1. O le ā e manaʻomia ona tatou faia ina ia faafiafiaina ai Ieova?

 SEʻI faapea ua e foaʻi atu i sē e te alofa i ai se meaalofa tautele e matagofie ma e aogā i lenā tagata. E mautinoa e te lē fiafia pe afai e teu e lenā tagata le meaalofa i se pusa, ma e lē toe ano i ai. I le isi itu, e te lagona le fiafia pe afai e faaaogā lelei e lenā tagata le meaalofa, ma faailoa mai lona lototalisapaia. O le ā le lesona? Ua foaʻi mai e Ieova lona Alo ina ia maliu mo i tatou. E mautinoa le matuā fiafia o Ieova pe a tatou faaalia le lototalisapaia mo lenā meaalofa tautele, aemaise lona alofa lea na uunaʻia ai o ia e saunia le togiola.—Ioa. 3:16; Roma 5:​7, 8.

2. O le ā o le a tatou talanoaina i lenei mataupu?

² Peitaʻi, a o faagasolo taimi e tatou te ono manatu māmā i le meaalofa o le togiola. E tai pei lenā ua tatou tuuina le meaalofa a le Atua i se pusa, ma lē toe ano i ai. Ina ia ʻalofia lenā tulaga, e manaʻomia ona fai ma masani lo tatou mafaufau i le gaoioiga alofa na faia e le Atua ma Keriso mo i tatou. E fesoasoani lenei mataupu iā i tatou ina ia faia faapea. O le a tatou talanoaina aogā ua tatou maua i le taimi lenei mai i le togiola, faapea aogā e maua i le lumanaʻi. O le a tatou iloiloina foʻi mea e mafai ona tatou faia e faaalia atili ai lo tatou talisapaia o le alofa o Ieova, aemaise i le vaitaimi o le Faamanatuga.

AOGĀ O LE TOGIOLA I LE TAIMI LENEI

3. O le ā se tasi o aogā o le togiola mo i tatou i le taimi lenei?

³ I le taimi lenei, o loo tatou maua aogā mai i le taulaga togiola a Keriso. O se faaaʻoaʻoga, o le togiola ua mafai ai ona faamagaloina  e Ieova a tatou agasala. E lē faamalosia Ieova e faamagaloina a tatou agasala, ae o le mea lenā e naunau o ia e fai. Na faapea mai le faisalamo ma le lotofaafetai: “Ieova e, o oe e lelei ma ua e nofosauni e faamagalo.”—Sala. 86:5; 103:​3, 10-13.

4. O ai na saunia ai e Ieova le togiola? (Luka 5:32; 1 Timoteo 1:15)

⁴ E iai taimi e tatou te mafaufau ai e lē tatau le faamagaloga a Ieova iā i tatou. O le mea moni, e leai se isi o i tatou ua tatau i ai le faamagaloga a Ieova. Na iloa e le aposetolo o Paulo lenā mea ina ua ia faapea mai, “e lē tatau ona taʻua aʻu o se aposetolo.” Peitaʻi, na ia faapea atili mai: “Ae ona o le agalelei faifua o le Atua, ua ou faapenei ai.” (1 Kori. 15:​9, 10) Pe a tatou salamō mai i a tatou agasala, e faamagaloina i tatou e Ieova. Aiseā? E lē faapea o se mea e tatau lava ona faia e Ieova mo i tatou, ae ona o lona alofa tele iā i tatou. Pe afai o loo lofitūina oe i faalogona lē aogā, ia manatua e leʻi saunia mai e Ieova le togiola mo tagata lelei atoatoa, ae mo tagata agasala ua faaalia le salamō moni.—Faitau le Luka 5:32; 1 Timoteo 1:15.

5. Pe e talafeagai ona tatou manatu e tatau lava ona faaalia mai e Ieova le alofa mutimutivale? Faamatala.

⁵ E tusa lava po ua tele tausaga o tatou auauna iā Ieova, ae e lē tatau ona tatou manatu e tatau lava ona faamagaloina i tatou e Ieova. O le mea moni, e talisapaia e Ieova la tatou auaunaga faamaoni iā te ia. (Epe. 6:10) Peitaʻi, na ia foaʻi mai lona Alo o se meaalofa foaʻifua, ae e lē o se totogi mo la tatou auaunaga. Pe afai e tatou te manatu e tatau lava ona faaalia mai e Ieova le alofa mutimutivale, pe feutagaʻi ma i tatou i se auala faapitoa, o lona uiga la ua tatou manatu e leai se aogā na maliu ai Keriso.—Faatusatusa i le Kalatia 2:21.

