1. Aiseā e ono lagona ai e auauna a Ieova i nisi taimi le tuua toʻatasi?

O LE toʻatele o i tatou e iai lava le taimi e lagona ai le tuua toʻatasi. O nisi atonu e lē umi ona iai na faalogona, a o nisi e umi se taimi o iai na faalogona. E tatou te ono lagona foʻi le tuua toʻatasi e tusa lava po o tatou faatasitasi ma ni tagata. E lē faigofie i nisi ona maua ni uō i se faapotopotoga fou. O nisi e māfana i o latou aiga ma e latou te lagona le tuua toʻatasi pe a siitia ese mai i o latou tauaiga. Ua misia e nisi le mafutaga ma sē e pele ua maliu. Ae o nisi Kerisiano aemaise lava i latou e leʻi leva ona aʻoaʻoina le upu moni, e latou te lagona le faaesea ma le tuua toʻatasi pe a feagai ma teteega po o sauāga mai i o latou tauaiga lē talitonu, po o a latou uō sa iai muamua.

2. O ā fesili o le a tatou taliina?

² E silafia ma e malamalama Ieova i mea uma e faatatau iā i tatou. Pe a tatou lagona le tuua toʻatasi, e silafia e Ieova lenā mea ma e finagalo e fesoasoani mai ina ia tatou manumalo i na faalogona. O le ā le auala ua fesoasoani mai ai Ieova iā i tatou? O le ā e mafai ona tatou faia e fesoasoani ai iā i tatou lava? O le ā e mafai ona tatou faia e fesoasoani ai iā i latou i le faapotopotoga o loo lagona le tuua toʻatasi? Seʻi o tatou iloiloina tali o na fesili.

3. Na faapefea ona faaalia e Ieova lona manatu mamafa iā Elia?

³ E matuā naunau Ieova i le lelei o ona tagata tapuaʻi uma. E latalata mai o ia iā i tatou taʻitoʻatasi, ma e na te silafia pe a lofitūina i tatou i faalogona lotovaivai. (Sala. 145:18, 19) Ia mātau le auala na uaʻi atu ai Ieova i lana auauna o Elia. Na soifua lenā tane faamaoni i le taimi faigatā o le talafaasolopito o  Isaraelu. Na matuā sauāina tagata tapuaʻi o Ieova, ma na taulaʻi faapitoa atu na fili malolosi o Ieova iā Elia. (1 Tu. 19:1, 2) Atonu na mafatia Elia, ona na manatu e na o ia le perofeta na totoe a Ieova. (1 Tu. 19:10) Na vave ona gaoioi Ieova e fesoasoani iā Elia. Na auina atu e Ieova se agelu e toe faamautinoa i lana perofeta e lē o tuua na o ia, ae o loo auauna foʻi le toʻatele o isi tagata Isaraelu iā Ieova.​—1 Tu. 19:5, 18.

4. E faapefea ona atagia mai i le Mareko 10:29, 30, le manatu mamafa o Ieova i ana auauna ua tuulafoaʻia e isi?

⁴ E silafia e Ieova, o nisi o i tatou e manaʻomia ona faia ni faataulaga se tele pe a filifili e auauna iā te ia. E ono aofia ai le faataulaga o le lagolagosua a tauaiga lē talitonu po o uō sa iai muamua. Atonu na popole Peteru ma fesili atu iā Iesu: “Ua matou tuua mea uma ae mulimuli atu iā te oe; o le ā la se mea e matou te maua?” (Mata. 19:27) Na faamautinoa atu ma le māfana e Iesu i ona soo, o le a latou maua se aiga toʻatele faaleagaga. (Faitau le Mareko 10:29, 30.) Na folafola mai foʻi e Ieova le Ulu o lo tatou aiga faaleagaga, o le a ia fesoasoani iā i latou e auauna iā te ia. (Sala. 9:10) Ia mātau nisi o mea e mafai ona tatou faia, ina ia maua ai le fesoasoani a Ieova pe a lagona le tuua toʻatasi.

5. O ā aogā o le uaʻi atu i le auala o loo fesoasoani mai ai Ieova iā te oe?

⁵ Ia uaʻi atu i le auala o loo fesoasoani ai Ieova iā te oe. (Sala. 55:22) O le faia faapea e fesoasoani ina ia saʻo ai pea lau vaaiga i lou tulaga. Ua faapea mai Carol * o se tuafafine nofofua ma e na o ia e upu moni i lona aiga: “Pe a ou toe mafaufau i le auala na fesoasoani mai ai Ieova e onosaʻia taimi faigatā, ou te mautinoa ai o loo faatasi mai pea Ieova iā te aʻu. E toe faamautinoa mai ai foʻi, o le a fesoasoani mai Ieova i so o se mea e tupu i le lumanaʻi.”

