1-2. (a) O le ā le aso e masani ai lava ona manatua sē e pele ua maliu? (e) O le ā na faavaeina e Iesu i le pō a o leʻi maliu o ia?

 E TUSA lava po o le ā le umi talu ona maliliu ē e pele iā i tatou, ae e tatou te manatua lava i latou. O aso na maliliu ai e masani ai lava ona tatou manatua ai i latou.

² I tausaga taʻitasi, e tatou te aofia i le faitau miliona o i latou e faapotopoto i le lalolagi aoao, e faamanatuina le maliu o se tasi e matuā pele iā i tatou, o Iesu Keriso. (1 Pete. 1:8) E tatou te manatua i lenā aso lē na foaʻi mai lona ola, e fai ma togiola e faasaoina ai i tatou mai le agasala ma le oti. (Mata. 20:28) O le mea moni e finagalo Iesu ina ia manatua e ona soo lona maliu. I le pō a o leʻi maliu Iesu, na ia faavaeina ai se talisuaga afiafi faapitoa ma na ia faatonuina: “Ia faia pea lenei mea e fai ma faamanatuga iā te aʻu.”​—Luka 22:19.

3. O le ā o le a tatou talanoaina i lenei suʻesuʻega?

³ E toʻaitiiti i latou e auai i le faamanatuina o le maliu o Keriso, e faamoemoe e ola i le lagi. Ae e toʻatele i latou e auai ai, e faamoemoe e ola i le lalolagi. I lenei suʻesuʻega o le a tatou talanoaina ai māfuaaga e naunau ai nei vaega e lua, e auai i le Faamanatuga i tausaga taʻitasi. O le a talanoaina foʻi aogā e tatou te maua mai i le auai i le Faamanatuga. Muamua  seʻi o tatou talanoaina nisi o māfuaaga e auai ai le ʻaufaauuina.

4. Aiseā e tagofia ai e le ʻaufaauuina le areto ma le uaina i le Faamanatuga?

⁴ I tausaga taʻitasi e tulimataʻia e le ʻaufaauuina le auai i le Faamanatuga, e tagofia ai le areto ma le uaina. Aiseā e latou te talisapaia ai le tagofia o le areto ma le uaina? Ina ia tali lenā fesili, mātau le mea na tupu i le pō mulimuli o Iesu i le lalolagi. Ina ua uma ona latou faamanatuina le Paseka, na faavaeina ai e Iesu le Talisuaga Afiafi a le Alii. Na avatu e Iesu le areto ma le uaina i ona aposetolo faamaoni e toʻasefulu tasi, ma faatonu i latou e aai ma feinu ai. Na taʻu atu e Iesu iā i latou ni feagaiga se lua po o ni maliega, o le feagaiga fou ma le feagaiga o le Malo.  * (Luka 22:19, 20, 28-30) O nei feagaiga ua mafai ai e le ʻauaposetolo ma se vaega toʻaitiiti ona avea ma tupu ma ositaulaga i le lagi. (Faaa. 5:10; 14:1) E na o le vaega totoe o le ʻaufaauuina * o loo aofia ai i nei feagaiga, e latou te tagofia le areto ma le uaina i le Faamanatuga.

5. O le ā ua iloa e le ʻaufaauuina e faatatau i lo latou faamoemoe?

⁵ O le isi māfuaaga e naunau ai le ʻaufaauuina e auai i le Faamanatuga, ona e latou te maua ai le avanoa e mafaufau loloto ai i lo latou faamoemoe. Ua tuuina atu e Ieova iā i latou se faamoemoe matagofie, o le ola i le lagi i se tino e lē pala ma e lē mafai ona oti. E latou te auauna faatasi ma Iesu Keriso ma isi ʻaufaauuina o le 144,000. Ae sili ai, ona o le a latou vaaitino iā Ieova le Atua! (1 Kori. 15:51-53; 1 Ioa. 3:2) Ua iloa e le ʻaufaauuina ua valaaulia i latou e olioli i na faaeaga i le lagi. Ae ina ia latou ulu atu i le lagi, e tatau ona latou tumau ma le faamaoni seʻia oo i le oti. (2 Timo. 4:7, 8) E matuā olioli le ʻaufaauuina, pe a mafaufau loloto i lo latou faamoemoe i le lagi. (Tito 2:13) Ae faapefea “isi mamoe”? (Ioa. 10:16) O ā ni māfuaaga e latou te auai ai i le Faamanatuga?

