1. O le ā ua faailoa mai i le Afioga a le Atua?

E MAFAI ona tatou taulimaina so o se faafitauli, talu ai o Ieova o lo tatou Aʻoaʻo Sili. (Isa. 30:20, 21) Ua faailoa mai i lana Afioga mea uma e tatou te manaʻomia, ina ia tatou “matuā agavaa ai” ma “lava saunia mo galuega lelei uma.” (2 Timo. 3:17) Pe a tatou ola e ōgatusa ma aʻoaʻoga o le Tusi Paia, o le a sili atu lo tatou atamamai nai lo o i latou e fai mai e tatau ona tatou ola e tusa ma le “atamai o lenei lalolagi.”​—1 Kori. 3:19; Sala. 119:97-100.

2. O le ā o le a tatou iloiloina i lenei mataupu?

² O le mea moni, o le atamai o le lalolagi e masani ona faaauiluma ai tuʻinanauga o le tino. O lea, atonu e faigatā ai ona tatou teena le mafaufau ma gaoioi e pei o tagata o le lalolagi. O le māfuaaga lea ua fautua mai ai le Tusi Paia: “Ia faaeteete: ina neʻi maileia outou e se tasi i filosofia ma manatu taufaasesē e lē aogā e tusa ma tū masani a tagata.” (Kolo. 2:8) I lenei mataupu, o le a tatou iloiloina ai le auala na amata ai ona talia e le toʻatele ni manatu taufaasesē lē aogā se lua. E lē gata i lea, o le a talanoaina ai le māfuaaga e valea ai le atamai o le lalolagi, ma pe e faapefea ona sili atu le atamai o le Afioga a le Atua, nai lo o se isi lava mea e ofo mai e le lalolagi.

3-4. I le Iunaite Setete, o ā suiga na amata ona iai i manatu o tagata e faatatau i amioga mamā i le tauamatamataga o le senituri lona 20?

³ I le tauamatamataga o le senituri lona 20 i le Iunaite Setete, na mātauina ai le suiga tele i manatu o tagata e faatatau i amioga mamā. A o leʻi oo i lenā vaitaimi, na talitonu ai le  toʻatele e na o i latou ua faaipoipo e tatau ona faia feusuaʻiga, ma o lenei mataupu e lē talanoaina faalauaʻitele. Peitaʻi, na faasolo ina teena e tagata na tapulaa ma taatele ai amioga lē mamā.

⁴ Na lauiloa tausaga e amata mai i le 1920 e oo i le 1929 i suiga tetele o le olaga. Na taʻua e se tasi o tagata suʻesuʻe: “O ata tifaga, tala faatino, pese, tusi faitau, ma faasalalauga ua tele ina faaalia ai vala e fesootaʻi atu i feusuaʻiga.” A o faagasolo lenā vaitaimi, na amata ona iai siva faatosina, ma faasolo ina lē onomea lavalava. E pei ona valoia i le Tusi Paia e faatatau i aso e gata ai, o le a ʻpupū tagata i mea faafiafia.’​—2 Timo. 3:4.

5. O le ā le suiga o le vaaiga a le lalolagi e faatatau i amioga mamā talu mai le 1960-1969?

⁵ I le vaitaimi o le 1960-1969, na amata ona taatele ai le nonofo faapouliuli o ulugalii, o amioga faatauatane ma tauafafine, faapea le faigofie ona tatala o faaipoipoga. O le tele o faafiafiaga ua faaalia ai le faia o feusuaʻiga. O ā iʻuga o nei vala? Na taʻua e se tasi o tusitala, o aiga malepelepe, mātua nofo toʻatasi, faalogona tigā, pulea e ata matagā taufeusuaʻiga, ma isi aafiaga, e māfua mai i le “sasao faaafi o faiga lē mamā taufeusuaʻiga lea ua aafia ai le sosaiete o tagata.” O le taatele o faamaʻi pipisi ona o feusuaʻiga e pei o le AIDS, o se tasi lea o faamaoniga o le valea o le atamai o le lalolagi.​—2 Pete. 2:19.

