1. O le ā o loo uaʻi atu ai le toʻatele i aso nei?

 PO O e mātauina i aso nei, o le toʻatele o tagata e manatu mo lo latou lava lelei nai lo o le lelei o isi? O se faaaʻoaʻoga, ua faaaogā e nisi tagata fesootaʻiga i le Initaneti po o le social media, ina ia faauaʻi mai ai isi iā i latou ma mea ua latou ausiaina. Peitaʻi, e toʻaitiiti lava i latou o loo avatu le mamalu iā Ieova le Atua. I lenei suʻesuʻega, o le a tatou iloiloina ai le uiga o le avatu iā Ieova o le mamalu, ma le uunaʻiga e ao ai ona tatou faia faapea. O le a talanoaina foʻi le auala e tatou te avatu ai i le Atua le mamalu ua matuā alagatatau iā te ia, faapea le auala o le a ia faamamaluina ai lona suafa i le lumanaʻi lata mai.

O LE Ā LE UIGA O LE AVATU IĀ IEOVA O LE MAMALU?

2. Na faapefea ona faaalia mai e Ieova lona mamalu i le mauga o Sinai? (Tagaʻi foʻi i le ata.)

² O le ā le uiga o le upu mamalu? I le Tusi Paia, e mafai ona faasino atu le upu “mamalu” i so o se mea e mataʻina ai se tasi. Ina ua faatoʻā uma ona laveaʻiina mai le nuu o Isaraelu mai i le nofo pologa i Aikupito, na faaalia ai e Ieova i se auala mataʻina lona mamalu. Seʻi faaata le vaaiga lenei: O loo faapotopoto le faitau miliona o tagata Isaraelu i le auvae mauga o Sinai ina ia faalogologo atu i lo latou Atua. Ua ufitia le mauga i se ao uliuli. Ae ua faafuaseʻi ona lūlū se mafuiʻe tele, ma ua pāpā faititili, emo uila, ma ua lagona foʻi le leo o pū ua matuā leotetele. (Eso. 19:​16-18; 24:17; Sala. 68:8) Seʻi mafaufau  i le matuā ofo o le nuu o Isaraelu, ina ua faaali mai i ai e Ieova lona mamalu i lenei auala mataʻina.

3. O le ā le uiga o le avatu iā Ieova o le mamalu?

³ Ae pe e mafai e tagata ona avatu le mamalu iā Ieova? Ioe, e mafai. O se tasi o auala e tatou te avatu ai le mamalu iā Ieova, o le faamatala atu lea i isi o lona mana mataʻutia ma ona uiga māfana. E tatou te faamamaluina foʻi o ia e ala i le avatu o le viiga iā te ia, ona o ni mea ua tatou ausia e ala i lana fesoasoani. (Isa. 26:12) O se tasi o faaaʻoaʻoga mataʻina o sē na ia avatu iā Ieova le mamalu, o le tupu o Tavita. I lana tatalo na faia i luma o le nuu o Isaraelu, na ia faapea atu ai: “Ieova e, o oe e ou le silisili ese, o le malosi, o le matagofie, o le mamalu, ma le malualii, auā o oe e ona mea uma i le lagi ma le lalolagi.” Ina ua uma le tatalo a Tavita, “ona vivii atu lea o le faapotopotoga uma iā Ieova.”—1 No. 29:​11, 20.

