1. O le ā le luʻi o loo tatou fesagaʻia uma?

 E MANAʻOMIA ona tatou faia filifiliga i aso taʻitasi. O nisi o filifiliga e faigofie, e pei o le filifili o meaʻai e fai ai le mālū o le taeao, po o le taimi foʻi e moe ai. A o isi filifiliga e faigatā, ona atonu e aafia ai lo tatou soifua mālōlōina, o lo tatou fiafia, o ē pele iā i tatou, ma la tatou tapuaʻiga. E tatou te mananaʻo e faia ni filifiliga mo lo tatou lelei, faapea o tatou aiga. Ae e sili atu i lenā, e tatou te mananaʻo e faafiafiaina Ieova i a tatou filifiliga.—Roma 12:​1, 2.

2. O ā laasaga e fesoasoani iā i tatou e faia ai filifiliga atamai?

² E mafai ona e faia se filifiliga atamai, pe afai e te (1) maua faamatalaga saʻo, (2) mafaufau i le silafaga a Ieova i se mataupu, ma le (3) mafaufau lelei i le mea e te filifili e fai. O le a talanoaina na laasaga i lenei mataupu, ma o le a fesoasoani e toleni ai o tatou mafaufau ia iloa le mea e saʻo ma le mea e sesē.—Faata. 2:11.

IA MAUA FAAMATALAGA SAʻO

3. Ia faataʻitaʻi le māfuaaga e tāua ai le maua o faamatalaga saʻo a o leʻi faia se filifiliga.

³ O le laasaga muamua lava e tāua ina ia faia ai se filifiliga lelei, o le maua lea o faamatalaga saʻo. Aiseā? Seʻi manatu i se tagata o loo talanoa atu i se fomaʻi e faatatau i se maʻi tugā o loo aafia ai. Po o le a filifili le fomaʻi e togafitia le tagata maʻi e aunoa ma le siakiina muamua o ia, ma fai atu i ai ni fesili? E mautinoa e leai. E mafai ona tatou faia filifiliga lelei pe a tatou iloilo muamua faamatalaga saʻo e faatatau i se mataupu ua tulaʻi mai. E faapefea ona tatou faia faapea?

4. E tusa ai o le Faataoto 18:​13, e faapefea ona e faamautinoa ua e maua faamatalaga saʻo? (Tagaʻi foʻi i le ata.)

 ⁴ E masani ona maua faamatalaga saʻo, pe a fai atu muamua ni fesili. Seʻi faapea ua valaaulia oe i se faatasiga faasamasamanoa. Po o le a e auai ai? Pe afai e te lē masani lelei i le tagata o loo faamaopoopoina le faatasiga, po o mea foʻi o le a fai ai, e mafai ona e fesili atu: “O fea ma o afea o le a fai ai le faatasiga? Pe e toʻatele nisi o le a iai? O ai o le a ia vaavaaia? O ai o le a auai ai? O ā mea o le a faia i lenā faatasiga? Po o le a faaaogāina ai le ʻava malosi?” O le iloaina o tali o na fesili, o le a fesoasoani iā te oe e faia ai se filifiliga atamai.—Faitau le Faataoto 18:13.

5. O le ā e manaʻomia ona e faia pe afai ua e mauaina faamatalaga saʻo?

⁵ Pe afai ua e mauaina faamatalaga saʻo, ona iloilo lelei lea o isi vala uma e aofia ai. O se faaaʻoaʻoga, ae faapefea pe afai e te iloa ane o le a auai i le faatasiga nisi e lē amanaʻia mataupu silisili o le Tusi Paia, po o le a faaaogāina ai foʻi le ʻava malosi e aunoa ma se tasi e vaavaaia? Pe e te manatu e uma ane ua avea lenei faatasiga o se patī lē taupulea? (1 Pete. 4:3) Ae faapefea pe afai o lenei faatasiga, e fai i le taimi ua faatulagaina e faia ai le sauniga po o le talaʻiga? O lou malamalama i nei vala uma, o le a fesoasoani iā te oe e fai ai se filifiliga lelei. Ae e iai se isi vala e manaʻomia ona e mafaufau i ai. E ui o lea ua e iloa nei vala uma, ae  ia fesili ifo: “O ā faalogona o Ieova e faatatau i lenei faatasiga?”—Faata. 2:6.

IA AMANAʻIA LE SILAFAGA A IEOVA

6. E tusa ai o le Iakopo 1:​5, aiseā e tatau ai ona tatou tatalo iā Ieova mo le fesoasoani?

⁶ Ia talosaga iā Ieova ina ia fesoasoani mai iā te oe, e malamalama i lana silafaga e faatatau i se mataupu. Ua folafola mai e Ieova o le a ia foaʻi mai le atamai ina ia iloa ai po o le a faafiafiaina o ia i se filifiliga o le a tatou faia. E na te “foaʻi tele mai [le atamai] e aunoa ma le faifai mai.”—Faitau le Iakopo 1:5.

