1. O le ā le faaaʻoaʻoga na faataatia e Iesu mo ona soo, ma o le ā le latou tali atu? (Tagaʻi i le ata i le faavaa.)

NA IAI pea iā Iesu se vaaiga saʻo i lana faiva i le lalolagi, ma e finagalo o ia ina ia faatumauina foʻi e ona soo se vaaiga saʻo i le faiva. (Ioa. 4:35, 36) A o iai faatasi Iesu ma ona soo, na latou maelega e talaʻi. (Luka 10:1, 5-11, 17) Ae ina ua puʻea ma fasiotia Iesu, na mou atu ai mo sina taimi le maelega o ona soo e talaʻi. (Ioa. 16:32) Ina ua toetū Iesu, na ia faalaeiau ona soo ina ia uaʻi atu i le talaʻiga. O lea, ina ua afio Iesu i le lagi, na matuā maelega ona soo e talaʻi ma na faitioina ai i latou e o latou fili ma faapea mai: “Faauta! ua outou faatumu Ierusalema i a outou aʻoaʻoga.”​—Galu. 5:28.

2. Na faapefea ona faamanuia e Ieova le galuega talaʻi?

² Na taʻitaʻia e Iesu le galuega talaʻi a Kerisiano i le uluaʻi senituri, ma o le faamanuia a Ieova na toʻatele ai i latou na taliaina le feʻau. O se faataʻitaʻiga, i le Penetekoso o le 33 T.A., e pe ā ma le 3,000 tagata na papatisoina. (Galu. 2:41) Na faaauau ona faatoʻateleina soo. (Galu. 6:7) Na valoia foʻi e Iesu o le a matuā faatoʻateleina tagata e talia le tala lelei i aso e gata ai.​—Ioa. 14:12; Galu. 1:8.

3-4. Aiseā e ono avea ai le galuega talaʻi o se luʻi i isi, ma o le ā o le a tatou talanoaina i lenei suʻesuʻega?

³ E tatou te taumafai uma ina ia iai pea iā i tatou se vaaiga saʻo i le faiva. I nisi atunuu e faigofie ona fai lena mea. Aiseā? Ona e matuā toʻatele i latou e fia suʻesuʻeina le Tusi Paia. O lea, o nisi o i latou e faatali seʻia avanoa se Molimau a Ieova ona fai lea o lana suʻesuʻega. Ae i nisi vaega o le lalolagi, o se luʻi le auai i le galuega talaʻi. E seāseā ona maua tagata i o  latou fale, ae a maua foʻi, atonu e lē fiafia i le Tusi Paia.

⁴ Afai o loo e nofo i se nofoaga e faigatā ai ona talaʻi, atonu la o le a fesoasoani fautuaga o loo i lenei suʻesuʻega iā te oe. O le a tatou talanoaina auala na faaaogā e nisi e faafesootaʻi ai tagata i la latou faiva. O le a talanoaina foʻi māfuaaga e mafai ai ona tatou maua pea se vaaiga saʻo, e tusa pe tali lelei mai tagata i la tatou feʻau pe leai.

5. O ā luʻi o loo fesagaʻia e le toʻatele o Molimau?

⁵ Ua matuā faigatā i le toʻatele o Molimau a Ieova ona maua tagata i o latou fale. O nisi tagata talaʻi e nonofo i nofoaga e iai fale mautotogi tetele e matuā leoleoina lelei, po o nofoaga e iai fale e loka pā. O na fale e ono iai tagata e leoleoina, ma e latou te lē faatagaina se tasi e alu i ai, seʻi vaganā ua valaaulia mai e se tagata e nofo ai i inā. O nisi tagata talaʻi e faigofie ona talaʻi mai i lea fale i lea fale, ae e seāseā ona maua ai ni tagata. O nisi tagata talaʻi e talaʻi i nofoaga maotua e lē toʻatele ni tagata e nonofo ai. Atonu e mamao nofoaga e malaga ai ina ia faafesootaʻi se tagata i na nofoaga, ae atonu e taunuu atu e leai se isi i le fale. Pe a tatou fesagaʻia nei luʻi, e lē tatau ona tatou faavaivai ai. O le ā e tatou te faia ina ia taulima ai na luʻi ma taulau ai i la tatou faiva?

