1. E faapefea ona tatou maua aogā i le auai i le Faamanatuga o le maliu o Iesu i tausaga taʻitasi?

 E MAUTINOA e tatou te ioe i le manatu o le togiola o se meaalofa tautele. (2 Kori. 9:15) O le faataulagaina e Iesu o lona ola, ua mafai ai ona tatou maua se faiā vavalalata ma Ieova le Atua. Ua mafai ai foʻi ona tatou maua le faamoemoe o le ola e faavavau. Ua talafeagai la ona tatou faaalia le lotofaafetai mo le togiola ma Ieova, o lē na saunia le togiola ona o lona alofa. (Roma 5:8) Ina ia fesoasoani iā i tatou e faaalia pea le lotofaafetai ma aua le manatu māmā i le togiola, na poloaʻi mai Iesu ina ia tatou faamanatuina i tausaga taʻitasi lona maliu.—Luka 22:​19, 20.

2. O le ā o le a tatou talanoaina i lenei suʻesuʻega?

² O le a faia le Faamanatuga i lenei tausaga i le Aso Toonaʻi, Aperila 12, 2025. E mautinoa o i tatou uma lava ua faia fuafuaga e auai. E tele aogā e tatou te maua i le vaitaimi o le Faamanatuga, pe a tatou manatunatu loloto i mea ua faia e Ieova ma lona Alo mo i tatou. I lenei suʻesuʻega, o le a tatou talanoaina ai mea e tatou te aʻoaʻoina i le togiola e faatatau iā Ieova ma lona Alo. I le suʻesuʻega o loo sosoo mai, o le a fesoasoani iā i tatou e malamalama ai i auala e tatou te maua ai aogā mai i le togiola, ma auala e tatou te faaalia ai le lotofaafetai.

MEA UA TATOU AʻOAʻOINA MAI I LE TOGIOLA E UIGA IĀ IEOVA

3. E faapefea i le maliu o le tagata e toʻatasi ona laveaʻiina ai le faitau miliona o tagata? (Tagaʻi foʻi i le ata.)

³ O le togiola ua tatou aʻoaʻoina mai ai le uiga o Ieova o le faamasinotonu. (Teu. 32:4) E faapefea? Seʻi mātau: O le lē usiusitaʻi o Atamu, ua tuufaasolo mai ai le agasala lea ua iʻu atu ai i le oti. (Roma 5:12) Ina ia tuusaʻoloto i tatou mai i le agasala  ma le oti, ua saunia ai e Ieova le togiola e ala mai iā Iesu. Ae e faapefea i le taulaga a le tagata lelei atoatoa e toʻatasi ona laveaʻiina ai le faitau miliona o tagata? Ua faamatalaina e le aposetolo o Paulo e faapea: “E pei ona agasala le toʻatele ona o le lē usiusitaʻi o le tagata e toʻatasi [Atamu], e faapea foʻi ona taʻuamiotonuina le toʻatele ona o le usiusitaʻi o le tagata e toʻatasi [Iesu].” (Roma 5:19; 1 Timo. 2:6) O lona uiga, ua faapologaina i tatou e le agasala ma le oti ona o le lē usiusitaʻi o le tagata lelei atoatoa e toʻatasi. Ae ua tuusaʻoloto i tatou ona o le usiusitaʻi o le tagata lelei atoatoa e toʻatasi.

4. Aiseā na lē faatagaina ai pea e Ieova le fanau usiusitaʻi a Atamu e ola e faavavau?

⁴ Pe na manaʻomia moni lava ona maliu Iesu ina ia faasaoina ai i tatou? Aiseā na lē faatagaina ai pea e Ieova le fanau usiusitaʻi a Atamu e ola e faavavau? Ona e tatou te lē lelei atoatoa, e tatou te ono manatu ai o le mea saʻo lenā e ao ona fai, peitaʻi, e lē faaatagia mai ai le faamasinotonu lelei atoatoa a Ieova. Talu ai o Ieova o le Atua e fai mea tonu, e lē mafai ona manatu māmā o ia i le gaoioiga lē usiusitaʻi a Atamu na faia ma le loto i ai.

5. E faapefea ona tatou mautinoa e faia i taimi uma e Ieova le mea saʻo?

⁵ Pe ana lē saunia foʻi e Ieova le togiola ae faataga le fanau a Atamu e ola e faavavau e ui i lo latou tulaga lē lelei atoatoa, semanū ua ia lē amanaʻia ana tapulaa i le mea saʻo ma le mea sesē. Atonu e manatu tagata o le a lē tonu le auala e faia ai e Ieova mea. O se faataʻitaʻiga, e latou te ono manatu o le a ia lē tausisi i ana folafolaga. Peitaʻi, e lē tatau ona tatou popole i lenā tulaga. Aiseā? Talu ai na faia e Ieova le mea tonu e pei o le ofoina mai o lona Alo pele e toʻatasi e ui lava o se tulaga e sili ona faigatā, ua faamautinoa mai ai e na te faia i taimi uma le mea saʻo.

