1. O le ā ua faia e Ieova mo i tatou taʻitoʻatasi?

UA TOSINA mai e Ieova i tatou taʻitoʻatasi iā te ia. (Ioa. 6:44) Seʻi mafaufau i le tāua o lenā mea. A o silasila mai Ieova i le faitau piliona o tagata i lenei lalolagi, na ia silafia ai se mea tautele o loo iā te oe, o se lotofaamaoni e mafai ona aʻoaʻoina e alofa iā te ia. (1 No. 28:9) E silafia e Ieova oe, e malamalama iā te oe ma e alofa iā te oe. Maʻeu le faalaeiau o lenā manatu!

2. Na faapefea ona faataʻitaʻi e Iesu le manatu mamafa o Ieova i Ana mamoe?

² E matuā manatu mamafa Ieova iā te oe, ma e manatu mamafa foʻi o ia i ou uso ma tuafāfine Kerisiano uma. Ina ia faataʻitaʻi lenei manatu, na faatusaina e Iesu Ieova i se leoleo mamoe. O le ā e faia e se leoleo mamoe pe a leiloa se mamoe e tasi mai i ana mamoe e 100? E na te ʻtuua le iva sefulu iva i le mauga, ae alu atu e saʻili mai le tasi ua sē.’ E lē ita le leoleo mamoe pe a maua le mamoe na sē, ae e fiafia o ia. O le ā le manatu tāua? E tāua mamoe uma iā Ieova. Na fetalai Iesu: “E faapena foʻi loʻu Tamā o i le lagi e lē finagalo e faaumatia se tasi o i latou nei e faatauvaa.”—Mata. 18:12-14.

3. O le ā o le a tatou talanoaina i lenei suʻesuʻega?

³ E tatou te lē mananaʻo e avea i tatou ma māfuaaga o le lotovaivai o se uso po o se tuafafine. E faapefea ona tatou ʻalofia le faatausuai o isi? O le ā e mafai ona tatou faia pe a faatigā mai se tasi iā i tatou? O le a taliina na fesili i lenei suʻesuʻega.  Ae seʻi o tatou talanoaina muamua po o ai e faasino i ai ʻi latou e faatauvaa’ o loo i le Mataio mataupu e 18.

4. O ai e faasino i ai ʻi latou e faatauvaa’?

⁴ O ʻi latou e faatauvaa’ e faasino atu i soo uma o Iesu, po o le ā lava lo latou matutua ae e “pei o tamaiti” ona e lotomalilie e aʻoaʻoina i latou e Iesu. (Mata. 18:3) E ui e eseese o latou talaaga, aganuu, manatu ma uiga, ae e latou te faaalia uma le faatuatua iā Keriso, ma e alofa tele Iesu iā i latou.​—Mata. 18:6; Ioa. 1:12.

5. O ā faalogona o Ieova pe a faatausuai ma faatigā se tasi i sana auauna?

⁵ E pele iā Ieova ʻi latou uma e faatauvaa.’ Ina ia malamalama i ona faalogona, seʻi o tatou iloilo o tatou faalogona e faatatau i tamaiti. E pele i latou iā i tatou. E tatou te mananaʻo e puipuia i latou auā e lē lava lo latou malosi, e leai se poto masani ma le atamai e pei o tagata matutua. O le mea moni, e tatou te lē fia vaai atu o lavea se tasi, ae e sili atu ona tatou lē fiafia ma feita pe a lavea se tamaitiiti. E faapena foʻi Ieova, e finagalo o ia e puipuia i tatou, ma e toʻatamaʻi ma lē fiafia pe a fai e se tasi se mea e tausuai pe tigā ai se tasi o Ona tagata.​—Isa. 63:9; Mare. 9:42.

6. E tusa ai ma le 1 Korinito 1:26-29, o le ā le vaaiga a le lalolagi i soo o Iesu?

⁶ O le ā le isi auala e pei ai soo o Iesu o ʻi latou e faatauvaa’? Seʻi manatu, o ai e sili ona tāua i le vaaiga a le lalolagi? O i latou e mauoloa, taʻutaʻua ma iai le pule. Ae e foliga lē tāua ma “faatauvaa” soo o Iesu. (Faitau le 1 Korinito 1:26-29.) Peitaʻi, e lē o le auala lenā e silasila ai Ieova iā i latou.

