E TATOU te iloa uma o Ieova o loo taʻitaʻiina ona tagata, ma foaʻi mai iā i latou mea e manaʻomia ina ia vavalalata atu ai iā te ia i nei “aso e gata ai.” (2 Timo. 3:1) Ae e tatau iā i tatou uma ona gaoioi e tusa ai ma lenā taʻitaʻiga. E pei lo tatou tulaga o tagata Isaraelu a o iai i le toafa. Na tatau i tagata Isaraelu ona gaoioi pe a faalogoina le leo o le pū.

Na faatonuina Mose e Ieova ina ia faaaogā se samala e faia ai ni pū siliva se lua, e na te faaaogāina i le taimi “e faapotopoto mai ai le faapotopotoga ma le taimi e tapena ese ai faleʻie.” (Nu. 10:2) Na tatau i ositaulaga ona iliina pū i ni auala eseese, ina ia taʻu atu ai i tagata le mea e ao ona fai. (Nu. 10:3-8) I aso nei, e eseese auala ua maua ai e tagata o le Atua taʻiala. O le a tatou talanoaina ni auala se tolu o loo tatou maua ai faatonuga, ma faatusatusa atu i le iliina o pū i Isaraelu anamua. O nei auala e tolu e aofia ai taimi e valaaulia ai i tatou i ni faatasiga tetele, o taimi e maua ai e toeaina ni toleniga, ma pe a toe teuteuina pe fetuunaʻi ni taʻiala mo faapotopotoga uma.

Sa tatau i ositaulaga ona iliina pū e lua, pe a finagalo Ieova e faapotopoto “le faapotopotoga atoa” i le faitotoʻa i le itu i sasaʻe o le faleʻie paia. (Nu. 10:3) Na lagona lelei le leo o le pū e ituaiga uma o Isaraelu na tolauapi faataamilo i le faleʻie paia i ni vaega se fā. Na ono vave tali atu i latou sa tolauapi e latalata i le faitotoʻa, ae o isi na nonofo mamao ese, sa ono manaʻomia le tele o le taimi ma taumafaiga ina ia taunuu ai i le faatasiga. E tusa lava po o le ā le tulaga, ae na finagalo Ieova ina ia faapotopoto mai tagata uma, ma faalogologo ma usitaʻi i ana faatonuga.

I aso nei, e tatou te lē o faapotopoto i se faleʻie paia. Ae ua valaaulia i tatou i faatasiga a tagata o le Atua, e pei o tauaofiaga itumalo ma isi faatasiga faapitoa, lea e maua ai faamatalaga ma taʻiala tāua. E tutusa taʻiala ma faatonuga e maua e tagata o Ieova i le lalolagi aoao. O lea, o ē e talia le valaaulia e auai i nei faatasiga, e latou te olioli e faapotopoto faatasi o se vaega o ni tagata fiafia. O nisi e mamao le mea e faimalaga mai ai nai lo o isi. Peitaʻi, o i latou uma e auai i nei faatasiga e ioe i le matuā tauia o a latou taumafaiga.

Ae faapefea i latou o loo iai i vaega maotua e mamao ese mai i so o se faatasiga tele? O le fesoasoani a tekinolosi faaonapōnei, ua mafai ai e le toʻatele o i latou na ona maua aogā mai i polokalame o loo maua foʻi e isi, ma lagona ai ua avea i latou o se vaega o na faatasiga tetele. O se faataʻitaʻiga, i se tasi o asiasiga a se sui o le ofisa ulu, na faia ai e uso i le lālā i Benin se auala ina ia maua ai le polokalame e i latou i Arlit, Niger, o se taulaga e iai le maina i le toafa o Sahara. E toʻa 21 i latou na faapotopoto ai i inā, e aofia ai uso, o  tuafāfine, ma ē e faaalia le fiafia. E ui sa latou iai i se nofoaga e mamao ese, ae na latou lagona le autasi ma ē e toʻa 44,131 na iai i lenā faatasiga. Na tusi mai se uso: “Faafetai, faafetai tele lava mo le faasalalauina mai o lenei polokalame. Ua matou iloa ai le tele o lo outou alofa iā i matou.”

Pe afai e na o le tasi le pū e iliina e ositaulaga Isaraelu, e na o “taʻitaʻi o ulu o le faitau afe” na tatau ona faapotopoto mai i le faleʻie o le feiloaʻiga. (Nu. 10:4) O i inā, na latou maua ai faamatalaga ma toleniga mai iā Mose, e fesoasoani iā i latou i le faatinoina o o latou tiute tauave i o latou ituaiga. Pe ana faapea o oe o se tasi o na taʻitaʻi, po o le a e faia taumafaiga uma ina ia iai i inā ma maua ai aogā?

