1-2. O le ā na taʻua e se tusitala, ma o le ā o le a tatou talanoaina i lenei suʻesuʻega?

E FAITAU miliona i latou e talitonu iā Iesu i aso nei, ae e latou te lē taliaina mea na ia aʻoaʻoina. (2 Timo. 4:3, 4) O le mea moni, na tusi se tusitala: “Pe ana faapea o loo tatou faatasi i aso nei ma se tagata e pei o Iesu, e fetalai o ia i mea e pei ona fetalai i ai Iesu, po o le a tatou teena o ia e pei ona teena o Iesu i le lua afe tausaga ua mavae? . . . O le tali: Ioe, e tatou te teena o ia.”

² E toʻatele tagata i le uluaʻi senituri na faalogo i aʻoaʻoga a Iesu ma vāai i vavega na ia faia. Peitaʻi, e latou te leʻi faatuatua iā te ia. Aiseā? I le suʻesuʻega ua mavae, na tatou talanoaina ai māfuaaga e fā na teena ai e tagata Iesu. Seʻi o tatou talanoaina nisi māfuaaga e fā. O le a tatou iloa ai māfuaaga e teena ai e tagata soo o Iesu i aso nei, ma le auala e tatou te ʻalofia ai le tautevateva.

3. O le ā na faia e Iesu na māfua ai ona teena o ia e nisi?

³ Na faifaimea faatasi Iesu ma so o se ituaiga tagata, a o i ai i le lalolagi. Na latou taumamafa faatasi ma tagata mauʻoa ma tagata taualoa, ae na ia faaaluina foʻi le tele o lona taimi ma tagata matitiva ma mafatia. E lē gata i lenā, na ia faaalia foʻi  le tigā alofa mo i latou na taʻua o “ē e agasala.” Na teena e nisi o tagata faafiaamiotonu Iesu ona o mea na ia faia. Na latou fesili atu i ona soo: “Aiseā ua outou aai ai ma feinu faatasi ma le ʻauaolafoga ma ē e agasala?” Na tali atu Iesu: “E lē manaʻomia e tagata malolosi se fomaʻi, ae na o ē e mamaʻi. Auā ua ou sau e valaau i ē agasala ina ia salamō, ae lē o ē amiotonu.”​—Luka 5:29-32.

4. E pei ona taʻua e le perofeta o Isaia, o le ā na tatau ona faatalitalia e tagata Iutaia e faatatau i le Mesia?

⁴ O le ā o loo taʻua i le Tusi Paia? A o leʻi afio mai le Mesia, na faamatala e le perofeta o Isaia o le a lē taliaina o ia e le lalolagi. Ua faapea mai le valoaga: “Ua inosia o ia ma tuulafoaʻiina e tagata, . . . Ua liliuese o tatou mata ina neʻi vāai atu i ona fofoga. Ua inosia o ia ma faalēaogāina o ia e i tatou.” (Isa. 53:3) O le a tuulafoaʻiina “e tagata” le Mesia. O lea, na tatau ona faatalitalia e tagata Iutaia i le uluaʻi senituri, o le a teena e tagata Iesu.

5. O le ā le vaaiga a le toʻatele i aso nei i soo o Iesu?

⁵ Po o tupu lenā faafitauli i aso nei? Ioe. E toʻatele faifeʻau e naunau e talia i a latou lotu tagata maualuluga, taualoa ma atamamai i le vaaiga a le lalolagi. E talia e na faifeʻau i latou nei, e ui e lē ōgatusa ma tapulaa a le Atua a latou amioga ma le auala o loo latou ola ai. Peitaʻi, e vaai maualalo na faifeʻau i auauna maelega ma mamā tauamio a Ieova, ona e vaai i ai le lalolagi o ni tagata e lē taualoa. Ae na taʻua e Paulo, e filifilia e le Atua i latou e “manatu faatauvaa i ai tagata.” (1 Kori. 1:26-29) E tautele iā Ieova ana auauna faamaoni uma.

