1. O le ā le lapataʻiga na avatu e le aposetolo o Paulo i Kerisiano faauuina?

“AUA tou te mulimuli i lenei faiga o mea a le lalolagi.” (Roma 12:2) O le lapataʻiga lenā a le aposetolo o Paulo i Kerisiano i le uluaʻi senituri. Aiseā na ia avatu ai lenā lapataʻiga malosi i tane ma fafine na tuuina atu i le Atua ma faauuina i le agaga paia?​—Roma 1:7.

2-3. Ua faapefea ona taumafai Satani e faaliliuese i tatou mai iā Ieova, ae e mafai faapefea ona tatou liaʻieseina mea “ua matuā mautū” i o tatou mafaufau?

² Na popole Paulo talu ai sa iai nisi o Kerisiano e foliga mai na taaʻina i manatu sesē ma filosofia na faaauiluma e le lalolagi a Satani. (Efe. 4:17-19) E mafai ona tupu lenā mea iā i tatou. Ua faaaogā e Satani le atua o lenei faiga o mea, togafiti eseese ina ia taumafai ai e faaliliuese i tatou mai iā Ieova. O se tasi o na togafiti, o le faaaogā lea o o tatou faanaunauga manatu faapito o loo iai po o le fia avea foʻi ma sē e taʻutaʻua. E mafai foʻi ona ia faaaogāina o tatou talaaga, aganuu, po o aʻoaʻoga ina ia tatou lolo atu ai i ona manatu.

³ Pe e mafai ona tatou liaʻieseina mea “ua matuā mautū” i o tatou mafaufau? (2 Kori. 10:4) Ia mātau le tali a Paulo: “Ua matou faatoʻilaloina manatu sesē ma mea maualuluga uma e tetee i le poto i le Atua; ma ua matou faatoʻilaloina manatu uma ina ia usiusitaʻi i le Keriso.” (2 Kori. 10:5) Ioe, o le fesoasoani  a Ieova e mafai ai ona tatou faatoʻilaloina so o se manatu sesē. E pei lava ona aveese e vailaau faafomaʻi aafiaga o se ona, e mafai foʻi e le Afioga a le Atua ona aveese aafiaga leaga o le lalolagi a Satani mai iā i tatou.

4. O ā suiga na manaʻomia ona faia e le toʻatele i le taimi na faatoʻā aʻoaʻoina ai le upu moni?

⁴ Seʻi toe mafaufau i suiga na manaʻomia ona e faia i le taimi na faatoʻā e aʻoaʻoina ai le upu moni, ma filifili ina ia auauna iā Ieova. O le toʻatele o i tatou na manaʻomia ona lafoaʻia ni amioga leaga. (1 Kori. 6:9-11) Maʻeu lo tatou lotofaafetai, ona o le fesoasoani a Ieova ua mafai ai ona tatou manumalo i na amioga leaga!

5. E tusa ai ma le Roma 12:2, o ā gaoioiga e lua e manaʻomia ona tatou faia?

⁵ Peitaʻi, aua neʻi o tatou manatu e lē manaʻomia ona faia nisi suiga. E ui lava e tatou te lē o toe faia agasala matuiā sa tatou faia a o leʻi papatiso, ae e manaʻomia pea ona tatou taumafai malosi ina ia ʻalofia so o se mea, e faaosoosoina ai i tatou e toe faia na amioga tuai. E faapefea? Ua faapea mai Paulo: “Aua tou te mulimuli i lenei faiga o mea a le lalolagi, ae peitaʻi ia liliu e ala i le suia o o outou mafaufau.” (Roma 12:2) O lea, e lua mea e manaʻomia ona tatou faia. Muamua, ʻaua neʻi mulimuli’ pe taaʻina i tatou e lenei lalolagi. Lua, “ia liliu” e ala i le suia o o tatou mafaufau.