6. E faapefea i le 1 Peteru 5:9, 10, ona faamalosia ai i latou o loo tauivi ma faalogona o le tuua toʻatasi?

⁶ Ia mafaufau i le auala o loo fesoasoani ai Ieova i uso ma tuafāfine o loo lagona le tuua  toʻatasi. (Faitau le 1 Peteru 5:9, 10.) Ua faapea mai Hiroshi, o se uso ua tele tausaga e na o ia lava e upu moni i lona aiga: “I le faapotopotoga, e faigofie ona iloa e tofu uma i tatou ma faafitauli. O le iloaina o loo faia e uso ma tuafāfine uma le mea sili e auauna ai iā Ieova, e faalaeiauina ai i matou o loo lagona le tuua toʻatasi ona e lē o iai ni tauaiga i le upu moni.”

7. E faapefea ona fesoasoani le tatalo iā te oe?

⁷ Ia faatumauina pea se faasologa lelei faaleagaga. E aofia ai i lenā mea le sasaa uma atu iā Ieova o ou faalogona moni. (1 Pete. 5:7) O Massiel o se tuafafine talavou na lagona le tuua toʻatasi ona e lē auauna lona aiga iā Ieova. Na faapea mai o ia: “O le tatalo faatauanau iā Ieova, o se tasi lea o mea e sili ona tāua na fesoasoani iā te aʻu e onosaʻia ai faalogona o le tuua toʻatasi. Na avea Ieova ma Tamā moni lava iā te aʻu. Na ou tatalo iā te ia i aso uma, ma faailoa i ai oʻu faalogona moni i le tele o taimi i le aso.”

8. E faapefea ona fesoasoani iā te oe le faitauina o le Afioga a le Atua ma mafaufau loloto i ai?

⁸ Ia faitau e lē aunoa le Afioga a le Atua, ma mafaufau loloto i mau o loo faamatilatila mai ai le alofa o Ieova mo oe. Na faapea mai Bianca o se tuafafine na onosaʻia faitioga mai lona aiga: “Na fesoasoani tele iā te aʻu le faitau ma mafaufau loloto i mau o le Tusi Paia, ma talaaga o soifuaga o auauna a Ieova na fesagaʻia tulaga faigatā e pei o aʻu.” E tauloto e nisi Kerisiano mau faamāfanafanaloto o le Tusi Paia e pei o le Salamo 27:10 ma le Isaia 41:10. Ua iloa e nisi, o le faalogologo i mataupu mo sauniga ua uma ona puʻeina, e faaitiitia ai o latou lagona tuua toʻatasi pe a sauniuni mo sauniga pe faitauina foʻi le Tusi Paia.

9. O ā aogā o lou auai i sauniga?

⁹ Ia fai taumafaiga uma e auai e lē aunoa i sauniga. O le a e maua ai aogā mai i mataupu faalaeiau o sauniga, ma o le a e iloa lelei ai foʻi ou uso ma tuafāfine. (Epe. 10:24, 25) Na faapea mai Massiel lea na taʻua muamua: “E ui lava o aʻu o se tagata e matuā matamuli, ae na ou filifili e auai i sauniga uma ma fai ai ni oʻu sao. O le faia faapea na fesoasoani ou te māfana ai i uso ma tuafāfine.”

10. Aiseā e tāua ai le atiaʻe o faauōga ma uso ma tuafāfine?

¹⁰ Ia atiaʻe faauōga ma uso ma tuafāfine. Ia saʻili ni uō i le faapotopotoga e mafai ona e aʻoaʻoina mai ai ni mea, e tusa lava pe e tou te lē tupulaga faatasi pe eseese foʻi talaaga. Ua faamanatu mai e le Tusi Paia e iai le atamai i ē matutua. (Iopu 12:12) E mafai foʻi ona aʻoaʻo e tagata matutua mea mai i talavou faamaoni. E matua mamao Ionatana iā Tavita, peitaʻi na māfana le la faauōga. (1 Samu. 18:1) Na fesoasoani  le tasi i le isi e auauna iā Ieova, e ui i faafitauli ogaoga na la fesagaʻia. (1 Samu. 23:16-18) Ua faapea mai Irina o se tuafafine e na o ia e upu moni i lona aiga: “E avea uso ma tuafāfine i le faapotopotoga ma o tatou mātua ma tauaiga faaleagaga. E faaaogā e Ieova i latou e fesoasoani iā i tatou e onosaʻia faalogona tuua toʻatasi.”