6. Aiseā na galue mamafa ai Paulo i le auaunaga iā Ieova?

⁶ Na iloa lelei e Paulo, e tusa po o le ā le tele o mea e na te faia mo Ieova, ae e lē faapea ai e faalagolago i ai le faamagaloina o ia e Ieova. Aiseā la na ia galue mamafa ai i le auaunaga iā Ieova? Ina ia faaalia ai lona talisapaia o le agalelei faifua o Ieova. (Efe. 3:7) I le pei o Paulo, e faaauau ona tatou maelega i le auaunaga iā Ieova ona e lē faapea e faalagolago i ai lo tatou mauaina o lona alofa mutimutivale, ae ina ia faaalia ai lo tatou talisapaia o lenā uiga.

7. O le ā le isi aogā o loo tatou mauaina i le taimi lenei ona o le togiola? (Roma 5:1; Iakopo 2:23)

⁷ O le isi aogā o loo tatou maua i le taimi lenei mai le togiola, o le mauaina lea o se faiā vavalalata a le tagata lava ia ma Ieova. a E pei ona taʻua i le mataupu ua mavae, e leʻi iai se tatou faiā ma le Atua ina ua tatou fananau mai. Ae o le togiola ua tatou maua ai le “filemu ma le Atua,” ma vavalalata atu ai iā te ia.—Faitau le Roma 5:1; Iakopo 2:23.

8. Aiseā e tatou te lotofaafetai ai mo le faaeaga o le tatalo?

⁸ O se isi vala o la tatou faiā vavalalata ma Ieova, o le faaeaga faapitoa o le tatalo. E lē gata e faafofoga Ieova i tatalo a ona tagata pe a faapotopoto faatasi, ae e faafofoga mai foʻi i tatalo a tagata taʻitoʻatasi. Pe a tatou tatalo, e lagona ai le toʻafilemu o o tatou loto ma mafaufau. Ae e iai se isi aogā e sili atu nai lo o le tau ina lelei ai o o tatou faalogona. O le tatalo e mafai ona māfana ai la tatou faiā ma le Atua. (Sala. 65:2; Iako. 4:8; 1 Ioa. 5:14) A o soifua Iesu i le lalolagi, na fai ma ana masani le tatalo ona na ia silafia o loo faafofoga mai Ieova,  ma e mafai ona faamalosia atili ai lana faiā ma lona Tamā. (Luka 5:16) Maʻeu lo tatou lotofaafetai i le taulaga togiola a Iesu, ona ua mafai ai ona avea i tatou ma uō a Ieova ma tatou talanoa atu ai iā te Ia e ala i le tatalo!

AOGĀ O LE TOGIOLA I LE LUMANAʻI

9. O ā aogā o le a maua e tagata tapuaʻi faamaoni o Ieova i le lumanaʻi ona o le togiola?

⁹ O ā aogā o le a maua e tagata tapuaʻi faamaoni o Ieova i le lumanaʻi ona o le togiola? O le a latou maua le ola e faavavau. E manatu le toʻatele e lē mafai ona tupu lenā mea ona ua faitau afe tausaga o maliliu tagata. Peitaʻi, o le uluaʻi fuafuaga lava ia a le Atua mo tagata, ina ia mafai ona ola e faavavau. Pe ana lē agasala Atamu, semanū e lē faigatā ona tatou talitonu e mafai e tagata ona ola e faavavau. E ui lava e faigatā i le taimi lenei ona faaata i o tatou mafaufau le ola e faavavau, ae e mautinoa e mafai ona tatou mauaina, ona e telē le tau na totogiina e Ieova, o le ola lea o lona lava Alo.—Roma 8:32.