7. O le ā e finagalo Ieova e tatou te manatu i ai e faatatau i o tatou uso ma tuafāfine?

⁷ E alofa Ieova i ana auauna uma e tusa po ua leva ona auauna iā te ia pe e fou mai foʻi i le upu moni. E tāua iā Ieova o tatou uso ma tuafāfine uma, e tatau foʻi la ona tāua i latou iā i tatou. E tatou te mananaʻo e “alolofa i le ʻauuso atoa,” ae e lē na o nisi o i latou. (1 Pete. 2:17) E tatau la ona tatou lotomalilie e faia so o se mea e puipuia ma tausia ai i latou. Pe a tatou iloa ua tatou faatigā i se tasi ma ita ai, e lē tatau ona tatou lē ano i ai ma faapea e maʻaleʻale faalogona o lenā tagata ma e tatau ona ia faagalo lenā mea. Aiseā e ono feita ai nisi? O nisi uso ma tuafāfine, e itaitagofie ona o olaga na ola aʻe ai. O nisi e fou i le upu moni, ma e leʻi aʻoaʻoina i latou i le auala e feagai ai ma masei o isi. Po o le ā lava le tulaga, e tatau ona tatou faia le mea e mafai ina ia faasaʻo ai mea. E lē gata i lea, o se tagata e itaitagofie e tatau ona ia iloa e lē lelei lenā uiga, ma e manaʻomia ona galue i ai ina ia faaleleia. E tatau ona ia faia lenā mea ina ia maua ai le filemu o le mafaufau ma lelei ai le faiā ma isi.

8. O le ā le manatu taatele na aafia ai soo o Iesu?

⁸ Aiseā na fetalai ai Iesu e faatatau iā i ʻlatou e faatauvaa’? Ona na fesili atu ona soo iā te ia: “O ai e sili i le malo o le lagi?” (Mata. 18:1) O le toʻatele o tagata Iutaia i lenā taimi, na matuā tāua iā i latou tulaga faaaloalogia ma taualoa. Ua faapea mai se tasi tagata atamai: “E saʻili e tagata mea e sili ona tāua iā i latou, o le viiga, talaaga, lauiloa, amanaʻia ma le faaaloalogia.”

9. O le ā na tatau ona faia e soo o Iesu?

⁹ Na silafia e Iesu, e tatau i ona soo ona galulue mamafa e liaʻiese mai i o latou loto le agaga faatautavā sa mauaa i le aganuu faa-Iutaia. Na ia fetalai atu iā i latou: “O lē sili iā te outou, ia avea o ia ma lē aupito itiiti, ma o  lē pule, ia avea o ia ma auauna.” (Luka 22:26) O le a pei i tatou o “lē aupito itiiti,” pe afai e tatou te “manatu ua sili isi” iā i tatou. (Fili. 2:3) O le tele e tatou te atiaʻe ai lenā uiga, o le itiiti foʻi lenā o le avanoa e tatou te faatausuai ai i isi.

10. O le ā le fautuaga a Paulo e tatau ona tatou faatatauina?

¹⁰ E iai mea e sili atu ai o tatou uso ma tuafāfine iā i tatou. E faigofie ona tatou mātauina lenā mea pe a tatou uaʻi atu i o latou uiga lelei. E tatau ona tatou faatatauina le fautuaga a le aposetolo o Paulo i Kerisiano i Korinito: “O ai na faia oe ia ese mai i le isi? Auā o le ā se mea o iā te oe e leʻi foaʻiina atu? Ae afai na foaʻiina atu iā te oe, aiseā la e te mimitavale ai e peiseaʻī e leʻi foaʻiina atu?” (1 Kori. 4:7) E tatau ona tatou mataala i so o se faaosoosoga e faauaʻi mai isi iā i tatou pe tatou te manatu foʻi e sili i tatou nai lo o isi. Pe afai e iai se uso e lelei lana failauga, po o se tuafafine e tomai i le amataina o suʻesuʻega faale-Tusi Paia, e tatau ona ia vave avatu le viiga iā Ieova.