4. Na faapefea ona avatu e Iesu le mamalu iā Ieova?

⁴ A o iai Iesu i le lalolagi, na ia faamamaluina lona Tamā e ala i le faailoa atu i isi e faapea, o le mana o Ieova na mafai ai ona ia faia vavega. (Mare. 5:​18-20) Na avatu foʻi e Iesu le mamalu iā Ieova e ala i le auala na ia talanoa ai e faatatau i lona Tamā, ma le auala na ia feutagaʻi ai ma isi. I se tasi taimi a o aʻoaʻo atu Iesu i se sunako, na iai i inā se fafine ua 18 tausaga o maʻi ona o se temoni, ua faanoʻunoʻu ma ua lē mafai ona toe tū saʻo. Pagā se tulaga faigatā! O le tigā alofa o Iesu, na ia faalatalata atu ai i le fafine ma faapea atu ma le māfana: “Le mafine e, ua faamālōlōina lou maʻi.” Ua faaee atu e Iesu ona aao iā te ia, ona tū saʻo ai loa lea o ia, ma ua “amata ona ia faamamaluina le Atua.” Ioe, ua toe faafoʻisia lona malosi ma teʻa ai lona tulaga faalumaina! (Luka 13:​10-13) Na alagatatau ona faamamaluina Ieova e lenā fafine, ma e ao foʻi ona tatou faia faapea.

O LE Ā E UUNAʻIA AI I TATOU E AVATU IĀ IEOVA LE MAMALU?

5. O ā māfuaaga e tatau ai ona tatou faaaloalo iā Ieova?

⁵ E tatou te faamamaluina Ieova ona e tatou te matuā faaaloalo iā te ia. E tele māfuaaga talafeagai e ao ai ona tatou faaaloalo iā te ia. O Ieova e ona le malosi uma, ma e matuā tele lona mana. (Sala. 96:​4-7) Ua faaalia mai i mea na ia foafoaina le tele o lona atamai. O ia foʻi o le Puna o le ola ma o Lē e saunia mai mea uma e faatumauina ai lo tatou ola. (Faaa. 4:11) E faamaoni o ia. (Faaa. 15:4) E taulau mea uma e na te faia ma e tausisi i ana folafolaga uma. (Iosua 23:14) E lētioa faapea mai le perofeta o Ieremia e faatatau iā Ieova: “E leai lava se isi e tusa ma oe i tagata atamamai uma o atunuu ma o latou malo uma.” (Iere. 10:​6, 7) O lea la, e matuā anoanoaʻi māfuaaga talafeagai e ao ai ona tatou faaaloalo i lo tatou Tamā i le lagi. Peitaʻi, e lē gata e tatau ona tatou faaaloalo iā te ia, ae e tatau foʻi ona tatou alolofa iā te ia.

6. Aiseā e tatou te alolofa ai iā Ieova?

⁶ E tatou te faamamaluina Ieova ona e tatou te alolofa faapelepele iā te ia. Seʻi mātau nisi o uiga o Ieova e māfua ai ona tatou alolofa iā te ia. O ia o le Atua e alofa mutimutivale ma tigā alofa. (Sala. 103:​8, 13) E mafatia o ia pe a tatou mafatia. (Saka. 2:8) E fesoasoani mai o ia ina ia tatou vavalalata atu iā te ia ma avea ma ana uō. (Sala. 25:14; Galu. 17:27) E lē gata i lea, “ua faamaulaloina e ia o ia lava e silasila mai i le lagi ma le lalolagi, ua ia faatūina le tagata faatauvaa mai i le pefu.” (Sala. 113:​6, 7) O ai la o le a lē manaʻo e faamamaluina lo tatou Atua sili?—Sala. 86:12.

7. O le ā le avanoa tāua ua tatou maua?

 ⁷ E tatou te faamamaluina Ieova ona e tatou te mananaʻo ia iloa o ia e isi. E toʻatele tagata e lē iloa Ieova. Aiseā? Talu ai ua faatauasoina e Satani o latou manatu, e ala i le faasalalau atu o tala pepelo e uiga iā Ieova. (2 Kori. 4:4) Ua faatalitonu e Satani tagata e faapea o Ieova o sē e tauimasui, e lē alofa, ma o lona finagalo ua tutupu ai mea o loo mafatia ai tagata. Ae o loo tatou iloa le mea moni e uiga i lo tatou Atua! Ua iā i tatou le avanoa e faailoa atu ai i isi le ituaiga o Atua e iai moni Ieova, ina ia latou faamamaluina ai foʻi o ia. (Isa. 43:10) O loo uaʻi atu le Salamo 96 i le faamamaluina o Ieova. A o iloiloina nisi o upu faagaeeina o loo i lenei salamo, ia mafaufau i auala e mafai ona e avatu ai iā Ieova le mamalu, lea ua matuā alagatatau iā te ia.

