1-2. E faapefea ona tatou faatatauina le fautuaga o loo i le Faataoto 4:25? Aumai se faataʻitaʻiga.

SEʻI manatu i faataʻitaʻiga nei. O se tuafafine matua o loo mafaufau i mea lelei na tutupu iā te ia i le taimi ua teʻa. E ui ina matuā faigatā lona olaga i le taimi lenei, ae o loo faaauau pea ona ia faia le mea e na te mafaia mo Ieova. (1 Kori. 15:58) O aso uma, e na te faaāta ai o loo latou ola faatasi i le Parataiso ma ē e pele iā te ia. O se isi tuafafine, o loo ia manatua le faatigā o se tasi o le faapotopotoga iā te ia, peitaʻi, e na te leʻi teulotoina le ita. (Kolo. 3:13) O se uso o loo ia manatua lelei ana mea sesē na fai i le taimi ua teʻa, ae na ia uaʻi atu i le faia o mea uma e na te mafaia i le taimi lenei e faamaoni ai pea iā Ieova.​—Sala. 51:10.

² O le ā se mea e tutusa ai nei Kerisiano e toʻatolu? Na latou manatua uma mea na tutupu iā i latou i le taimi ua teʻa. Peitaʻi, e latou te leʻi soona uaʻi i ai. Nai lo o lea, na latou “vaai saʻo i luma” i le lumanaʻi.​—Faitau le Faataoto 4:25.

3. Aiseā e tāua ai le “vaai saʻo i luma” i le lumanaʻi?

³ Aiseā e tāua ai le “vaai saʻo i luma” i le lumanaʻi? Talu ai e lē mafai ona savali se tasi i se laina saʻo pe a fai ma tepa i tua. E lē mafai foʻi la ona tatou agaʻigaʻi i luma i le auaunaga iā Ieova, pe a fai ma tatou tepa i tua i mea ua teʻa.​—Luka 9:62.

4. O le ā o le a tatou talanoaina i lenei suʻesuʻega?

⁴ I lenei suʻesuʻega, o le a tatou talanoaina ai ni mailei se tolu, lea e ono māfua ai ona tatou soona uaʻi atu i mea na tutupu i o tatou olaga i le taimi ua teʻa. * (1) O le moomoo i le olaga na iai  muamua, (2) o le teuloto o le ita, (3) o le soona uaʻi atu i faalogona nofosala. I nei tulaga taʻitasi, o le a tatou iloa ai auala e fesoasoani ai mataupu silisili o le Tusi Paia iā i tatou, e ʻalofia ai le soona uaʻi atu i “mea ua tuanaʻi” ae tepa taulaʻi atu “i mea o i le lumanaʻi.”​—Fili. 3:13.

5. O le ā le mailei ua lapataʻia ai i tatou e le Failauga 7:10?

⁵ Faitau le Failauga 7:10. Ia mātau, e lē o faapea mai le mau e sesē le fesili: “Aiseā na lelei ai aso ua mavae?” O le manatuaina o mea lelei na tutupu o se meaalofa mai iā Ieova. Peitaʻi, o loo faapea mai le mau: “Aua le faapea ane: ʻAiseā ua sili ai ona lelei aso ua mavae nai lo o nei aso?’” O le mailei la, o le faatusatusa lea o tatou olaga i le taimi ua teʻa ma o tatou olaga i le taimi lenei, ma tatou manatu ai ua leaga mea uma i le taimi lenei. Ua faapea mai le faaliliuga o lenei mau i se tasi o Tusi Paia: “Aua le fesili, ʻAiseā ea na sili ai ona lelei mea i aso ua mavae?’ E lē atamai lenā fesili.”