11. O le ā le lesona o le talafaatusa a Iesu e faatatau i se tupu ma lana pologa?

¹¹ Ina ua uma ona lapataʻia e Iesu ona soo ina ia aua neʻi faatausuai i isi, na ia faia ai se talafaatusa e faatatau i se tupu ma lana auauna. Na faamagalo e le tupu le aitalafu telē a se pologa lea e lē taitai mafai ona ia totogiina. Mulimuli ane, e leʻi manaʻo lenā pologa e faamagalo se aitalafu itiiti a lona uso a pologa. O le iʻuga, na faafalepuipuiina e le tupu lenā pologa lē alofa. O le ā le lesona? Na fetalai Iesu: “E faia foʻi faapena e loʻu Tamā o i le lagi iā te outou, pe afai tou te lē faamagalo atu ma o outou lotoatoa i o outou uso.”​—Mata. 18:21-35.

12. E faapefea ona tatou faatigā i isi pe a tatou lē faamagalo atu?

¹² E lē na o le pologa na aafia i ana gaoioiga ae na aafia ai foʻi ma isi. Muamua, na aafia lona uso a pologa ina ua ia “lafo o ia i le falepuipui seʻia toe totogi uma mai lana aitalafu.” Lua, na aafia foʻi isi pologa na mātauina le mea na ia faia. Ina ua “iloa e ona uso a pologa mea uma na ia faia, ona matuā tigā ai lea o i latou.” E aafia foʻi isi i a tatou gaoioiga. Pe a agaleaga mai se tasi ae tatou te lē mananaʻo e faamagalo i ai, o le ā le iʻuga? Muamua, o le a tatou faatigā ai iā te ia, ona e tatou te lē mananaʻo e faamagalo, amanaʻia pe faaalia i ai le alofa. Lua, o le a iai foʻi se aafiaga i isi i le faapotopotoga, pe a latou mātauina o loo tatou feeseeseaʻi ma lenā tagata.

13. O le ā e tatou te aʻoaʻoina mai i le mea na tupu i se paeonia?

¹³ E aogā iā i tatou ma isi le faamagalo i o tatou uso ma tuafāfine. O le mea lenā na tupu i se paeonia o le a tatou faaigoa iā Crystal. Na faatigā se tuafafine i le faapotopotoga iā te ia. Na faapea mai Crystal: “E tai pei o le tutuʻi o se naifi ana faamatalaga lē alofa. Pe a matou ō i le talaʻiga, ou te lē fia alu i le taavale la e alu ai. Na amata mou atu ai loʻu maelega ma loʻu olioli.” Na manatu Crystal na saʻo le māfuaaga na lē fiafia ai. Peitaʻi, e na te leʻi teulotoina le ita pe soona faamamafa naʻuā ona faalogona. Na ia lotomaulalo ma faatatau le fautuaga faale-Tusi Paia mai Le Olomatamata o Oketopa 15, 1999 i le mataupu, “Ia Faamagalo Mai i Lou Loto.” Na ia faamagalo i le tuafafine. Na faapea mai Crystal: “Ua ou iloaina nei, o loo tatou taumafai uma ina ia oofu i le tagata fou, ma e faamagalo atoatoa i tatou e Ieova i taimi uma. Na ou lagona e pei ua aveese atu se avega mamafa mai i oʻu tauau, ma ua toe maua nei loʻu olioli.”

14. (a) E tusa ai o le Mataio 18:21, 22, o le ā le faafitauli e foliga mai na iai i le aposetolo o Peteru? (e) O le ā e mafai ona fesoasoani iā i tatou pe a fesagaʻia se tulaga faapena?