6. I le Mataio 11:25, 26, e faapefea ona tatou mafaufau e pei o Iesu?

⁶ E faapefea ona tatou ʻalofia le tautevateva? (Faitau le Mataio 11:25, 26.) Aua neʻi aafia i tatou i vaaiga a le lalolagi e faatatau i tagata o le Atua. Ua tatou iloa, e na o tagata lotomaulalo e faaaogā e Ieova e faia lona finagalo. (Sala. 138:6) Seʻi manatu i le tele o mea ua faataunuuina e Ieova e ala i le faaaogāina o i latou e lē atamamai i le vaaiga a le lalolagi.

7. Aiseā na taʻua ai e Iesu le ʻau faresaio o tagata faafiaamiotonu, ma o le ā la latou tali atu?

⁷ Na lototele Iesu e taʻusalaina aʻoaʻoga sesē a taʻitaʻi lotu faafiaamiotonu. O se faataʻitaʻiga, na taʻusalaina e Iesu le faafiaamiotonu o le ʻau faresaio o ē na sili atu ona popole i le auala e fufulu ai o latou lima, nai lo o le tausia o latou mātua. (Mata. 15:1-11) Atonu na faateʻia soo o Iesu i ana fetalaiga, o lea na latou fesili atu ai: “Pe e te silafia ua lē malilie le ʻau Faresaio i au fetalaiga?” Ua tali atu Iesu: “O laau uma e leʻi totōina e loʻu Tamā o i le lagi, e liaʻieseina. Tuu ai pea i latou. Auā o i latou o taʻitaʻi tauaso. Afai e taʻitaʻi e le tauaso le isi tauaso, e paʻuʻū uma i laʻua i le lua.” (Mata. 15:12-14) E leʻi faatagaina e Iesu uiga leaga na faaalia e taʻitaʻi lotu e taofia ai o ia i le taʻu atu o le mea moni.

8. Na faapefea ona faailoa mai e Iesu e lē o talitonuga faalelotu uma e talia e le Atua?

⁸ Na taʻusalaina foʻi e Iesu aʻoaʻoga sesē. E leʻi faapea mai Iesu o aʻoaʻoga uma faalotu e talia e le Atua. Ae na fetalai o ia, e toʻatele tagata o le a ui atu i le ala vatele e tau atu i le malaia, ae toʻaitiiti e ui atu i le ala vaitiiti e tau atu i le ola. (Mata. 7:13, 14) Na faamatala manino mai e Iesu e iai tagata e faafoliga o loo auauna i le Atua, ae o le mea moni e leai. Na ia lapataʻi mai: “Ia mataala pea i perofeta  pepelo, o ē e ō mai iā te outou i ofu mamoe, a o totonu o luko feʻai lava i latou. Tou te iloa i latou i o latou fua.”​—Mata. 7:15-20.

9. O ā nisi o aʻoaʻoga sesē faalotu na taʻusalaina e Iesu?

⁹ O le ā o loo taʻua i le Tusi Paia? Na valoia i le Tusi Paia, o le a maelega le Mesia mo le fale o Ieova. (Sala. 69:9; Ioa. 2:14-17) Na uunaʻia Iesu e lenā maelega, e taʻusalaina ai talitonuga ma aʻoaʻoga sesē faalotu. O se faataʻitaʻiga, na talitonu le ʻau Faresaio e ola pea le agaga o le tagata pe a oti; ae na aʻoaʻoina e Iesu o le tagata ua oti o loo moe. (Ioa. 11:11) E leʻi talitonu le ʻau Satukaio i le toetū; ae na toe faatūina e Iesu lana uō o Lasalo. (Ioa. 11:43, 44; Galu. 23:8) Na aʻoaʻoina e le ʻau Faresaio e tuupōina mea uma e tutupu ma e faatonutonuina e le Atua; ae na aʻoaʻo e Iesu e filifili le tagata lava ia pe auauna i le Atua pe leai.​—Mata. 11:28.