6. O le ā le auala e pei ai tagata talaʻi o ni faifaiva?

⁶ Na faatusa e Iesu le galuega talaʻi i le galuega a se faifaiva. (Mare. 1:17) O nisi tagata faifaiva atonu e fagogota mo ni aso, ae e leai se iʻa e maua. Peitaʻi, e latou te lē faavaivai ai ae e fetuutuunaʻi. E sui le taimi, le nofoaga ma le auala e fagogota ai. E mafai foʻi ona tatou faia na suiga i la tatou faiva. Seʻi o tatou talanoaina auala o loo mulimuli mai.

7. O le ā se iʻuga lelei o le talaʻi i taimi eseese?

⁷ Taumafai e talaʻi i tagata i taimi eseese. E tatou te mauaina le toʻatele o tagata pe a tatou talaʻi i le taimi e latou te iai i le fale. O tagata uma e iai lava le taimi e foʻi ai i o latou aiga. O lea, o le toʻatele o uso ma tuafāfine ua latou iloa le aogā o le talaʻi i le aoauli po o le afiafi, ona e maua ai le toʻatele o tagata. O na taimi atonu e faigofie ma e fia talanoa ai tagata. Atonu foʻi e te fiafia e faatatau le fautuaga mai i se toeaina e igoa iā David. Na faapea mai o ia, pe a uma le talaʻiga i le oganuu ona la toe foʻi lea ma lana paga e asi fale e leʻi maua ai ni tagata. Na ia faapea mai, “Na faateʻia aʻu i le toʻatele o tagata na maua atu i fale ina ua ma toe foʻi i ai.” *

8. E faapefea ona tatou faatatauina le Failauga 11:6 i la tatou faiva?

⁸ E lē tatau ona tatou faavaivai. Ua faamanatu mai i le mau autū o lenei suʻesuʻega le vaaiga e tatau ona iā i tatou. (Faitau le Failauga 11:6.) E leʻi faavaivai David lea na taʻua muamua. I se tasi o fale, na ia maua ai se tagata e na te leʻi maua i le tele o taimi na ia asia ai. Na manaʻo le tamāloa e suʻesuʻe le Tusi Paia ma na ia faapea mai, “E pe ā ma le valu tausaga o ou nofo i inei, ae e ma te leʻi talanoa lava ma se Molimau a Ieova i loʻu fale.” Na faapea mai David, “Pe a oo ina e maua se tagata i lona fale, e masani lava e latou te fia faalogo i le feʻau o loo tatou talaʻia.”

9. Ua faapefea ona faafesootaʻi e Molimau tagata e faigatā ona maua i o latou fale?

⁹ Taumafai e talaʻi i se isi nofoaga. O nisi tagata talaʻi e sui nofoaga e talaʻi ai, ina ia maua tagata e seāseā ona maua i o latou fale. O se faataʻitaʻiga, o le talaʻi i magāala ma le  faaaogāina o fata tusi o se metotia e aogā tele, ona e maua ai tagata e nonofo i fale mautotogi tetele ia e lē faatagaina ai le talaʻiga. O lenā auala, ua mafai ai ona talanoa atu Molimau iā i latou na. E toʻatele foʻi tagata talaʻi ua latou iloa, e toʻatele tagata e fia talanoa pe e taliaina lomiga i paka mo le lautele, maketi ma nofoaga o pisinisi. Na faapea mai Floiran o se ovasia matagaluega i Polivia: “E matou te talaʻi i maketi ma pisinisi i le va o le 1 ma le 3 i le afiafi. O le taimi lenā e tau lē pisi ai le ʻau faatauoloa. E masani lava e maua ai ni talanoaga lelei ma e amata ai foʻi ni suʻesuʻega faale-Tusi Paia.”

