PE E iai se mea e tou te tutusa ai ma perofeta i aso anamua? Ua taʻua i le lomiga faa-Peretania i le 2013 o le Faaliliuga a le Lalolagi Fou, le uiga o le upu perofeta i lalo o le vaega “Uiga o Upu Faale-Tusi Paia”: “O se tasi e faalauiloaina atu le finagalo o le Atua. Na avea perofeta ma fofoga fetalai a le Atua, e faailoa atu ana valoaga, aʻoaʻoga, poloaʻiga, ma faamasinoga.” E ui lava e latou te lē o vavalo atu, ae e latou te tautatala mo le Atua, ma faalauiloa atu mea o loo taʻua i lana Afioga.—Mata. 24:14.

Maʻeu se faaeaga ua tatou mauaina, o le faailoa atu lea i isi e faatatau i lo tatou Atua o Ieova, ma aʻoaʻoina i latou e uiga i lona finagalo mo tagata! Ua tatou galulue faatasi ma le “agelu o loo lele i le taulotoaʻiga o le lagi.” (Faaa. 14:6) Peitaʻi, atonu e tatou te feagai ma luʻi e ono mou ese atu ai le vaaiga saʻo e faatatau i lenā faaeaga matagofie. O ā nisi o na luʻi? Atonu e tatou te lagona le vaivai ma le lē aogā, po o le lotovaivai foʻi. O luʻi foʻi na sa feagai ma perofeta faamaoni i aso anamua, ae e leʻi faavaivai ai. Sa fesoasoani Ieova iā i latou e faataunuu o latou tofiga. Seʻi o tatou iloiloina nisi o faaaʻoaʻoga ma vaai pe faapefea ona tatou faaaʻoaʻo iā i latou.

I nisi taimi, e tatou te lagona ai le vaivai ona o a tatou galuega i aso faisoo, ma ua lē mafai ai ona auai i le galuega talaʻi. E manaʻomia ona fai sa tatou mālōlōga e pei ona faia e Iesu ma ona aposetolo. (Mare. 6:31) Ae seʻi mafaufau iā Esekielu a o iai i Papelonia, ma lona tofiga sa tatau ona faia i tagata Isaraelu na faaaunuua mai i Ierusalema. Na fetalai atu le Atua iā Esekielu ina ia ave se piliki e vane ai le ata o le aai o Ierusalema. E ao iā Esekielu ona siʻomia lenei aai i se auala faafaatusa, e ala i le taoto i lona itu agavale mo aso e 390, ona toe liliu lea ma taoto i lona itu taumatau mo aso e 40. Na fetalai atu Ieova iā Esekielu: “Faauta! ou te saisaia oe i maea ina ia e lē feliuaʻi ai mai i le tasi  ou itu i le isi ou itu, seʻia atoa aso o lou siʻomiaina o le aai.” (Eseki. 4:1-8) E lē taumatea o lenā mea na uaʻi atu i ai tagata Isaraelu na faaaunuua. E silia i le tausaga sa faia ai e Esekielu lenā gaoioiga faigatā e lagona ai le vaivai. Na faapefea ona faataunuuina e le perofeta lona tofiga?

Na malamalama Esekielu i le māfuaaga na auina atu ai o ia o se perofeta. Ina ua auina atu Esekielu, na fetalai atu le Atua iā te ia: “E tusa lava pe latou te [Isaraelu] faalogo pe leai . . . , o le a latou iloa lava sa iai le perofeta iā i latou.” (Eseki. 2:5) Na ia manatua le fuafuaga o lona tofiga. O lea, na ia lotomalie ai e siʻomia Ierusalema i se auala faafaatusa. Na avea o ia o se perofeta moni. Na oo mai se lipoti iā te ia ma ē na faaaunuua: “Ua faaumatia le aai!” Ioe, na mautinoa e tagata Isaraelu o loo latou faatasi ma se perofeta.—Eseki. 33:21, 33.

I aso nei, o loo tatou lapataʻia tagata e faatatau i le faaumatiaga o le faiga o mea a Satani. E ui lava e tatou te lagona le vaivai, ae e tatou te faaaogā pea le malosi e talaʻi atu ai le Afioga a le Atua, faia toe asiga ma suʻesuʻega faale-Tusi Paia. A o faataunuuina valoaga e faatatau i le faaiʻuga o lenei faiga o mea, e faamalieina i tatou ona o le avea ma ni ē e “faalauiloaina atu le finagalo o le Atua.”

E tatou te matuā finafinau ona o le fesoasoani a le agaga o Ieova, ae e iai lava taimi e tatou te lotovaivai ai ona o le tali mai a tagata i la tatou feʻau. E tatau ona tatou manatua le faaaʻoaʻoga a le perofeta o Ieremia. Na tauemua ma upuleagaina o ia, ona o lona faalauiloa atu o le feʻau a le Atua i tagata Isaraelu. I se tasi taimi, na faapea mai ai Ieremia: “Ou te lē toe taʻutaʻuina lava o ia, ou te lē toe tautala foʻi i lona suafa.” Sa iai foʻi faalogona o Ieremia e pei o i tatou. Peitaʻi, sa ia faalauiloa atu pea le feʻau a le Atua. Aiseā? Na toe faaopoopo mai le perofeta: “Ae i loʻu loto, ua pei o se afi e mumū o loo punitia i totonu o oʻu ivi; ma ua ou lē lavā taofi, ua lē mafai foʻi ona ou onosaia.”—Iere. 20:7-9.