6. Aiseā e lē atamai ai le mafaufau pea, na sili atu ona lelei o tatou olaga i aso ua mavae? Aumai se faaaʻoaʻoga.

⁶ Aiseā e lē atamai ai le mafaufau pea, na sili atu ona lelei o tatou olaga i aso ua mavae? O lo tatou moomoo i le olaga na iai muamua, e māfua ai ona tatou manatua na o mea lelei na tutupu iā i tatou i aso ua mavae, ma tatou manatu māmā ai i faigatā na tatou fesagaʻia i na taimi. O se faaaʻoaʻoga o Isaraelu anamua, ina ua latou tuua Aikupito, na vave lava ona galo iā i latou le faigatā o le olaga na latou tofo i ai, ae na latou uaʻi atu i meaʻai lelei na latou taumamafa ai. Na latou faapea mai: “O le mea lea e tatou te manatua ai pea iʻa e masani ona tatou aai fua ai i Aikupito, o kukama, o meleni, o liki, o aniani ma kaliki!” (Nu. 11: 5) Ae pe e moni na latou “aai fua” i na meaʻai? E leai. Na telē le tau na latou totogiina mo na meaʻai. I lenā taimi, na matuā mafatia ma sauāina i latou o ni pologa i Aikupito. (Eso. 1:13, 14; 3:6-9) Mulimuli ane, na galo iā i latou na faigatā ma moomoo ai i le taimi ua teʻa. Na latou filifili e uaʻi atu i mea lelei na tutupu iā i latou i aso ua mavae, nai lo o le uaʻi atu i mea lelei  faatoʻā uma lava ona faia e Ieova mo i latou. O lea, e leʻi fiafia Ieova i o latou uiga.​—Nu. 11:10.

7. O le ā na fesoasoani i se tuafafine e ʻalofia ai le mailei o le moomoo i le olaga na iai muamua?

⁷ E faapefea ona tatou ʻalofia le mailei o le moomoo i le olaga na iai muamua? Seʻi manatu i le faaaʻoaʻoga a se tuafafine na amata ona auauna i le Peteli i Brooklyn i le 1945. I nai tausaga mulimuli ane ai, na faaipoipo ai o ia i se uso mai i Peteli, ma na la auauna i inā mo le tele o tausaga. Peitaʻi i le 1976, na maʻi ai lana tane. Na ia faapea mai, ina ua iloa e lana tane ua latalata ina maliu, na avatu e lana tane iā te ia ni fautuaga aogā e fesoasoani i ona mafatiaga pe a maliu. Na faapea atu lana tane: “Sa ta maua se faaipoipoga fiafia. E toʻatele tagata e leʻi maua ni faaipoipoga faapena.” Na ia fautua atu foʻi iā te ia: “Aua e te soona uaʻi atu i mea na tutupu i le olaga i le taimi ua teʻa, e ui lava o le a e manatua na taimi. A o faagasolo taimi, o le a mou atu ou mafatiaga. Aua e te lototigā ma tuuaʻia oe. Ae ia e fiafia ona o taimi lelei na ta auauna faatasi ai iā Ieova ma faamanuiaga na ta tofo i ai. . . . O le manatua o mea na tutupu, o se meaalofa mai le Atua iā i tatou.” Pe e te ioe o ni fautuaga aogā na?

8. O ā aogā na maua e lo tatou tuafafine ona o le lē moomoo i le olaga na iai muamua?

⁸ Na faatatau e lo tatou tuafafine lenā fautuaga. Na auauna faamaoni o ia iā Ieova seʻia oo i lona maliu i le 92 o ona tausaga. I ni nai tausaga a o leʻi maliu, na ia faapea mai: “Pe a toe tepa i tua i le 63 tausaga o le auaunaga faataimi atoa iā Ieova, ou te faapea atu ai, ua matuā faamalieina loʻu olaga.” Aiseā? Na faapea mai o ia: “O le mea sa sili ona faamalieina moni ai le olaga, o le matagofie o le aufaatasi ma uso, ma le faamoemoe i le ola e faavavau ma o matou uso ma tuafāfine i le lalolagi parataiso, ma auauna e faavavau i Lē Sili na Foafoaina i tatou, le Atua moni e toʻatasi, o Ieova.” * Maʻeu se faaaʻoaʻoga sili ona lelei o se tasi na vaai saʻo i luma i le lumanaʻi!

