1-2. (a) Aiseā e tatau ai i ulugalii fou ona maufaatuatuaina Ieova? (Salamo 37:3, 4) (e) O le ā o le a tatou iloiloina i lenei suʻesuʻega?

 PO O e fuafua e faaipoipo, po ua faatoʻā uma ona e faaipoipo? E lē taumatea o loo e tulimataʻia se olaga fiafia faatasi ma lau paaga faaipoipo. O le mea moni, e iai luʻi o le faaipoipoga ma e iai filifiliga tāua e tatau ona tatou faia. O le auala e tatou te taulimaina ai luʻi ma faia filifiliga, e faalagolago iai le mauaina o le fiafia i le lumanaʻi. Pe a faalagolago iā Ieova, o le a mafai la ona lua faia filifiliga atamai, faamalosia le faaipoipoga ma faateleina le fiafia. Pe a lē faatatauina fautuaga a le Atua, e ono tutupu ai ni faafitauli i le faaipoipoga ma oo ai i faanoanoaga.​—Faitau le Salamo 37:3, 4.

² E ui o loo faatatau lenei suʻesuʻega i ulugalii fou, ae o loo talanoaina ai foʻi luʻi e fesagaʻia e ulugalii uma. O le a faamatilatila ai mea e tatou te aʻoaʻoina mai i faaaʻoaʻoga a tane ma fafine faamaoni o le Tusi Paia. O nei faaaʻoaʻoga mai i le Tusi Paia, e tatou te aʻoaʻoina mai ai lesona e mafai ona tatou faatatauina i vala eseese o le olaga, e aofia ai le faaipoipoga. O le a tatou aʻoaʻoina foʻi ni lesona i mea na tutupu i nisi ulugalii i aso nei.

3-4. O ā luʻi e ono fesagaʻia e ulugalii fou?

³ E faalaeiau e nisi tagata ulugalii fou e ola i se olaga e pei ona ola ai le toʻatele o tagata. O se faataʻitaʻiga, e ono uunaʻia  e mātua ma tauaiga le ulugalii fou e vave fai se la fanau. E ono uunaʻia foʻi e uō ma nisi o le aiga le ulugalii e faatau so la fale ma faatumu i meafale mananaia.

⁴ Pe a lē faaeteete le ulugalii, e la te ono faia ai ni filifiliga e fai ni aitalafu ma avea ai o ni avega mamafa iā i laʻua. O le a iʻu ai ina faigaluega ovataimi uma i laʻua e tau totogi aitalafu. O lea, ua fao ai e galuega totogi le taimi sa tatau ona faaalu i le suʻesuʻeina o le Tusi Paia a le tagata lava ia, tapuaʻiga a le aiga ma le talaʻiga. Atonu e misi foʻi e le ulugalii sauniga ona ua faigaluega ovataimi, ina ia maua ai se tupe faasili pe e faamautinoa ai e maua pea a la galuega. O le iʻuga, o le a la misia ai avanoa tāua e faalautele atu ai le la auaunaga iā Ieova.

5. O le ā ua e aʻoaʻoina mai i le faaaʻoaʻoga a Klaus ma Marisa?

⁵ E tele faaaʻoaʻoga ua faailoa mai ai, o le taulaʻi atu o le olaga i le mauaina o meafaitino e lē maua ai le fiafia. Mātau le mea na tupu i se ulugalii e igoa iā Klaus ma Marisa. * Ina ua la faaipoipo, na la galulue uma i galuega totogi faataimi atoa ina ia mafai ai ona la fiafia i le tele o mea i le olaga. O le mea moni, e la te leʻi maua ai le faamalieina. Na taʻutino mai Klaus: “Na sili atu ona tele meafaitino na ma maua nai lo mea na ma manaʻomia, ae e leʻi iai ni o ma sini faaleagaga. Na matuā faigatā ma tele popolega i o ma olaga.” Atonu ua e mātauina foʻi o le saʻilia muamua o meafaitino, e te lē maua ai le faamalieina. Afai o lea, aua neʻi e lotovaivai ai. O le iloiloina o faaaʻoaʻoga lelei a isi, e fesoasoani iā te oe e faia ai suiga manaʻomia. Ae seʻi o tatou iloiloina muamua mea e mafai ona aʻoaʻoina mai e tane i le faaaʻoaʻoga a le tupu o Iosefatu.