10. O ā nisi auala e mafai ona e faaaogāina e maua ai tagata?

¹⁰ Taumafai e sui le auala e talaʻi ai. Atonu na e taumafai e asiasi i se tagata. E eseese taimi na e asia ai o ia i lona fale, ae e leʻi maua lava. Pe e iai nisi auala e mafai ona e maua ai lenā tagata? Na faapea mai Katarina, “E tusi aʻu tusi iā i latou ou te lē maua i fale. Ou te faamatalaina i ai mea ou te ono taʻu i ai pe ana ma feiloaʻi.” O le ā le lesona? Ia taumafai e faafesootaʻi tagata uma i lau oganuu a o e talaʻi, po o le ā lava le auala.

11. Aiseā e lē tali lelei mai ai isi i la tatou feʻau?

¹¹ O nisi tagata e lē tali lelei mai i la tatou feʻau. E latou te lē fia iloa le Atua po o le Tusi Paia. E latou te lē talitonu e iai se Atua, ona o le tele o mafatiaga o loo latou vaaia i le lalolagi. E latou te teena le Tusi Paia, ona o le faagutugutulua o taʻitaʻi lotu o loo faapea mai o  loo latou ola e tusa ma le Tusi Paia. O nisi e pisi tele i a latou galuega, aiga ma faafitauli o le tagata lava ia. Ua avea lenā ma mea ua latou lē iloa ai, e mafai ona fesoasoani le Tusi Paia i o latou olaga. E faapefea ona tatou maua pea le olioli, pe a manatu tagata e lē aogā le feʻau o loo tatou talaʻia?

12. E faapefea i le faatatauina o le Filipi 2:4, ona fesoasoani i la tatou talaʻiga?

¹² Ia faaalia le naunau moni. E toʻatele e lē tali lelei mai i le tala lelei i le taimi muamua. Ae e mulimuli ane faaalia le fiafia ina ua iloa le naunau moni o le tagata talaʻi iā i latou. (Faitau le Filipi 2:4.) O se faataʻitaʻiga, na faapea mai David lea na taʻua muamua, “Pe a faapea mai se isi e lē fiafia i la tatou feʻau, nai lo o le faaaogā o le Tusi Paia ma lomiga ae e matou te fesili i ai: ʻE iai se māfuaaga ua e manatu ai faapea?’” E mātau e tagata le manatu mamafa o isi iā i latou. Atonu e latou te lē manatuaina a tatou tala uma na fai atu, ae latou te manatuaina lo tatou naunau moni iā i latou. E tusa pe lē mananaʻo tagata o le fale e fai se talanoaga, ae e mafai ona faaalia atu i o tatou uiga ma foliga vaaia lo tatou manatu mamafa mo i latou.

13. E faapefea ona fetuutuunaʻi la tatou feʻau, ina ia fetaui ma le tagata o le fale?

¹³ E tatou te faaalia le naunau moni pe a fetuutuunaʻi la tatou feʻau e fua i manaʻoga o le tagata o le fale. O se faataʻitaʻiga, pe e iai ni faamaoniga e iloa ai e iai ni tamaiti i le aiga? Atonu e fia iloa e mātua fautuaga mai i le Tusi Paia, i le auala e tausia aʻe ai fanau po o fautuaga aogā i le auala e maua ai se aiga fiafia. E fia ni loka o loo e vaaia i le faitotoʻa o le fale? Atonu la e tatou te filifili e talanoa e faatatau i le solitulafono ma le mataʻu ua taatele i le lalolagi. Atonu o le a fia iloa atili ai e le tagata e ona le fale le vaifofō tumau mo soligatulafono. Po o le ā lava le tulaga, taumafai e fesoasoani iā i latou e fia faalogo i la tatou feʻau ina ia latou iloa le auala e fesoasoani ai fautuaga a le Tusi Paia iā i latou. Ua faapea mai Katarina lea na taʻua muamua: “Ou te taumafai e manatua le auala na faaleleia ai e le upu moni loʻu olaga.” O le iʻuga, na talanoa atu ma le mautinoa Katarina, ma na mātau e tagata na ia talanoa i ai lenā mea.