6. O le ā se auala ua faaalia mai ai e Ieova lona alofa e ala i le togiola? (1 Ioane 4:​9, 10)

⁶ O le togiola e lē gata ua tatou malamalama ai i le faamasinotonu o Ieova, ae ua fesoasoani foʻi e tatou te iloa ai le tele o lona alofa. (Ioa. 3:16; faitau le 1 Ioane 4:​9, 10.) O le aʻoaʻoga o le togiola, ua faailoa mai ai e finagalo Ieova ia tatou ola e faavavau, ma avea ma vaega o lona aiga. Seʻi mātau, ina ua agasala Atamu, na tuliesea o ia e Ieova mai i Lona aiga o tagata tapuaʻi. O le iʻuga, e leʻi avea i tatou ma vaega o le aiga o le Atua ina ua tatou fananau mai. Peitaʻi o le togiola ua mafai ai ona faamagaloina e Ieova a tatou agasala, ma o i latou uma lava e faatuatua ma usiusitaʻi iā te ia o le a avea ma vaega o lona aiga. Ua mafai foʻi ona tatou mauaina i le taimi lenei se faiā  māfana ma Ieova, faapea o tatou uso tapuaʻi. Maʻeu le alofa faapelepele o Ieova iā i tatou!—Roma 5:​10, 11.

7. E faapefea i puapuaga o Iesu ona tatou malamalama ai i le tele o le alofa o Ieova mo i tatou?

⁷ E mafai ona tatou malamalama atili i le tele o le alofa o Ieova mo i tatou, pe a tatou manatunatu i le faataulaga na ia faia e saunia ai le togiola. Ua faapea mai Satani e leai se auauna a le Atua e faamaoni pea iā te Ia pe a feagai ma tulaga faigatā. Ina ia taʻusesēina Satani, na faataga ai e Ieova mafatiaga e oo iā Iesu a o leʻi maliu. (Iopu 2:​1-5; 1 Pete. 2:21) Na silasila mai Ieova a o tauemua Iesu e ona fili, sasaina faamoʻamoʻa e fitafita, tutuʻiina i luga o le laau, ma iʻu ina faapuapuagatia lona Alo pele i se maliu e sili ona tigā. (Mata. 27:​28-31, 39) Na iā Ieova le mana e taofia ai nei mea uma. O se faataʻitaʻiga, ina ua faapea mai tagata tetee: “Seʻi tuu atu la i le Atua e na te laveaʻiina o ia pe a finagalo malie iā te ia,” na mafai e Ieova ona ia faia lenā mea. (Mata. 27:​42, 43) Peitaʻi, pe ana faia faapea e le Atua, semanū e leai se togiola e totogiina ma leai ai so tatou faamoemoe. O lea, na faataga ai e Ieova lona Alo e onosaia mafatiaga seʻia oo lava ina tō lana mānava.

8. Pe na lagona e Ieova le tigā ina ua ia silasila mai o puapuagatia lona Alo? Ia faamatala. (Tagaʻi foʻi i le ata.)

⁸ E lē tatau ona tatou manatu, ona o Ieova o Lē e ona le malosi uma lava, e leai la ni ona faalogona. Talu ai na foafoaina i tatou i le faatusa o le Atua ma e iai o tatou faalogona, e talafeagai la ona tatou faapea atu e iai faalogona o Ieova. O loo faamatalaina i le Tusi Paia e “faanoanoa” o ia ma e “tigā . . . lona finagalo.” (Kene. 6:6) Seʻi mātau le mea na tupu iā Aperaamo ma Isaako. Na poloaʻia Aperaamo e ofo atu lona atalii e toʻatasi e fai ma taulaga. (Kene. 22:​9-12; Epe. 11:​17-19) Seʻi faaata le tigā o faalogona o Aperaamo a o sauni e fasiotia lona atalii e ala i le tutuʻi i se naifi. E mautinoa la e matuā sili atu ona tigā faalogona o Ieova, a o silasila mai o matuā faapuapuagatia e tagata faalēmataʻu lona Alo, seʻia oo lava ina maliu.—Tagaʻi i le vitiō Faaaʻoaʻo i lo Latou Faatuatua—Aperaamo, Vaega 2 o loo i le jw.org.

9. E faapefea i le Roma 8:​32, 38, 39 ona fesoasoani iā i tatou e malamalama ai i le tele o le alofa o Ieova mo i tatou, ma o tatou uso talitonu?