E FAAPEFEA ONA TATOU FAAMAMALUINA IEOVA?

8. O le ā se isi auala e tatou te faamamaluina ai Ieova? (Salamo 96:​1-3)

⁸ Faitau le Salamo 96:​1-3. E tatou te faamamaluina Ieova i a tatou faamatalaga e fai e faatatau iā te ia. I nei fuaiupu, o loo faalaeiauina ai tagata o Ieova ina ia ʻpepese atu iā Ieova,’ “viia lona suafa,” ʻtaʻutaʻu atu le tala lelei o le faaolataga mai iā te ia,’ ma “taʻutaʻu atu i nuu lona mamalu.” O vala uma nei e tatou te faamamaluina ai lo tatou Tamā i le lagi. Na lototetele tagata Iutaia faamaoni ma Kerisiano i le uluaʻi senituri e taʻu atu i isi mea lelei uma na faia e Ieova mo i latou, ma puipuia lona suafa. (Tani. 3:​16-18; Galu. 4:29) E faapefea ona tatou faia foʻi faapea?

9-10. O le ā e tatou te aʻoaʻoina mai i le mea na tupu iā Angelena? (Tagaʻi foʻi i le ata.)

⁹ Seʻi mātau se mea na tupu iā Angelena, a o se tuafafine e nofo i Amerika. Na lototele o ia e puipuia le suafa o Ieova i lona fale faigaluega. Talu ai e fou Angelena i lana galuega, na valaaulia ai o ia ma isi e fou atu ina ia faamatala se mea e uiga iā i latou lava. O lea na fuafua ai o ia e faaali ni ata e faailoa atu ai lona fiafia i le avea ai o ia o se Molimau a Ieova. Peitaʻi, a o leʻi oo i le taimi e fai ai sana faamatalaga, ae tū ane se isi tamāloa ma faamatala e faapea na tausia aʻe o ia o se Molimau a Ieova, ma amata ona ia faitioina o tatou talitonuga. Na faapea mai Angelena: “Na tātāvale loʻu fatu ma ou faapea ifo, ʻPo o  le a ou tuu pea lenei tagata e fai tala pepelo e uiga iā Ieova? Po ou te lototele e faamatala atu upu moni e uiga iā te Ia?’”

¹⁰ Ina ua uma le faamatalaga a le tamāloa, ona fai loa lea o se tatalo puupuu lē leoa a Angelena. Na ia faapea atu ma le agalelei i le tamāloa: “E tutusa lelei taʻua. Na ou ola aʻe foʻi o se Molimau a Ieova, ma o loo avea pea aʻu o se Molimau.” E ui na lagona e Angelena le popole, ae na toʻafilemu pea o ia ma faaali atu ata o faatasiga faaleagaga na ia auai ai, ma faamatala atu ma le faautauta ona talitonuga. (1 Pete. 3:15) O le ā le iʻuga? E uma ane le faamatalaga a Angelena, ua suia uiga o le tamāloa. Na taʻua foʻi e le tamāloa ni mea mananaia e na te manatua a o ola aʻe o se Molimau a Ieova. Na faapea mai Angelena: “E ono ma tatau ona tatou puipuia le suafa o Ieova. O se faaeaga lo tatou lototetele e taʻutaʻu atu lona suafa.” Ua iā i tatou foʻi le faaeaga e viiviia ma faamamaluina ai Ieova, e tusa lava pe e lē o faia faapea e isi.