10. O ā faamoemoe o loo tulimataʻia e le ʻaufaauuina ma isi mamoe?

¹⁰ E ui e faatoʻā tatou maua le ola e faavavau i le lumanaʻi, ae e finagalo Ieova ia tatou tulimataʻia pe mafaufau i ai i le taimi lenei. O loo tulimataʻia e le ʻaufaauuina lo latou faamoemoe mataʻina i le lagi, pe a latou pule faatasi mai ma Iesu i le lalolagi. (Faaa. 20:6) Ae e tulimataʻia e isi mamoe se olaga fiafia i se lalolagi parataiso e aunoa ma ni tigā po o mafatiaga. (Faaa. 21:​3, 4) Po o loo e aofia ai i isi mamoe, o ē o loo faamoemoe e ola e faavavau i le lalolagi? O lenā taui, e lē faapea e itiiti ifo lona tāua nai lo o le faamoemoe e ola i le lagi! O le mea moni, o le ola e faavavau i le lalolagi, o le fuafuaga lava lenā a Ieova mo tagata. O lea, e mafai ona tatou maua le fiafia moni pe a tatou ola e faavavau i le lalolagi.

11-12. O ā nisi o faamanuiaga i le Parataiso o loo tatou tulimataʻia? (Tagaʻi foʻi i ata.)

¹¹ Seʻi mafaufau i le ituaiga o olaga o le a e olioli ai i le lalolagi Parataiso! O le a e lē toe popole i ni maʻi po o le maliu foʻi. (Isa. 25:8;  33:24) O le a faamalieina atoatoa e Ieova ou manaʻoga uma. Pe e te manaʻo e aʻoaʻo atili e faatatau i meaola, o le tāina o se meafaifaaili po o le tusiaina o ata? I le Parataiso, e mautinoa o le a manaʻomia nisi e iloa tusia ata o fale, o ni ʻaukamuta ma faifaatoʻaga. O le a manaʻomia foʻi nisi e faia isi galuega e pei o le saunia o meaʻai, gaosia o meafaigaluega, faapea le tausia ma le faamatagofieina o fanua. (Isa. 35:1; 65:21) Talu ai o le a tatou ola e faavavau, o le a e maua la le taimi e faia ai so o mea e te manaʻo e fai.

¹² Maʻeu foʻi lo tatou olioli i le taimi e toe feiloaʻi ai ma ē o le a toe faatutūina mai! (Galu. 24:15) Ia mafaufau foʻi i le tele o mea o le a e aʻoaʻoina e faatatau iā Ieova, e ala i le iloilo o le tele o ana galuega o le foafoaga! (Sala. 104:24; Isa. 11:9) Ae e sili atu i lenā, o le a tatou tapuaʻi fiafia iā Ieova e aunoa ma le popole ina neʻi o tatou faia se mea sesē ma tatou nofosala ai. Po o le a e melea nei faamanuiaga i le lumanaʻi, ona o le “fiafia puupuu i tuʻinanauga o le agasala”? (Epe. 11:25) E mautinoa e leai! E tusa po o ā faataulaga e tatou te faia i le taimi lenei, e lē mafaatusalia i faamanuiaga o le a tatou maua i le lumanaʻi. Ia manatua, o le ola e faavavau i le Parataiso e lē na o se moomooga faivavale, ae o le a taunuu moni. Ua mafai ona faataunuuina nei mea uma, ona o le alofa tele o Ieova lea na ia foaʻi mai ai lona Alo e maliu mo i tatou!

IA TALISAPAIA LE ALOFA O IEOVA

13. E faapefea ona faaalia atu lo tatou talisapaia o le alofa o Ieova? (2 Korinito 6:1)

¹³ E faapefea ona tatou faaalia le lototalisapaia iā Ieova i le saunia mai o le togiola? E ala i le faamuamua o le Malo i o tatou olaga. (Mata. 6:33) E alagatatau ona tatou faia faapea ona na maliu Iesu “mo tagata uma, ina ia lē toe ola i latou mo i latou lava, ae ia ola mo ia o lē na maliu mo i latou ma toe faatūina mai.” (2 Kori. 5:15) E mautinoa e tatou te lē mananaʻo e manatu māmā i le agalelei faifua o Ieova, ma misia ai lona fuafuaga.—Faitau le 2 Korinito 6:1.

