata e tatou te faigaluega pe aʻoʻoga faatasi, ina ia lē faamaoni pe faia amioga lē mamā taufeusuaʻiga. E lē mafai foʻi ona tatou taofia le tutupu o soligatulafono i o tatou vaipanoa. Ua tatou fesagaʻia nei  faafitauli, ona o loo tatou ola i se lalolagi e toʻatele tagata e lē faavaeina o latou manatu i mataupu silisili o le Tusi Paia. E iloa e Satani le atua o lenei lalolagi, e iai tagata e faatagaina le “popole i mea a lenei lalolagi” e taofia ai i latou e auauna iā Ieova. (Mata. 13:22; 1 Ioa. 5:19) E lētioa a faatumulia le lalolagi i mea e faapopoleina ai i tatou.

4. O le ā e tupu pe a tatou soona popole i o tatou faafitauli?

⁴ Atonu e tatou te soona popole i o tatou faafitauli, ma alu uma ai le malosi ma le taimi e mafaufau i ai. O se faataʻitaʻiga, atonu e tatou te popole ina neʻi lē lava tupe e tausia ai o tatou manaʻoga, pe popole foʻi neʻi o tatou mamaʻi ma lē ō ai e faigaluega. E tatou te popole ina neʻi leai ni a tatou galuega. E tatou te popole foʻi ina neʻi tatou lē faamaoni pe a tofotofoina i tatou e solia tulafono a le Atua. E lē o toe umi ona faaosooso lea e Satani i latou o loo ia puleaina e osofaʻia tagata o le Atua, o lea, e tatou te ono popole ai po o le ā le auala e tatou te tali atu ai i na osofaʻiga. Atonu e tatou te taumānatu, ʻPe e sesē lo tatou popole i nei mea?’

5. O le ā le uiga o le fetalaiga a Iesu ia ʻaua tou te popole’?

⁵ Ua tatou iloa na fetalai Iesu i ona soo: ʻAua tou te popole.’ (Mata. 6:25) Po o lona uiga e faatalitalia i tatou e Iesu ia matuā lē popole lava i se mea? E leai. Na iai auauna faamaoni a Ieova i le taimi ua teʻa na tauivi ma popolega, ae na latou maua pea le finagalo malie o Ieova. * (1 Tu. 19:4; Sala. 6:3) O le mea moni, na faalaeiau mai Iesu iā i tatou. E leʻi manaʻo o ia e tatou te soona popole i mea e tausia ai o tatou ola, ma lē avea ai le auaunaga i le Atua ma mea e sili ona tāua i o tatou olaga. O ā la auala e mafai ona tatou pulea ai o tatou faalogona popole? Tagaʻi i le pusa “ Auala e Faia Ai.”

6. E tusa ai ma le Filipi 4:6, 7, o le ā e faatoʻafilemu ai o tatou faalogona popole?

⁶ (1) Ia tatalo e lē aunoa. E maua e Kerisiano ua lofitūina i faafitauli le mapusaga pe a tatalo faatauanau iā Ieova. (1 Pete. 5:7) E tali Ieova i au tatalo e ala i le foaʻi atu iā te oe o le filemu mai iā te ia, lea e silisili i mea uma lava e manatu i ai tagata. (Faitau le Filipi 4:6, 7.) E foaʻi atu e Ieova le filemu o le mafaufau iā te oe e ala i lona agaga paia.​—Kala. 5:22.

7. O le ā e tatau ona tatou manatua pe a tatou tatalo i le Atua?

⁷ Pe a tatou tatalo iā Ieova, ia sasaa atu o tatou loto iā te ia. Ia patino au tatalo. Ia taʻu atu iā te ia le faafitauli ma faamatala i ai ou faalogona. Pe afai e iai se vaifofō o le faafitauli, ia tatalo iā Ieova mo le atamai e mafai ai ona maua lenā vaifofō ma le malosi e faia ai. Ae afai e leai se mea e mafai ona e faia e foʻia ai le faafitauli, ia tatalo mo le fesoasoani a Ieova ina ia aua neʻi lofitūina oe i popolega. Pe a patino au tatalo, o le a iai le taimi e te iloa lelei ai auala na tali mai ai Ieova i au tatalo. Afai e lē vave tali mai Ieova i au tatalo, aua le lotovaivai. E finagalo Ieova ia patino au tatalo ma ia e finafinau e tatalo.​—Luka 11:8-10.