7. E faapefea ona e iloa le silafaga a Ieova i se mataupu? Ia faataʻitaʻi.

⁷ Pe a uma ona e tatalo mo le taʻitaʻiga a Ieova, ia mātau lelei le auala e tali mai ai o ia. O se faataʻitaʻiga, pe afai e te faimalaga i se isi nofoaga ae ua e fesēaʻi solo, atonu e te fesili atu i se tagata i lenā vaipanoa mo se fesoasoani. Ae po o le a e savali ese a o leʻi tali mai le tagata? E mautinoa e leai. O le a e faalogologo lelei atu i lana faasinoga. I se tulaga taitutusa, pe a uma ona e talosaga iā Ieova mo le atamai, ia taumafai e iloa le auala o loo ia tali mai ai e ala i le saʻili o tulafono ma mataupu silisili o le Tusi Paia, e faatatau i le tulaga o loo e fesagaʻia. O se faaaʻoaʻoga, pe a filifili pe e te auai i le faatasiga lea na taʻua muamua, e te ono mafaufau po o le ā le manatu o le Tusi Paia e faatatau i patī lē taupulea, o aumea leaga, ma le faamuamua o manaʻoga o le Malo nai lo o  ou lava manaʻoga.—Mata. 6:33; Roma 13:13; 1 Kori. 15:33.

8. O le ā e te faia pe a e manaʻomia se fesoasoani ina ia maua ai faamatalaga o loo e saʻilia? (Tagaʻi foʻi i le ata.)

⁸ Peitaʻi, i isi taimi e te manaʻomia ai se fesoasoani ina ia maua ai faamatalaga o loo e saʻilia. Atonu e te maua ni fautuaga mai i se uso po o se tuafafine e lava le poto masani. E te maua foʻi aogā pe a faia ni au lava saʻiliʻiliga. E anoanoaʻi faamatalaga e maua i a tatou lomiga mo saʻiliʻiliga, e pei o le Tusi Taʻiala mo Saʻiliʻiliga a Molimau a Ieova ma le lomiga Taʻiala a le Tusi Paia mo Kerisiano. Ia manatua, o lou sini o le faia lea o se filifiliga e faafiafiaina ai Ieova.

9. E faapefea ona faamautinoa e faafiafiaina Ieova i la tatou filifiliga? (Efeso 5:17)

⁹ E faapefea ona faamautinoa e faafiafiaina Ieova i la tatou filifiliga? Muamua, e ao ona tatou iloa lelei o ia. Ua faapea mai le Tusi Paia: “O le poto i Lē e Sili Ona Paia, o le malamalama lea.” (Faata. 9:10) Ioe, o le malamalama moni e maua i lo tatou iloaina o uiga o Ieova, o lona finagalo, faapea mea e fiafia i ai ma mea e inosia e ia. Ia fesili ifo: ʻPe a fua i mea ua ou iloa e faatatau iā Ieova, o le ā le filifiliga e ao ona ou faia ina ia faafiafia ai o ia?’—Faitau le Efeso 5:17.

10. Aiseā e sili atu ai ona tāua mataupu silisili o le Tusi Paia nai lo o tū ma aganuu?

¹⁰ I nisi taimi, ina ia faafiafia Ieova, e tatau ona tatou faia se filifiliga o le a lē fiafia mai ai nisi e pele iā i tatou. O se faaaʻoaʻoga, o faanaunauga lelei o nisi mātua e la te maumauaʻi ai e faaipoipo le la tama teine i se tasi e lelei le tamaoaiga ma tausia i latou, e tusa lava pe e lē malosi faaleagaga lenā tagata. E moni e la te mananaʻo e tausia lelei le la tama teine i le itu faaletino, ae o ai o le a fesoasoani iā te ia ina ia agaʻigaʻi i luma o se tagata faaleagaga? O le ā le silafaga a Ieova i lenā tulaga? E maua le tali i le Mataio 6:33. O loo faalaeiauina Kerisiano ia “saʻili muamua le Malo.” E ui e tatou te āva ma faaaloalo i o tatou mātua ma isi, ae o lo tatou sini autū o le faafiafiaina o Ieova.

IA MAFAUFAU LELEI I LE MEA E TE FILIFILI E FAI

11. O le ā le uiga o loo taʻua i le Filipi 1:​9, 10, e fesoasoani iā i tatou pe a filifili po o le ā le mea e fai?

¹¹ Pe a uma ona e iloiloina mataupu silisili e aofia ai i lau filifiliga, ona e mafaufau loa lea po o le ā lau filifiliga e fai. (Faitau le Filipi 1:​9, 10) O le faautaga loloto, o le a fesoasoani e te iloa ai iʻuga e ono oo i ai se filifiliga e te faia. O nisi taimi e faigofie ona tatou iloa le filifiliga e fai, ae o nisi taimi e lē faigofie. O le faautaga loloto o le a fesoasoani iā i tatou e faia ai ni filifiliga atamai, e oo lava i ni tulaga faigatā.

12-13. E faapefea ona fesoasoani le faautaga loloto ina ia e faia ai se filifiliga atamai e tusa ai o galuega totogi?

