1. I le Mataio 24:9, aiseā e lē tatau ai ona faateʻia i tatou pe a ʻinoʻino mai le lalolagi?

NA FOAFOAINA i tatou e Ieova ina ia faaali atu le alofa, ma e tatou te mananaʻo foʻi ia alofagia i tatou e isi. O lea, pe a ʻinoʻino mai se tasi, e tigā ai o tatou faalogona ma atonu e tatou te fefefe ai. O se faaaʻoaʻoga, ua faapea mai se tuafafine e igoa iā Georgina e nofo i Europa: “Ina ua 14 oʻu tausaga, na inosia aʻu e loʻu tinā ona ua ou auauna iā Ieova. Na ou lagona ai le tuua toʻatasi ma ou manatu ai e lē o aʻu o se tagata lelei.” * Na tusi se uso e igoa iā Danylo: “Na ou lagona le fefe ma le māsiasi ina ua sasa, faalumaina ma faafefe aʻu e fitafita, ona o aʻu o se Molimau a Ieova.” E tigā o tatou faalogona pe a inosia i tatou ae e lē o se mea e faateʻia ai. Na valoia e Iesu o le a inosia i tatou.—Faitau le Mataio 24:9.

2-3. Aiseā e inosia ai soo o Iesu?

² E inosia e le lalolagi soo o Iesu. Aiseā? Ona “e lē o ni tagata o le lalolagi” i tatou e pei o Iesu. (Ioa. 15:17-19) O le māfuaaga lenā e tatou te lē tapuaʻi ai i malo o tagata, po o a latou tagāvai e ui e tatou te faaaloalo i ai. E tatou te tapuaʻi tau lava o Ieova. E tatou te lagolagoina le aiā a le Atua e pule ai i tagata e ui ina luʻia e Satani ma lana “fanau” lenā aiā. (Kene. 3:1-5, 15) E tatou te talaʻia le Malo o le Atua e na o le pau lea o le faamoemoe o tagata, ma ua toeitiiti faaumatia e lenā Malo i latou uma e tetee i ai. (Tani. 2:44; Faaa. 19:19-21) O se tala  lelei lenā mo ē agamalu, ae o se tala faanoanoa mo ē amioleaga.—Sala. 37:10, 11.

³ E inosia foʻi i tatou ona e tatou te ola i tapulaa amiotonu a le Atua. E matuā lē tutusa lava le maualuluga o tapulaa tauamio a le Atua, ma le paʻū maualalo o tapulaa a tagata o le lalolagi. O se faataʻitaʻiga, e toʻatele tagata e lē kea i le faia o amioga lē mamā, e pei o amioga na faia i Sotoma ma Komoro lea na faaumatia ai i latou e le Atua. (Iuta 7) Ona e tatou te usiusitaʻi i tapulaa a le Atua e faatatau i na amioga, e toʻatele tagata e ulagia i tatou ma fai mai e tatou te faailoga tagata.—1 Pete. 4:3, 4.

4. O ā uiga e faamalosia ai i tatou pe a inosia i tatou e tagata?

⁴ O le ā e fesoasoani e tatou te tumau ai pe a inosia ma faalumaina i tatou e tagata? E tatau ona malosi lo tatou faatuatua, o le a fesoasoani mai Ieova iā i tatou. E pei lo tatou faatuatua o se talita e “tineia ai aū fanafana mū uma a lē o loo leaga.” (Efe. 6:16) Ae e lē lava le tau ina faatuatua. E tatou te manaʻomia foʻi le alofa. Aiseā? Auā “e lē itaitagofie” le alofa. E onosaʻi ma tumau i mea tigā uma. (1 Kori. 13:4-7, 13) Seʻi o tatou iloiloina pe faapefea i lo tatou alofa mo Ieova, uso talitonu ma o tatou fili, ona fesoasoani e tatou te tumau ai i le auaunaga, e ui i le ʻinoʻino mai o le lalolagi.