⁹ Ua tatou aʻoaʻoina mai i le togiola, e leai se isi e sili atu lona alofa iā i tatou nai lo o Ieova, e oo lava i tauaiga ma uō e sili ona tatou vavalalata i ai. (Faitau le Roma 8:​32, 38, 39.) Ua tatou mautinoa, e sili atu le alofa o Ieova iā i tatou nai lo o i tatou lava. E lē taumatea e tatou te naunau e ola e faavavau, peitaʻi, e sili atu ai le naunau o Ieova ia tatou maua le ola e faavavau. E mautinoa foʻi e tatou te naunau  e faamagalo a tatou agasala, ae e sili atu ai ona naunau Ieova e faamagalo i tatou. E pau le mea e na te faafinagaloina mai iā i tatou, o le talia lea o lana meaalofa tautele o le togiola, e ala i le faaalia o le faatuatua ma ia usiusitaʻi. O le togiola o le faailoaga silisili lea o le alofa o Ieova mo i tatou. I le lalolagi fou, o le a sili atu ona tele mea e tatou te aʻoaʻoina mai i le alofa o Ieova.—Fai. 3:11.

MEA UA TATOU AʻOAʻOINA MAI I LE TOGIOLA E UIGA IĀ IESU

10. (a) Aiseā na tigā ai faalogona o Iesu i le taimi o le a fasiotia ai o ia? (e) O ā auala na faasilisilia ai e Iesu le suafa o Ieova? (Tagaʻi foʻi i le pusa “ O le Faamaoni o Iesu na Faasilisilia ai le Suafa o Ieova.”)

¹⁰ E manatu mamafa Iesu i le talaaga o lona Tamā. (Ioa. 14:31) Na tigā faalogona o Iesu i tuuaʻiga e faapea o ia o se tagata fouvale ma upuleaga i le Atua, ma e ono faalumaina ai le suafa o lona Tamā. O le māfuaaga lea na ia tatalo ai: “Loʻu Tamā e, afai e mafai, ia aveese lenei ipu mai iā te aʻu.” (Mata. 26:39) O le faamaoni pea o Iesu iā Ieova seʻia oo lava ina maliu, na ia matuā faasilisilia ai le suafa o lona Tamā.

11. Na faapefea ona atagia mai le alofa tele o Iesu i tagata? (Ioane 13:1)

¹¹ Ua tatou aʻoaʻoina mai foʻi i le togiola e matuā manatu mamafa Iesu i tagata, aemaise lava ona soo. (Faata. 8:31; faitau le Ioane 13:1.) O se faaaʻoaʻoga, na silafia e Iesu e iai luʻi o le a ia fesagaʻia i lana faiva i le lalolagi, aemaise ai lona maliu tigā. E ui i lea, e leʻi manatu o ia o lona tofiga i le lalolagi o se mea na tau lava ina fai. Nai lo o lea, na ia tuu atoa lona loto i le galuega talaʻi, aʻoaʻo atu, ma auauna atu i isi. E oo lava i le aso na maliu ai, na ia faaalu se taimi e fufuluina ai vae o ona aposetolo, aʻoaʻo, faalaeiau ma faamāfanafana i latou. (Ioa. 13:​12-15) A o tautau o ia i le  laau, na faaalu e Iesu se taimi e faailoa atu ai i le tagata solitulafono na i ona autafa se faamoemoe, ma talosaga atu iā Ioane ina ia tausia lona tinā. (Luka 23:​42, 43; Ioa. 19:​26, 27) O lea, o le tele o le alofa o Iesu na atagia mai i lona maliu, ae faapea foʻi mea uma na ia faia i lona soifuaga i le lalolagi.

12. O le ā le uiga o le manatu o loo faaauau pea ona faia e Iesu faataulaga mo i tatou?

¹² E ui e na o le “faatasi lava” ona maliu Keriso, ae o loo faaauau pea ona ia faia faataulaga mo i tatou. (Roma 6:10) E faapefea? O loo faaauau ona galue mamafa Iesu ina ia maua ai e tagata aogā mai i lana togiola. O se faaaʻoaʻoga, o loo pisi o ia i lenei taimi o se Tupu, o se Ositaulaga Sili, ma o le ulu o le faapotopotoga. (1 Kori. 15:25; Efe. 5:23; Epe. 2:17) O loo ia vaavaaia le galuega o le aoaoina mai o le ʻaufaauuina ma le motu o tagata e toʻatele, lea o le a māeʻa a o leʻi faaiʻuina le puapuaga tele. a (Mata. 25:32; Mare. 13:27) E na te faamautinoa foʻi o loo lava meaʻai faaleagaga e fafagaina ai ana auauna faamaoni i nei aso e gata ai. (Mata. 24:45) A o faagasolo lana Pulega mo le Afe Tausaga, o le a ia saunia mai pea mea e tatou te manaʻomia. O le mea moni, e leʻi tau ina foaʻi mai e Ieova lona Alo e maliu mo i tatou, ae ina ia faia foʻi isi mea e tele mo i tatou!

