1. O le ā le tulaga moni o tatou uso talavou?

USO talavou, e tele mea e mafai ona outou faia. O le toʻatele o outou e malolosi ona o loo malaulau le talavou. (Faata. 20:29) E tele mea e mafai ona outou fesoasoani ai i a outou faapotopotoga. Atonu o loo e tulimataʻia le taimi e avea ai oe o se auauna o le faiva. Peitaʻi, e te ono manatu e vaai isi iā te oe e te laʻititi, ma e te leʻi agavaa mo ni tiute tauave tāua i le faapotopotoga. E ui atonu e te laʻititi, ae e iai mea e mafai ona e faia i le taimi lenei ina ia maufaatuatuaina ma faaaloalogia ai oe e le faapotopotoga.

2. O le ā o le a tatou suʻesuʻeina i lenei mataupu?

² O le a tatou iloiloina i lenei suʻesuʻega le olaga o le tupu o Tavita. O le a tatou talanoa puupuu foʻi i mea na tutupu iā Asa ma Iosefatu o ni tupu o Iuta. O le a tatou suʻesuʻeina foʻi ituaiga o luʻi na fesagaʻia e nei tane, le auala na latou tali atu ai ma mea e aʻoaʻoina e uso talavou mai i a latou faaaʻoaʻoga.

3. O le ā se tasi o auala e fesoasoani ai talavou i uso ma tuafāfine matutua i le faapotopotoga?

³ A o laʻitiiti le tupu o Tavita, na ia atiaʻe tomai na aogā i isi. O ia o se tagata faaleagaga ma na ia atiaʻe tomai faamusika, lea na ia faaaogā e fesoasoani ai iā Saulo le tupu tofia a le  Atua. (1 Samu. 16:16, 23) Uso talavou, pe e iai ni o outou tomai e mafai ona aogā i isi i le faapotopotoga? Ioe, e toʻatele outou e iai tomai. O se faaaʻoaʻoga, atonu e te mātauina nisi uso ma tuafāfine matutua i le faapotopotoga e fia iloa le auala e faaaogā lelei ai a latou masini faaonapōnei, e fai ai a latou suʻesuʻega totino ma faaaogā i sauniga. E mafai ona e fesoasoani iā i latou na, ona e te malamalama i le faaaogāina o masini faaonapōnei.

4. Ina ia faaaʻoaʻo iā Tavita, o ā uiga e tatau ona atiaʻe e uso talavou?

⁴ Na avea Tavita o se tagata maufaatuatuaina. O se faaaʻoaʻoga, na ia tausia lelei mamoe a lona tamā a o talavou e ui ina lamatia ai lona ola. Na faamatala atu e Tavita i le tupu o Saulo: “Sa avea lau auauna ma leoleo mamoe o le lafu a lona tamā, sa iai foʻi le leona ma le pea, na taʻitasi ma ave se mamoe mai i le lafu. Ona ou tuliloa lea i ai, ma fasi i ai, ma laveaʻi le mamoe mai i lona gutu.” (1 Samu. 17:34, 35) Na iloa e Tavita o lana tiute tauave le tausia lelei o mamoe a lona tamā, ma na ia lototele e puipuia i latou. E mafai e uso talavou ona faaaʻoaʻo iā Tavita e ala i le fai māeʻaeʻa o so o se galuega ua tuu atu iā i latou.

5. E tusa ai ma le Salamo 25:14, o le ā le mea e sili ona tāua e faia e uso talavou?

⁵ A o talavou Tavita, na ia atiaʻe se faiā māfana ma Ieova. Na sili atu ona tāua iā te ia le la faiā ma Ieova nai lo o lona lototele ma lona tomai i le tāina o le kitara. E lē gata o Ieova o le Atua o Tavita, ae o ia foʻi o lana Uō mamae. (Faitau le Salamo 25:14.) Uso talavou, o le mea sili ona tāua e te faia, o le faamalosia o le lua faiā ma lou Tamā i le lagi. O le faia faapea, e te ono maua ai nisi faaeaga faaopoopo i le faapotopotoga.

6. O le ā le vaaiga sesē a nisi e faatatau iā Tavita?

⁶ O se tasi o luʻi na feagai ma Tavita, o le sesē o le vaaiga a tagata iā te ia. O se faaaʻoaʻoga, ina ua ofo atu Tavita e tau ma Koliata, na taumafai le tupu o Saulo e vavao Tavita i lona faapea atu: “O oe o le tamaitiiti.” (1 Samu. 17:31-33) Muamua atu, na tuuaʻia ai Tavita e lona uso o ia o se tagata e lē maufaatuatuaina. (1 Samu. 17:26-30) Ae e leʻi manatu Ieova o Tavita o se tagata e laʻititi tele pe e lē maufaatuatuaina. Na silafia lelei e Ieova Tavita. Na mafai ona  faatoʻilaloina e Tavita Koliata, ona na ia faalagolago i lana Uō o Ieova mo le malosi.—1 Samu. 17:45, 48-51.