6. O le ā e tatou te aʻoaʻoina mai i upu a Iesu o loo i le Mataio 12:43-45?

⁶ O le suiga sa taʻua e Paulo, e lē na o le suia o foliga vaaia o se tagata, ae e aofia ai lo tatou tagata atoa. (Tagaʻi i le pusa “ Suia Atoatoa pe na Ona Faafoliga Atu?”) E manaʻomia ona suia atoatoa o tatou mafaufau, e aofia ai o tatou uiga moni, faalogona loloto, ma faanaunauga. O lea, e manaʻomia ona tatou fesili ifo, ʻPo o suiga o loo oʻu faia ina  ia avea ai o se Kerisiano e na o le faafoliga atu i fafo, ae e lē o suia atoatoa ai loʻu loto ma loʻu mafaufau?’ E tāua ona iloa le eseesega. Na faailoa mai e Iesu le mea e manaʻomia ona fai i le Mataio 12:43-45. (Faitau.) Ua faamatilatila mai i lenā mau le manatu tāua lenei: E lē lava le tau ina liaʻiese o manatu sesē, ae e manaʻomia ona tatou suia na manatu i manatu o le Atua.

7. E faapefea ona suia lo tatou tagata lilo i totonu?

⁷ Pe e mafai ona suia o tatou faanaunauga moni po o lo tatou tagata lilo i totonu? Ua faapea mai le Afioga a le Atua ina ia faaauau ona “faafouina le malosi e pulea ai o outou mafaufau, ma ia oofu i le tagata fou na foafoaina e tusa ma le finagalo o le Atua, i le amiotonu moni ma le faamaoni.” (Efe. 4:23, 24) Ioe, e mafai ona suia lo tatou tagata lilo i totonu, ae e lē faigofie ona faia faapea. E lē lava le tau ina teena o faanaunauga ma gaoioiga sesē, ae e manaʻomia ona suia “le malosi e pulea ai o [tatou] mafaufau.” E aofia ai le suia o mea e tatou te moomoo i ai, o tatou faanaunauga, ma uunaʻiga e tatou te faia ai mea. O na suiga o ni gaoioiga e faaauau pea ona fai.

8-9. E faapefea i le faaaʻoaʻoga a se tasi uso ona faamatilatila mai ai, le manaʻomia ona suia o lo tatou tagata lilo i totonu?

⁸ Seʻi o tatou iloiloina le faaaʻoaʻoga i se uso e sauā lona talaaga. Ina ua tuu lona inu ʻava malosi ma le faamisa, na agavaa o ia mo le papatisoga. O se molimau lelei lea i le nuu laʻitiiti sa nofo ai. E leʻi leva talu ona ia papatiso ae tulaʻi mai se tofotofoga e na te leʻi faatalitalia. I se tasi afiafi, na alu atu ai se tamāloa onā i le fale o le uso ma luʻi o ia ina ia la fufusu. I le taimi muamua, e leʻi manaʻo le uso e fufusu ma le tamāloa. Peitaʻi, ina ua faifai le tamāloa i le suafa o Ieova, na lē mafai e le uso ona tatali lona ita ma ia faaoolima ai loa i le tamāloa. O le ā le faafitauli? E ui na fesoasoani le suʻesuʻeina o le Tusi Paia i le uso ina ia taofia ai o ia mai i le faia o gaoioiga sauā, ae e leʻi mafai ona ia suia le malosi e pulea ai lona mafaufau. I se isi faaupuga, e leʻi suia lona tagata lilo i totonu.

⁹ E ui i lea, na faia pea taumafaiga a le uso. (Faata. 24:16) O le fesoasoani a toeaina na ia agaʻigaʻi ai pea i luma faaleagaga, ma iʻu lava ina agavaa ai o ia e avea o se toeaina. I se tasi afiafi i fafo o le Maota mo Sauniga, na toe tulaʻi mai ai foʻi se tofotofoga e taitutusa ma le tofotofoga sa ia fesagaʻia i tausaga ua mavae. Na taumafai se tasi o tamāloa onā e fasi se toeaina o le faapotopotoga. O le ā na faia e lo tatou uso? Na ia talanoa i le tamāloa onā i se auala toʻafilemu ma lotomaulalo, ma taʻitaʻi o ia i lona fale. Aiseā ua suia ai le auala ua tali atu ai le uso? Ua suia le malosi e pulea ai lona mafaufau. Ua suia lona tagata lilo i totonu, ma ua avea ai o ia o se tagata e filemu ma lotomaulalo. O le iʻuga, na faamamaluina ai Ieova.