9. E pei ona taʻua i le Levitiko 19:18, aiseā e ono matuā faigatā ai mo i tatou ona aveesea le teuloto o le ita?

⁹ Faitau le Levitiko 19:18. E masani ona faigatā iā i tatou ona aveese le teuloto o le ita, aemaise lava pe afai o se uso, se uō vavalalata po o se tauaiga na faatigā mai. O se faaaʻoaʻoga, na tuuaʻia sesē e se tuafafine i le faapotopotoga le isi tuafafine i lona gaoia o se tupe. Mulimuli ane, na faatoese atu le tuafafine ona o le sesē o tuuaʻiga na ia faia. Peitaʻi, na uaʻi atu pea le tuafafine na tuuaʻia sesē i le mea na tupu. Pe na oo iā te oe lenā lagona? E tusa pe e leʻi tupu se mea faapena iā te oe, ae o le toʻatele o i tatou atonu ua oo iai le lagona o le teuloto o le ita, ma ua e talitonu e lē mafai ona e toe aveesea lenā lagona.

10. O le ā e fesoasoani iā i tatou pe afai e tatou te teulotoina le ita?

¹⁰ O le ā e fesoasoani iā i tatou pe afai e tatou te teulotoina le ita? O se tasi o fesoasoani, o lo tatou manatua e silafia e Ieova mea uma. E silafia e Ieova mea uma e tutupu iā i tatou, e aofia ai ma faiga lē tonu ua tatou tofo i ai. (Epe. 4:13) E mafatia o ia pe a tatou mafatia. (Isa. 63:9) Na ia folafola mai o le a ia aveesea so o se tigā ua tatou mafatia ai ona o faiga lē tonu.​—Faaa. 21:3, 4.

11. O ā aogā e tatou te maua pe a aveese lo tatou teulotoina o le ita?

¹¹ E ao foʻi ona tatou manatua, e tatou te maua aogā pe a aveese lo tatou teulotoina o le ita. O le mea lenā na iloa e le tuafafine lea na tuuaʻia sesē. Na iai le taimi na mafai ai ona ia aveesea le teulotoina o le ita. Na ia iloa pe a tatou faamagalo i isi, o le a faamagaloina foʻi i tatou e Ieova. (Mata. 6:14) Na ia iloa foʻi e sesē le gaoioiga na faia e le isi tuafafine iā te ia, ae na ia filifili e aveese lona teulotoina o le ita. O le iʻuga, na matuā fiafia le tuafafine ma mafai ai ona ia uaʻi atu i lana auaunaga iā Ieova.

12. O le ā e tatou te aʻoaʻoina mai i le 1 Ioane 3:19, 20?

¹² Faitau le 1 Ioane 3:19, 20. E iai taimi e oo ai iā i tatou uma faalogona nofosala. O se faaaʻoaʻoga, o nisi e lagona le nofosala ona o mea na latou faia a o leʻi aʻoaʻoina le upu moni. Ae e lagona e isi le nofosala ona o mea sesē na latou faia ina ua uma ona papatiso. O ni faalogona masani na. (Roma 3:23) E ui e tatou te mananaʻo e fai le mea saʻo, ae e “e sesē i tatou uma i mea e tele.” (Iako. 3:2; Roma 7:21-23) E ui e tatou te lē fiafia i faalogona nofosala, ae e mafai ona maua ai e i tatou se mea lelei. E faapefea? Talu ai e mafai ona uunaʻia i tatou e faalogona nofosala e faasaʻo o tatou ala, ma maumauaʻi ai e aua neʻi toe faia mea sesē.​—Epe. 12:12, 13.