8. O le ā e tatau ona faaaofia i a tatou tatalo?

⁸ A o sasaa atu ou popolega iā Ieova i le tatalo, faamautinoa e faaaofia ai ma tatalo o le faafetai. E tāua mo i tatou le uaʻi atu i o tatou faamanuiaga e tusa lava pe tele faafitauli o loo tatou fesagaʻia. Pe a iai se taimi e te  lē maua ai upu saʻo e faamatala atu ai ou faalogona ootia, ia manatua e tali foʻi e Ieova tatalo faigofie e pei o lenei, ʻIa fesoasoani mai faamolemole!’​—2 No. 18:31; Roma 8:26.

9. E faapefea ona maua le puipuiga moni?

⁹ (2) Ia faalagolago i le atamai o Ieova ae lē o lou lava atamai. I le senituri lona valu T.L.M., na faamataʻuina ai e Asuria tagata o Iuta. Ona e leʻi mananaʻo Iuta e pulea i latou e Asuria, na latou saʻili ai le fesoasoani a Aikupito, o se atunuu faapaupau. (Isa. 30:1, 2) Na lapataʻia i latou e Ieova o lo latou faatuatuaina o Aikupito e iʻu atu ai i se tulaga leaga. (Isa. 30:7, 12, 13) Na fetalai Ieova i ona tagata e ala atu iā Isaia i le auala e latou te maua ai le puipuiga moni: “O le a malolosi outou pe a outou nonofo fifilemu pea ma le faatuatua” iā Ieova.—Isa. 30:15e.

10. O ā ni faataʻitaʻiga o ni mea e ono tutupu e faaalia atu ai lo tatou faatuatuaina o Ieova?

¹⁰ E faapefea ona tatou faaalia e tatou te faatuatuaina Ieova? Ia mātau nisi o faataʻitaʻiga nei. Seʻi faapea ua ofo atu iā te oe se galuega e lelei le totogi, e manaʻomia ai le tele o lou taimi ma o le a aafia ai au faasologa faaleagaga. Pe faapea foʻi e iai se tama po o se teine i le fale faigaluega e manaʻo e te lua feoaʻi, ae e lē o se auauna papatiso a Ieova lenā tagata. Ae faapefea pe a faapea mai se tasi o le aiga e pele iā te oe: “Filifili la oe pe e te alofa i lou Atua pe e te alofa iā te aʻu.” E faigatā nei tulaga, ma e faigatā lau filifiliga o le a fai, ae o le a foaʻi atu e Ieova iā te oe taʻiala e te manaʻomia. (Mata. 6:33; 10:37; 1 Kori. 7:39) O le fesili la, po o le a e faatuatuaina Ieova ma e usitaʻi i ana taʻiala?

11. O ā tala i le Tusi Paia e mafai ona tatou suʻesuʻeina, ina ia tatou maua ai pea le toʻafilemu pe a feagai ma teteega?

¹¹ (3) Ia aʻoaʻo mai i faaaʻoaʻoga lelei ma faaaʻoaʻoga leaga. E tele tala i le Tusi Paia o loo faamatilatila mai ai le tāua o lo tatou toʻafilemu pea ma le faatuatuaina o Ieova. A o e suʻesuʻeina na tala, ia mātau po o le ā na fesoasoani i auauna a Ieova e toʻafilemu ai pea a o fesagaʻia sauāga ogaoga. O se faaaʻoaʻoga, ina ua poloaʻia e le faamasinoga maualuga a Iutaia le ʻauaposetolo ina ia aua neʻi toe talaʻi, e latou te leʻi fefefe ai. Ae na latou lototetele ma faapea atu: “E tatau ona matou usiusitaʻi i le Atua o le pule, nai lo o tagata.” (Galu. 5:29) E ui ina sasaina le ʻauaposetolo ae e latou te leʻi popolevale ai. Aiseā? Auā na latou iloa, o loo ʻau Ieova ma i latou. Na finagalo malie o ia iā i latou. O lea, na faaauau ai pea ona latou talaʻia le tala lelei. (Galu. 5:40-42) Na toʻafilemu foʻi le soo o Setefano, ina ua lata ina fasiotia o ia ma na pei ona fofoga “o fofoga o se agelu.” (Galu. 6:12-15) Aiseā? Auā na ia mautinoa ua ia mauaina le finagalo malie o Ieova.