10. Aiseā e teena ai e le toʻatele a tatou aʻoaʻoga?

¹⁰ Po o tupu lenā faafitauli i aso nei? Ioe. E teena e le toʻatele i tatou, ona e taʻusalaina e a tatou aʻoaʻoga faale-Tusi Paia a latou aʻoaʻoga sesē faalotu. E aʻoaʻoina e faifeʻau i a latou lotu, e faasala e le Atua tagata amioleaga i le afi ma e latou te faaaogāina lenā aʻoaʻoga sesē e pulea ai tagata. Ae ona e tatou te tapuaʻi iā Ieova le Atua alofa, e tatou te taʻusalaina la lenā aʻoaʻoga sesē. E aʻoaʻoina foʻi e faifeʻau le ola pea o le agaga o le tagata pe a oti. Ae e tatou te taʻusalaina le māfuaaga faapaupau o lenā aʻoaʻoga, auā pe afai e moni, o le a lē aogā la le toetū. E talitonu foʻi le tele o lotu, e tuupōina e le Atua mea uma e tutupu, ae e tatou te aʻoaʻoina e iai le filifiliga saʻoloto i le tagata e filifili ai pe auauna i le Atua pe leai. O le ā le tali mai a faifeʻau i lenā aʻoaʻoga? E masani lava e latou te matuā feita mai.

11. E tusa ai ma fetalaiga a Iesu i le Ioane 8:45-47, o le ā e finagalo le Atua e faia e ona tagata?

¹¹ E faapefea ona tatou ʻalofia le tautevateva? Pe a tatou faatāuaina le upu moni i o tatou olaga, e tatau la ona tatou talia fetalaiga a le Atua. (Faitau le Ioane 8:45-47.) E tatou te tumau i le upu moni nai lo o le tetee  i ai e pei o Satani. E lē mafai ona tatou lolo atu i se mea e feteenaʻi ma o tatou talitonuga. (Ioa. 8:44) O le finagalo o le Atua mo ona tagata, ia “ʻinoʻino i le leaga” ae “pipii i le lelei e pei ona faia e Iesu.”​—Roma 12:9; Epe. 1:9.

12. Aiseā na teena ai e le toʻatele o tagata Iutaia Iesu, ona o le auala na maliu ai?

¹² O le ā le isi māfuaaga na teena ai e tagata Iutaia Iesu? Na taʻua e Paulo: “O lo tatou talaʻia o Keriso na tutuʻi i luga o le laau ua avea ma mea e tausuai ai tagata Iutaia.” (1 Kori. 1:23) Aiseā na teena ai e le toʻatele o tagata Iutaia Iesu, ona o le auala na maliu ai? Talu ai o le maliu o Iesu i le laau e faapuapuagatia ai, na foliga ai o ia o se tagata solitulafono ma agasala, ae lē o se Mesia.​—Teu. 21:22, 23.

13. O le ā sa tatau ona iloa e i latou na teena Iesu?

¹³ Sa tatau ona iloa e tagata Iutaia na teena Iesu, o ia o se tagata lē sala, ma na tuuaʻia pepelo ma faileagaina o ia. O i latou na faamasinoina Iesu, e latou te leʻi faia le faamasinoga tonu. Na faia faatopetope e le faamasinoga sili i Iutaia le faamasinoga o Iesu, ma e leʻi mulimuli i le tulafono. (Luka 22:54; Ioa. 18:24) E leʻi faalogologo lelei faamasino i tuuaʻiga ma molimau faasaga iā Iesu, ae na latou saʻilia “ni molimau pepelo iā Iesu, ina ia mafai ona faasalaina ai o ia i le oti.” Ina ua latou lē taulau, na taumafai le ositaulaga sili e fai se mea e molia ai o ia. E matuā lē ōgatusa lava ma le tulafono lenā mea. (Mata. 26:59; Mare. 14:55-64) Ina ua toetū Iesu, na totogi e na faamasino amioleaga fitafita Roma na leoleoina le tuugamau i ni “tupe siliva e tele,” ina ia faasalalau atu se tala sesē i le māfuaaga ua leai ai le tino oti o Iesu i le tuugamau.​—Mata. 28:11-15.