5. Na faapefea i le alofa o Iesu mo lona Tamā ona faamalosia ai o ia?

⁵ I le pō a o leʻi fasiotia Iesu e ona fili, na fetalai atu ai o ia i ona soo faamaoni: “Ou te alofa i le Tamā, ma ua tuuina mai e le Tamā iā te aʻu poloaʻiga ina ia ou faia, o lea ua ou faia ai.” (Ioa. 14:31) O le alofa o Iesu mo Ieova, na faamalosia ai o ia e onosaʻia tofotofoga faigatā o le a oo iā te ia. E faamalosia foʻi i tatou e lo tatou alofa mo Ieova.

6. E tusa ai ma le Roma 5:3-5, o le ā le vaaiga a auauna a Ieova i le inosiaina o i latou e le lalolagi?

⁶ O le alofa mo le Atua ua fesoasoani i auauna a Ieova e tumau ai e ui i sauāga. O se faaaʻoaʻoga, ina ua faatonuina e le faamasinoga maualuga a Iutaia le ʻauaposetolo e aua neʻi toe talaʻi, o lo latou alolofa mo le Atua, na uunaʻia ai i latou e “usiusitaʻi i le Atua o le pule nai lo o tagata.” (Galu. 5:29; 1 Ioa. 5:3) O lenā alofa lē maluelue mo le Atua, ua faamalosia ai lo tatou ʻauuso i aso nei. E toʻatele o loo tumau pea e ui i sauāga a faigāmalo malolosi. Nai lo o le lotovaivai, e latou te vaai i ai o se faaeaga lo latou tumau faamaoni, e ui ina inosia i latou e le lalolagi.—Galu. 5:41; faitau le Roma 5:3-5.

7. O le ā le auala e tatau ona tatou tali atu ai pe a tetee mai o tatou tauaiga?

⁷ Atonu o luʻi e sili ona faigatā, e mai i o tatou lava aiga. Pe a amata ona tatou fiafia i le upu moni, e ono manatu nisi o tatou tauaiga ua faasesēina i tatou. O nisi ua faapea mai ua faalētonu o tatou mafaufau. (Faatusatusa i le Mareko 3:21.) E ono sauāina e nisi i tatou, ae e lē o se mea e faateʻia ai. Na fetalai Iesu: “E fai le aiga o le tagata ma ona fili.” (Mata. 10:36) Po o le ā lava le vaaiga a o tatou tauaiga, ae e tatou te lē ʻinoʻino ai iā i latou. O le tele o lo tatou alofa mo Ieova, o le tele foʻi lenā o lo tatou alofa mo tagata. (Mata. 22:37-39) Ae e lē mafai ona tatou solia tulafono ma mataupu silisili o le Tusi Paia, ina ia faamalie ai se tagata.

8-9. O le ā na fesoasoani i se tuafafine e tumau ai e ui i faigatā?

⁸ Na tūmausalī Georgina lea na taʻua muamua e ui i le matuā tetee o lona tinā. Na ia faapea mai: “Na ma suʻesuʻeina ma loʻu tinā le Tusi Paia ma ni Molimau a Ieova. Ae i le ono  masina mulimuli ane ai ina ua ou fia auai i sauniga, na teʻi lava ua sui ona uiga. Na ou iloa ane o loo fesootaʻi ma ē ua liliuese mai i le upu moni. Na ia faaaogāina tuuaʻiga sesē a na tagata pe a talanoa mai iā te aʻu. Na ia faamāina aʻu, futi loʻu ulu, titina aʻu ma tauʻai solo aʻu lomiga. Ae na ou papatiso lava i le 15 o oʻu tausaga. Na taumafai loʻu tinā ia aua neʻi oʻu toe auauna iā Ieova. O lea na ia ave ai aʻu i se nofoaga e nonofo faatasi ai ma isi talavou. O isi na faaaogāina fualaau faasāina ma faia solitulafono. E matuā faigatā lava ona feagai ma se teteega, pe a sau mai i se tagata sa tatau ona alofa ma tausi faapelepele iā te oe.”