6. E tusa ai ma le fautuaga o loo i le Faataoto 3:5, 6, na faapefea ona faafetaiaʻia e le tupu o Iosefatu se luʻi ogaoga?

⁶ Tane, pe e iai se taimi e te lagona ai le lofitūina ona o au tiute tauave? Afai o lea, e mafai ona aogā iā te oe le faaaʻoaʻoga a le tupu o Iosefatu. Talu ai o Iosefatu o le tupu, o lana tiute tauave o le vaavaaia lelei o le nuu atoa o Iuta. Na faapefea ona taulimaina e Iosefatu lenā tiute tauave tāua? Na faia e Iosefatu le mea sili e na te mafaia e puipuia ai ona tagata. Na ia toe faaleleia ma faamalosia aai o Iuta ina ia malupuipuia. Na ia aoao mai foʻi tagata totoa ma malolosi mo lana vaegaau e silia ma le 1,160,000 fitafita. (2 No. 17:12-19) Mulimuli ane, na fesagaʻia ai e Iosefatu se luʻi faigatā. Na siitaua atu se ʻautau tele a tagata Amoni ma Moapi, ma tagata e nonofo i vaega maugā o Seira. Na faamataʻuina ai o ia, lona aiga faapea ona tagata. (2 No. 20:1, 2) O le ā na faia e Iosefatu? Na ia saʻili atu mo le fesoasoani a Ieova ma le malosi e taulima ai le faafitauli. Na fetaui lelei le gaoioiga na faia e Iosefatu ma le fautuaga atamai o loo i le Faataoto 3:5, 6. (Faitau.) O le  tatalo lotomaulalo a Iosefatu o loo faamauina i le 2 Nofoaiga a Tupu 20:5-12, ua faailoa mai ai lona matuā maufaatuatuaina o lona Tamā alofa i le lagi. Na faapefea ona tali Ieova i le tatalo a Iosefatu?

7. Na faapefea ona tali atu Ieova i le tatalo a Iosefatu?

⁷ Na tali Ieova e ala iā Iaaseelu le tagata sa Levī. Na fetalai atu Ieova: “Inā tutū ia outou ma tutumau, ma vāai i le faaolataga a Ieova iā te outou.” (2 No. 20:13-17) E lē o se gaoioiga masani lenā e tau ai se isi i se taua. Peitaʻi, e leʻi aumaia na faatonuga i se tagata ae na tuuina mai iā Ieova. Na maufaatuatuaina atoatoa e Iosefatu lona Atua, ma na ia faia e pei ona faatonuina ai o ia. Ina ua latou faafetaiaʻia le fili, e leʻi faamuamuaina e Iosefatu ni fitafita tomai e tau. Ae na ia faamuamua i luma o ana ʻautau tagata pepese e leʻi iai ni meatau. Na faataunuu e Ieova lana folafolaga iā Iosefatu, ma na ia faatoʻilaloina le fili.​—2 No. 20:18-23.

8. O le ā e aʻoaʻoina e tane mai i le faaaʻoaʻoga a Iosefatu?

⁸ E mafai ona aʻoaʻoina e tane se lesona mai le faaaʻoaʻoga a Iosefatu. O le matafaioi a tane o le tausia lelei o latou aiga. O lea, ia galulue mamafa e puipuia ma lagolagosua iā i latou. Pe a feagai ma luʻi, atonu e te manatu e mafai ona e foʻia luʻi i au lava auala. Peitaʻi, ia teena le faalagolago i lou lava malosi. Ia tatalo tau lava o oe iā Ieova mo lana fesoasoani. Ia tatalo faatauanau foʻi iā Ieova faatasi ma lau avā. Ia saʻili le fesoasoani a Ieova e ala i le suʻesuʻeina o le Tusi Paia, lomiga ua saunia e lana faalapotopotoga, ma faatatau fautuaga e te maua mai ai. E ono lē ioe nisi i au filifiliga e faavae mai i le Tusi Paia. Atonu e latou te fai atu e valea na filifiliga. E latou te ono faapea atu foʻi o tupe ma meafaitino, e mafai ona puipuia ai lou aiga. Ae ia manatua le faaaʻoaʻoga a Iosefatu. Na ia maufaatuatuaina Ieova, ma na ia faamaonia atu i ana gaoioiga. E leʻi tuulafoaʻia e Ieova lenā tagata faamaoni, e lē mafai foʻi ona tuulafoaʻia oe e Ieova. (Sala. 37:28; Epe. 13:5) O le ā e faia e ulugalii faaipoipo, ina ia faamautinoa ai e latou te maua se olaga fiafia?