14. O le ā na valoia e le Tusi Paia e faatatau i le maliu o le Mesia?

¹⁴ O le ā o loo taʻua i le Tusi Paia? E ui e leʻi faatalitalia e le toʻatele o tagata Iutaia e tatau ona maliu le Mesia, ae seʻi mātau le mea na valoia e le Tusi Paia: “Na ia sasaaina lona ola  i le oti, na faitauina foʻi o ia faatasi ma tagata solitulafono; na tauave foʻi e ia agasala a le toʻatele o tagata, ma ua fautua atu o ia ona o tagata solitulafono.”(Isa. 53:12) O lea, e leai se māfuaaga na tatau ai ona teena e tagata Iutaia Iesu, ina ua tuuaʻia pepelo ma fasiotia o ia o se tagata agasala.

15. O ā tuuaʻiga sesē i Molimau a Ieova, ua teena ai e nisi i latou?

¹⁵ Po o tupu lenā faafitauli i aso nei? Ioe. Na tuuaʻia pepelo Iesu ma faasalaina ma le lē tonu. O le auala foʻi lenā o loo faileagaina ai Molimau a Ieova i aso nei. O se faataʻitaʻiga, i le 1930 i le 1950, na faia ai le tele o faamasinoga i le Iunaite Setete e puipuia ai lo tatou saʻolotoga e tapuaʻi ai i le Atua. O nisi faamasino, na matuā manino lo latou ʻinoʻino i Molimau a Ieova. I le aai o Quebec i Kanata, na auau faatasi ai lotu ma le malo e tetee i la tatou galuega. E toʻatele le ʻautalaʻi na faafalepuipui, ona o le talaʻia o le Malo o le Atua. I Siamani, e toʻatele uso talavou faamaoni na fasiotia e le pulega faa Nasi. I tausaga talu ai, e toʻatele o tatou uso i Rusia na faasalaina ma faafalepuipuiina, ona o le talanoaina o le Tusi Paia. Ua faaigoaina e le malo le talanoaina o le Tusi Paia, “e lē faaletulafono ma e faatupu vevesi.” E oo foʻi i le Faaliliuga a le Lalolagi Fou o le Tusi Paia i le gagana Rusia, ua faasāina e le malo ma ua faaigoaina o se “tusi a tagata faatupu faalavelave,” ona o loo tusia ai le suafa o Ieova.

16. E pei ona faamatilatila i le 1 Ioane 4:1, aiseā e lē tatau ai ona faasesēina i tatou i tala pepelo e faatatau i tagata o Ieova?

¹⁶ E faapefea ona tatou ʻalofia le tautevateva? Ia tatou iloa mea moni. I le lauga a Iesu i luga o le mauga, na ia lapataʻia ai lana ʻau faalogologo o le a iai nisi e ʻtuuaʻia pepelo i latou i mea leaga uma.’ (Mata. 5:11) O Satani le puna o nei pepelo uma. E na te taaʻina tagata tetee e faasalalau atu tala taufaaleaga e uiga iā i latou e faapelepele i le upu moni. (Faaa. 12:9, 10) E tatau ona tatou teena pepelo a i latou e tetee mai. E lē tatau ona faamataʻuina i tatou i na pepelo ma faavaivaia ai lo tatou faatuatua.​—Faitau le 1 Ioane 4:1.