11. Ua faapefea ona mulimuli tagata tapuaʻi moni o Ieova i le taʻiala o loo i le Salamo 96:8 a o faagasolo tausaga?

¹¹ Faitau le Salamo 96:8. E tatou te faamamaluina Ieova i a tatou meafaitino. E masani ona faamamaluina Ieova e ona tagata tapuaʻi moni e ala i a latou meafaitino. (Faata. 3:9) O se faataʻitaʻiga, na faia e tagata Isaraelu ni foaʻi mo le fausiaina ma le faaleleia o le malumalu. (2 Tu. 12:​4, 5; 1 No. 29:​3-9) Na auauna isi soo o Keriso iā te ia ma ona aposetolo e ala i “a latou meafaitino.” (Luka 8:​1-3) Na aoina foʻi e Kerisiano i le uluaʻi senituri se foaʻi, ina ia fesoasoani ai i o latou uso ma tuafāfine faaleagaga. (Galu. 11:​27-29) I aso nei, e mafai foʻi ona tatou faamamaluina Ieova e ala i a tatou foaʻi tauofo.

12. E faapefea ona faamamaluina Ieova i a tatou foaʻi? (Tagaʻi foʻi i le ata.)

¹² Mātau se tasi o mea na tupu e iloa ai e faamamaluina Ieova i a tatou foaʻi. I se lipoti i le 2020, na taʻua ai le ogaoga o aafiaga ona o le umi o se lāmala i Zimbabwe. E faitau miliona tagata na matelāina i le fia aai, e aofia ai ma se tuafafine e igoa iā Prisca. E ui i faigatā ona o le lāmala, ae na talaʻi pea o ia i Aso Lulu ma Aso Faraile taʻitasi e oo lava i le vaitau e sua ma faamalū ai le palapala. Na ulagia o ia e ona tuaoi ona o le alu i le talaʻiga ae lē galue i lona fanua. Na latou faapea mai: “E te lē maʻona ai i lau talaʻiga.” Na tali atu  ma le mautinoa Prisca: “E lē taitai tuulafoaʻia e Ieova ana auauna.” E leʻi umi ae ia maua ni fesoasoani laveaʻi mai i la tatou faalapotopotoga. Na mafai ona maua na fesoasoani ona o a tatou foaʻi. Na matuā maofa tuaoi o Prisca ma faapea mai iā te ia: “E leʻi tuulafoaʻia oe e le Atua, ma e matou te fia iloa atili e uiga iā te ia.” O le iʻuga, e toʻafitu tagata e latou te tuaoi na auai i sauniga a le faapotopotoga.

13. E tusa ai o le Salamo 96:​9, o le ā e tatou te faia ina ia faamamaluina ai Ieova?

¹³ Faitau le Salamo 96:9. E tatou te faamamaluina Ieova pe a “paia” pe mamā a tatou amioga. Na tatau i ositaulaga na auauna iā Ieova i le faleʻie paia ma mulimuli ane i le malumalu, ona mamā faaletino. (Eso. 40:​30-32) E ui e tāua foʻi ona tatou mamā faaletino, ae e sili atu ona tāua le mamā o a tatou amioga. (Sala. 24:​3, 4; 1 Pete. 1:​15, 16) E tatau ona tatou taumafai malosi e toese le “tagata tuai” po o amioga ma gaoioiga lē mamā. Nai lo o lea, ia tatou oofu i le “tagata fou,” lea e faasino atu i gaoioiga ma mafaufauga e atagia mai ai uiga matagofie o Ieova. (Kolo. 3:​9, 10) E oo lava i se tagata na faia ni gaoioiga matuā lē mamā pe sauā, e mafai ona ia faia ni suiga ma ofu i le tagata fou e ala i le fesoasoani a Ieova.