14. E tusa ai o le Faataoto 27:17, e faapefea ona fesoasoani le tasi i le isi i le talaʻiga?

¹⁴ Saʻili atu mo le fesoasoani a isi. I le uluaʻi senituri, na faasoa atu e Paulo iā Timoteo le auala e talaʻi ma aʻoaʻo ai, ma na ia faalaeiauina foʻi Timoteo e faaaogā lenā auala e fesoasoani ai i isi. (1 Kori. 4:17) E mafai foʻi ona tatou maua aogā mai iā i latou e iai le poto masani i a tatou faapotopotoga. (Faitau le  Faataoto 27:17.) Seʻi mātau le faaaʻoaʻoga a le uso o Shawn. Na paeonia o ia mo se taimi i nuu maotua lea e toetoe o tagata uma e toʻaʻaga i a latou lotu. Na faapefea ona ia maua pea le olioli? Na faapea mai o ia: “E ma te galulue faatasi ma se isi i le tele e mafai ai. A o ma ō atu mai i lea fale i lea fale, e ma te faaaogāina lenā taimi e fesoasoani ai le tasi i le isi, ina ia faaleleia o ma tomai e aʻoaʻo atu ai. O se faataʻitaʻiga, e ma te talanoa i le auala e tali atu ai i se fesili a se tagata e ona le fale. E ma te talanoa foʻi i se isi auala e ono tali atu ai, pe a fesili mai se isi tagata i le fesili lava lenā.”

15. Aiseā e tāua ai le tatalo pe a auai i le faiva?

¹⁵ Ia tatalo mo le fesoasoani a Ieova. Ia talosaga mo le fesoasoani a Ieova i taimi uma e te auai ai i le faiva. E leai se mea e mafai ona tatou faataunuuina, pe a aunoa ma le fesoasoani a le agaga paia o Ieova. (Sala. 127:1; Luka 11:13) Ia taʻu saʻo iā Ieova e ala i le tatalo mea e te manaʻomia. O se faataʻitaʻiga, ia talosaga iā Ieova e taʻitaʻia oe i se tasi ua saunia lona loto ma fia faalogo mai i le feʻau. Ona e gaoioi lea e tusa ma lau tatalo, e ala i le talaʻi i so o se tasi e te feiloaʻi i ai.

16. Aiseā e tāua ai le faia o au oe lava suʻesuʻega ina ia taulau ai i le faiva?

¹⁶ Ia faaavanoa se taimi mo au oe lava suʻesuʻega. Ua faapea mai le Afioga a le Atua: “Ia faamaonia e outou lava po o le ā le finagalo o le Atua, lea e lelei, e mālie, ma lelei atoatoa.” (Roma 12:2) O le tele o lo tatou mautinoa ua tatou iloa le upu moni e faatatau i le Atua, o le tele foʻi lenā o lo tatou mautinoa pe a talanoa atu i isi i le talaʻiga. Ua faapea mai Katarina lea na taʻua muamua: “E leʻi leva ona ou iloa, e manaʻomia ona faamalosia loʻu faatuatua e faatatau i nisi o aʻoaʻoga faavae o le Tusi Paia. O lea, na ou suʻesuʻe lelei ai i faamaoniga ina ia ou mautinoa ai e iai Lē na foafoaina mea, o le Tusi Paia o le Afioga a le Atua, ma e iai le faalapotopotoga a le Atua i aso nei.” Na faapea mai Katarina, o ana suʻesuʻega na faamalosia ai lona faatuatua, ma faatuputeleina ai lona olioli i le faiva.