¹² Seʻi mātau se mea e ono tupu. Atonu o loo suʻe sau galuega e tausia ai lou aiga, ma o loo iai ni avanoa faigaluega se lua. Ua e iloilo faamatalaga uma e faatatau i nei galuega, e pei o mea e fai i le galuega, o taimi faigaluega, o le mamao o le galuega ma isi mea. I nei galuega uma e lua, e leai se mataupu silisili o le Tusi Paia o aafia ai. Ae atonu e te fiafia atu i le isi galuega ona o mea e fai ai, pe e telē atu foʻi le totogi. Peitaʻi, e iai lava isi vala e manaʻomia ona e iloiloina a o leʻi faia sau filifiliga.

¹³ O se faaaʻoaʻoga, po o le ā lava le galuega e te filifilia, ae pe faamata o le a aafia ai lou auai i sauniga? Po o le a faaitiitia ai le taimi e te uaʻi ai i le tausia o lou aiga i le itu tau faalogona ma le itu faaleagaga? O fesili faapena o le a fesoasoani iā te oe ina ia faamuamua ai “mea e sili ona tāua,” e pei o lau tapuaʻiga ma manaʻoga o lou aiga, nai lo o meafaitino. O le  faia faapea, o le a e faia ai se filifiliga e faamanuia e Ieova.

14. E faapefea i le faautaga loloto ma le alofa ona fesoasoani iā i tatou ina ia lē tausuai ai isi?

¹⁴ O le faautaga loloto foʻi e fesoasoani iā i tatou e mafaufau ai i aafiaga o a tatou filifiliga i isi, ma “lē tausuai ai isi.” (Fili. 1:10) E tāua lenei manatu aemaise i mataupu e fitoitonu i le tagata lava ia, e pei o laʻei ma teuga. O se faataʻitaʻiga, atonu e tatou te fiafia i se ituaiga laʻei ma teuga. Ae e faapefea pe afai e tausuai ai isi i totonu po o fafo foʻi o le faapotopotoga? O le faautaga loloto o le a tatou amanaʻia ai o latou faalogona. O le alofa e uunaʻia ai i tatou e faamuamua “le lelei o isi,” ma ia onomea o tatou laʻei. (1 Kori. 10:​23, 24, 32; 1 Timo. 2:​9, 10) O le iʻuga, o le a tatou faia ai se filifiliga e atagia atu ai lo tatou alofa ma le faaaloalo i isi.

15. O le ā le iloiloga e ao ona e faia a o leʻi faia se filifiliga tāua?

¹⁵ Pe a e faia se filifiliga tāua, ia mafaufau  muamua i mea e ao ona e faia ina ia faataunuuina ai. Ua aʻoaʻoina i tatou e Iesu ina ia “faitau tupe o le a faaalu.” (Luka 14:28) Ia mafaufau i le tele o le taimi o le a faaalu, o meafaitino ma taumafaiga ina ia faataunuu ai se filifiliga. I nisi tulaga, atonu e manaʻomia ona e talanoa atu i lou aiga, ina ia iloa ai e tagata taʻitoʻatasi mea e ao ona latou faia e lagolagoina ai lau filifiliga. Aiseā e tāua ai le iloiloina o nei vala uma? Atonu o le a e iloa ai e manaʻomia ona toe fetuunaʻi lau filifiliga, po o loo iai foʻi se isi filifiliga e sili atu ona lelei. Pe afai e te talanoa i tagata o lou aiga ma faalogologo atu i o latou manatu, e mautinoa o le a latou naunau e fesoasoani atu e faataunuu lau filifiliga.—Faata. 15:22.

IA FAIA SE FILIFILIGA E TAULAU MANUIA

16. O ā laasaga e fesoasoani iā te oe ina ia taulau manuia ai lau filifiliga? (Tagaʻi foʻi i le pusa “ Auala e Faia ai Filifiliga Atamai.”)

¹⁶ Pe a e uia laasaga e pei ona taʻua i luga, e mautinoa ua e sauni e faia se filifiliga atamai. O lou mauaina o faamatalaga saʻo ma iloiloina mataupu silisili, o le a fesoasoani iā te oe e faia se filifiliga e faafiafiaina ai Ieova. E mafai loa ona e talosaga atu iā Ieova e fesoasoani mai ina ia taulau manuia ai lau filifiliga.

17. O le ā le vala e sili ona tāua i le faia o filifiliga lelei?

¹⁷ E tusa pe na taulau manuia le tele o filifiliga na e faia i le taimi ua teʻa, ae ia manatua, o le vala e sili ona tāua i le faia o filifiliga lelei, o lou faalagolago lea i le atamai mai iā Ieova, ae e lē o ou lava tomai ma le poto masani. E na Ieova e mafai ona foaʻi maia le poto saʻo, le malamalama ma le faautaga loloto, o vaega tāua mo le mauaina o le atamai. (Faata. 2:​1-5) E mafai ona fesoasoani mai Ieova ina ia e faia filifiliga e faafiafiaina ai o ia.—Sala. 23:​2, 3.