1-2. O ā luʻi o loo fesagaʻia e le toʻatele o Molimau?

NA FAALAEIAU e le aposetolo o Paulo Timoteo faapea foʻi Kerisiano uma, ina ia faia ma le māeʻaeʻa la latou faiva. (2 Timo. 4:5) E matuā tāua iā i tatou le fautuaga lenei a Paulo. Peitaʻi, e iai luʻi. O le toʻatele o tatou uso ma tuafāfine, e manaʻomia ona lototetele ina ia faia ai se sao i le galuega talaʻi. (2 Timo. 4:2) O se faataʻitaʻiga, seʻi manatu i o tatou uso o loo nonofo i atunuu o loo taofiofia pe matuā faasā ai lava la tatou galuega. O loo latou talaʻi pea e ui i lamatiaga.

² O loo fesagaʻia e tagata o Ieova faafitauli eseese e ono faavaivaia ai i latou. O se faataʻitaʻiga, e uumi taimi e faigaluega ai ina ia maua mea manaʻomia mo le tausia o latou aiga. E latou te mananaʻo e faatele se sao i le talaʻiga, ae oo ane i le faaiʻuga o le vaiaso ua matuā vaivai lava. O nisi e matuā itiiti lava mea e mafai ona latou faia, ona o maʻi faaumiumi po o le soifua matua. O nisi atonu o loo faataotolia i o latou fale. Ua lofitūina isi i faalogona lē aogā. Ua faapea mai Mary * o se tuafafine e nofo i Sasaʻe Tutotonu: “Ou te faia le tele o taumafaiga e tauivi ai ma oʻu faalogona sesē. E uma ane ua ootia oʻu faalogona ma matuā lagona ai le vaivai, ma oo ai iā te aʻu faalogona nofosala ona ua leai se taimi ma se malosi mo le talaʻiga.”

3. O le ā o le a tatou talanoaina i lenei suʻesuʻega?

³ Po o ā lava tulaga faigatā e tatou te fesagaʻia, ae e faamalosia i tatou e Ieova ina ia fesagaʻia na faigatā ma auauna ai pea iā te ia i le mea e tatou te mafaia. A o tatou leʻi talanoaina le auala e fesoasoani mai ai Ieova, seʻi o tatou iloiloina le auala na ia faamalosia ai Paulo ma Timoteo ina ia faataunuu le la faiva e ui i luʻi na la fesagaʻia.

4. O ā luʻi na fesagaʻia e Paulo?

⁴ E tele luʻi na fesagaʻia e Paulo. Na ia matuā manaʻomia le malosi ina ua sasaina, fetogi i maa ma faafalepuipui. (2 Kori. 11:23-25) Na taʻutino e le aposetolo o Paulo, na iai taimi na tauivi ai ma faalogona sesē. (Roma 7:18, 19, 24) Na tauivi foʻi o ia ma “mea matuitui i le tino,” lea na ia manaʻo ina ia aveesea e le Atua.​—2 Kori. 12:7, 8.

5. O le ā na faataunuuina e Paulo, e ui i faafitauli na ia fesagaʻia?

⁵ Na avatu e Ieova le malosi iā Paulo e faaauau ai lana faiva, e ui i luʻi uma na ia fesagaʻia. Seʻi mātau mea na mafai ona faataunuuina e Paulo. O se faataʻitaʻiga, a o saisaitia Paulo i se fale i Roma, na tū atu o ia mo le tala lelei ina ua molia i luma o taʻitaʻi Iutaia ma atonu i luma o tagata maualuluga o le malo. (Galu. 28:17; Fili. 4:21, 22) Na talaʻi foʻi Paulo i le toʻatele o leoleo o le Emeperoa o Roma, ma na ia molimau atu foʻi iā i latou uma na asiasi atu iā te ia. (Galu. 28:30, 31; Fili. 1:13) I lenā taimi, na tusia ai foʻi e Paulo ni tusi faagaeeina, lea na aogā i Kerisiano moni e oo mai lava i aso nei. E lē gata i lenā, ae na faamalosia foʻi le faapotopotoga i Roma i le faaaʻoaʻoga a Paulo, lea na faalaeiau ai le ʻauuso e “atili faamalolosi . . . e tautatala atu ma le lē fefefe i le Afioga a le Atua.” (Fili. 1:14) E ui e itiiti mea na mafai ona fai e Paulo i nisi o taimi, ae na ia faia le mea sili e na te mafaia, ma na avea lenā ma mea na “agaʻigaʻi ai i luma le tala lelei, ae e leʻi faalavelavea ai.”​—Fili. 1:12.