9. O le ā le ituaiga ulugalii e iai Isaia ma lana avā?

⁹ Na faamuamua e le perofeta o Isaia ma lana avā le auaunaga iā Ieova i o la olaga. O Isaia o se perofeta, ma atonu na iai foʻi ni galuega faaperofeta lava ia a lana avā, auā na taʻua o ia o le “perofeta fafine.” (Isa. 8:1-4) E mautinoa na uaʻi atoatoa atu lenei ulugalii i le tapuaʻiga iā Ieova. Maʻeu se faaaʻoaʻoga mataʻina mo ulugalii faaipoipo i aso nei.

10. E faapefea ona fesoasoani le suʻesuʻeina o valoaga a le Tusi Paia i ulugalii, e maumauaʻi ai e fai le mea sili e auauna ai iā Ieova?

¹⁰ E mafai e ulugalii Kerisiano i aso nei ona faamuamua le auaunaga iā Ieova i o la olaga, pe a fai mea uma e la te mafaia e auauna ai iā te ia. E mafai ona la faamalosia lo la maufaatuatuaina o Ieova, e ala i le suʻesuʻeina faatasi o valoaga a le Tusi Paia ma iloa auala ua faataunuuina ai. * (Tito 1:2) E mafai foʻi ona la manatunatu i le auala e fai ai so la sao, i le faataunuuina o nisi o valoaga i le Tusi Paia. O se faaaʻoaʻoga e mafai ona fai so la sao i le faataunuuina o le valoaga a Iesu, e faatatau i le talaʻia o le tala lelei o le Malo i le lalolagi uma a o leʻi oo mai le iʻuga. (Mata.  24:14) O le tele lava o le mautinoa o se ulugalii i le faataunuuina moni o valoaga a le Tusi Paia, o le faateleina foʻi lena o lo la maumauaʻi e fai le mea sili e auauna ai iā Ieova.

11. O le ā na mafai ona fai e Pisila ma Akula, ma aiseā?

¹¹ E mafai e ulugalii talavou ona aʻoaʻo mai ni lesona i se ulugalii Iutaia na nonofo i Roma, e igoa iā Pisila ma Akula. Na la faalogo i le tala lelei e faatatau iā Iesu, ma avea ai ma Kerisiano. E mautinoa na faamalieina o la olaga. Peitaʻi na suia faafuaseʻi le tulaga o mea, ina ua faatonuina e le emeperoa o Kalaotio tagata Iutaia uma e tuua Roma. O ā ni aafiaga na oo iā Pisila ma Akula? Na la tuua Roma ma le siʻomaga na masani ai, suʻe se fale e nonofo ai ma amata se pisinisi fai faleʻie i se nofoaga e lē masani ai. Pe na avea mea na tutupu faafuaseʻi i o la olaga, ma māfuaaga e taofia ai le la auaunaga iā Ieova? Atonu ua e iloa le tali o lenā fesili. I lo la nofoaga fou i Korinito, na galulue faatasi Akula ma Pisila ma le faapotopotoga i ina. Na latou galulue faatasi foʻi ma le aposetolo o Paulo e faamalosia uso ma tuafāfine. Mulimuli ane, na latou malaga ai ma le aposetolo o Paulo i isi vaipanoa na tele ai le manaʻoga. (Galu. 18:18-21; Roma 16:3-5) E lē taumatea na la maua se olaga fiafia ma faamalieina.