17. Aiseā na ono teena ai e nisi Iesu, ona o mea na tutupu a o leʻi maliu?

¹⁷ A o latalata ina maliu Iesu, na faalataina ai o ia e se tasi o ona aposetolo. Na faafitia faatolu e le isi aposetolo Iesu, ma na tuulafoaʻia o ia e ona aposetolo uma i le pō a o leʻi maliu. (Mata. 26:14-16, 47, 56, 75) Ae e leʻi faateʻia ai Iesu, auā na ia valoia o le a tupu lenā mea. (Ioa. 6:64; 13:21, 26, 38; 16:32) Ona o na mea, atonu la na teena ai e nisi Iesu ma faapea ane, ʻAfai o le faiga na o soo o Iesu, e maʻimau la le taimi.’

18. O ā valoaga na faataunuuina a o lata ina maliu Iesu?

¹⁸ O le ā o loo taʻua i le Tusi Paia? I senituri muamua atu, na faailoa mai e Ieova i lana Tusi Paia o le a faalataina le Mesia i tupe siliva e 30. (Saka. 11:12, 13) O lē o le a faalataina Iesu, o se tasi o ana uō vavalalata. (Sala. 41:9) Na tusi foʻi le perofeta o Sakaria: “Ia taia le leoleo mamoe, ma ia faataapeape le lafu.” (Saka. 13:7) Nai lo o le teena o Iesu ona o na mea, na tatau ona faamalosia tagata lotofaamaoni i le faataunuuina o na valoaga e faatatau iā Iesu.

19. O le ā ua iloa e tagata lotofaamaoni?

¹⁹ Po o tupu lenā faafitauli i aso nei? Ioe. I aso nei, e toʻaitiiti i latou na auauna faamaoni iā Ieova ua tuua le upu moni. Ua latou liliuese mai i le upu moni, ma ua taumafai foʻi  e faaliliuese isi mai le upu moni. Ua latou faasalalau atu tala pepelo ma taufaasesē e faatatau i Molimau a Ieova, i tala fou ma luga o le Initaneti. Ae e lē taʻitaʻisesēina ai tagata lotofaamaoni ona e latou te iloa na valoia e le Tusi Paia, o le a tutupu na mea.​—Mata. 24:24; 2 Pete. 2:18-22.

20. E faapefea ona tatou ʻalofia le tautevateva ona o i latou ua tuua le upu moni? (2 Timo. 4:4, 5)

²⁰ E faapefea ona tatou ʻalofia le tautevateva? E manaʻomia ona faamalosia pea lo tatou faatuatua e ala i le suʻesuʻe ma tatalo e lē aunoa, ma ia pisi pea i le galuega talaʻi, le galuega na tuu mai e Ieova e tatou te faia. (Faitau le 2 Timoteo 4:4, 5.) Pe a tatou faatuatua pea, o le a tatou lē popolevale la pe a faalogo i ni tala tau faaleaga. (Isa. 28:16) O lo tatou alofa mo Ieova, lana Afioga ma le ʻauuso, o le a tatou ʻalofia ai le tautevateva ona o i latou ua tuua le upu moni.

21. E ui ina teena e le toʻatele i aso nei la tatou feʻau, ae o le ā e tatou te mautinoa i ai?

²¹ I le uluaʻi senituri, e toʻatele i latou na tautevateva ma teenaina Iesu. Ae e toʻatele foʻi na taliaina o ia. Na aofia iā i latou na se tasi o le ʻau Saniterini a Iutaia ma le ʻtoʻatele o faitaulaga.’ (Galu. 6:7; Mata. 27:57-60; Mare. 15:43) E toʻatele foʻi i latou i aso nei e lē o tautevateva. Aiseā? Ona ua latou iloa upu moni o le Tusi Paia, ma e pele iā i latou. Ua faapea mai le Tusi Paia: “E tele le filemu o i latou e naunau i lau tulafono, Ma e leai foʻi se mea e tautevateva ai i latou.”​—Sala. 119:165.