1-3. (a) E tusa ai ma le Salamo 5:4-6, o ā faalogona o Ieova e faatatau i amioga leaga? (e) Aiseā e tatou te faapea atu ai o faigaaiga faamalosi e faia i tamaiti, e solia ai “le tulafono a le Keriso”?

E INOSIA e Ieova le Atua so o se ituaiga o amioga leaga. (Faitau le Salamo 5:4-6.) E matuā ʻinoʻino Ieova i faigaaiga faamalosi e faia i tamaiti, o se amioga leaga e sili ona matagā. I le avea ai o i tatou ma auauna a Ieova, e tatou te faaaʻoaʻo iā te ia e ala i le ʻinoʻino i nei faiga matagā, ma e tatou te lē taliaina i totonu o le faapotopotoga Kerisiano.​—Roma 12:9; Epe. 12:15, 16.

² O so o se faigaaiga faamalosi e faia i tamaiti, e matuā solia ai “le tulafono a le Keriso.” (Kala. 6:2) Aiseā? E pei ona taʻua i le mataupu ua mavae, o le tulafono a le Keriso lea e aofia ai aʻoaʻoga ma le faaaʻoaʻoga a Iesu, e faavae i le alofa ma e faaauiluma ai le faamasinotonu. O le usitaʻia e Kerisiano moni o lea tulafono, e latou te feutagaʻi ai ma fanau i se auala e latou te lagona ai le saogalemu ma le alofa moni. Peitaʻi, o le faaleagaina o tamaiti, o se gaoioiga manatu faapito lea e lagona ai e le tamaitiiti e lē o alofagia ma malupuipuia o ia.

³ E faanoanoa ona o le faaleagaina o tamaiti o se amioga matagā ua aafia ai le lalolagi atoa, e oo lava i Kerisiano moni. Aiseā? Ua faatoʻateleina “tagata amioleaga ma ē taufaasesē,” ma ua taumafai nisi e auaufaatasi ma le faapotopotoga. (2 Timo. 3:13) E lē gata i lea, e iai i latou na avea ma sui o le faapotopotoga, ae ua lolo atu i o latou tuʻinanauga matagā ma faaleagaina ai tamaiti. Seʻi o tatou iloiloina pe aiseā o se agasala matuiā ai le faaleagaina o tamaiti. O le a iloiloina foʻi le  auala e taulima ai e toeaina se agasala matuiā e aofia ai faigaaiga faamalosi i tamaiti, ma le auala e puipuia ai e mātua a latou fanau. *

4-5. Aiseā e avea ai le faia o faigaaiga faamalosi o se agasala i le tamaitiiti na faaleagaina?

⁴ E tugā aafiaga o faigaaiga faamalosi e faia i tamaiti. E lē gata e aafia ai tamaiti ae faapea foʻi ē e alolofa iā i latou, e pei o o latou aiga ma uso ma tuafāfine Kerisiano. Ioe, o le faaleagaina o tamaiti, o se agasala matuiā.

⁵ O se agasala i le tamaitiiti na faaleagaina. * O se agasala le faaoo o tigā ma mafatiaga i isi tagata. O le mea tonu lenā e faia e le tagata e faaleagaina tamaiti, ma e na te matuā faatigā i le tamaitiiti i ni auala ogaoga. O le manatu lenā o le a talanoaina i le mataupu o loo sosoo mai. E faaaogāsesē e lea tagata le maufaatuatuaina o ia e le tamaitiiti, ma iʻu atu ai i le lē toe lagona e le tamaitiiti o le saogalemu. E tatau ona puipuia le fanauiti mai i na amioga leaga, ma e manaʻomia e i latou ua faaleagaina faamāfanafanaga ma le fesoasoani.​—1 Tesa. 5:14.

6-7. Aiseā e avea ai le faia o faigaaiga faamalosi i tamaiti o se agasala i le faapotopotoga ma faipule silisili?

