E OO ane i le senituri lona fitu T.L.M., ua avea Asuria ma se tasi o malo na telē se vaega o le lalolagi na pule ai. Na pule Asuria “e amata mai i le itu i sisifo o Kuperu seʻia oo i le itu i sasaʻe o Iran, ma na iai le taimi na aofia ai ma Aikupito i lana pulega,” e pei ona taʻua i le upega tafaʻilagi a le Fale Mataaga a Peretania. O lona laumua o Nineva o se tasi o aai telē i le lalolagi. E iai i lenā aai le tele o maa faamanatu mataʻina, o togālaau matagofie, fale tetelē mananaia ma taugatā ma faletusi tetelē. O tusitusiga i pā puipui o Nineva anamua ua faaalia ai, na taʻua e le tupu o Asurapanipa o ia o le “tupu o le lalolagi,” e pei foʻi ona faia e isi tupu o Asuria. Na foliga mai i lenā taimi, na matuā lē mafai lava ona faatoʻilaloina Asuria ma Nineva.

Peitaʻi, ina ua matuā malosi le pulega a Asuria, na valoia ai e le perofeta o Sefanaia e faapea: “O le a ia [Ieova] . . . faaumatia foʻi Asuria. O le a ia fai Nineva ma mea e faatafunaina, o se vaipanoa e leai se vai e pei o le toafa.” E lē gata i lea, na valoia foʻi e le perofeta o Nauma: “Ia outou faoa siliva, ia faoa auro . . . Ua gaogao ma ua leai foʻi ni mea, ua faatafunaina le aai! . . . O i latou uma e vaavaai atu iā te oe o le a sosola ese mai iā te oe ma faapea ane, ʻUa faatafunaina Nineva!’” (Sefa. 2:13; Nau. 2:9, 10; 3:7) I lenā taimi, pe a faalogo tagata i nei valoaga atonu e latou te tomānatu: ʻPe e taunuu moni lava na valoaga? Pe e mafai moni lava ona faatoʻilaloina le malo malosi o Asuria?’ Atonu e lē talitonu se isi e tupu se mea faapena.

E ui i lea, na taunuu moni lava mea e leʻi mafaufau tagata e mafai ona tupu. I le iʻuga o le senituri lona fitu T.L.M., na faatoʻilaloina ai Asuria e Papelonia ma Metai. Mulimuli ane, e leʻi toe nofoia Nineva ma na lē toe manatua e tagata. E tusa ai ma se tusi a le Metropolitan Museum of Art i Niu Ioka: “I le tele o tausaga mulimuli ane ai, na iʻu ina lafoaʻia ma tanumia lenā nofoaga, ma e na o faamatalaga o loo taʻua ai Nineva i le Tusi Paia e manatua ai e tagata lenā aai.” E tusa ai ma le Archaeology Society Online Archive, i le amatamataga o le vaitausaga o le 1800, “e leai ma se tasi na iloa pe na iai moni lava Nineva le laumua tele o Asuria.” Peitaʻi i le 1845, na amata ona eliina ai e Austen Henry Layard o se tagata e suʻesuʻeina toega o mea i le eleele, le nofoaga na tū ai le aai o Nineva. O toega o mea na maua mai ai, na faailoa mai ai o Nineva o se aai e sili ona matagofie.

O le faataunuuina aʻiaʻi o valoaga e faatatau iā Nineva e faamalosia ai lo tatou mautinoa, o le a faataunuuina foʻi valoaga o le Tusi Paia e faatatau i le iʻuga o malo faapolotiki malolosi i aso nei.—Tani. 2:44; Faaa. 19:15, 19-21.