Na ou fanau i le 1983. Na lelei mea uma i uluaʻi tausaga o loʻu olaga ae ina ua sefulu oʻu tausaga na amata ai ona ou faalogoina le tigā atoa o loʻu tino. Ina ua mavae le lua tausaga na ou ala ane ai i se taeao ua lē mafai ona ou minoi. Na ou taumafai malosi e faagaoioi oʻu vae ae na matuā lē mafai lava. Talu mai lenā aso, e leʻi mafai ona ou toe savali. E leʻi mafai foʻi ona ou toe tupu ona o loʻu maʻi. I aso nei, o loʻu tino e pei lava o se tino o se tamaitiiti.

I ni nai masina talu ona ou maʻi i le fale, na asiasi mai ai ni Molimau a Ieova se toʻalua. E masani lava ona ou lafi pe a asiasi mai ni tagata, a o lea aso na ou faatagaina ai nei tamaʻitaʻi e matou te talanoa. A o la talanoa mai e faatatau i le Parataiso, na faamanatu mai ai iā te aʻu mea na ou faalogo i ai i le lima o oʻu tausaga. I lenā taimi, e faatasi i le masina ona asiasi mai i lo matou nuu se misionare e igoa iā Jethro na nofo i Suriname, e suʻesuʻe le Tusi Paia ma loʻu tamā. E ese le agalelei o Jethro iā aʻu ma na ou matuā fiafia lava iā Jethro. Na ave foʻi aʻu e mātua o loʻu tamā i sauniga a Molimau a Ieova lea na faia i lo matou nuu. O lea, ina ua fesili mai se tasi o tamaʻitaʻi e igoa iā Florence po ou te fia iloa atili le Tusi Paia, na ou fai i ai ioe.

Na toe foʻi mai Florence ma lana tane o Justus ma matou suʻesuʻeina faatasi le Tusi Paia. Ina ua la iloa ou te lē iloa faitau tusi na la fesoasoani mai loa e aʻo laʻu faitau. Ina ua mavae se taimi ae ou iloa loa faitau. I se tasi aso na fai mai ai Justus ma Florence ua tofia i laʻua e auauna i Suriname. E faanoanoa ona e leʻi iai se tasi i Orealla e mafai ona faaauauina laʻu suʻesuʻega. Ae o le mea e fiafia ai, ona e leʻi faagaloina aʻu e Ieova.

E leʻi umi ae taunuu ane loa se paeonia e igoa iā Floyd i Orealla, na ma feiloaʻi a o ia talaʻi mai i lea fale i lea fale. Na ou ʻataʻata ina ua ia talanoa mai e faatatau i le suʻesuʻeina o le Tusi Paia. Na fesili mai, “O le ā le mea e te ʻata ai?” Na ou fai i ai ua uma ona ou suʻesuʻeina le polosiua O le ā e Manaʻomia e le Atua mai ia i Tatou? ma ua amata ona ou suʻesuʻeina le tusi Le Poto e Taʻitaʻia ai i le Ola e Faavavau. * Na ou taʻu i ai le māfuaaga na taofi ai laʻu suʻesuʻega. Na faauma e Floyd laʻu suʻesuʻega i le tusi o le Poto ae na toe tofia foʻi Floyd e auauna i se isi vaipanoa. Na lē toe iai foʻi saʻu faiaʻoga o le Tusi Paia.

Peitaʻi i le 2004, na tofia ai i Orealla ni paeonia  faapito se toʻalua e igoa iā Granville ma Joshua. Na la maua foʻi aʻu i le la talaʻiga i le fale i le fale. Na ou ʻataʻata foʻi ina ua la fesili mai po ou te manaʻo e suʻesuʻe le Tusi Paia. Na ou fai i ai e toe amata le matou suʻesuʻega i le tusi o le Poto. Na ou fia iloa pe e tutusa mea o le a la aʻoaʻoina ai aʻu ma oʻu faiaʻoga muamua. Na taʻu mai e Granville o loo fai sauniga i le nuu. E ui e toeitiiti sefulu tausaga ou te leʻi tuua loʻu fale, ae na ou manaʻo ou te auai i le sauniga. O lea, na sau ai Granville ma tuu aʻu i luga o se nofoa faataavalevale ma toso i le Maota mo Sauniga.