⁶ O se agasala i le faapotopotoga. O se sui o le faapotopotoga e faaleagaina tamaiti, e taʻuleagaina ai le faapotopotoga. (Mata. 5:16; 1 Pete. 2:12) O na amioga e taʻuleagaina ai taumafaiga a le faitau miliona o isi Kerisiano faamaoni, o ē o loo “finafinau mo le faatuatua.” (Iuta 3) E tatou te matuā lē taliaina i totonu o le faapotopotoga i latou e faia ma le loto i ai amioga leaga e aunoa ma le salamō, ma taʻuleagaina ai le talaaga lelei o le faapotopotoga.

⁷ O se agasala i faipule silisili. E tatau i Kerisiano ona ʻgauaʻi i faipule silisili.’ (Roma 13:1) E faaalia lo tatou gauaʻi e ala i le usiusitaʻi i tulafono a le atunuu. Pe a solia e se sui o le faapotopotoga se tasi o na tulafono, e pei o le faia o faigaaiga faamalosi i tamaiti, o lenā ua ia agasala i faipule silisili. (Faatusatusa i le Galuega 25:8.) E ui lava e leai se pule i toeaina e faasala ai lē na solia se tulafono a le atunuu, ae e latou te lē puipuia le tagata na faaleagaina tamaiti mai i le faasalaga e tuuina mai e le malo. (Roma 13:4) E na te selesele i āuga o lana solitulafono na fai.​—Kala. 6:7.

8. O le ā le silafaga a Ieova pe a faia e se tasi se agasala i se isi tagata?

⁸ E sili atu i lenā, o se agasala i le Atua. (Sala. 51:4) Pe a faia e se tasi se agasala i se isi tagata, o lenā ua ia agasala foʻi iā Ieova. Ia mātau se tasi o tulafono mai i le Tulafono faa-Mose e faapea, o se tasi e talepe fale pe ave faagaoi se mea mai i lana uō, e tusa lenā ua ia “lē faamaoni iā Ieova.” (Levi. 6:2-4) O lea, pe a faaleagaina e se sui o le faapotopotoga se tamaitiiti ma lē toe lagona ai e le tamaitiiti le saogalemu, e tusa lenā ua ia lē faamaoni i le Atua. Ua matuā faalumaina e lea tagata le suafa o Ieova. O le māfuaaga lea e tatou te vaai ai i le faia o faigaaiga faamalosi i tamaiti, o se agasala matuiā i le Atua ma e tatau ona tatou ʻinoʻino i ai.

9. O ā faamatalaga faale-Tusi Paia ua saunia mai e le faalapotopotoga a Ieova mo le tele o tausaga, ma aiseā?

⁹ Ua saunia mai e le faalapotopotoga a Ieova mo le tele o tausaga, le anoanoaʻi  o faamatalaga faale-Tusi Paia e faatatau i faigaaiga faamalosi i tamaiti. O se faataʻitaʻiga, o loo faamatalaina i mataupu i Le Olomatamata ma le Ala Mai!, auala na feagai ai nisi o i latou na faaleagaina ma aafiaga ogaoga ua oo iā i latou, o auala e fesoasoani ma faalaeiau atu ai iā i latou, faapea auala e puipuia ai e mātua a latou fanau. Ua maua e toeaina mai i le faalapotopotoga a Ieova toleniga faapitoa faale-Tusi Paia, i auala e taulima ai le agasala o le faaleagaina o tamaiti. O loo faaauau pea ona tilofaʻia e le faalapotopotoga le auala e taulima ai lea agasala. Aiseā? Ina ia faamautinoa o loo ōgatusa ma le tulafono a le Keriso.

10-12. (a) O le ā e ao ona manatua e toeaina pe a taulima se agasala matuiā, ma o ā mea e tāea i o latou mafaufau? (e) E tusa ai ma le Iakopo 5:14, 15, o le ā e taumafai toeaina e fai?