12. Aiseā e tatau ai i ulugalii faaipoipo ona faatutū ni sini faaleagaga?

¹² E mafai ona faaaʻoaʻo ulugalii i aso nei iā Pisila ma Akula, e ala i le faamuamua o manaʻoga o le Malo. O le taimi o le faigāuō, o le taimi sili ona lelei lenā e talanoa ai se ulugalii e faatatau i o la sini i le olaga. Pe a fai faatasi filifiliga a se ulugalii ma taumafai e ausia o la sini faaleagaga, e tele avanoa e la te molimauina ai le fesoasoani a le agaga o Ieova iā i laʻua. (Fai. 4:9, 12) Seʻi o tatou iloiloina le mea na tupu iā Russell ma Elizabeth. Na faapea mai Russell: “I le taimi o le ma faigāuō, na ma talanoa ai i o ma sini faaleagaga.” Na faapea mai foʻi Elizabeth: “Na ma talanoa i o ma sini i le taimi lenā ina ia faamautinoa ai e lē taofia lo ma ausiaina o sini faaleagaga, pe a faia nisi filifiliga.” O le  faia faapea, na mafai ai e Russell ma Elizabeth ona siitia i Maikoronesia, e auauna i le mea na manaʻomia ai ni tagata talaʻi.

13. I le Salamo 28:7, o le ā e iʻu i ai pe a tatou maufaatuatuaina Ieova?

¹³ E toʻatele ulugalii ua faia filifiliga e pei o Russell ma Elizabeth. Ua faafaigofie o latou olaga ina ia faatele ai le taimi e talaʻi ma aʻoaʻo atu ai. E tele iʻuga lelei e maua e se ulugalii pe a faatutū sini faaleagaga mo le auaunaga iā Ieova, ma galulue faatasi ina ia ausia na sini. O le a la tofo ai i le tausiga a Ieova, faateleina lo la maufaatuatuaina o ia ma maua ai le fiafia moni.​—Faitau le Salamo 28:7.

14. Na faapefea ona faaalia e le aposetolo o Peteru ma lana avā, le maufaatuatuaina o le folafolaga o loo i le Mataio 6:25, 31-34?

¹⁴ E mafai foʻi e ulugalii faaipoipo ona aʻoaʻo mai ni lesona iā Peteru ma lana avā. Na tatau ona fai e le aposetolo o Peteru se filifiliga tāua i lona olaga, i le pe ā ma le ono masina i le tausaga talu ona la feiloaʻi ma Iesu. Na tausia e Peteru lona aiga i lana pisinisi faifaiva. Ina ua valaaulia e Iesu Peteru e mulimuli atu iā te ia i lona olaga atoa, na tatau ona mafaufau muamua Peteru i le tausiga o lona aiga. (Luka 5:1-11) Na filifili Peteru e ō faatasi ma Iesu i le galuega talaʻi. Maʻeu se filifiliga atamai na faia e Peteru! E tatou te mautinoa na lagolagoina e le avā a Peteru lana filifiliga, ona o loo taʻua i le Tusi Paia na iai taimi na malaga faatasi ai Peteru ma lana avā, ina ua mavae le toe faatūina o Iesu. (1 Kori. 9:5) E mautinoa o le faaaʻoaʻoga lelei a le avā a Peteru, na maua ai e Peteru le saʻolotoga e tusia ai fautuaga mai le Atua mo tane ma avā Kerisiano. (1 Pete. 3:1-7) Na maufaatuatuaina e Peteru ma lana avā le folafolaga a Ieova, o le a ia saunia mea e la te manaʻomia pe a faamuamua le Malo i o la olaga.​—Faitau le Mataio 6:25, 31-34.