6. E faapefea i le vaaiga a le lalolagi e faatatau i feusuaʻiga ona faataunuu ai le manaʻo o Satani?

⁶ O le vaaiga sesē a le lalolagi e faatatau i feusuaʻiga, o le mea tonu lea o loo manaʻo ai Satani. E mautinoa lona fiafia i le vaai mai o loo faaaogā sesē e tagata le meaalofa a le Atua o feusuaʻiga, ma lē faamamaluina ai Lana faatulagaga o le faaipoipoga. (Efe. 2:2) O le faia o feusuaʻiga lē mamā e lē gata ua lē faatāuaina ai le meaalofa a le Atua lea e maua ai fanau, ae e melea ai foʻi le avanoa e ola ai e faavavau.​—1 Kori. 6:9, 10.

7-8. O le ā le vaaiga talafeagai ma paleni e faatatau i feusuaʻiga o loo taʻua i le Tusi Paia?

⁷ O tagata e mulimuli i le atamai o lenei lalolagi e latou te faifai i tapulaa tauamio o le Tusi Paia, e ala i le faapea mai ua lē toe aogā na tapulaa. E latou te ono fesili: ʻAiseā na foafoa ma tuuina ai e le Atua faalogona taufeusuaʻiga iā i tatou, ae toe faapea mai e tatau ona pulea na faalogona?’ E māfua lenā fesili  ona e latou te manatu e tatau ona faia e le tagata so o se mea e manaʻo i ai. Peitaʻi, e lē o le manatu lenā o le Tusi Paia. Ua faatonuina i tatou ina ia pulea o tatou tuʻinanauga. (Kolo. 3:5) E lē gata i lea, ua foaʻi mai e le Atua le meaalofa o le faaipoipoga, o se faatulagaga e mafai ona faamalieina ai faalogona taufeusuaʻiga i se auala faamamaluina. (1 Kori. 7:8, 9) O lenei foʻi faatulagaga, e mafai ai e le tane ma le avā ona maua le fiafia i feusuaʻiga, e aunoa ma faalogona nofosala ma popole ona o le faia o amioga lē mamā.

⁸ E ese mai i le atamai o le lalolagi, ua faaauiluma e le Tusi Paia le vaaiga paleni e faatatau i feusuaʻiga. Ua faailoa mai ai e mafai ona maua le fiafia i feusuaʻiga. (Faata. 5:18, 19) Peitaʻi, ua faapea mai foʻi le Tusi Paia: “Ia taʻitasi outou ona iloa pulea o lona lava tino ina ia paia ma mamalu, ae e lē o le tuʻinanau o le manaʻo tele i feusuaʻiga e pei ona masani ai nuu o ē e lē iloa le Atua.”​—1 Tesa. 4:4, 5.

9. (a) Na faapefea ona faalaeiauina tagata o Ieova i le amataga o le senituri lona 20 ina ia mulimuli i le atamai o loo i le Afioga a le Atua? (e) O le ā le fautuaga atamai o loo i le 1 Ioane 2:15, 16? (i) O ā amioga lē mamā e tatau ona tatou ʻalofia o loo taʻua i le Roma 1:24-27?

⁹ A o faagasolo le amataga o le senituri lona 20, e leʻi faasesēina tagata o Ieova i manatu taufaasesē o tagata ʻua lē toe lagona le mā’ ona o a latou amioga. (Efe. 4:19) Na latou taumafai e tausisi i tapulaa a Ieova. Na taʻua i le Watch Tower o Me 15, 1926, “e tatau i se tamāloa po o se fafine ona mamā ma lē ponā ona mafaufauga ma ana gaoioiga, aemaise lava pe a feutagaʻi ma le isi itupā.” E tusa po o ā mea na tutupu i le lalolagi i lenā vaitaimi, ae na mulimuli tagata o Ieova i taʻiala e sili ona atamai o loo i le Afioga a le Atua. (Faitau le 1 Ioane 2:15, 16.) Maʻeu lo tatou talisapaia o le Afioga a le Atua! E tatou te lotofaafetai foʻi iā Ieova mo le saunia mai o meaʻai faaleagaga i le taimi tatau, lea ua fesoasoani iā i tatou ina ia ʻalofia ai le faasesēina i le atamai o le lalolagi e faatatau i amioga mamā. *​—Faitau le Roma 1:24-27.