11. O le ā e tatau ona e faia e atiaʻe ai se faauōga māfana?

¹¹ Atonu e faigatā ona maua ni uō fou, aemaise lava pe afai o oe o se tagata matamuli. Na taʻutino mai Ratna o se tuafafine matamuli, ma na ia aʻoaʻoina le upu moni e ui i teteega, “O le mea moni e tatau ona ou talia, ou te manaʻomia le fesoasoani ma le lagolagosua a loʻu aiga faaleagaga.” Atonu e faigatā ona sasaa atu ou faalogona i se tasi, ae o le faia faapea o le faavae lenā o se faauōga māfana. E naunau au uō e faamalosiau ma fesoasoani atu, ae e latou te fia faailoa mai iā te oe le auala e latou te faia ai faapea.

12. E faapefea ona fesoasoani le talaʻiga iā te oe e maua ai ni uō lelei?

¹² O se tasi o auala sili e maua ai uō, o le galulue faatasi ma uso ma tuafāfine i le talaʻiga. Na faapea mai Carol lea na taʻua muamua: “Ua ou maua le tele o faauōga lelei, e ala i le galulue faatasi ma tuafāfine i le talaʻiga ma isi vala o le auaunaga. Na fesoasoani mai Ieova e ala i nei uō mo le tele o tausaga.” E telē le aogā o le taumafai e atiaʻe faauōga ma Kerisiano faamaoni. E faaaogā e Ieova na faauōga, e fesoasoani e te tauivi ai ma faalogona mafatia e pei o le tuua toʻatasi.​—Faata. 17:17.

13. O le ā le matafaioi a tagata uma o le faapotopotoga?

¹³ O le matafaioi a tagata uma o le faapotopotoga, o le saosaolaumea i se siʻomaga alofa ma filemu ina ia lē lagona ai e se tasi le tuua toʻatasi. (Ioa. 13:35) Maʻeu se aafiaga lelei o a tatou upu ma gaoioiga lelei i isi! Seʻi mātau le faamatalaga a se tuafafine: “Ina ua ou aʻoaʻoina le upu moni, na avea le faapotopotoga ma oʻu aiga. E lē mafai ona avea aʻu ma se Molimau a Ieova pe ana leai la latou lagolagosua.” O nisi e lagona le tuua toʻatasi, ona e leai ni o latou tauaiga i le upu moni. O le ā e mafai ona tatou faia e fesoasoani ai iā i latou na ina ia iloa, o i latou o se vaega o le faapotopotoga?

14. O le ā e tatou te faia e atiaʻe ai ni faauōga māfana ma tagata fou i le faapotopotoga?

¹⁴ Ia tausolomua e faauō atu i isi. E amata ona tatou faia faapea e ala i le faafeiloaʻi ma le māfana o i latou e fou mai i le faapotopotoga. (Roma 15:7) Peitaʻi, e tele mea e aofia ai nai lo o le tau ina fai atu o se faafeiloaʻiga faaleuō. E tatou te mananaʻo e atiaʻe ni faauōga māfana a o faagasolo taimi. O lea, ia māfana ma naunau moni i tagata fou. Ia taumafai e malamalama i faafitauli atonu o loo latou fesagaʻia, ae ʻalofia le fia iloa o mataupu e fitoitonu i le tagata lava ia. Atonu e faigatā i nisi ona faamatala mai o latou faalogona, o lea ia faaeteete, aua le faamalosia le tagata e tali au fesili pe a lē mananaʻo ai. Ae ia fai ni fesili faautauta i se auala agalelei, ina ia sasaa mai ai e le tagata mea o loo i lona loto ma ia faalogologo ma le onosaʻi a o tali mai. O se faataʻitaʻiga, e mafai ona e fesili i ai i le auala na latou maua ai le upu moni.

15. E faapefea ona fesoasoani Kerisiano taʻumatuaina i isi o le faapotopotoga?

¹⁵ E tuputupu aʻe faaleagaga tagata uma i le faapotopotoga, pe a faaalia e Kerisiano taʻumatuaina le naunau moni iā i latou, aemaise lava i toeaina. Na tausia aʻe Melissa e lona tinā i le upu moni, ma na faapea mai o ia: “E lē  mafai e upu ona faamatalaina loʻu matuā talisapaia o uso na avea o ni tamā faaleagaga iā te aʻu a o faagasolo tausaga. E so o se taimi lava ou te manaʻomia ai se fesoasoani, e iai lava se tasi ou te sulufaʻi atu i ai.” Na faapea mai Mauricio o se uso talavou na lagona le tuua toʻatasi ina ua tuua e lana faiaʻoga le upu moni: “Na fesoasoani tele iā te aʻu le naunau moni mai o toeaina. Na latou talanoa mai e lē aunoa. Na matou galulue faatasi i le talaʻiga, faasoa mai ʻoa faaleagaga na maua mai i a latou suʻesuʻega o le Tusi Paia, ma matou taaalo faatasi.” O loo auauna nei Melissa ma Mauricio i le Peteli.