IA FAAAUAU ONA FAI AU SAʻILIʻILIGA

13. E faapefea i le manatunatu loloto ona fesoasoani iā i tatou e aʻoaʻoina atili pea e uiga i le alofa o le Atua ma Keriso mo i tatou?

¹³ E mafai ona tatou aʻoaʻo atili e faatatau i le alofa o Ieova le Atua ma Iesu Keriso mo i tatou, e ala i le faaauau ona manatunatu loloto i mea ua la faia mo i tatou. Atonu i le vaitaimi o le Faamanatuga o lenei tausaga, e mafai ona e faitau i tusi o le Evagelia. Aua e te taumafai e faitau uma mataupu i le taimi e tasi, pe faatopelau le faitau. Nai lo o lea, a o faitau, ia vaavaai totoʻa i nisi o māfuaaga e ao ai ona tatou alolofa iā Ieova ma Iesu. E mafai foʻi ona e faasoa atu i isi mea ua e aʻoaʻoina mai i lau faitauga Tusi Paia.

14. E tusa ai o le Salamo 119:97 ma le faamatalaga pito i lalo, e faapefea ona fesoasoani a tatou saʻiliʻiliga e aʻoaʻo atili ai e uiga i le togiola ma isi aʻoaʻoga? (Tagaʻi foʻi i le ata.)

¹⁴ Pe afai ua tele tausaga talu ona e iai i le upu moni, atonu e te taumānatu pe e iai nisi manatu fou e mafai ona e aʻoaʻoina mai i le faamasinotonu o le Atua, o lona alofa, ma le togiola. O le mea moni, e lē gata mai mea e  tatou te aʻoaʻoina i nei manatu ma isi foʻi mataupu. O lea, o le ā e mafai ona e faia? Ia faaaogā le tele o faamatalaga o loo maua i a tatou lomiga. Pe a iai se manatu i le Tusi Paia e te lē o malamalama i ai, ia fai ni au saʻiliʻiliga. A o faagasolo le aso, ia manatunatu loloto i mea ua e aʻoaʻoina e faatatau iā Ieova, o lona Alo ma lo la alolofa iā te oe.—Faitau le Salamo 119:97 ma le faamatalaga pito i lalo.

15. Aiseā e tatau ai ona tatou saʻiliʻili pea mo ni ʻoa tautele mai i le Tusi Paia?

¹⁵ Aua e te lotovaivai pe afai e lē maua se manatu fou po o se manatu mataʻina i taimi uma e fai ai lau faitauga Tusi Paia po o au saʻiliʻiliga. Ia manatu iā te oe lava e pei o se tagata e saʻili mo ni auro! E umi se taimi po o ni aso o galulue ma le onosaʻi i latou nei, ona faatoʻā maua lea o se auro itiiti. Peitaʻi, e latou te lē fiugofie ona e oo lava i sina auro itiiti e matuā tāua iā i latou. Pe e lē sili atu la ona tāua iā i tatou ʻoa tautele o upu moni o le Tusi Paia? (Sala. 119:127; Faata. 8:10) O lea, ia onosaʻi ma pipii pea i lau faasologa o le faitauina o le Tusi Paia.—Sala. 1:2.

16. E faapefea ona tatou faaaʻoaʻo iā Ieova ma Iesu?

¹⁶ A o faia au saʻiliʻiliga, ia mafaufau i auala e mafai ona e faatatauina ai mea ua e aʻoaʻoina. O se faaaʻoaʻoga, ia faaaʻoaʻo i le faamasinotonu o Ieova e ala i lou feutagaʻi ma isi i se auala lē faailoga tagata. Ia faaaʻoaʻo i le alofa o Iesu mo lona Tamā ma tagata, e ala i le onosaia o puapuaga ona o le suafa o Ieova, ma faia taumafaiga uma e fesoasoani ai i ou uso Kerisiano. E lē gata i lea, ia faaaʻoaʻo iā Iesu e ala i le molimau atu i isi ina ia latou maua ai foʻi aogā mai i le meaalofa tautele a Ieova.

17. O le ā o le a talanoaina i le mataupu o loo sosoo mai?

¹⁷ O le tele e tatou te malamalama ai ma talisapaia le togiola, o le faalolotoina foʻi lenā o lo tatou alofa mo Ieova ma lona Alo. O le iʻuga, o le a atili ai foʻi ona la alolofa iā i tatou. (Ioa. 14:21; Iako. 4:8) O lea, seʻi faaauau ona tatou faaaogā sauniuniga uma mai iā Ieova ina ia aʻoaʻo atili ai e faatatau i le togiola. O le a tatou talanoaina i le mataupu o loo sosoo mai nisi o auala e tatou te maua ai aogā mai i le togiola, ma le auala e faaalia ai lo tatou lotofaafetai mo le alofa o Ieova.