10-11. O le ā na lapataʻi mai le Tusi Paia o le a tupu i aso e gata ai?

¹⁰ Na lapataʻi mai le Tusi Paia, pe a faagasolo aso e gata ai, o le a avea tagata ma “ē e alolofa iā i latou lava.” (2 Timo. 3:1, 2) E lē faateʻia ai la i tatou i le faaauilumaina e le lalolagi o le agaga manatu faapito. Na taʻua i se lomifefiloi, a o faagasolo vaitaimi o le 1970-1979, na “faatupulaʻia le aofaʻiga o tusi e aumaia ai fautuaga i le auala e maua ai se olaga manuia.” O nisi o tusi “na uunaʻia ai tagata faitau ina ia latou mitamita ma faaeaea iā i latou lava.” O se faataʻitaʻiga, o le manatu lenei na taʻua i se tasi o na tusi: “Ia e alofa iā te oe lava, ona o oe le tagata e sili ona aulelei, mataʻina ma tāua.” Ua faalaeiauina e lenā tusi “le filifili e le tagata lava ia o le auala e ola ai, ma faia le mea e manatu o ia lava e tonu ma talafeagai.”

¹¹ Pe na e faalogo muamua i lenā manatu? E faapena le mea na faalaeiau atu Satani iā Eva ina ia fai. Na ia fai atu iā Eva e mafai ona ʻpei o ia o le Atua, e iloa le lelei ma le leaga.’ (Kene. 3:5) I aso nei, ua matuā faatāua e le toʻatele o tagata i latou lava ma latou manatu ai, e leai se tagata e mafai ona faatonuina i latou i le mea saʻo ma le mea sesē, e oo lava i le Atua. O se faataʻitaʻiga, ua matuā matilatila lenā manatu i le auala e vaai ai tagata i le faaipoipoga.

12. O le ā le manatu o loo faaauiluma e le lalolagi e faatatau i le faaipoipoga?

 ¹² Ua faatonuina i le Tusi Paia tane ma avā ina ia faamamaluina e le tasi le isi, ma tausisi i a la tautoga o le faaipoipoga. Ua faalaeiauina ai foʻi paaga faaipoipo ina ia maumauaʻi e nonofo faatasi e ala i le faapea mai: ʻE tuua e le tane lona tamā ma lona tinā, ma nonofo faatasi ma lana avā, ona avea ai lea o i laʻua ma tino e tasi.’ (Kene. 2:24) Peitaʻi, e ese le manatu o loo faaauiluma e tagata ua aafia i le atamai o lenei lalolagi. Ua latou faapea mai, e tatau i paaga faaipoipo ona uaʻi atu le tagata lava ia i ona manaʻoga. Ua taʻua i se tusi e faatatau i talaga faaipoipoga: “I nisi o sauniga o faaipoipoga, ua suia le tautoga masani o le a ta faaipoipo e tusa ʻpo o le ā lava le umi e ta te ola faatasi ai,’ i le tautoga o le a ta faaipoipo ʻpo o le ā lava le umi e alofa ai le tasi i le isi.’” O le manatu māmā faapena i le faaipoipoga, ua iʻu atu ai i le tele o aiga malepelepe, ma faapogaia ai faalogona tigā. O le mea moni, e valea le manatu o le lalolagi e faatatau i le faaipoipoga.