⁹ Na faapefea ona onosaʻia e Georgina na mea? Na ia faapea mai: “O le aso na tetee mai ai loʻu tinā, faatoʻā uma lava ona ou faitauina atoa le Tusi Paia. Na ou mautinoa atoatoa ai ua ou mauaina le upu moni, ma na matuā ou māfana iā Ieova. Na faafofoga mai Ieova i aʻu tatalo e lē aunoa. A o oʻu iai i le fale na ave i ai aʻu e loʻu tinā, na valaaulia aʻu e se tuafafine i lona fale ma ma suʻesuʻeina faatasi le Tusi Paia. I na taimi, na faamalosia foʻi aʻu e uso ma tuafāfine i le Maota mo Sauniga. Na pei aʻu o se tasi o latou lava aiga. Na ou mautinoa ai, e sili atu ona malosi Ieova nai lo i latou e tetee mai e tusa lava po o ai i latou.”

10. O le ā e tatou te mautinoa e faia e Ieova lo tatou Atua mo i tatou?

¹⁰ Na tusi le aposetolo o Paulo, e leai se mea e mafai ona “faateʻaeseina i tatou mai i le alofa o le Atua ua iā Keriso Iesu, lo tatou Alii.” (Roma 8:38, 39) E ui e iai taimi e tatou te mafatia ai, ae e faamāfanafana ma faamalosia pea i tatou e Ieova. E fesoasoani mai foʻi Ieova e ala i o tatou uso ma tuafāfine faaleagaga e pei ona tofo i ai Georgina.

11. Na faapefea ona fesoasoani le alofa na faamatalaina e Iesu i le Ioane 15:12, 13 i le ʻausoo? Aumai se faaaʻoaʻoga.

¹¹ I le pō a o leʻi maliu Iesu, na ia faamanatu atu i ona soo ia alofa le tasi i le isi. (Faitau le Ioane 15:12, 13.) Na ia silafia o le alofa faataulaga, o le a fesoasoani i ona soo e autasi ma tumau ai pea e ui ina inosia i latou e le lalolagi. Seʻi o tatou iloiloina le faaaʻoaʻoga a le faapotopotoga i Tesalonia. Na sauāina i latou mai lava i le taimi na faavaeina ai le faapotopotoga. Ae na avea na uso ma tuafāfine ma faaaʻoaʻoga o le tumau faamaoni ma le alofa. (1 Tesa. 1:3, 6, 7) Na apoapoaʻi atu Paulo iā i latou ia “atoatoa” ona faaalia pea le  alofa. (1 Tesa. 4:9, 10) O le alofa na uunaʻia ai i latou e faamāfanafana i ē mafatia ma fesoasoani i ē vaivai. (1 Tesa. 5:14) Na latou usitaʻia faatonuga a Paulo, auā i lana tusi lona lua na tusia i se tausaga mulimuli ane ai, na faapea atu ai Paulo: “Ua faateleina foʻi le alofa o le tasi i le isi iā te outou uma lava taʻitoʻatasi.” (2 Tesa. 1:3-5) O lo latou alofa na fesoasoani e latou te tumau ai e ui i faigatā ma sauāga.