15. O le ā e tatou te aʻoaʻoina mai i le mea na tupu iā Tiago ma Esther?

¹⁵ Pe afai e leʻi leva ona lua faaipoipo, e faapefea ona oulua atiaʻe pea le faanaunauga e faalautele atu le lua auaunaga? O se tasi o fesoasoani, o le mātauina o faaaʻoaʻoga a isi ulugalii. O se faaaʻoaʻoga, e mafai ona oulua faitauina le faasologa o mataupu, “Ua Lotomalilie e Ofo Atu i Latou Lava.” Na fesoasoani na mataupu i se ulugalii mai Pasili o Tiago ma Esther, e atiaʻe ai se faanaunauga malosi e auauna i nofoaga o loo tele ai le manaʻoga. Na faapea mai Tiago: “A o ma faitauina le auala na fesoasoani ai Ieova i ana auauna i aso nei, na ma fia tofo ai foʻi i le taʻitaʻiga ma le tausiga a Ieova.” O le iʻuga, na la siitia i Paraguay ma auauna ai i oganuu e tautatala i le gagana Potukali, talu mai le 2014. Na taʻua e Esther: “O se tasi o mau e ma te fiafia tele ai o le Efeso 3:20. E matuā tele taimi ua ma molimauina ai le moni o na upu i la ma auaunaga iā Ieova.” Na folafola atu e Paulo i lana tusi i Efeso, o le a saunia e Ieova mea e sili atu nai lo mea e tatou te talosaga atu ai. Maʻeu le moni o lenā folafolaga!

16. Pe a toe iloilo sini i le olaga o se ulugalii talavou, o ai e mafai ona saʻili i ai mo fautuaga?

¹⁶ E mafai foʻi ona aogā i ulugalii i aso nei faaaʻoaʻoga a isi ulugalii na faalagolago iā Ieova. O nisi ulugalii ua tele tausaga o auauna faataimi atoa. Aiseā e lē saʻili ai mo ni a latou fautuaga, pe a lua manatu ua manaʻomia ona toe iloilo o oulua sini? O le isi  lenā auala e faailoa atu ai e te lua maufaatuatuaina Ieova. (Faata. 22:17, 19) E mafai foʻi ona fesoasoani toeaina i ulugalii talavou e faatutū ma ausia sini faaleagaga.

17. O le ā na tupu iā Klaus ma Marisa, ma o le ā e tatou te aʻoaʻoina mai ai?

¹⁷ E iai taimi atonu e lē ausia ai o tatou sini faaleagaga e pei ona tatou mananaʻo ai. Seʻi mātau le faaaʻoaʻoga a Klaus ma Marisa lea na taʻua i le amataga. Ina ua mavae le tolu tausaga talu ona la faaipoipo, na la tuua ai lo la fale ae tauofo e auauna i faugāfale i Finilani. Peitaʻi, na la iloa ane e na o le ono masina le umi e mafai ona la nonofo ai i ina. Na la lagona le lē fiafia. Peitaʻi, e leʻi umi ae valaaulia i laʻua e auai i se aʻoga mo le gagana Arapi. Ua la auauna fiafia nei i se oganuu e tautatala i le gagana Arapi i se isi atunuu. Pe a tomānatu i mea na tutupu, ua taʻutino mai Marisa: “E faigatā ona ou faia se mea ou te leʻi faia muamua, ma maufaatuatuaina atoatoa ai Ieova. Ae ua ou vaaia le fesoasoani faifai pea a Ieova i auala e ma te leʻi faatalitalia. O lenei mea, ua matuā faamalosia ai loʻu maufaatuatuaina o Ieova.” Ua faaalia i lenei faaaʻoaʻoga, e tatou te mautinoa e tauia i tatou e Ieova i taimi uma pe a maufaatuatuaina atoatoa o ia.

18. O le ā e mafai ona fai e ulugalii faaipoipo, ina ia maufaatuatuaina ai pea Ieova?

¹⁸ O le faaipoipoga o se meaalofa mai iā Ieova. (Mata. 19:5, 6) E finagalo o ia ina ia olioli ulugalii faaipoipo i lenā meaalofa. (Faata. 5:18) Pe e mafai ona iloilo e ulugalii talavou auala o loo faaaogā ai o latou olaga? Po o outou faia mea uma ina ia faailoa atu ai iā Ieova, lo outou matuā talisapaia o ana meaalofa mo outou? Ia tatalo iā Ieova ma suʻesuʻe mataupu silisili i lana Afioga, e fetaui lelei i o outou tulaga. Ia utagia fautuaga ua tuuina mai e Ieova iā te outou. E mautinoa e maua ai se olaga fiafia ma faamalieina, pe a faamuamua le auaunaga iā Ieova i ā outou faaipoipoga!