14. E faapefea ona faaalia lo tatou maufaatuatuaina o le taʻitaʻiga a Ieova?

¹⁴ E tatou te faaalia foʻi le talisapaia o le alofa o Ieova e ala i le maufaatuatuaina o lana taʻitaʻiga. E faapefea? Pe a faia a tatou filifiliga e pei o le filifilia o galuega ma aʻoaʻoga faaopoopo, e ao ona tatou mafaufau muamua po o le ā e faafinagaloina e Ieova. (1 Kori. 10:31; 2 Kori. 5:7) Pe a faaalia i a tatou filifiliga lo tatou maufaatuatuaina o Ieova, o le a faamalosia ai lo tatou faatuatua ma la tatou faauōga ma ia. E lē gata i lea, o le a atili ai ona tatou mautinoa i lo tatou faamoemoe.—Roma 5:​3-5; Iako. 2:​21, 22.

15. E faapefea ona faaalia lo tatou agaga talisapaia a o faagasolo le vaitaimi o le Faamanatuga?

¹⁵ O le ā se isi auala e faaalia ai lo tatou talisapaia o le alofa o Ieova? E ala i le faaaogā o  le vaitaimi o le Faamanatuga e faailoa atu ai lo tatou lotofaafetai mo le togiola. E ese mai i a tatou fuafuaga ina ia auai i le Faamanatuga, e mafai foʻi ona tatou valaaulia isi ina ia auai. (1 Timo. 2:4) Ia faamatala i ē o le a e valaauliaina mea o le a faia i le Faamanatuga. Atonu e lelei ona e faaali atu iā i latou vitiō Aiseā na Maliu ai Iesu? ma le Faamanatuga o le Maliu o Iesu o loo i le jw.org. E ao i toeaina ona faamautinoa e valaaulia foʻi ē e lē o toe talaʻi. Seʻi faaata le olioli o le lagi ma le lalolagi, pe a toe foʻi mai i le lafu a Ieova nisi o ana mamoe na leiloloa. (Luka 15:​4-7) I le Faamanatuga, ia taumafai e faafeiloaʻi isi, aemaise lava i latou e fou mai po o nisi ua leva e leʻi toe auai mai i sauniga, ma latou lagona ai le alofagia o i latou.—Roma 12:13.

16. Aiseā e ao ai ona e mafaufau i le faateleina o sou sao i le faiva i le vaitaimi o le Faamanatuga?

¹⁶ Pe e mafai ona faateleina sou sao i le faiva i le vaitaimi o le Faamanatuga? O le faia faapea, ua faailoa atu ai lo tatou talisapaia o mea uma ua faia e le Atua ma Keriso mo i tatou. O le tele e faia ai so tatou sao i le auaunaga iā Ieova, o le tele foʻi lenā e tatou te tofo ai i lana fesoasoani ma iʻu ai ina tatou matuā maufaatuatuaina o ia. (1 Kori. 3:9) E lē gata i lea, ia faamautinoa e faia lau faitauga Tusi Paia o le Faamanatuga, e tusa ai ma le faasologa o loo maua i le tamaʻi tusi Iloiloina Tusitusiga Paia i Aso Taʻitasi, po o le siata o loo i le polokalame o le sauniga amata o le vaiaso. Atonu foʻi e te filifili e faaaogā na mau o le Tusi Paia e faia ai nisi au saʻiliʻiliga.

17. O le ā e faafiafiaina ai le finagalo o Ieova? (Tagaʻi foʻi i le pusa “ Auala e Faaalia ai le Talisapaia o le Alofa o Ieova.”)

¹⁷ O le mea moni, atonu e lē mafai ona e faia mea uma o loo taʻua i lenei mataupu, ona o lou tulaga. Ae ia manatua, e lē faatusatusa e Ieova mea e te faia i mea o loo faia e isi, ae e silasila o ia i lou loto. E fiafia lona finagalo pe a silasila mai i lou lotofaafetai i lana meaalofa tautele o le togiola.—1 Samu. 16:7; Mare. 12:​41-44.

18. Aiseā e tatou te talisapaia ai Ieova le Atua ma Iesu Keriso?

¹⁸ E pau le māfuaaga ua mafai ai ona faamagaloina a tatou agasala, maua se faauōga ma Ieova, ma maua le faamoemoe o le ola e faavavau, ona o le togiola. Ia faaauau ona faaalia lo tatou talisapaia o le alofa o Ieova, lea ua uunaʻia ai o ia e faasafua mai nei faamanuiaga mo i tatou. (1 Ioa. 4:19) Ia faaalia foʻi lo tatou talisapaia o Iesu, o lē na matuā alofa iā i tatou e ala i le maliu mo i tatou.—Ioa. 15:13.