6. I le 2 Korinito 12:9, 10, o le ā na mafai ai e Paulo ona faataunuuina lana faiva?

⁶ Na iloa e Paulo, o mea uma na ia faia i le auaunaga iā Ieova, na mafai ona ia faia ona o le malosi mai le Atua ae lē o sona lava malosi. Na faapea mai Paulo, ua faaatoaina le mana o le Atua i mea e vaivai ai. (Faitau le 2 Korinito 12:9, 10.) E ala i Lona agaga paia, na foaʻi atu ai e Ieova iā Paulo le malosi e faia ai ma le māeʻaeʻa lana faiva, e ui i sauāga, faafalepuipui ma isi luʻi na ia fesagaʻia.

7. O ā luʻi na fesagaʻia e Timoteo, na ono faigatā ai ona faataunuu lana faiva?

⁷ Na faalagolago foʻi le talavou o Timoteo i le malosi mai le Atua, ina ia faataunuu ai lana faiva. Na malaga faatasi Timoteo ma Paulo i ni malaga uumi faamisionare. E lē gata i lea, na auina atu foʻi e Paulo Timoteo e asiasi ma faalaeiau faapotopotoga. (1 Kori. 4:17) Atonu  na lagona e Timoteo le lē agavaa. Atonu o le māfuaaga lenā na faapea atu ai Paulo iā Timoteo: “Aua lava neʻi vaai maulalo se tagata i lou talavou.” (1 Timo. 4:12) I lenā taimi, na iai foʻi mea matuitui i le tino o Timoteo, o lona “maʻi e tupu soo.” (1 Timo. 5:23) Ae na iloa e Timoteo, e foaʻi atu e Ieova iā te ia e ala i le agaga paia le malosi manaʻomia, ina ia talaʻia ai le tala lelei ma fesoasoani i ona uso.​—2 Timo. 1:7.

8. Ua faapefea ona faamalosia e Ieova ona tagata i aso nei?

⁸ I aso nei, ua foaʻi e Ieova i ona tagata “le mana lea e sili atu i le malosi o tagata,” ina ia faaauau ai ona auauna faamaoni iā te ia. (2 Kori. 4:7) Seʻi o tatou iloiloina sauniuniga e fā mai iā Ieova e faamalosia ai i tatou ma fesoasoani e tumau faamaoni ai iā te ia: o le tatalo, le Tusi Paia, faatasitasiga faa-Kerisiano ma le faiva.

9. E faapefea ona fesoasoani le tatalo iā i tatou?

⁹ Faamalosia e ala i le tatalo. Na faalaeiau i tatou e Paulo i le Efeso 6:18, ina ia tatalo i le Atua “i taimi uma.” E tali mai le Atua e ala i le faamalosia o i tatou. Na tofo Jonnie mai i Polivia i le fesoasoani a le Atua, a o ia fesagaʻia le tele o tofotofoga. Na aafia lana avā ma ona mātua i ni maʻi ogaoga i le taimi e tasi. E leʻi faigofie iā Jonnie ona tausia o latou manaʻoga. Na maliu lona tinā, ae na umi se taimi faatoʻā malolosi lana avā ma lona tamā. Pe a toe mafaufau i le mea na tupu, na faapea mai Jonnie: “Ina ua matuā lofitūina aʻu i faafitauli, na fesoasoani le sasaa atu iā Ieova o mea tonu o loo i loʻu loto e ala i le tatalo.” Na foaʻi e Ieova iā Jonnie le malosi na ia manaʻomia e onosaʻia ai faafitauli. Na maua e Ronald o se toeaina i Polivia le tala ua aafia lona tinā i le kanesa, ma pe ā o se masina ae maliu loa o ia. O le ā na fesoasoani iā te ia e onosaʻia ai lenā faafitauli? Na ia faapea mai: “Na ou taʻu atu iā Ieova e ala i le tatalo mea uma nai loʻu loto ma oʻu faalogona uma. Na ou iloa e sili atu ona iloa ma malamalama Ieova iā te aʻu nai lo o se isi lava, e oo lava foʻi iā te aʻu.” E iai taimi e tatou te lagona ai ua lē mafai ona tatou onosaʻia faafitauli ma e tatou te lē mautonu i mea e tatou te tatalo atu ai. Ae ua valaaulia i tatou e Ieova ina ia tatalo atu iā te ia, e tusa lava pe faigatā ona faamatala atu o tatou manatu ma lagona.​—Roma 8:26, 27.