I aso nei, e lē o avea toeaina o faapotopotoga o ni “taʻitaʻi” pe e latou te fia pule foʻi i le lafu a le Atua o loo latou tausia. (1 Pete. 5:1-3) Peitaʻi, e latou te faia taumafaiga uma ina ia leoleoina le lafu. O lea, e latou te nofosauni e talia le valaaulia mo toleniga faaopoopo e pei o le Aʻoga o le Faiva o le Malo. I na aʻoga, e aʻoaʻoina ai e toeaina auala e faaleleia atili ai lo latou taulimaina o mataupu i le faapotopotoga. O le faia faapea, e vavalalata atu ai iā Ieova toeaina ma i latou o loo latou leoleoina. E tusa po ua e auai i se tasi o na aʻoga pe e leai, ae atonu o loo e maua aogā mai iā i latou na auai ai.

E iai isi taimi e ili faatetetete ai le pū e ositaulaga Isaraelu, e faailoa atu ai i le nuu ua finagalo Ieova ina ia ō atu e tolauapi i se isi nofoaga. (Nu. 10:5, 6) Pe a siitia ese, e mataʻina le auala na faamaopoopo ai e le nuu o Isaraelu nei suiga, ae na manaʻomia ai ona latou galulue mamafa. O nisi taimi, e ono lē mautonu ai nisi o tagata Isaraelu e fai nei suiga. Aiseā?

Atonu e manatu nisi ua sau soo tele le valaau ina ia suia le mea e tolauapi ai, pe ua sau foʻi le valaau i ni taimi e leʻi faatalitalia. O “nisi taimi ua iai pea le ao mai i le afiafipō seʻia oo i le taeao,” a o isi taimi “pe lua ni aso, po o se masina pe sili atu foʻi” ma latou ō atu i se isi nofoaga fou. (Nu. 9:21, 22) Na faafia ona suia le mea e tolauapi ai le nuu? O loo taʻua i le Numera mataupu e 33 nisi o nofoaga eseese e 40 na tolauapi ai le nuu o Isaraelu.

I nisi taimi, e ono maua ai e tagata Isaraelu se nofoaga paolo e tolauapi ai, ma atonu sa avea o se nofoaga lelei e mapu ai i le “toafa . . . telē ma matuā mataʻutia.” (Teu. 1:19) O lea, na ono faaosoosoina ai nisi e mafaufau, atonu e lē manaia le nofoaga lea o le a ō atu i ai.

O le taimi lava e amata ai ona tuua e ituaiga o Isaraelu le mea sa tolauapi ai, atonu na faigatā mo nisi ona faatalitali ma le onosaʻi i le taimi latou te faia ai faapea. E ui na lagona e tagata uma le leo o le pū na ili faatetetete, ae e leʻi mafai e tagata uma ona tuumuli uma i le taimi e tasi. Pe a iliina faatetetete le pū, na faailoa atu ai i ituaiga na tolauapi i le itu i sasaʻe, lea e iai Iuta, Isakara ma Sepulona, ua tatau ona latou tuumuli ese. (Nu. 2:3-7; 10:5, 6) Pe a uma ona latou ō ese, ona toe ili faatetetete lea o le pū e ositaulaga e fai ma faailo i ituaiga e tolu sa tolauapi i le itu i saute, ua tatau foʻi ona latou tuumuli. Na faaauau ona faia faapea e ositaulaga seʻia oo ina tuumuli uma ese le nuu atoa.

Atonu na iai se taimi na e lagona ai le lē mautonu ona o suiga i le faalapotopotoga. Atonu ua lofitūina oe ona o le tele naʻuā o suiga e te leʻi faatalitalia. Pe atonu sa e fiafia foʻi i le auala na faia ai mea i le taimi ua teʻa, ma manatu maʻimau pe a na lē suia. E tusa po o le ā le tulaga, ae atonu na tofotofoina ai lou onosaʻi ma na manaʻomia se taimi e te faamasani ai i suiga. Peitaʻi, pe afai e tatou te taumafai malosi e talia suiga, atonu o le a tatou iloa ai e lelei suiga mo i tatou ma o le a fiafia mai ai le finagalo o Ieova.

I aso o Mose, na taʻitaʻiina ai e Ieova le faitau miliona o tane, fafine ma tamaiti i le toafa. Pe ana leai lana taʻitaʻiga ma lana tausiga, semanū e lē mafai ona faasaoina na tagata. O loo taʻitaʻiina foʻi i tatou e Ieova i nei aso faigatā. E fesoasoani mai o ia ina ia tatou vavalalata atu iā te ia ma malosi pea lo tatou faatuatua. O lea, tau ina ia tatou maumauaʻi e faia mea uma ina ia faaalia le usiusitaʻi e pei o tagata Isaraelu, pe a tatou faalogoina le leo o le pū!