14. O le ā e te aʻoaʻoina mai i le tala iā Jack? (Tagaʻi foʻi i le ata.)

¹⁴ Seʻi mātau le tala e faatatau iā Jack, o se tagata e leaga ma matuā sauā lea na faaigoa e tagata o Le Temoni. Na faasalaina o ia i le oti i le falepuipui ona o le matuiā o ana solitulafono. Peitaʻi, a o faatali le aso e faataunuu ai lona faasalaga, na malie ai o ia e faia se la suʻesuʻega faale-Tusi Paia ma se uso na asiasi atu i le falepuipui. E ui i lona talaaga leaga, ae na suia uiga o Jack ma mulimuli ane agavaa e papatiso. O le mataʻina o suiga na ia faia, na fetagisi ai nisi o leoleo o le falepuipui a o faamavae atu iā te ia i le aso na faasalaina ai i le oti. Na faapea mai se leoleo o le falepuipui: “O Jack o se pagota na sili ona leaga, a o lenei ua avea o sē e sili ona lelei.” I le vaiaso na sosoo ai ina ua uma ona fasiotia Jack, na toe foʻi atu ai uso e faia le sauniga faalevaiaso i le falepuipui, ma feiloaʻi ai ma se pagota ua faatoʻā auai atu i se sauniga. O le ā na uunaʻia ai o ia e faia faapea? Talu ai na maofa o ia i suiga na faia e  Jack, ma ia fia iloa ai foʻi po o le ā e manaʻomia ona ia faia ina ia tapuaʻi ai iā Ieova. E mautinoa o a tatou amioga e faamamaluina ai lo tatou Tamā i le lagi.—1 Pete. 2:12.

O LE A FAAPEFEA ONA FAAMAMALUINA E IEOVA LONA SUAFA I SE TAIMI LATA MAI?

15. O le a faapefea ona faamamaluina e Ieova lona suafa i se taimi lata mai i le lumanaʻi? (Salamo 96:​10-13)

¹⁵ Faitau le Salamo 96:​10-13. I fuaiupu mulimuli o le Salamo 96, o loo faamatalaina ai Ieova o se Tupu ma o se Faamasino amiotonu. O le a faapefea ona faamamaluina e Ieova lona suafa i se taimi lata mai i le lumanaʻi? E ala i lona faia o le faamasinogatonu. E lē o toe umi ona ia faaumatia lea o Papelonia le Aai Tele, lea o loo faalumaina lona suafa paia. (Faaa. 17:​5, 16; 19:​1, 2) Pe a vaaia e nisi le faaumatiaga o Papelonia le Aai Tele, atonu o le a latou filifili e aufaatasi ma i tatou i le tapuaʻiga moni. Mulimuli ane, o le a faaumatia aʻiaʻi e Ieova iā Amaketo lenei faiga o mea a Satani, ma tafiesea i latou e tetee iā te Ia ma taʻuleagaina lona suafa. Peitaʻi, o le a ia faasaoina i latou uma e alolofa ma usiusitaʻi iā te ia, ma fiafia e faamamaluina o ia. (Mare. 8:38; 2 Tesa. 1:​6-10) E oo ane i le taimi ua uma le tofotofoga mulimuli i le faaiʻuga o le pulega a Keriso mo le Afe Tausaga, ua faamamaluina atoatoa e Ieova lona suafa. (Faaa. 20:​7-10) I lenā taimi, “o le a tumu le lalolagi i le iloaina o le mamalu o Ieova e pei ona ufitia o le ilititai i le suāsami.”—Sapa. 2:14.

16. O le ā ua tatou maumauaʻi e fai? (Tagaʻi foʻi i le ata.)

¹⁶ Maʻeu se taimi matagofie o le a iai, pe a avatu e tagata uma iā Ieova le mamalu e tatau mo lona suafa! A o leʻi oo mai lenā taimi, seʻi o tatou faaaogā so o se avanoa i le taimi lenei e faamamaluina ai lo tatou Atua. Ina ia faamatilatila le tāua o lenei manatu, ua filifilia ai e le Vaega Pule le Salamo 96:8 e avea ma mau o le tausaga 2025: “Ia avatu iā Ieova le mamalu e tatau mo lona suafa.”