12. I le taimi o le taua, na faapefea ona faaalia e uso ma tuafāfine i se tasi o atunuu le alofa o le tasi i le isi?

¹² Seʻi o tatou iloiloina le mea na tupu iā Danylo lea na taʻua muamua ma lana avā. Ina ua aafia le taulaga na nonofo ai i le taua, na faaauau pea ona la auai i sauniga, fai le mea e mafai e talaʻi ai ma faasoa atu ni meaʻai na la maua i uso ma tuafāfine. Ae i se tasi aso, na ō atu ai fitafita faaauupegaina i le fale o Danylo. Na ia faapea mai: “Na latou faamalosia aʻu e aua neʻi toe avea ma Molimau a Ieova. Ae ina ua ou teena lo latou manaʻo, na latou sasaina ma fana faamisi aʻu. A o latou leʻi tuua loʻu fale, na latou faamataʻu mai o le a latou faamalosia laʻu avā pe a toe foʻi mai. Na vave ona faaee maʻua e le ʻauuso i se nofoaafi ma ma malaga ai i le isi taulaga. E lē galo iā te aʻu le alofa na faaalia e na uso. Ina ua ma taunuu, na aumai e uso i inā meaʻai ma fesoasoani i le suʻeina o saʻu galuega ma se ma fale. O lea, na mafai ai ona ma saunia se nofoaga mo isi Molimau na sosola ese mai i le nofoaga na faia ai le taua.” O na mea na tutupu e tatou te iloa ai, e fesoasoani le alofa faa-Kerisiano e tumau ai e ui ina inosia i tatou.

13. E faapefea ona fesoasoani le agaga paia e tatou te tumau ai i le auaunaga iā Ieova, e ui ina ʻinoʻino mai tagata iā i tatou?

¹³ Na fetalai Iesu i ona soo ina ia alolofa i o latou fili. (Mata. 5:44, 45) Pe e faigofie ona fai lenā mea? E leai. Ae e mafai e ala i le fesoasoani a le agaga paia o le Atua. O vala o fua o le agaga paia o le Atua e aofia ai le alofa, faapalepale, agalelei, agamalu ma le amio pulea. (Kala. 5:22, 23) E fesoasoani nei uiga iā i tatou e tumau ai e ui ina inosia i tatou. E toʻatele tagata na tetee ua suia o latou uiga, ona na faaalia e se tane talitonu, se avā, se tasi o le fanau po o se tuaoi na uiga o le Atua. E toʻatele foʻi tagata tetee ua avea ma o tatou uso ma tuafāfine pele. Pe a faigatā ona e faaalia le alofa i ē e tetee mai ona o lou auauna i le Atua, ia tatalo mo le agaga paia. (Luka 11:13)  Ia e mautinoa atoatoa, e sili ona lelei ala o le Atua.—Faata. 3:5-7.

14-15. Na faapefea ona fesoasoani iā Yasmeen le Roma 12:17-21, e faaalia ai le alofa i lana tane e ui ina matuā tetee iā te ia?

¹⁴ Seʻi o tatou talanoaina le faaaʻoaʻoga a Yasmeen e nofo i sasaʻe tutotonu. Ina ua avea o ia ma Molimau a Ieova, na manatu lana tane ua faasesēina o ia ma taumafai ai e taofi o ia mai i le auauna i le Atua. Na faalumaina o ia e lana tane ma faaoso ona tauaiga, se faifeʻau ma se faataulāitu e faafefe o ia. Na tuuaʻia foʻi o ia i le faamalepe aiga. Na ʻeʻē atu foʻi lana tane ma fai atu upu faalumaluma i uso a o fai le sauniga. Na tele ina tagi Yasmeen ona o le leaga o le auala na feagai ai isi ma ia.

¹⁵ I le Maota mo Sauniga, na faamāfanafanaina ma faamalosia Yasmeen e lona aiga faaleagaga. Na faalaeiauina o ia e toeaina e faatatau le manatu i le Roma 12:17-21. (Faitau.) Na faapea mai Yasmeen: “E lē faigofie. Na ou tatalo iā Ieova mo le fesoasoani ma ou faia le mea sili e faatatau ai lenā mau. Ina ua faapalapalā e laʻu tane le umukuka, na ou faamamāina. Ina ua soona ʻeʻē mai, na ou tali filemu i ai. Ina ua maʻi foʻi na ou tausi faapelepele i ai.”

16-17. O le ā e te aʻoaʻoina mai i le faaaʻoaʻoga a Yasmeen?