7. O le ā e te aʻoaʻoina mai i se tasi o mea na tupu iā Tavita?

⁷ O le ā tatou te aʻoaʻoina mai le mea na tupu iā Tavita? Ua tatou aʻoaʻoina mai ai, e manaʻomia ona tatou onosaʻi. O i latou na iloa oe a o e tamaitiiti, atonu e umi se taimi e faamasani ai iā te oe ina ia iloa ua avea oe ma tagata matua. Ia e mautinoa e silasila Ieova i le ituaiga o tagata e iai oe nai lo o ou foliga vaaia. E silafia lelei e Ieova oe ma mea e mafai ona e faia. (1 Samu. 16:7) Ia faamalosia le lua faiā ma le Atua. Na faia faapea e Tavita e ala i le mafaufau loloto i galuega mataʻina o le foafoaga a Ieova. Na mafaufau loloto foʻi Tavita i mea ua faaalia e na galuega e faatatau i Lē na Foafoaina mea. (Sala. 8:3, 4; 139:14; Roma 1:20) E mafai foʻi ona e faalagolago iā Ieova mo le malosi. O se faataʻitaʻiga, pe e iai ni tamaiti e tou te aʻoʻoga faatasi e ula atu ona o oe o se Molimau a Ieova? Pe afai o lea, ia tatalo iā Ieova mo le fesoasoani e te fesagaʻia ai lenā luʻi. Ia faatatau foʻi fautuaga aogā mai lana Afioga, a tatou lomiga faale-Tusi Paia ma vitiō. O taimi uma e te tofo ai i le fesoasoani a Ieova e fesagaʻia se luʻi, o le faateleina foʻi lenā o lou maufaatuatuaina o ia. Pe a mātauina e isi lou faalagolago iā Ieova, o le a latou maufaatuatuaina foʻi oe.

8-9. O le ā na fesoasoani iā Tavita e faatalitali ai ma le onosaʻi seʻia avea aloaʻia o ia ma tupu, ma o le ā e aʻoaʻoina e uso talavou mai lana faaaʻoaʻoga?

⁸ Seʻi manatu i se isi luʻi na fesagaʻia e Tavita. Ina ua uma ona faauuina Tavita e avea ma tupu, na faatalitali o ia mo le tele o tausaga seʻia avea aloaʻia o ia ma tupu o Iuta. (1 Samu. 16:13; 2 Samu. 2:3, 4) I lenā taimi umi, o le ā na fesoasoani iā te ia e faatalitali ai ma le onosaʻi? Na uaʻi atu Tavita i mea na mafai ona ia faia nai lo le lofitūina i le lotovaivai. O se faaaʻoaʻoga, a o fesolasolataʻi Tavita i nuu o Filisitia, na ia faaaogā lenā avanoa e tau ai ma fili o Isaraelu. O lona faia faapea, na ia puipuia ai tuaoi o Iuta.—1 Samu. 27:1-12.

⁹ O le ā e aʻoaʻoina e uso talavou mai le faaaʻoaʻoga a Tavita? Ia faaaogā avanoa ua e maua e auauna ai i ou uso. Ia mātau le mea na tupu i le uso o Ricardo. * A o talavou na naunau o ia e avea ma paeonia sauatoa, ae na manatu toeaina e leʻi agavaa. Nai lo le faavaivai ma lē fiafia ai, na ia faateleina lona sao i le galuega talaʻi. Na ia faapea mai: “Pe a ou toe manatu i ai, o se avanoa lelei lenā na ou agaʻigaʻi ai i luma. Na ou uaʻi i le toe asia o i latou na faaalia le fiafia, ma maua ni asiga na fua mai, ma amata ai ma laʻu uluaʻi suʻesuʻega faale-Tusi Paia. A o faateleina loʻu poto masani, na faateleina ai foʻi loʻu mautinoa i le galuega talaʻi.” Ua avea nei Ricardo ma se paeonia sauatoa maelega ma se auauna o le faiva.