6. Aiseā e auai ai isi mamoe i le Faamanatuga i tausaga taʻitasi?

⁶ E auai isi mamoe i le Faamanatuga o ni molimau ae lē o ni ē e tagofia le areto ma le uaina. I le 1938 na valaaulia ai mo le taimi muamua i latou e faamoemoe e ola i le lalolagi, e auai i le Faamanatuga. O loo taʻua i Le Olomatamata o Mati 1, 1938 e faapea: “E matuā tatau ma onomea i isi mamoe ona auai i lenā sauniga, ma latou molimauina ai mea o loo faia ai. O se taimi fiafia ma e tatau foʻi ona latou maua ai le fiafia.” E pei ona fiafia se ʻau valaaulia e molimauina se sauniga o le faaipoipoga, e faapena foʻi ona fiafia o isi mamoe e auai o ni molimau i le Faamanatuga.

7. Aiseā e tulimataʻia ai e isi mamoe le lauga o le Faamanatuga?

⁷ E fiafia foʻi isi mamoe e manatunatu loloto i lo latou faamoemoe. E tulimataʻia e isi mamoe le lauga o le Faamanatuga ma o le tele o lenā lauga, e taulaʻi atu i mea o le a faia e Keriso ma le 144,000 mo tagata faamaoni i le Afe Tausaga. O le a fesoasoani  le 144,000 i lo latou Tupu o Iesu Keriso e toe faafoʻisia le lalolagi i se parataiso, ma fesoasoani i tagata usiusitaʻi ina ia lelei atoatoa. Maʻeu le faafiafiaina o le faitau miliona o i latou e molimauina le Faamanatuga, pe a faaāta i o latou mafaufau le faataunuuina o valoaga a le Tusi Paia, e pei ona maua i le Isaia 35:5, 6; 65:21-23; ma le Faaaliga 21:3, 4. Pe a faaāta e isi mamoe lo latou olioli i le lalolagi fou ma ē pele iā i latou, o le a faamalosia lo latou faamoemoe mo le lumanaʻi ma maumauaʻi ai e auauna pea iā Ieova.​—Mata. 24:13; Kala. 6:9.

8. O le ā le isi māfuaaga e auai ai isi mamoe i le Faamanatuga?

⁸ Seʻi mātau se isi māfuaaga e auai ai isi mamoe i le Faamanatuga. E latou te mananaʻo e faaalia lo latou alofa ma le lagolagosua i le ʻaufaauuina. Na valoia e le Afioga a le Atua le iai o se faiā vavalalata a le ʻaufaauuina, ma i latou e faamoemoe e ola i le lalolagi. Seʻi o tatou talanoaina ni faataʻitaʻiga.

9. O le ā ua faailoa mai i le valoaga i le Sakaria 8:23 e faatatau i faalogona o isi mamoe i le ʻaufaauuina?

⁹ Faitau le Sakaria 8:23. O loo faamatalaina i lenei valoaga se ata matagofie o faalogona o isi mamoe, e faatatau i o latou uso ma tuafāfine faauuina. O faaupuga “tagata Iutaia” ma “outou,” e faasino atu i le vaega totoe o le ʻaufaauuina. (Roma 2:28, 29) O “tagata e toʻasefulu mai i gagana uma a atunuu eseese,” e faasino atu i isi mamoe. O lo latou ʻfetagofi atu i le pito ofu,’ ua faailoa mai ai lo latou pipii faamaoni atu i le ʻaufaauuina ma tapuaʻi faatasi ai i le tapuaʻiga mamā. E faaalia e isi mamoe lo latou vavalalata atu i le ʻaufaauuina, e ala i le auai faatasi ma i latou i le pō o le Faamanatuga.

10. O le ā ua faia e Ieova e faataunuuina ai le valoaga i le Esekielu 37:15-19, 24, 25?

¹⁰ Faitau le Esekielu 37:15-19, 24, 25. Ua faataunuuina e Ieova lenei valoaga, e ala i lona aʻoaʻoina o le ʻaufaauuina ma isi mamoe e galulue faatasi ma le autasi. O loo taʻua e le valoaga ni laau se lua. O i latou e faamoemoe e ola i le lagi, ua faatusaina i le laau “mo Iuta,” (o le ituaiga lea na filifilia mai ai tupu o Isaraelu) ae ua faatusaina i latou e faamoemoe e ola i le lalolagi i le laau a “Efaraima.” * E faatasia e Ieova nei vaega e lua ina ia avea ma “laau e tasi.” O lona uiga, e latou te auauna ma le autasi i lalo o le pulega a lo latou Tupu e toʻatasi o Iesu Keriso. I tausaga taʻitasi, e auai faatasi le ʻaufaauuina ma isi mamoe i le Faamanatuga o se “lafu e tasi,” i le taʻitaʻiga a le “leoleo mamoe e toʻatasi.”​—Ioa. 10:16.