10. O le ā e tatau ona tatou faia ina ia suia ai lo tatou tagata lilo i totonu?

¹⁰ E lē faafuaseʻi pe otometi ona tutupu nei suiga. E manaʻomia ona faia ni a tatou “taumafaiga filigā” mo le tele o tausaga. (2 Pete. 1:5) Ina ia mafai ona faia na suiga, e lē lava le tau ina iai i totonu o le upu moni mo se taimi umi. Peitaʻi, e manaʻomia ona tatou faia le mea sili ina ia suia ai o tatou tagata lilo i totonu. O lea, seʻi o tatou iloiloina nisi o auala o le a fesoasoani iā i tatou ina ia faia ai na suiga.

11. E faapefea i le tatalo ona fesoasoani iā i tatou ina ia suia le malosi e pulea ai o tatou mafaufau?

¹¹ O le vala tāua muamua, o le tatalo. E manaʻomia ona tatou tatalo e pei o le faisalamo e faapea: “Le Atua e, ia e faia se lotomamā mo aʻu, ma ia e tuu foʻi i totonu iā te aʻu se agaga fou, o se agaga e tumau.” (Sala. 51:10) E tatau ona tatou amanaʻia le mea moni, e manaʻomia ona suia le malosi e pulea ai o tatou mafaufau ma talosaga atu iā Ieova mo le fesoasoani. E faapefea ona tatou mautinoa o le a fesoasoani mai Ieova ina ia tatou faia na suiga? E faalaeiauina i tatou i le folafolaga a Ieova i tagata Isaraelu lotomaaa i taimi o Esekielu e faapea: “O le a ou tuuina atu iā i latou le loto e tasi, ma o le a ou tuuina i totonu o i latou se agaga fou . . . ma tuuina atu iā te i latou se lotovaivai,” po o se loto e faigofie ona taliaina le taʻitaʻiga a le Atua. (Eseki. 11:19) Na finagalo Ieova e fesoasoani i na tagata Isaraelu ina ia suia o latou loto, ma e finagalo foʻi o ia ina ia fesoasoani mai iā i tatou.

12-13. (a) E tusa ai ma le Salamo 119:59, o le ā e manaʻomia ona tatou manatunatu loloto i ai? (e) O ā fesili e tatau ona e fesili ifo ai?

¹² O le vala tāua lona lua, o le manatunatu loloto. A o tatou vaavaai totoʻa i le Afioga a le Atua i aso taʻitasi, e manaʻomia ona faaalu se taimi e tatou te manatunatu loloto ai, po o ā manatu ma faalogona e manaʻomia ona suia. (Faitau le Salamo 119:59; Epe. 4:12; Iako. 1:25) E tatau ona tatou iloa ni faanaunauga o loo iā i tatou ia e taaʻina i filosofia faaletagata. E manaʻomia foʻi ona tatou taliaina e iai o tatou vaivaiga, ma faia taumafaiga malolosi ina ia liaʻiese ai na vaivaiga.

¹³ O se faataʻitaʻiga, ia fesili ifo: ʻPo o iai sina faailoga o le matauʻa po o le lotoleaga i loʻu loto?’ (1 Pete. 2:1) ʻPo ou te faamaualuga ona o loʻu talaaga, tulaga tauaʻoaʻoga, po o le tulaga tau tamaoaiga?’ (Faata. 16:5) ʻPo ou te vaai maulalo i isi e lē taualoa o latou tulaga, pe e ese foʻi o latou ituaiga?’ (Iako. 2:2-4) ʻPo o oʻu manaʻo i mea o loo i le lalolagi a Satani?’ (1 Ioa. 2:15-17) ʻPo ou te fiafia i faafiafiaga lē mamā ma sauā?’ (Sala. 97:10; 101:3; Amo. 5:15) O au tali i na fesili, o le a iloa ai vala e manaʻomia ona e galue ina ia faaleleia. O le faatoʻilaloina o manatu sesē “ua matuā mautū” i o tatou loto, o le a faafiafiaina ai lo tatou Tamā i le lagi.​—Sala. 19:14.