¹⁰ Pe a taulima e toeaina se agasala matuiā, e latou te manatua le tulafono a le Keriso, e manaʻomia ona latou tausia ma le alofa le lafu mamoe a le Atua, ma ia faia le mea tonu i lana silafaga. O lea, pe a latou maua se lipoti i se tasi ua faia se agasala matuiā, e tele mea e tāea i o latou mafaufau. O le mea e sili ona tāua i toeaina, o le faatumauina lea o le paia o le suafa o le Atua. (Levi. 22:31, 32; Mata. 6:9) E latou te manatu mamafa foʻi i le lelei faaleagaga o o latou uso ma tuafāfine i le faapotopotoga, ma avatu le fesoasoani iā i latou na aafia ona o se agasala matuiā.

¹¹ E lē gata i lea, pe afai o lē na agasala o se sui o le faapotopotoga, e vaavaai toeaina po ua ia salamō moni ma pe e mafai ona toe faaleleia lana faiā ma Ieova. (Faitau le Iakopo 5:14, 15.) O se Kerisiano e lolo atu i ona tuʻinanauga ma faia se agasala matuiā, ua maʻi faaleagaga o ia. O lona uiga e lē o toe iai sana faiā lelei ma Ieova. * O lea, e pei toeaina o ni fomaʻi faaleagaga. E latou te faia taumafaiga ina ia toe “malosi ai le tagata maʻi [po o lē na faia le agasala].” O a latou fautuaga faale-Tusi Paia e mafai ona fesoasoani i le tagata agasala ina ia toe faaleleia ai lana faiā ma le Atua. Ae e faatoʻā mafai ona tupu lenā mea, pe afai e na te faaalia le salamō moni.​—Galu. 3:19; 2 Kori. 2:5-10.

¹² O le mea moni, e mamafa le tiute tauave a toeaina. E latou te manatu mamafa i le lafu mamoe a le Atua ua tofia i latou e tausia. (1 Pete. 5:1-3) E latou te mananaʻo ina ia lagona e o latou uso ma tuafāfine le saogalemu i le faapotopotoga. O lea, e latou te vave gaoioi ai pe a maua se lipoti i se tasi ua faia se agasala matuiā, e aofia ai le faaleagaina o tamaiti. Ia mātau fesili o loo i le amataga o  palakalafa e 13,  15, ma le  17.

13-14. Pe e usitaʻia e toeaina tulafono a le atunuu e faatatau i le lipotia o se tasi ua tuuaʻia i le faaleagaina o tamaiti? Ia faamatala.

 ¹³ Pe e usitaʻia e toeaina tulafono a le atunuu e faatatau i le lipotia i leoleo o se tasi ua tuuaʻia i le faaleagaina o tamaiti? Ioe. I atunuu e iai na tulafono, e taumafai toeaina e usitaʻia tulafono a le atunuu, e ala i le lipotia o se tasi ua tuuaʻia i le faaleagaina o tamaiti. (Roma 13:1) O na tulafono e lē o solia ai le tulafono a le Atua. (Galu. 5:28, 29) O lea, pe a maua e toeaina se lipoti e faatatau i se tasi ua tuuaʻia i le faia o lea amioga, e vave ona latou saʻili taʻiala mai i le ofisa o le lālā, i le auala e faailoa atu ai i leoleo le soligatulafono ua lipotia mai.

¹⁴ E faamautinoa atu e toeaina i tamaiti na faaleagaina ma o latou mātua, faapea isi na iloa le mea na tupu, e mafai ona latou lipotia  le mataupu i leoleo. Ae e faapefea pe afai o lē ua tuuaʻia o se tasi o le faapotopotoga, ma ua iloa e le toʻatele o tagata o le vaipanoa le mea na tupu? Pe e tatau i le Kerisiano na lipotia le mataupu ona popole ua ia faalumaina le suafa o le Atua? E leai. O lē ua faalumaina le suafa o le Atua, o le tagata na faia le solitulafono.