10. I se tasi o mea na tupu, o le ā na faia e Tavita a o leʻi faia se filifiliga tāua?

¹⁰ Seʻi o tatou iloiloina se isi mea na tupu iā Tavita. A o fesolasolataʻi Tavita ma lana ʻautau mai iā Saulo, na iai le taimi na latou tuua ai o latou aiga ae ō e tau. I lenā taimi, na ō atu ai ni fili ma osofaʻia o latou fale ma ave faatagataotaua o latou aiga. O Tavita o se toa tomai, na ono faigofie ona ia faia se fuafuaga e laveaʻia ai i latou. Peitaʻi, na ia faalagolago iā Ieova mo le taʻitaʻiga. Na talosaga atu Tavita iā Ieova e ala i le ositaulaga o Aviata: “Po ou te tuliloa ea lenei ʻautau?” Na fetalai atu Ieova iā Tavita e alu e tuliloa, ma  na ia faamautinoa atu foʻi o le a ia manumalo. (1 Samu. 30:7-10) O le ā e te aʻoaʻoina mai i lenei tala?

11. O le ā e mafai ona e faia a o leʻi faia ni faaiʻuga?

¹¹ Ia saʻili mo se fautuaga ae e te leʻi faia ni faaiʻuga. Ia talanoa i ou mātua. E te maua foʻi fautuaga lelei mai i toeaina ua iai le poto masani. E maufaatuatuaina e Ieova nei tane tofia ma e mafai foʻi ona e faia faapea. E silasila Ieova iā i latou o ni meaalofa i le faapotopotoga. (Efe. 4:8) E te maua aogā pe a e faaaʻoaʻo i lo latou faatuatua, ma faalogo i a latou fautuaga atamai. Seʻi o tatou iloiloina po o le ā e tatou te aʻoaʻoina mai le tupu o Asa.

12. O ā uiga na iai i le tupu o Asa ina ua faatoʻā amata lana nofoaiga?

¹² A o talavou le tupu o Asa, sa lotomaulalo ma lototele o ia. O se faataʻitaʻiga, ina ua maliu Avia lona tamā na avea ai o ia ma tupu, ma na ia aveesea uma tupua mai le atunuu. E lē gata i lea, na “ia fai atu foʻi iā Iuta e saʻili iā Ieova le Atua o o latou augātamā, ma ia faia le tulafono ma le poloaʻiga.” (2 No. 14:1-7) Ina ua siitaua atu Sera le Aitiope ma lana ʻautau e miliona iā Iuta, na faia e Asa se faaiʻuga atamai i lona talosaga atu iā Ieova mo le fesoasoani, na ia faapea atu: “Ieova e, e lē o se mea faigatā iā te oe ona fesoasoani mai, e tusa lava pe toʻatele po o ē e leai so latou malosi. Ieova e, lo matou Atua, ia e fesoasoani mai iā i matou, auā e matou te faalagolago atu iā te oe.” O na faaupuga logolelei na faaalia ai le tele o le maufaatuatuaina e Asa o Ieova, e mafai ona ia laveaʻia o ia ma ona tagata. Na faatuatuaina e Asa lona Tamā i le lagi, ma na ʻfaatoʻilaloina e Ieova tagata Aitiope.’—2 No. 14:8-12.

13. O le ā na tupu mulimuli ane iā Asa, ma aiseā?

¹³ O se mea mataʻutia le fesagaʻia o se ʻautau e miliona, ae na manumalo le tupu o Asa ona na faalagolago iā Ieova. Peitaʻi, o le mea e faanoanoa ai, ina ua osofaʻi ane se ʻautau toʻaitiiti e leʻi faalagolago Asa iā Ieova. Ina ua faamataʻu ane le tupu amioleaga o Isaraelu o Paasa, na talosaga atu Asa i le tupu o Suria mo se fesoasoani. Na iʻu leaga lenā faaiʻuga. Na fetalai atu Ieova i le tupu o Asa e ala i lana perofeta o Hanani: “Talu ai ua e faalagolago i le tupu o Suria ae e lē  faalagolago iā Ieova lou Atua, o le mea lea, ua sosola ese ai mai i lou lima le ʻautau a le tupu o Suria.” Na iai pea taua i le nofoaiga a Asa talu mai lenā taimi. (2 No. 16:7, 9; 1 Tu. 15:32) O le ā le lesona?

14. E faapefea ona e faalagolago iā Ieova, ma i le 1 Timoteo 4:12, o le ā le ituaiga o tagata o le a iai oe pe a e faia faapea?