13. O le ā se tasi o māfuaaga e inosia ai e Ieova tagata mimita?

¹³ Ua faapea mai le Tusi Paia: “O le loto mimita o tagata, o se mea lea e inosia e Ieova.” (Faata. 16:5) Aiseā e inosia ai e Ieova tagata mimita? O se tasi o māfuaaga, ona o i latou e matuā faatāua i latou lava, o loo latou faataʻitaʻi i le faamaualuga o Satani. Seʻi mafaufau i ai, na faaaogā e le Atua Iesu e foafoaina mea uma. Ae na manatu Satani, e tatau ona ifo ma tapuaʻi atu Iesu iā te ia. (Mata. 4:8, 9; Kolo. 1:15, 16) Ua faaalia mai e i latou e soona faatāuaina i latou lava, o le atamai o le lalolagi o le valea lea i luma o le Atua.

14. Ua faapefea ona fesoasoani mai le Roma 12:3 ina ia maua ai se vaaiga paleni e faatatau iā i tatou lava?

¹⁴ Ua fesoasoani mai le Tusi Paia ina ia tatou maua se vaaiga paleni e faatatau iā i tatou lava. Ua taʻua ai o se mea e talafeagai lo tatou alolofa iā i tatou lava. O le fetalaiga a Iesu, “Ia e alofa atu i lou tuaoi e pei o oe lava iā te oe,”  ua faaalia mai ai e mafai ona tatou uaʻi atu i o tatou lava manaʻoga. (Mata. 19:19) Peitaʻi, e lē o aʻoaʻoina i le Tusi Paia i tatou ina ia faasili atu i tatou nai lo o isi. Nai lo o lea, ua taʻua ai: “Ia aua lava neʻi faia se mea ma le finauvale ma le faasausili, ae ia faia ma le lotomaulalo, i le manatu ua sili isi iā te outou.”​—Fili. 2:3; faitau le Roma 12:3.

15. Aiseā e te talitonu ai e sili atu le manatu o le Tusi Paia e faatatau i le auala e tatau ona tatou manatu ai iā i tatou lava?

¹⁵ O le toʻatele o tagata atamamai i aso nei, e latou te faapea mai e sesē le manatu o le Tusi Paia. E latou te faapea mai o le mafaufau e sili atu isi nai lo o oe, o le a avea ai oe o sē e vaivai ma manatu faatauvaa ai isi iā te oe. Peitaʻi, o le ā ua iʻu i ai le uiga manatu faapito o loo faaauiluma e le lalolagi a Satani? O le ā ua e mātauina? Po o fiafia tagata manatu faapito? Po o fiafia o latou aiga? Po o maua ni a latou uō moni? Po o latou maua se faiā vavalalata ma le Atua? Pe a fua i na mea, o lē fea itu e maua ai iʻuga e sili ona lelei, o le mulimuli i le atamai o le lalolagi po o le mulimuli i le atamai o loo i le Afioga a le Atua?

16-17. O le ā e tatou te lotofaafetai ai, ma aiseā?

¹⁶ O tagata e mulimuli i fautuaga a i latou e manatu i ai le lalolagi o ni ē e atamamai, e tai pei i latou o se turisi o loo fesili atu i se isi turisi mo le auala e agaʻi i ai, ae o loo fesēaʻi foʻi lenā turisi. Na fetalai Iesu e faatatau i tagata atamamai i ona aso: “O i latou o taʻitaʻi tauaso. Afai e taʻitaʻi e le tauaso le isi tauaso, e paʻuʻū uma i laʻua i le lua.” (Mata. 15:14) Ioe, o le atamai o le lalolagi o le valea lea i luma o le Atua.

¹⁷ O fautuaga atamai o loo i le Tusi Paia e “aogā e aʻoaʻo ai, e aʻoaʻi ai, e faasaʻo ai mea, e faatonu ai i le amiotonu.” (2 Timo. 3:16) Maʻeu lo tatou lotofaafetai, ona ua faaaogā e Ieova lana faalapotopotoga e puipuia ai i tatou mai i le atamai o lenei lalolagi! (Efe. 4:14) O meaʻai faaleagaga ua Ia saunia mai, ua tatou maua ai le malosi lea e mafai ona tatou tausisi ai i tapulaa o loo i lana Afioga. O se faaeaga le taʻitaʻia o i tatou i le atamai e lē mafaatusalia o loo i le Tusi Paia!