10. I le Eperu 4:12, aiseā e tāua tele ai le faitauina o le Tusi Paia ma mafaufau loloto i ai?

¹⁰ Faamalosia e ala i le Tusi Paia. E mafai foʻi ona tatou faalagolago i le Tusi Paia e maua mai ai le malosi ma faamāfanafanaga, e pei ona faia e Paulo. (Roma 15:4) A o tatou faitauina le Afioga a le Atua ma mafaufau loloto i ai, e fesoasoani le agaga paia o Ieova ina ia tatou malamalama lelei i le auala e faatatau ai lana Afioga i o tatou tulaga. (Faitau le Eperu 4:12.) Na faapea mai Ronald lea na taʻua muamua: “Ou te matuā lotofaafetai ona ua ou atiaʻeina se masaniga, o le faitau o se vaega o le Afioga a le Atua i pō uma. I le tele o taimi, ou te mafaufau loloto i uiga o Ieova ma le auala alofa na feutagaʻi ai ma ana auauna. Na fesoasoani lenā e toe faamalosia ai aʻu.”

11. Na faapefea ona faamalosia e le Tusi Paia se tuafafine loto faavauvau?

¹¹ E mafai ona tatou atiaʻeina se vaaiga saʻo e faatatau i o tatou tulaga, e ala i le mafaufau loloto i le Afioga a le Atua. Seʻi mātau le auala na fesoasoani ai le Tusi Paia i se tuafafine faavauvau ua oti lana tane. Na fautua i ai se toeaina, e mafai ona ia aʻoaʻoina ni lesona aogā mai le faitauina o le tusi a Iopu. Ina ua ia faitau i ai, na vave lava ona ia faitioina Iopu ona  o le sesē o ona manatu. Na pei ua ia lapataʻia Iopu ma faapea atu: “Iopu, aua e te soona faamamafa naʻuā ou faafitauli.” Peitaʻi, na ia iloa e tai pei lava ona uiga o uiga o Iopu. Na fesoasoani lenā e toe faasaʻo ai ona manatu, ma maua ai le malosi e feagai ai ma tigā o le maliu o lana tane.

12. O le ā le isi auala ua faamalosia ai e Ieova i tatou?

¹² Faamalosia e ala i faatasitasiga faa-Kerisiano. E faamalosia foʻi e Ieova Kerisiano e ala i lo tatou ʻauuso. Na tusi Paulo, na ia matuā naunau lava e “fefaalaeiauaʻi” ma ona uso faaleagaga. (Roma 1:11, 12) Na matuā tāua iā Mary lea na taʻua muamua na faatasitasiga. Na ia faapea mai: “Na faaaogā e Ieova uso ma tuafāfine e leʻi iloa faafitauli na ou fesagaʻia, e fesoasoani iā te aʻu. Na latou faamatala mai se manatu pe lafo mai se card na faalaeiauina ai aʻu, ma o le mea tonu lenā na ou manaʻomia. Na fesoasoani foʻi le talanoa i tuafāfine na fesagaʻia faafitauli e pei o oʻu faafitauli, ma na ou aʻoaʻoina mai ai ni lesona i auala na latou taulima ai na faafitauli. Na faamanatu mai foʻi e toeaina i taimi uma, o aʻu o se vaega tāua o le faapotopotoga.”

13. E faapefea ona faamalosia e le tasi le isi i sauniga a le faapotopotoga?

¹³ O se tasi o nofoaga sili e fefaalaeiauaʻi ai le tasi i le isi, o sauniga a le faapotopotoga. Pe a auai i sauniga, aiseā e lē tausolomua ai e faamalosia isi, e ala i le fai atu o ni faaupuga e faaalia atu ai lo tatou alofa ma le talisapaia o lo tatou ʻauuso? O se faataʻitaʻiga, a o leʻi amataina se sauniga na taʻu atu e se toeaina e igoa iā Peter i se tuafafine e lē talitonu lana tane: “E ese le faalaeiauina o aʻu i lou auai i le sauniga. O taimi uma e tou te ō mai ai i le sauniga, ua sauni lelei lau fanau e toʻaono, ma ua sauni foʻi e fai a latou tali.” Na tali atu le tuafafine ma le maligi o ona loimata ona o lona lotofaafetai: “Faafetai lava, o le faalaeiauga tonu lava na o loo oʻu manaʻomia.”

14. E faapefea ona fesoasoani iā i tatou le faia o se sao i le faiva?

¹⁴ Faamalosia e ala i le faiva. Pe a tatou faasoa atu upu moni o le Tusi Paia i isi, e tatou te lagona le faamalosia ma le faafouina e tusa pe tali lelei mai tagata pe leai. (Faata. 11:25) Ua tofo se tuafafine e igoa iā Stacy i le auala e faamalosia ai e le faiva se tasi. Ina ua faateʻaina se tasi o lona aiga, na faanoanoa le tuafafine ma tuufesili ifo, ʻPe na iai nisi mea na tatau ona ou faia e fesoasoani ai iā te ia?’ Na matuā faigatā ona ia aveesea lea faafitauli mai i lona mafaufau. O le ā na fesoasoani e na te fesagaʻia ai lenei tulaga faigatā? O le faiva. A o auai o ia i le galuega talaʻi, na amata ona ia uaʻi atu i tagata i le oganuu na manaʻomia lana fesoasoani. Na ia faapea mai: “I lenā taimi, na aumai ai e Ieova iā te aʻu se suʻesuʻega faale-Tusi Paia na agaʻigaʻi i luma. Na matuā faalaeiauina lava aʻu i lenā mea. O le mea sili na fesoasoani iā te aʻu, o le alu e talaʻi.”