¹⁴ Ia lotomaulalo pea ma faaauau ona faalagolago iā Ieova. Ina ua e papatiso, na e faaalia le faatuatua malosi ma maufaatuatuaina Ieova. Maʻeu le fiafia o Ieova e tuu atu le faaeaga o le avea o oe ma se tasi o lona ʻauaiga! O le manatu tāua, ia faalagolago pea iā Ieova. E faigofie ona faalagolago iā Ieova pe a tatou faia filifiliga e sili ona tāua i le olaga, ae faapefea filifiliga e lē tāua tele? E manaʻomia ona tatou matuā maufaatuatuaina Ieova pe a faia filifiliga e aofia ai faafiafiaga, galuega totogi ma sini o le olaga. Aua e te faalagolago i lou lava atamai, ae ia saʻili mataupu silisili o le Tusi Paia e fesoasoani i le faia o se filifiliga, ma faatatau i lou olaga. (Faata. 3:5, 6) O lou faia faapea, o le a e faafiafiaina ai le finagalo o Ieova, ma faaaloalogia ai foʻi oe e le faapotopotoga.—Faitau le 1 Timoteo 4:12.

15. I le 2 Nofoaiga a Tupu 18:1-3; 19:2, o ā mea sesē na faia e le tupu o Iosefatu?

¹⁵ O le mea moni e te lē lelei atoatoa e pei o tagata uma, ma o le a iai taimi e te faia ai mea sesē. Ae e lē avea lenā mea e taofia ai oe mai le faia o le mea sili e auauna ai iā Ieova. Seʻi o tatou iloiloina le faaaʻoaʻoga a le tupu o Iosefatu. E tele ona uiga lelei. A o talavou, “na ia saʻili atu i le Atua o lona tamā ma savali foʻi i lana poloaʻiga.” Na ia auina atu foʻi alii sili i aai uma o Iuta e aʻoaʻo tagata e faatatau iā Ieova. (2 No. 17:4, 7) E ui i le faamaoni o Iosefatu, ae na iai taimi na ia faia ai ni faaiʻuga leaga. O le iʻuga, na aʻoaʻia o ia e se tasi o auauna a Ieova. (Faitau le 2 Nofoaiga a Tupu 18:1-3; 19:2.) O le ā le lesona e tatou te aʻoaʻoina mai lenā tala?

16. O le ā e te aʻoaʻoina mai le mea na tupu iā Rajeev?

¹⁶ Ia talia ma faatatau fautuaga. Atonu e pei oe o isi tama talavou, e lē faigofie ona faatulaga mea e sili ona tāua i lou olaga. Aua e te lotovaivai ai. Seʻi mātau le mea na tupu i se uso talavou e igoa iā Rajeev. E na te manatua le taimi a o talavou, na ia faapea mai: “E iai taimi na ou lē mautonu ai po o le ā e fai i  loʻu olaga. Na pei a aʻu o isi talavou, na sili atu loʻu fiafia i taaloga ma tafaoga nai lo le alu i le sauniga ma talaʻiga.” O le ā na fesoasoani iā Rajeev? Na fautuaina o ia e se toeaina agalelei. Na faapea mai Rajeev: “Na fesoasoani mai le toeaina ou te mafaufau i le mataupu silisili o loo i le 1 Timoteo 4:8.” Na talia ma le lotomaulalo e Rajeev le fautuaga ma toe iloilo mea e faatāua i lona olaga. O le ā le iʻuga? Na ia faapea mai: “I ni nai tausaga mulimuli ane, na ou agavaa ai e avea o se auauna o le faiva.”

17. O ā faalogona o uso ma tuafāfine matutua e faatatau i uso talavou o loo auauna iā Ieova?

¹⁷ E matuā talisapaia e uso ma tuafāfine matutua, le auauna “soosootauʻau” ma uso talavou iā Ieova. (Sefa. 3:9) E tāua iā i latou lou maelega i le faia o galuega ua tuuina atu iā te oe, ma e latou te alolofa tele iā te oe.—1 Ioa. 2:14.

18. I le Faataoto 27:11, o ā faalogona o Ieova e faatatau i uso talavou o loo auauna iā te ia?

¹⁸ Uso talavou, aua neʻi galo, e alofa ma maufaatuatuaina e Ieova outou. Na valoia e Ieova o aso e gata ai, o le a matuā toʻatele tane talavou e lotomalilie e ofo atu i latou e auauna iā Ieova. (Sala. 110:1-3) E silafia e Ieova e te alofa iā te ia, ma e te manaʻo e fai le mea sili e auauna ai iā te ia. O lea, ia e onosaʻi e lē gata i uiga e faaalia e isi, ae ia onosaʻi foʻi iā te oe lava. Pe a e faia se mea sesē, ia talia toleniga ma aʻoaʻiga, ma ia vaai i ai e mai iā Ieova. (Epe. 12:6) Ia galue māeʻaeʻa i so o se faaeaga e te maua. Ae ia sili atu ona e faafiafiaina lou Tamā i le lagi i mea uma e te faia.—Faitau le Faataoto 27:11.