15-16. (a) E tusa ai ma le 1 Timoteo 5:19, aiseā e manaʻomia ai ni molimau se toʻalua pe sili atu, a o leʻi taulima e se komiti faafaamasinoga le mataupu? (e) O le ā e ao ona faia e toeaina pe a latou maua se lipoti ua tuuaʻia se tasi o le faapotopotoga i le faaleagaina o tamaiti?

 ¹⁵ I le faapotopotoga, a o leʻi taulima e se komiti faafaamasinoga le mataupu, aiseā e manaʻomia ai ni molimau se toʻalua pe sili atu? Talu ai o tapulaa maualuluga na a le Tusi Paia mo le faamasinotonu. Pe a lē taʻutino e le tagata na tuuaʻia lana agasala, e manaʻomia ni molimau se toʻalua na vāai i le mea na tupu ina ia faamaonia ai le tuuaʻiga, ma mafai ai loa e toeaina ona faavae se komiti faafaamasinoga. (Teu. 19:15; Mata. 18:16; faitau le 1 Timoteo 5:19.) Po o lona uiga la seʻiloga e iai ni molimau se toʻalua, ona faatoʻā mafai lea ona lipoti i leoleo lē ua tuuaʻia i le faaleagaina o tamaiti? E leai. O lenā faatulagaga e patino i le faapotopotoga Kerisiano. Peitaʻi, e tatau ona lipoti pea i leoleo lē ua tuuaʻia i le faia o le solitulafono.

¹⁶ Pe a iloa e toeaina ua tuuaʻia se tasi o le faapotopotoga i le faaleagaina o tamaiti, e latou te taumafai e usitaʻia tulafono a le atunuu e ala i le lipotia o le mea na tupu. Pe a māeʻa lenā, ona latou faaaogā lea o le Tusi Paia e iloilo ai le mataupu, ina ia iloa pe e tatau ona faavae se komiti faafaamasinoga. Pe a faafiti le tagata e faapea e sesē tuuaʻiga, ona iloilo lea e toeaina o le taʻutinoga a molimau. Pe afai e faamaonia e nisi se toʻalua le mea na tupu, e aofia ai lē na faia le tuuaʻiga ma se isi e faamaonia le mea na tupu, po o se isi foʻi taimi na faaleagaina ai e lea tagata se isi tamaitiiti, ona faatoʻā faavae lea o se komiti faafaamasinoga. * E lē faapea a toʻatasi le molimau, ona lē moni ai lea o le faamatalaga a lē na tuuaʻia le tagata agasala. E tusa pe e toʻatasi le molimau e faamaonia le mea na tupu, ae e iloa e toeaina atonu na faia e le tagata ua tuuaʻia se agasala matuiā, lea e matuā tigā ai isi. E faaauau pea ona fesoasoani toeaina i so o se tasi na aafia faalogona ona o le mea na tupu. E mātaʻitū foʻi e toeaina gaoioiga a lē ua tuuaʻia, ina neʻi toe faia se isi gaoioiga e lamatia ai le faapotopotoga.​—Galu. 20:28.

17-18. Faamatala le matafaioi a le komiti faafaamasinoga.

 ¹⁷ O le ā le matafaioi a le komiti faafaamasinoga? O le upu “faafaamasinoga,” e lē uiga atu faapea e faamasino e toeaina lē ua agasala pe e latou te filifili pe e tatau ona faasalaina o ia e faipule silisili. E lē aiā toeaina i le faamalosia o tulafono a le atunuu, ae e taatia atu i faipule silisili e latou te taulimaina soligatulafono. (Roma 13:2-4; Tito 3:1) E faamasino pe e filifili e toeaina, pe e tatau ona tumau pea ona iai lē na agasala i le faapotopotoga.