13. Aiseā e manaʻomia ai ona leoleoina i tatou mai i le soona uaʻi atu i faalogona nofosala?

¹³ I le isi itu, e mafai ona tatou soona uaʻi atu i faalogona nofosala, o lona uiga e tatou te lagona pea le nofosala e ui ua tatou salamō ma ua tatou iloa faamaoniga o le faamagaloina o i tatou e Ieova. O lenā ituaiga faalogona nofosala e faaleagaina ai oe. (Sala. 31:10; 38:3, 4) E faapefea? Seʻi manatu i se tuafafine na tauivi ma faalogona nofosala ona o ana agasala na fai. Na faapea mai o ia: “Na ou lagona e leai se aogā ou te galue mamafa ai i le auaunaga iā Ieova, ua ou tuai, atonu e lē faasaoina aʻu.” E iai foʻi i le toʻatele o i tatou na faalogona. O lea, e tāua tele ona leoleoina i tatou mai i le mailei o le soona uaʻi atu i faalogona nofosala. O le mea moni, seʻi mafaufau i le matuā fiafia o Satani pe a tatou faavaivai i le auaunaga iā Ieova, ae e lē o faavaivai Ieova i le faaalia o le alofa mo i tatou.​—Faatusatusa i le 2 Korinito 2:5-7, 11.

14. E faapefea ona tatou mautinoa e lē o faavaivai Ieova i le faaalia o le alofa iā i tatou?

¹⁴ Atonu e tatou te taumānatu pea, ʻE faapefea  ona ou mautinoa e lē o faavaivai Ieova i le faaalia o le alofa iā te aʻu?’ O lou faia o lenā fesili, ua faaalia ai e mafai e Ieova ona faamagaloina oe. I le tele o tausaga ua mavae na taʻua ai e se Watchtower: “[Atonu] e tatou te tautevateva ma paʻuʻū i le tele o taimi ona o ni masaniga leaga mai i o tatou olaga tuai, lea ua matuā aafia ai i tatou e aunoa ma lo tatou iloaina. . . . Aua le faavaivai ai. Aua e te manatu ua e faia se agasala e lē mafai ona faamagaloina. O le mea tonu lava lenā e manaʻo Satani e te mafaufau i ai. O le mea moni, ona o lenā e te lagona le faanoanoa ma le lē fiafia iā te oe lava, ua faamaonia ai la e te leʻi faia se agasala e lē mafai ona faamagaloina. Aua e te faavaivai e tatalo e lē aunoa i le Atua ma le lotomaulalo. Ia saʻili mo lana faamagaloga, se lotofuatiaifo mamā ma lana fesoasoani. Ia faalatalata atu iā Ieova e pei ona alu atu o se tamaitiiti ua oo i ai ni faafitauli i lona tamā. E tusa po ua faatele ona tatou faia le mea sesē lava lea e tasi, ae o le a foaʻi mai ma le alofa e Ieova iā te oe le fesoasoani ona o lona agalelei faifua.”

15-16. O ā faalogona o nisi ina ua latou iloa e leʻi faavaivai Ieova e faaalia le alofa mo i latou?

¹⁵ E toʻatele tagata o Ieova ua faamāfanafanaina i le iloa, e lē faavaivai Ieova i le faaalia o le alofa iā i latou. O se faaaʻoaʻoga, i ni nai tausaga ua mavae, na pāʻia le loto o se uso ina ua faitau i se mea na tupu o loo lomia i le faasologa o mataupu, “E Mafai e le Tusi Paia Ona Suia Olaga.” I se tasi o mataupu, na faamatala ai e se tuafafine le mea na tupu iā te ia i le taimi ua teʻa, lea na faigatā ai ona ia talitonu e alofa Ieova iā te ia. Na tauivi pea le tuafafine ma na faalogona mo le tele o tausaga, e ui lava ua uma ona papatiso. Peitaʻi, ina ua ia manatunatu loloto i le togiola na amata ai ona suia lana vaai i mea. *