17. Aiseā na iai pea iā Iesu se vaaiga saʻo i lana faiva?

¹⁷ Na iai pea iā Iesu se vaaiga saʻo ma na talaʻi ai pea e ui e leʻi talia e nisi lana feʻau. Aiseā? Na silafia e Iesu le tāua o le iloa e tagata o le upu moni, ma na ia manaʻo e fesoasoani i le toʻatele o tagata ia talia le feʻau o le Malo. Na ia silafiaina foʻi, o le a tali lelei mai nisi e leʻi talia muamua le upu moni. Seʻi mātau le mea na tupu i le aiga o Iesu. I le tolu ma le afa tausaga o le faiva a Iesu i le lalolagi, e leai se tasi o ona uso na avea ma ona soo. (Ioa. 7:5) Peitaʻi, na avea i latou ma Kerisiano ina ua mavae lona toe faatūina mai.​—Galu. 1:14.

18. Aiseā e tatou te talaʻi ai pea?

¹⁸ E tatou te lē iloa po o ai moni lava o le a iʻu ina talia upu moni o le Tusi Paia o loo tatou aʻoaʻoina atu. O nisi tagata e umi atu le taimi nai lo o isi, faatoʻā tali mai i la tatou feʻau. E oo lava iā i latou e lē fia faalogo i la tatou feʻau, e latou te mātauina o tatou uiga lelei ma la tatou vaaiga saʻo, ma atonu o le a amata ai ona latou “faamamaluina . . . le Atua.”​—1 Pete. 2:12.

19. E tusa ai o le 1 Korinito 3:6, 7, o le ā e tatau ona tatou amanaʻiaina?

¹⁹ E tatau ona tatou amanaʻiaina le matafaioi a le Atua a o tatou totō ma faasūsū. (Faitau le 1 Korinito 3:6, 7.) Ua faapea mai Getahun, o se uso o loo galue i Aitiope: “I le silia ma le 20 tausaga, e na o aʻu lava le Molimau  a Ieova na nofo i se oganuu e seāseā talaʻia. Ae o lea ua 14 tagata talaʻi ua iai nei. E toʻasefulu tolu i latou na papatiso, e aofia ai laʻu avā ma la ma fanau uma e toʻatolu. I se fuafaatatau, e pe ā ma le 32 tagata e auai i sauniga.” Maʻeu se fiafiaga i le uso o Getahun, ona na faaauau pea ona talaʻi, a o ia faatalitali ma le onosaʻi iā Ieova e na te tosina mai tagata lotofaamaoni i lana faalapotopotoga!​—Ioa. 6:44.

20. O le ā le auala ua pei ai i tatou o ni tagata laveaʻi?

²⁰ E tautele iā Ieova ola o tagata uma. Ua ia tuuina mai iā i tatou le faaeaga o le galulue faatasi ma lona Alo, i le aoaoina o tagata mai i atunuu uma a o leʻi oo mai le iʻuga o lenei faiga o mea. (Ha. 2:7) O la tatou galuega talaʻi ua pei o se galuega laveaʻi. Ua pei i tatou o ni tagata laveaʻi, o loo auina atu e faasaoina mai tagata o loo i totonu o se maina. Atonu e toʻaitiiti ni tagata ʻeli maina e maua atu o feola, ae e tāua le galuega laveaʻi e faia e tagata uma. E faapena foʻi le tāua o la tatou faiva. E tatou te lē iloa pe toʻafia o le a faasaoina mai i le faiga o mea a Satani. Ae e faaaogā e Ieova so o se tasi lava o i tatou e fesoasoani i tagata. Ua faapea mai Andreas e nofo i Polivia, “E so o se tasi lava na te aʻoaʻoina upu moni o le Tusi Paia ma papatiso, ou te vaai i ai o se galuega na fai e ni tagata se toʻatele.” Ia iai pea iā i tatou lenā vaaiga saʻo e faatatau i la tatou faiva. Pe a tatou faia faapea, o le a faamanuia e Ieova i tatou ma o le a avea la tatou faiva ma puna o le olioli moni.