14. Aiseā e tāua ai le filifili o aumea lelei?

¹⁴ O le vala tāua lona tolu, o le filifili o aumea lelei. E tusa pe e tatou te iloaina pe leai, ae e telē le aafiaga o a tatou aumea iā i tatou. (Faata. 13:20) I totonu o fale faigaluega po o le aʻoga, e siʻomia i tatou i tagata e lē fesoasoani mai ina ia tatou mafaufau i le auala e finagalo malie i ai le Atua. Peitaʻi, e mafai ona tatou maua aumea e sili ona lelei i a tatou sauniga faa-Kerisiano, lea e uunaʻia pe faatupu ai iā i tatou “le alofa ma galuega lelei.”​—Epe. 10:24, 25.

15-16. Ua faapefea ona taumafai Satani e suia o tatou mafaufauga?

¹⁵ Ia manatua, o loo matuā vilivilitaʻi Satani ina ia suia o tatou mafaufauga. E na te faaaogā so o se manatu sesē, ina ia faalēaogāina ai aafiaga lelei o le Afioga a le Atua i o tatou mafaufauga.

¹⁶ O loo faaauau pea ona fai e Satani le fesili na ia fai atu iā Eva i le faatoʻaga o Etena: “E moni ea na fetalai mai le Atua . . . ?” (Kene. 3:1) I lenei lalolagi o loo pulea e Satani, e masani lava ona tatou faalogo ai i fesili tofotofo  nei: ʻPe e moni ea e lē talia e le Atua le tauatane ma le tauafafine? Pe e moni ea e faasā e le Atua ona e faamanatuina le Kerisimasi ma aso fanau? Pe e moni ea e faasā e le Atua tuigātoto? Pe e moni ea e finagalo le Atua e aua neʻi e faifaimea faatasi ma ē e pele iā te oe ua faateʻaina, ae o ia o se Atua alofa?’

17. O le ā e tatau ona tatou faia pe a fesiligia i tatou e faatatau i o tatou talitonuga, ma o le ā le iʻuga e pei ona taʻua i le Kolose 2:6, 7?

¹⁷ E manaʻomia ona tatou mautinoa i o tatou talitonuga. Pe afai e faaauau ona lē maua ni tali i fesili tāua e faatatau i o tatou talitonuga, o le a amata ai ona tatou matuā masalosalo i o tatou talitonuga. O na masalosaloga e iʻu atu ai i le faasesēina o o tatou mafaufau ma faavaatuʻia ai lo tatou faatuatua. O le ā la e ao ona tatou faia? Ua faapea mai le Tusi Paia ia suia o tatou mafaufau, ina ia faamaonia e i tatou lava “po o le ā le finagalo o le Atua, lea e lelei, e mālie, ma lelei atoatoa.” (Roma 12:2) Pe a tatou suʻesuʻeina e lē aunoa le Tusi Paia, o le a mafai ai ona tatou faamaonia e i tatou lava le moni o manatu ua tatou aʻoaʻoina mai ai. O le a tatou mautinoa atoatoa ai e tonu tapulaa a Ieova. O le iʻuga, o le a pei i tatou o se laau e matuā malosi ona aa, o le a tatou matuā mauaa, ma “mausalī i le faatuatua.”​—Faitau le Kolose 2:6, 7.

18. O le ā e fesoasoani ina ia puipuia ai i tatou mai i aafiaga leaga o le lalolagi a Satani?

¹⁸ O lau tiute tauave le faamausalīina o lou lava faatuatua. O lea, ia faaauau ona faafouina le malosi e pulea ai lou mafaufau. Ia tatalo e lē aunoa, ma ʻaiʻoi atu mo le fesoasoani a le agaga o Ieova. Ia manatunatu loloto, ma iloilo e lē aunoa ou manatu ma uunaʻiga. Ia saʻili aumea lelei, ma faifaimea faatasi ma ē o le a fesoasoani iā te oe ina ia suia ou mafaufauga. O le faia faapea, o le a puipuia ai oe mai i aafiaga leaga o le lalolagi a Satani, ma faatoʻilaloina ai “manatu sesē ma mea maualuluga uma e tetee i le poto i le Atua.”​—2 Kori. 10:5.