12. E tusa ai ma le 1 Peteru 3:14 ma le 4:14, aiseā e tatou te fiafia ai pe a sauāina i tatou?

¹² Na iloa lelei e le ʻauaposetolo na faatasi Ieova ma i latou. Na ia tuuina atu iā i latou le mana e fai ai vavega. (Galu. 5:12-16; 6:8) E lē o aumaia e Ieova iā i tatou i aso nei se mana e tatou te faia ai ni vavega. Ae e alofa Ieova, ma ua ia faamautinoa mai i lana Afioga pe a tatou mafatia ona o le amiotonu, e tatou te fiafia ona ua tatou maua lona finagalo malie, ma e faatasi mai foʻi lona agaga iā i tatou. (Faitau le 1 Peteru 3:14; 4:14.) O lea, e lē manaʻomia ona tatou soona popole i auala e tatou te tali atu ai i sauāga ogaoga i le lumanaʻi. Ae e tatau ona tatou taulaʻi atu i le taimi lenei i mea e mafai ona tatou faia, e atiaʻe ai lo tatou mautinoa e mafai e Ieova ona lagolagoina ma faasaoina i tatou. E tatau foʻi ona tatou faatuatuaina folafolaga a Iesu e pei ona  faia e uluaʻi soo: “Ou te tuuina atu upu ma le atamai i o outou gutu, e lē mafai ai e ē e faasagatau ona tetee pe e finau mai.” Ua folafola mai e Iesu: “O lo outou tumau, e maua ai lo outou ola.” (Luka 21:12-19) Aua neʻi galo, e manatua e Ieova mea uma e faatatau i ana auauna ua maliliu a o faamaoni pea iā te ia. O lea, o mea uma e faatatau iā i latou, o le a toe faatutūina mai ai i latou e Ieova.

13. O ā lesona e tatou te maua mai i le iloiloina o mea na tutupu iā i latou e leʻi tumau ona toʻafilemu ma faatuatuaina Ieova?

¹³ E mafai foʻi ona tatou aʻoaʻoina ni lesona mai i mea na tutupu iā i latou e leʻi tumau ona toʻafilemu ma faatuatuaina Ieova. O lo tatou iloiloina o a latou faaaʻoaʻoga leaga, e fesoasoani e tatou te ʻalofia ai le faia o mea sesē na latou faia. O se faaaʻoaʻoga, i le taimi o le nofoaiga a Asa le tupu o Iuta, na faalagolago o ia iā Ieova ina ua faamataʻu ane le ʻautau e matuā toʻatele a Aitiope, ma na faamanuia Ieova iā te ia e ala i le foaʻi atu i ai o le manumalo. (2 No. 14:9-12) Mulimuli ane, ina ua osofaʻia Asa e se ʻautau toʻaitiiti a Paasa le tupu o Isaraelu, na ia totogiina le ʻautau a Suria e fesoasoani iā te ia. O lea, e leʻi faalagolago Asa iā Ieova mo le faaolataga e pei o le taimi muamua. (2 No. 16:1-3) Ina ua lata ina maliu Asa ona o lona maʻi tigāina, e leʻi saʻili atu o ia iā Ieova mo le fesoasoani.​—2 No. 16:12.

14. O le ā e tatou te aʻoaʻoina mai i mea sesē a Asa?

¹⁴ I le amataga, na saʻili Asa iā Ieova mo le fesoasoani i ona faafitauli. Ae mulimuli ane, e leʻi faaauau ona saʻili Asa iā Ieova mo le fesoasoani ma na manaʻo e taulima mea i lana lava auala. I le vaaiga a tagata, o le saʻilia e Asa o le fesoasoani mai i ʻautau a Suria, e foliga mai o se filifiliga e fetaui lelei ma aogā, ae e leʻi umi se taimi na taulau ai Asa. Na fetalai atu Ieova iā te ia e ala i se perofeta: “Talu ai ua e faalagolago i le tupu o Suria ae e lē faalagolago iā Ieova lou Atua, o le mea lea, ua sosola ese ai mai i lou lima le ʻautau a le tupu o Suria.” (2 No. 16:7) O lea, e tatau ona tatou matuā faaeteete i le soona mautinoa naʻuā ma faia mea i ā tatou lava auala, ma lē faaauau ai ona tatou saʻili i taʻiala a Ieova o loo i lana Afioga. E tusa lava pe tatou te feagai ma se tulaga e manaʻomia ai ona vave fai se faaiʻuga, ae e tatau ona tatou toʻafilemu pea ma faalagolago iā Ieova, ma o le a ia fesoasoani iā i tatou e faia se faaiʻuga saʻo.