I se tulaga talitutusa, pe afai e tatou te lotovaivai ona o le tali mai a tagata i la tatou feʻau, e mafai ona tatou manumalo i lenā faalogona, e ala i le manatunatu loloto i le feʻau o loo tatou faalauiloa atu. E tai pei o se ʻafi e mumū o loo punitia i totonu o o tatou ivi.’ O le faitauina o le Tusi Paia i aso taʻitasi, e mafai ona mumū ai pea lenā afi i totonu o i tatou.

E lagona e nisi Kerisiano le popole pe a mauaina ni tofiga e latou te lē malamalama atoatoa i ai. Atonu na faapena foʻi faalogona o le perofeta o Hosea. Na faatonuina o ia e Ieova: “Inā alu ia ma e fai avā i le fafine faitaaga ma o le a iai sau fanau ona o lana faitaaga.” (Ho. 1:2) Seʻi mafaufau i ou faalogona pe a e sauni e faaipoipo, ae ua taʻu atu e le Atua iā te oe o lau avā faaipoipo o se fafine talitane. Na taliaina e Hosea le tofiga. Na ia ave Komeri ma fai ma ana avā ma maua ai sona atalii. Mulimuli ane, na fanaua e Komeri se tama teine ona sosoo ai lea ma se tama tama. E foliga mai, o nei tamaiti e toʻalua, na maua mai i le mulilua a Komeri. Na fetalai atu Ieova iā Hosea, o lē o le a avea ma ana avā, o le a “tuliloa e ia o ē e mananaʻo iā te ia.” Mātau le faaupuga numera tele, “o ē e mananaʻo iā te ia.” Na taumafai o ia e toe foʻi atu iā Hosea. Pe afai o oe o Hosea, po o le a e toe taliaina lau avā? O le mea tonu lenā na faatonuina e Ieova Hosea e fai! Na toe faatau mai e le perofeta o ia i se tau taugatā.—Ho. 2:7; 3:1-5.

Atonu na taumānatu Hosea po o le ā le aogā o le faataunuuina o lona tofiga. O le faatinoina ma le faamaoni e Hosea o lenā tofiga, ua fesoasoani iā i tatou e malamalama ai i le tigā o faalogona o le Atua, ina ua lē faamaoni tagata Isaraelu iā te ia. E ui i lea, na iai pea nisi tagata Isaraelu lotofaamaoni na toe foʻi i le Atua.

E lē o toe faatonuina e le Atua se tasi i aso nei e faaipoipo i se “fafine faitaaga.” Ae pe e mafai ona tatou aʻoaʻoina se lesona mai i le lotomalie o Hosea e faataunuu lona tofiga? O se tasi o lesona, ia tatou lotomalilie e tusa lava pe e feagai ai ma luʻi i le faalauiloaina atu o le tala lelei o le Malo, i “luma o le lautele, ma mai i lea fale i lea fale.” (Galu. 20:20)  Atonu e lē faigofie mo oe nisi vala o le galuega talaʻi. E toʻatele i latou o loo suʻesuʻe ma Molimau a Ieova ua faapea mai, ua latou fiafia i le suʻesuʻeina o le Tusi Paia, ae e lē mafai ona ō atu i lea fale i lea fale e faalauiloa atu le feʻau. Mulimuli ane, ua faia e le toʻatele o i latou le mea na latou manatu e lē mafai ona latou faia. O le ā se lesona ua e aʻoaʻoina mai ai?

E tatou te aʻoaʻoina mai foʻi se isi lesona mai i le taliaina e Hosea o se tofiga faigatā. E tele māfuaaga na ia ono teena ai lona tofiga e aofia ai lana avā, lea e iai sona faaataga. Pe na mafai ona iloa e tagata lenei tofiga pe ana lē tusia e Hosea lenei tala? Atonu e tatou te maua foʻi se avanoa e talanoa ai i isi e faatatau iā Ieova, ae leai se tasi e na te iloaina. Na tupu lenei mea iā Anna, sa aʻoga i se aʻoga maualuga i le Iunaite Setete. Na faatonuina e le faiaʻoga le vasega e tusia ni tala e faatatau i ni mataupu e latou te talitonu maumauaʻi i ai, ma taumafai e faatalitonu ai le vasega. Sa ono ʻalofia e Anna lea avanoa e avatu ai se molimau. Peitaʻi, na ia manatu o se avanoa lea mai i le Atua. Na ia iloa o le a lē fiafia mai tamaiti, o lea na ia tatalo ai iā Ieova, ma matuā naunau ai e faaaogā lea avanoa. Na ia tusia ai le tala ua faaulutalaina “Evolusione: Manatunatu i Faamaoniga.”

Ina ua faitau e Anna lana tala i le vasega, sa tuʻifesili o ia e se teineitiiti e talitonu i le evolusione. Na taulau manuia Anna e puipuia lona talitonuga. Na maofa le faiaʻoga, ma maua ai e Anna le faailoga o se tala e sili ona faaoso naunau. Talu mai lenā taimi, sa tele ni talanoaga a Anna ma le teineitiiti na tuʻifesiliina o ia. O le taliaina o lenei tofiga mai iā Ieova, ua faapea mai ai Anna: “Ua ou maua le mautinoa e talaʻi atu ai le tala lelei e aunoa ma le fefe.”

E moni e lē o i tatou o ni perofeta e pei o perofeta i aso anamua. Peitaʻi, o le faaaʻoaʻo i le agaga faataulaga o perofeta e pei o Esekielu, Ieremia, ma Hosea, o le a mafai ai foʻi ona tatou faataunuuina le finagalo o Ieova mo i tatou i aso nei. I taimi o tapuaʻiga a le aiga ma au lava suʻesuʻega, e faalaeiauina oe faitau e faatatau i isi perofeta anamua, ma manatunatu i auala e faataʻitaʻi ai i a latou faaaʻoaʻoga?