11. O le ā le auala autū e faaalia ai e “mamoe” o loo taʻua i le Mataio 25:31-36, 40, lo latou lagolagosua i uso o Keriso?

¹¹ Faitau le Mataio 25:31-36, 40. O “mamoe” i lenā talafaatusa, ua faaāta mai ai tagata amiotonu i le taimi o le iʻuga o ē e faamoemoe e ola i le lalolagi, o lona uiga o isi mamoe. E latou te lagolagoina ma le faamaoni le vaega totoe o uso faauuina o Keriso, i le faataunuuina o se matafaioi e sili ona telē, o le galuega talaʻi ma le faia o isi ma soo i le lalolagi aoao.​—Mata. 24:14; 28:19, 20.

12-13. O ā nisi auala e faaalia ai e isi mamoe lo latou lagolagosua i uso o Keriso?

¹² I tausaga taʻitasi a o lumanaʻi le Faamanatuga, e lagolagoina e isi mamoe uso o Keriso e ala i le auai atoatoa i le tauiviga e valaaulia ai tagata fiafia mo le Faamanatuga.  (Tagaʻi i le pusa “ Po ua E Sauniuni mo le Faamanatuga?”) E fesoasoani foʻi isi mamoe i faapotopotoga i le lalolagi aoao, e faia faatulagaga uma e manaʻomia mo le Faamanatuga, e ui o le tele o faapotopotoga e leai ni ē e tagofia le areto ma le uaina. E matuā fiafia isi mamoe e lagolagosua i uso o Keriso i auala faapena. E iloa e nei mamoe e silasila Iesu i lo latou lagolagosua mo ona uso faauuina, e pei lava o loo latou faia iā te ia.​—Mata. 25:37-40.

¹³ O ā nisi māfuaaga e tatou te auai uma ai i le Faamanatuga, po o le ā lava lo tatou faamoemoe?

14. E faapefea ona faaalia e Ieova ma Iesu le alofa sili mo i tatou?

¹⁴ E tatou te lotofaafetai i le alofa ua faaalia e Ieova ma Iesu mo i tatou. E tele auala ua faaalia ai e Ieova lona alofa mo i tatou, ae e iai le auala e tasi e sili atu. O le auala sili ua faailoa mai ai e lo tatou Atua lona alofa lē manatu faapito, o le auina mai lea o lona Alo pele ina ia faapuapuagatia ma maliu mo i tatou. (Ioa. 3:16) Ua tatou iloa ua faaalia foʻi e Iesu le alofa sili, e ala i lona finagalo malie e maliu mo i tatou. (Ioa. 15:13) E lē mafai ona tatou taui atu iā Ieova ma Iesu le alofa ua la faaalia mo i tatou. Peitaʻi e mafai ona tatou faaalia le lotofaafetai, e ala i le auala e tatou te ola ai i aso taʻitasi. (Kolo. 3:15) E tatou te auai i le Faamanatuga e lē gata ina ia manatua ai lo la alofa mo i tatou, ae e faaali atu ai foʻi lo tatou alofa mo i laʻua.

15. Aiseā e matuā tāua ai i le ʻaufaauuina ma isi mamoe le meaalofa o le togiola?

¹⁵ E matuā tāua iā i tatou le meaalofa o le togiola. (Mata. 20:28) E tāua i le ʻaufaauuina le togiola ona ua mafai ona latou maua ai se faamoemoe matagofie. Talu ai ona o lo latou faatuatua i le taulaga a Keriso, ua taʻuamiotonuina ai i latou e Ieova ma vaetamaina o lana fanau. (Roma 5:1; 8:15-17, 23) E lotofaafetai foʻi isi mamoe mo le togiola. Talu ai ona e latou te faatuatua i le toto maligi o Keriso, ua latou maua ai se tulaga mamā i luma o le Atua, avatu le auaunaga paia iā te ia ma mafai ai ona “sao mai i le puapuaga tele.” (Faaa. 7:13-15) O se tasi o auala e faaalia ai e le ʻaufaauuina ma isi mamoe le lotofaafetai mo le togiola, o le auai lea i le Faamanatuga i tausaga taʻitasi.