¹⁸ E na o mataupu e aafia ai le faiā a se tasi ma Ieova faapea isi uso tapuaʻi, e iloiloina e le komiti faafaamasinoga. E latou te faaaogā le Tusi Paia e filifili ai po ua salamō le tagata faimea sesē pe leai. Pe afai e lē salamō, e faateʻaina o ia ma o le a faasilasila i le faapotopotoga. (1 Kori. 5:11-13) Ae afai e na te faaalia le salamō, e mafai ona avea pea o ia ma sui o le faapotopotoga. Peitaʻi, e faailoa atu e toeaina e lē toe agavaa o ia e auauna i so o se faaeaga, pe auauna foʻi o se toeaina po o se auauna o le  faiva i le faapotopotoga. O le manatu mamafa o toeaina i le fanauiti, atonu e latou te talanoa atu ai i mātua i le faapotopotoga, ina ia vaavaai lelei a latou fanau pe a iai faatasi ma lea tagata. I le taimi e tasi, e faaeteete foʻi toeaina ina ia aua neʻi faailoa atu ni faamatalaga faalilolilo e faatatau i fanau na faaleagaina.

19-22. O le ā e mafai ona faia e mātua ina ia puipuia ai a latou fanau? (Tagaʻi i le ata i le faavaa.)

¹⁹ O mātua e ana le tiute tauave o le puipuia o fanau mai i lamatiaga. * O lau fanau o se meaalofa ma “o le tofi lea mai iā Ieova.” (Sala. 127:3) O lau tiute tauave le puipuimalu o lenā meaalofa. O le ā e mafai ona e faia ina ia puipuia ai lau fanau mai i le faaleagaina?

²⁰ Muamua, ia e aʻoaʻoina mea e faatatau i le faaleagaina o tamaiti. Ia e iloa mea e faatatau i ituaiga o tagata e faaleagaina tamaiti, ma togafiti e latou te faaaogā e faasesē ai tamaiti. Ia e mataala i tulaga po o tagata e mafai ona lamatia ai le fanau. (Faata. 22:3; 24:3) Ia manatua o le tele o mea e tutupu, o lē e faaleagaina le tamaitiiti o se tasi e iloa lelei ma maufaatuatuaina e le tamaitiiti.

²¹ Lua, ia lelei pea fesootaʻiga ma lau fanau. (Teu. 6:6, 7) E aofia ai le avea o oe o sē e faalogologo lelei. (Iako. 1:19) Ia manatua e masani ona fefefe tamaiti e taʻu se tagata na faaleagaina i latou. Atonu e latou te mafaufau e leai se isi o le a talitonuina i latou, pe atonu na faafefe i latou e lea tagata ina ia aua le taʻuina le mea na tupu. Pe a e masalomia ua iai se mea ua tupu, ia fesili atu iā i latou i se auala agalelei, ona faalogologo lea ma le onosaʻi a o latou talanoa mai.

²² Tolu, ia aʻoaʻo lau fanau. Ia taʻu atu iā i latou faamatalaga e manaʻomia ona latou iloa e faatatau i feusuaʻiga, e fua i lo latou matutua ma mea e mafai ona malamalama ai. Ia aʻoaʻo i latou i le faamatalaga ma le gaoioiga e fai, pe a taumafai se tasi e tago atu i se auala e lē talafeagai. Ia faaaogā faamatalaga mai i le faalapotopotoga a le Atua i le auala e puipui ai lau fanau.​—Tagaʻi i le pusa “ Ia Aʻoaʻoina Oe Lava Faapea Lau Fanau.”

23. O le ā la tatou vaaiga i faigaaiga faamalosi e faia i tamaiti, ma o le ā o le a iloiloina i le mataupu o sosoo mai?

²³ I le avea ai o i tatou ma Molimau a Ieova, e tatou te vāai i faigaaiga faamalosi e faia i tamaiti, o se agasala matuiā ma o se amioga leaga e sili ona matagā. O lo tatou usitaʻia o le tulafono a le Keriso, e lē puipuia ai e a tatou faapotopotoga ē e faia nei amioga matagā mai i āuga o a latou agasala. Ae e faapefea ona tatou fesoasoani iā i latou na faaleagaina? O le a taliina lenā fesili i le mataupu o sosoo mai.