15. O le ā e te aʻoaʻoina mai i faamatalaga a Mary?

¹⁵ Atonu e lagona e nisi, e lē mafai ona latou faia ni mea se tele i le faiva ona o latou tulaga. Pe afai o ou lagona na, ia manatua e fiafia le finagalo o Ieova pe a e faia le mea sili. Ia mātau le faaaʻoaʻoga a Mary lea na taʻua muamua. Na ia lagona le lē aogā ina ua siitia i se oganuu e ese le gagana. Na faapea mai: “E na o le pau le mea na mafai ona ou faia mo se taimi, o le fai atu o se tali faigofie, faitau se mau o le Tusi Paia, pe avatu foʻi se savali pe a ō i le talaʻiga.” O lea, na lagona ai e le tuafafine, e lē tele ni mea na mafai ona ia faia, pe a faatusatusa i tagata e lelei le tautatala i lenā gagana. Peitaʻi, na amata ona toe faasaʻo e le tuafafine ona manatu. Na amata ona ia iloaina,  e mafai ona faaaogā o ia e Ieova e ui i le itiiti o mea e mafai ona ia faia. Na faapea mai o ia: “O upu moni faasaoola o loo i le Tusi Paia, e malamalamagofie ma e mafai ona suia ai olaga o tagata.”

16. O le ā e fesoasoani e faamalosia ai i latou ua faataotolia i le fale?

¹⁶ E silafia ma e talisapaia e Ieova o tatou faanaunauga e fai se sao i le faiva, e tusa lava po ua faataotolia i le fale. E mafai ona fesoasoani Ieova iā i tatou e molimau atu iā i latou o loo tausia i tatou, fomaʻi ma tausimaʻi. E tatou te ono lagona le lotovaivai, pe a faatusatusa mea e mafai ona tatou faia i le taimi lenei, ma mea na tatou faia i le taimi ua teʻa. Pe a tatou iloa le auala o loo fesoasoani mai ai Ieova i le taimi lenei, o le a tatou maua la le malosi manaʻomia e onosaʻia ai so o se faafitauli.

17. I le Failauga 11:6, aiseā e tāua ai le talaʻi pea, e tusa pe e lē vave ona iai ni iʻuga lelei?

¹⁷ E tatou te lē mailoa po o lē fea o fatu o le upu moni na tatou totōina e ono mauaa ma amata ona ola. (Faitau le Failauga 11:6.) O se faataʻitaʻiga o Barbara, o se tuafafine ua pe ā ma le 80 ona tausaga. E molimau atu e lē aunoa o ia e ala i telefoni ma tusi. I se tasi o ana tusi, na ia tuuina i ai Le Olomatamata o Mati 1, 2014 lea o loo iai le mataupu “O Mea ua Faia e le Atua mo Oe.” E aunoa ma lona iloa, na ia lafoina le tusi i se ulugalii ua lē o toe avea ma Molimau a Ieova. Na la faitau ma toe faitau i le mekasini. Na lagona e le tane, e pei o loo talanoa tuusaʻo atu Ieova iā te ia. Na amata ona toe auai le ulugalii i sauniga ma iʻu ina toe avea ma Molimau a Ieova, ina ua mavae le silia ma le 27 tausaga. E mautinoa le faalaeiauina ma le faamalosia o Barbara i se iʻuga lelei mai lenā tusi.

18. O le ā e tatou te faia ina ia faamalosia ai i tatou e le Atua?

¹⁸ Ua aumaia e Ieova le tele o sauniuniga e tatou te maua ai le tele o lona mana. Pe a tatou faaaogāina sauniuniga e pei o le; tatalo, le Tusi Paia, faatasitasiga faa-Kerisiano ma le faiva, e faaalia ai lo tatou maufaatuatuaina o le malosi o le mana o Ieova ma lona faanaunauga e fesoasoani mai. Ia tatou faalagolago pea i lo tatou Tamā i le lagi o lē e na te “faaali atu lona malosi iā i latou e atoatoa o latou loto iā te ia.”​—2 No. 16:9.