¹⁶ Na tauia Yasmeen i le faaalia o le alofa i lana tane. Na ia faapea mai: “Na matuā talitonuina aʻu e laʻu tane, ona e na te iloa ou te tautala saʻo. Na amata ona ia faalogologo ma le faaaloalo pe a ma talanoa e faatatau i tapuaʻiga, ma na ia malie o le a lē toe faamisa i lo ma aiga. Na ia faalaeiauina aʻu e auai pea i sauniga. Ua faaleleia le ma faiā ma ua filemu foʻi lo ma aiga. O loʻu faanaunauga, ia talia e laʻu tane le upu moni ma ia ma auauna faatasi iā Ieova.”

¹⁷ O le faaaʻoaʻoga a Yasmeen ua faaalia ai o le alofa “e onosaʻi i mea uma, . . . e faamoemoe i mea uma, e tumau i mea uma.” (1 Kori. 13:4, 7) E tigā ma mataʻutia āuga o le ʻinoʻino, ae e sili atu ona malosi le alofa. E suia ai uiga o tagata ma e faafiafiaina ai le finagalo o Ieova. E ui e ʻinoʻino mai pea tagata tetee iā i tatou, ae e tatou te fiafia pea. Aiseā?

18. Aiseā e mafai ai ona tatou fiafia pe a inosia i tatou?

¹⁸ Na fetalai Iesu: “E fiafia outou pe a inosia outou e tagata.” (Luka 6:22) E tatou te lē mananaʻo e inosia i tatou. E tatou te lē fiafia foʻi pe a sauāina i tatou ona o lo tatou faatuatua.  Aiseā la e mafai ai ona tatou fiafia pe a inosia i tatou? Seʻi o tatou iloiloina ni māfuaaga se tolu. Muamua, pe a tatou tumau e tatou te mauaina le finagalo malie o le Atua. (1 Pete. 4:13, 14) Lua, o le a faaleleia ma atili faamalosia ai lo tatou faatuatua. (1 Pete. 1:7) Lona tolu, o le a tatou maua ai le taui sili o le ola e faavavau.—Roma 2:6, 7.

19. Aiseā na fiafia ai le ʻauaposetolo ina ua uma ona sasaina i latou?

¹⁹ E leʻi leva lava talu ona faatūina Iesu, ae tofo loa le ʻauaposetolo i le fiafia na ia fetalai i ai. Ina ua uma ona sasaina ma faatonuina i latou e aua neʻi toe talaʻi, na latou faaalia le olioli. Aiseā? Ona “ua taʻuaogāina i latou ia faaleagaina ona o lona [Iesu] suafa.” (Galu. 5:40-42) Na sili atu lo latou alolofa i lo latou matai, nai lo o le matataʻu i o latou fili. Na latou faaalia lenā alofa e ala i le talaʻia o le tala lelei e “lē aunoa.” E toʻatele o tatou uso i aso nei o loo auauna faamaoni pea e ui i faigatā. E latou te iloa, e lē faagaloina e Ieova a latou galuega ma le alofa ua latou faaalia mo lona suafa.—Epe. 6:10.

20. O le ā o le a talanoaina i le suʻesuʻega e sosoo ai?

²⁰ A o tatou iai pea i lenei faiga o mea, e ʻinoʻino pea le lalolagi iā i tatou. (Ioa. 15:19) Ae e lē manaʻomia ona tatou fefefe ai. O le a talanoaina i le suʻesuʻega o loo sosoo mai e “faatumauina . . . ma puipuia” e Ieova ana auauna faamaoni. (2 Tesa. 3:3) O lea, seʻi faaauau ona tatou alolofa iā Ieova, o tatou uso ma tuafāfine faapea o tatou fili. Pe a tatou mulimuli i lenei fautuaga, o le a faaauau ona tatou autasi ma malolosi faaleagaga. E tatou te faamamaluina ai foʻi Ieova ma faamaonia ai, e sili atu ona malosi le alofa i le ʻinoʻino.