16-17. O ā ni auala aogā e ono mafai ona tatou fesoasoani ai i isi?

¹⁶ Ia fesoasoani i ni auala aogā. (Kala. 6:10) Ua faapea mai Leo, o se misionare o loo auauna i se atunuu e mamao mai i lona aiga: “E pau lava le mea e te manaʻomia, o sina gaoioiga agalelei i le taimi talafeagai. Ou te manatua se tasi aso na lavea ai laʻu taavale, ou te taunuu atu i le fale ua matuā ou lē fiafia lava. Ae na valaaulia aʻu e se ulugalii i lo la fale mo se taumafataga māmā. Ou te lē o manatua la matou meaʻai na ʻai, ae ou te manatua lo la faalogologo lelei mai. E uma ane, ua matuā lelei lava oʻu faalogona!”

¹⁷ O se tasi o māfuaaga e tatou te olioli uma ai i polokalame faaleagaga e pei o fonotaga ma tauaofiaga, ona e maua ai le taimi e talatalanoa faatasi ai ma isi e faatatau i le polokalame. Peitaʻi, ua faapea mai Carol lea na taʻua muamua: “E lē faigofie mo aʻu le auai i fonotaga ma tauaofiaga.” Aiseā? Na ia toe faapea mai: “E ui na matou auai faatasi ma le faitau selau po o le faitau afe o uso ma tuafāfine, ae e masani lava e nonofo faatasi ma o latou aiga. O lenā mea ou te matuā lagona ai le tuua toʻatasi.” O nisi ua maliliu a latou paaga, e lē faigofie ona auai na o i latou i se tauaofiaga po o se fonotaga. Pe e te iloa se tasi o loo fesagaʻia nei luʻi? Aiseā e lē valaaulia ai o ia e tou te ō faatasi ma lou aiga i le isi polokalame faaleagaga o loo sosoo ai?

18. E faapefea ona tatou faatatauina le 2 Korinito 6:11-13, pe a faaalia le agaga talimālō?

¹⁸ Ia faaalu le taimi ma isi. Ia taumafai e faaaofia uso ma tuafāfine eseese i a outou mea e fai, aemaise lava i latou o loo lagona le tuua  toʻatasi. E tatou te mananaʻo e “faalautele atu o [tatou] loto” aemaise lava iā i latou na. (Faitau le 2 Korinito 6:11-13.) Na faapea mai Melissa lea na taʻua muamua: “Ou te lagona le amanaʻia o aʻu e aʻu uō i taimi uma e latou te valaaulia ai aʻu i o latou aiga pe ō foʻi i se tafaoga.” Pe e iai se tasi i lau faapotopotoga e mafai ona e faaalia i ai le agaga talimālō?

19. O ā taimi patino atonu e matuā aogā ai lava le faifaimea faatasi ma uso Kerisiano?

¹⁹ E iai taimi patino e matuā talisapaia ai e o tatou uso Kerisiano lo tatou faaaluina o se taimi mo i latou. Atonu e faigatā i nisi ona iai faatasi ma o latou aiga lē talitonu i taimi o aso faamanatu. O nisi atonu e iai aso e matuā faanoanoa ai lava e pei o le aso na maliu ai sē e pele iā te ia. Pe a tatou faaalu se taimi ma uso ma tuafāfine o loo fesagaʻia na luʻi, ua faailoa atu ai lo tatou “manatu mamafa” iā i latou.​—Fili. 2:20.

20. E faapefea ona fesoasoani fetalaiga a Iesu i le Mataio 12:48-50 iā i tatou pe a lagona le tuua toʻatasi?

²⁰ E tele māfuaaga e ono lagona ai e se Kerisiano i nisi taimi le tuua toʻatasi. Ae ia aua lava neʻi galo, e silafia lelei e Ieova na faalogona. E saunia e Ieova mea e tatou te manaʻomia, ma e na te faaaogāina o tatou uso Kerisiano e tausia o tatou manaʻoga i le tele o taimi. (Faitau le Mataio 12:48-50.) O lea, e tatou te faaalia atu iā Ieova lo tatou talisapaia o ana sauniuniga, pe a tatou faia le mea sili e lagolagoina ai lo tatou aiga faaleagaga. E tusa lava po o ā o tatou faalogona i nisi taimi, ae e lē mafai ona tuua na o i tatou auā o loo faatasi pea Ieova ma i tatou!