16. O le ā le isi māfuaaga e tatou te auai ai i le Faamanatuga?

¹⁶ O le isi māfuaaga e tatou te auai ai i le Faamanatuga, ona e tatou te mananaʻo e usiusitaʻi iā Iesu. Po o le ā lava lo tatou faamoemoe mo le lumanaʻi, e tatou te matuā faatāuaina le faatonuga a Iesu i le pō na ia faavaeina ai le Faamanatuga: “Ia faia pea lenei mea e fai ma faamanatuga iā te aʻu.”​—1 Kori. 11:23, 24.

17. E faapefea ona fesoasoani le Faamanatuga iā i tatou e mafuta vavalalata atu ai iā Ieova?

¹⁷ E tatou te mafuta vavalalata ai iā Ieova. (Iako. 4:8) Ua tatou aʻoaʻoina, o le Faamanatuga ua tatou maua ai le avanoa e manatunatu ai i le faamoemoe ua tuuina mai e Ieova iā i tatou, ma mafaufau loloto ai i le alofa ua ia faaalia mo i tatou. (Iere. 29:11; 1 Ioa. 4:8-10) Pe a tatou mafaufau loloto i lo tatou faamoemoe mautinoa mo le lumanaʻi ma le alofa e lē uma o le Atua mo i tatou, e faalolotoina ai la tatou alofa mo Ieova ma faamalosia ai la tatou faiā ma ia.​—Roma 8:38, 39.

18. O le ā e uunaʻia i tatou e fai pe a mafaufau loloto i le faaaʻoaʻoga a Iesu?

 ¹⁸ E uunaʻia ai i tatou e faaaʻoaʻo i le faaaʻoaʻoga a Iesu. (1 Pete. 2:21) A o leʻi oo i le aso o le Faamanatuga, e tatou te uaʻi atu ai i le faitauina o tala i le Tusi Paia e faatatau i le vaiaso mulimuli o Iesu i le lalolagi, lona maliu ma lona toetū. I le pō o le Faamanatuga e faamanatu mai ai i le lauga le alofa o Iesu mo i tatou. (Efe. 5:2; 1 Ioa. 3:16) A o tatou faitau ma manatunatu loloto i faaaʻoaʻoga o faataulaga na faia e Iesu, e uunaʻia ai i tatou ina ia “faaauau pea ona savali e faapei ona savali o Iesu.”​—1 Ioa. 2:6.

19. E faapefea ona tatou tumau i le alofa o le Atua?

¹⁹ E tatou te maumauaʻi ai ina ia tumau i le alofa o le Atua. (Iuta 20, 21) E tatou te tumau i le alofa o le Atua, e ala i le faia o mea uma e usiusitaʻi ai iā te ia, faapaia lona suafa ma faafiafia lona finagalo. (Faata. 27:11; Mata. 6:9; 1 Ioa. 5:3) O le faamanatuina o le maliu o Iesu, e uunaʻia ai i tatou e maumauaʻi e ola i aso taʻitasi i se auala e mafai ai ona tatou faapea atu iā Ieova, ʻOu te manaʻo ina ia ou tumau i lou alofa e faavavau!’

20. O ā māfuaaga tāua e tatou te auai ai i le Faamanatuga?

²⁰ Pe e tatou te faamoemoe e ola i le lagi po o le lalolagi, ae ua iā i tatou māfuaaga tāua e tatou te auai ai i le Faamanatuga. Pe a tatou faapotopoto i lenā aso, e tatou te manatua ai le maliu o se tasi e pele iā i tatou, o Iesu Keriso. Ae sili ai, ona e tatou te manatua ai le alofa silisili o Ieova, e ala i le foaʻi mai o lona Alo e fai ma togiola. O le a faia le Faamanatuga o lenei tausaga i le afiafi o le Aso Faraile, Aperila 15, 2022. E tatou te alolofa iā Ieova ma lona Alo. O lea i le aso e faamanatu ai le maliu o Iesu, e leai se mea e sili atu ona tāua iā i tatou nai lo le auai i le Faamanatuga.