¹⁶ Na faapefea i le mea na tupu i le tuafafine ona pāʻia ai le loto o le uso? Na ia tusi, “A o oʻu talavou na ou tauivi ai ma se masaniga o le matamata i ata matagā taufeusuaʻiga. Na ou toe matamata foʻi i se taimi e leʻi leva atu. Na ou saʻilia le fesoasoani mai i toeaina ma na sologa lelei aʻu taumafaiga e foʻia le faafitauli. Na faamautinoa mai e toeaina le alofa o le Atua ma lona nofosauni e faamagalo. Ae e iai taimi ou te lagona ai pea le leai o se aogā, e pei e lē mafai e Ieova ona faaalia le alofa iā te aʻu. Na fesoasoani  tele iā te aʻu le faitauina o le mea na tupu i lenei tuafafine. Ua ou iloa nei pe a ou manatu e lē mafai e le Atua ona faamagalo aʻu, o lona uiga ua ou fai atu i le Atua e lē lava le togiola a lona Alo e faamagalo ai aʻu agasala. Na ou ooti ese le mataupu lenei ina ia mafai ona ou faitau ma manatunatu loloto i ai i so o se taimi e oso aʻe ai faalogona o le lē aogā.”

17. Na faapefea ona ʻalofia e le aposetolo o Paulo le mailei o le soona uaʻi atu i faalogona nofosala?

¹⁷ O nei mea na tutupu, e faamanatu mai ai iā i tatou le mea na tupu i le aposetolo o Paulo. A o leʻi avea o ia ma Kerisiano na ia faia le tele o agasala matuiā. Na manatua e Paulo mea na ia faia, ae e na te leʻi soona uaʻi atu i ai. (1 Timo. 1:12-15) Na vaai Paulo i le togiola e pei o se meaalofa e patino lava mo ia. (Kala. 2:20) O le māfuaaga lenā na teena ai e Paulo le mailei o le soona uaʻi atu i faalogona nofosala, ae na ia uaʻi atu i le faia o le mea sili e na te mafaia e auauna ai iā Ieova talu mai lenā taimi.

18. O ā mea ua tatou iloa mai i lenei suʻesuʻega?

¹⁸ O ā mea ua tatou iloa mai i mailei na talanoaina i lenei suʻesuʻega? (1) O se faamanuiaga mai iā Ieova le manatuaina o mea lelei na tutupu, ae po o le ā lava le sologa lelei o tatou olaga na iai i le taimi ua teʻa ae o le a sili atu ona lelei o tatou olaga o le a iai i le lalolagi fou. (2) E ono faatigā mai isi iā i tatou, ae pe a tatou lotofaamagalo, o le a mafai la ona tatou uaʻi atu i la tatou auaunaga iā Ieova i le taimi lenei. (3) O le soona uaʻi atu i faalogona nofosala e taofia ai i tatou mai i le auauna iā Ieova ma le olioli. O lea la, e tatau ona tatou mautinoa e faamagaloina i tatou e Ieova e pei ona mautinoa i ai Paulo.

19. I le lalolagi fou, e faapefea ona tatou iloa o le a lē toe oo iā i tatou faalogona nofosala ona o mea na tatou faia i taimi ua teʻa?

¹⁹ E tatou te faamoemoe e ola e faavavau. I le lalolagi fou a le Atua, o le a lē toe oo iā i tatou faalogona nofosala ona o mea na tatou faia i taimi ua teʻa. I lenā taimi, ua taʻua i le Tusi Paia: “E lē toe manatua mea sa iai muamua.” (Isa. 65:17) Seʻi manatu i ai: O nisi o i tatou ua matutua a o auauna pea iā Ieova, ae i le lalolagi fou o le a toe talavou. (Iopu 33:25) O lea, seʻi o tatou maumauaʻi e aua le soona uaʻi i mea na tutupu i le taimi ua teʻa. Ae ia tatou uaʻi atu i le lalolagi fou, ma faamanuiaga e maua ai.