15. O le ā e tatou te taumafai e fai pe a faitau i le Tusi Paia?

¹⁵ (4) Ia tauloto mau o le Tusi Paia. Pe a tatou faitau i mau o le Tusi Paia e faailoa mai ai e tatou te maua le malosi pe a toʻafilemu pea ma maufaatuatuaina Ieova, taumafai e tauloto manatu tāua mai i na mau. Ina ia mafai ona taulotoina na mau, ia faitau leotele pe tusi i lalo ma faitau i ai e lē aunoa. Na faatonuina Iosua ia faitau e lē leoa le tusi o le tulafono i aso uma, ina ia gaoioi ai ma le poto. O mea na ia faitau i ai i le tusi o le tulafono, na fesoasoani iā te ia ina ia lē fefe ai ae ia lototele e taʻitaʻia tagata o le Atua. (Iosua 1:8, 9) E tele mau i le Afioga a le Atua e mafai ona tatou maua ai le filemu o le mafaufau ma le loto, pe a tatou fesagaʻia tulaga e tatou te lagona ai le popole po o le fefe.​—Sala. 27:1-3; Faata. 3:25, 26.

16. E faapefea ona faaaogā e Ieova le faapotopotoga e faatoʻafilemuina i tatou ma faatuatuaina Ieova?

¹⁶ (5) Ia faifaimea faatasi ma tagata o le Atua. E faaaogā e Ieova o tatou uso ma tuafāfine e fesoasoani e faatoʻafilemuina i tatou ma faatuatuaina Ieova. I a tatou sauniga e tatou te maua aogā mai i lauga, o tali mai i le aofia ma talanoaga faalaeiau ma o tatou uso  ma tuafāfine. (Epe. 10:24, 25) E matuā faalaeiauina foʻi i tatou pe a faasoa atu mea e tatou te popole ai i uō maufaatuatuaina i le faapotopotoga. O se “tala lelei” mai i se uō e mafai ona fesoasoani e tuuitiitia ai o tatou faalogona popole.​—Faata. 12:25.

17. E tusa ai ma le Eperu 6:19, e faapefea ona faamausalīina i tatou i lo tatou faamoemoe i le Malo o le Atua e ui ina tatou fesagaʻia tulaga faigatā ma faalogona popole?

¹⁷ (6) Ia faamalosia pea lou faamoemoe. O lo tatou faamoemoe mo le Malo o le Atua, ua pei “o se taula i o tatou ola” e faamausalīina ai i tatou e ui ina tatou fesagaʻia tulaga faigatā ma faalogona popole. (Faitau le Eperu 6:19.) Ia manatunatu i folafolaga a Ieova o le a lē toe iai ni faalogona popole i le lumanaʻi. (Isa. 65:17) Ia faaata lou ola ai i se lalolagi fou filemu, o le a lē toe iai ni mea leaga e tutupu ai. (Mika 4:4) E faamalosia foʻi lou faamoemoe mo le lumanaʻi pe a e taʻu atu i isi lenā faamoemoe. Ia fai mea uma e te mafaia i le galuega talaʻi ma le faia o isi ma soo. O lou faia faapea o le a e “mautinoa atoatoa ai i le faamoemoe e oo i le iʻuga.”​—Epe. 6:11.

18. O ā faafitauli e ono tutupu i le lumanaʻi, ma e faapefea ona tatou faafesagaʻia na faafitauli?

¹⁸ A o latalata mai le iʻuga o le faiga o mea leaga a lenei lalolagi, o le a tatou fesagaʻia ai le tele o isi faafitauli e faapopoleina ai i tatou. O le a fesoasoani iā i tatou le mau o le tausaga mo le 2021, e fesagaʻia ai na faafitauli ma toʻafilemu ai pea ona o lo tatou faatuatuaina o Ieova, ae e lē o so tatou lava malosi. A o faagasolo lenei tausaga, seʻi o tatou faaalia atu iā tatou gaoioiga e tatou te faatuatua i le folafolaga a Ieova: “O le a malolosi outou pe a outou nonofo fifilemu pea ma le faatuatua.”​—Isa. 30:15.