 ¹⁴ E tatou te iloa e tatau ona faamagalo atu, ma o le mea saʻo lenā e tatau ona fai. Ae e ono lē faigofie ona tatou faia faapea. Atonu na iai taimi na faapena ai faalogona o le aposetolo o Peteru. (Faitau le Mataio 18:21, 22.) O le ā e mafai ona fesoasoani iā i tatou? Muamua, ia mafaufau loloto i le tele o taimi ua faamagalo ai oe e Ieova. (Mata. 18:32, 33) E lē tatau ona tatou mauaina lana faamagaloga, ae ua finagalo malie o ia e faamagalo atoatoa i tatou. (Sala. 103:8-10) I le taimi e tasi, o la tatou matafaioi o le ʻalofa o le tasi i le isi.’ O lea la, o le faamagalo atu e lē o se mea e fai i ai sa tatou filifiliga. E tatau ona tatou faamagalo atu i o tatou uso ma tuafāfine. (1 Ioa. 4:11) Lona lua, mafaufau i iʻuga lelei o le faamagalo atu. Pe a faamagalo atu, atonu ua tatou fesoasoani ai i le tagata na faatigā mai, autasi ai le faapotopotoga, puipuia ai la tatou faauōga ma Ieova ma tatou lagona ai le toʻafilemu. (2 Kori. 2:7; Kolo. 3:14) Lona tolu, ia tatalo atu i Lē e finagalo e tatou te faamagalo atu. Aua le faatagaina Satani e saveʻuina le filemu lea e tatou te olioli ai ma o tatou uso tapuaʻi. (Efe. 4:26, 27) Ina ia ʻalofia le puʻea i mailei a Satani, e tatou te manaʻomia le fesoasoani a Ieova.

15. E tusa ai o le Kolose 3:13, o le ā e tatou te faia pe a faatigā mai se uso po o se tuafafine?

¹⁵ Ae a pe a fai e se uso talitonu se gaoioiga e te matuā lē fiafia ai? O le ā e tatau ona e faia? Ia fai taumafaiga uma e tausia ai pea le filemu. Ia tatalo faatauanau iā Ieova. Ia tatalo e faamanuia i lē ua faatigā atu, ma fesoasoani iā te oe ia e iloa uiga lelei o lenā tagata lea e pele ai o ia iā Ieova. (Luka 6:28) Ae afai e lē mafai ona e faagalo le mea ua faia e lou uso iā te oe, ia mafaufau i se auala e te talanoa ai iā te ia. E tāua tele le mafaufau e leʻi fuafua lou uso  e faatigā iā te oe. (Mata. 5:23, 24; 1 Kori. 13:7) Pe a lua talanoa, ia manatua e leai sona faanaunauga e faatigā iā te oe. Ae a pe afai e lē manaʻo e faalelei? “Ia faaauau ona onosaʻi.” Ia aua neʻi fiugofie i lou uso. (Faitau le Kolose 3:13.) Ae o le mea e sili ona tāua, aua le teulotoina le ita auā e faaleagaina ai la oulua faiā ma Ieova. Aua neʻi e faatagaina se mea e te tausuai ai. O le faia faapea, e faamaonia ai e sili atu lou alofa iā Ieova nai lo se isi lava mea.—Sala. 119:165.

16. O le ā la tatou tiute tauave?

¹⁶ E tautele iā i tatou le faaeaga o le auauna autasi iā Ieova o le “lafu e tasi” i le taʻitaʻiga a le “leoleo mamoe e toʻatasi.” (Ioa. 10:16) Ua faapea mai le tusi, Ua Faamaopoopo Ina ia Faia le Finagalo o Ieova, i le itulau e 165: “Ua iai iā te oe le tiute tauave o le fesoasoani i le faatumauina o lenā autasi, ona o aogā ua e maua mai ai.” O lea, e manaʻomia ona “aʻoaʻoina i tatou ina ia vaai iā i latou e pei o le auala e silasila ai Ieova.” E pele iā Ieova i tatou uma “e faatauvaa.” Po o lau vaaiga lenā i ou uso ma tuafāfine? E silafia e Ieova ma e tāua iā te ia mea uma e te faia e fesoasoani ma tausia ai i latou.​—Mata. 10:42.

17. O le ā e tatou te maumauaʻi e fai?

¹⁷ E tatou te alolofa i o tatou uso talitonu. O lea, e tatou te maumauaʻi ai e “aua le faia se mea e tausuai ai pe tautevateva ai se uso.” (Roma 14:13) E tatou te manatu e sili o tatou uso ma tuafāfine iā i tatou, ma ia faamagalo i latou mai i le loto. Ia aua lava neʻi o tatou tausuai ona o isi. Ae ia tatou “tausisi i mea e faatupu ai le filemu, ma mea e atiaʻe ai e le tasi le isi.”—Roma 14:19.