Mulimuli ane na faalaeiau aʻu e Granville e tusi loʻu igoa i le Aʻoga Faatiokarate. Na fai mai: “E lē atoatoa lou malosi, ae e mafai ona e tautala. E iai se aso e fai ai sau lauga lautele. E mautinoa o le a e faia.” O ana upu faalaeiau na ou maua ai le mautinoa.

Na amata ona ma talaʻi faatasi ma Granville. Peitaʻi, o le tele o auala i lo matou nuu e lauleaga ma e salutulutu ai le nofoa faataavalevale. O lea, na ou fai ai iā Granville e ave aʻu i se uilipaelo. Na aogā tele lenā mea. Na ou papatiso iā Aperila 2005. E leʻi umi ae toleni loa aʻu e uso ou te vaaia lomiga a le faapotopotoga ma vaaia le masini faaleotele leo i le Maota mo Sauniga.

O se tala faanoanoa, i le 2007 na maliu ai loʻu tamā i se faalavelave i se vaa. Na matuā faateʻia lo matou aiga. Na asiasi mai Granville ma tatalo faatasi ma i matou ma faasoa mai ni feʻau faamāfanafana mai i le Tusi Paia. I le lua tausaga mulimuli ane ai, na matuā toe faateʻia ai foʻi i matou i se isi faalavelave. Na maliu Granville i se faalavelave i se vaa.

Na matuā faanoanoa si a matou tamaʻi faapotopotoga ina ua tuua i matou e aunoa ma ni toeaina ma e toʻatasi le auauna o le faiva. Na matuā ootia oʻu faalogona i le maliu o Granville ona o ia o se uō pele iā te aʻu. Na ia tausia faamaoni oʻu manaʻoga faaleagaga ma le faaletino. I le sauniga na sosoo ai ina ua mavae lona maliu, na tofia ai aʻu e faitau le suʻesuʻega o le Olomatamata. E na o palakalafa muamua e lua na mafai ona ou faitauina ae amata loa ona ou tagi ma e leʻi mafai ona taofi le maligi o oʻu loimata. Na iʻu lava ina ou alu ese mai i le pulelaa.

Na amata ona ou toe fiafia ina ua ō mai uso mai i le isi faapotopotoga e fesoasoani iā i matou i Orealla. E lē gata i lenā, ae na auina mai foʻi e le ofisa o le lālā Kojo o se paeonia faapito. Na faafiafiaina aʻu ina ua suʻesuʻe ma papatisoina loʻu tinā ma loʻu uso laʻitiiti. Iā Mati 2015 na tofia ai aʻu o se auauna o le faiva. Mulimuli ane, na fai ai laʻu lauga lautele muamua. I lenā aso na ou ʻataʻata ma maligi oʻu loimata ona o le lotofaafetai ina ua ou manatua le tala a Granville na fai mai iā aʻu i le tele o tausaga ua teʻa: “E iai se aso e fai ai sau lauga lautele. E mautinoa o le a e faia.”

Na ou iloa mai i le polokalame i le TV i le Initaneti, e iai foʻi uso ma tuafāfine e tutusa o matou tulaga. E ui e lē atoatoa lo latou malosi o le tino ae e tele mea na mafai ona latou faia ma fiafia o latou olaga. E faapena foʻi aʻu e iai lava mea e mafai ona ou faia. O loʻu faanaunauga e fai le mea sili e auauna ai iā Ieova, na uunaʻia ai aʻu e avea o se paeonia sauatoa. Iā Setema 2019 na faateʻia ai aʻu i se tala ou te leʻi faatalitalia. I lenā masina na tofia ai aʻu e auauna o se toeaina i la matou faapotopotoga e pe ā ma le 40 tagata talaʻi.

Ou te matuā lotofaafetai i uso ma tuafāfine pele na matou suʻesuʻe ma fesoasoani iā te aʻu i le talaʻiga. Ae e sili atu i mea uma, ou te matuā lotofaafetai ona e leʻi faagaloina aʻu e Ieova.