1. O le ā ua faalaeiauina i tatou e Ieova e fai?

 E FIAFIA Ieova i le alofa faamaoni. (Ho. 6:6) E ala i lana Afioga, ua ia faalaeiauina ai ana auauna ina ia faatāua lona alofa faamaoni. (Faata. 3:3) Peitaʻi, a o leʻi faia faapea e manaʻomia ona tatou iloa po o le ā le alofa faamaoni.

2. O le ā le alofa faamaoni?

² O le ā le alofa faamaoni? O le faaupuga “alofa faamaoni,” e pe ā ma le 230 taimi e maua ai i le Tusi Paia o le Faaliliuga a le Lalolagi Fou. Pe a iai le alofa faamaoni i se tasi, e matuā alofa o ia i le isi tagata ma e faaauau pea ona alofa ma faamaoni i lenā tagata. E masani ona faasino atu lenei faaupuga i le alofa e faaalia e le Atua i tagata, ae e faasino atu foʻi i le alofa e faaalia e le tasi i le isi. O Ieova o le faaaʻoaʻoga sili o le faaalia o le alofa faamaoni. O le a tatou talanoaina i lenei suʻesuʻega, pe e faapefea ona faaalia e Ieova le alofa faamaoni i tagata. I le suʻesuʻega o sosoo ai, o le a talanoaina ai pe e faapefea ona tatou faaaʻoaʻo iā Ieova, i le faaalia o le alofa faamaoni o le tasi i le isi.

3. Na faapefea ona faailoa atu e Ieova o ia lava iā Mose?

³ E leʻi leva ona ō ese Isaraelu mai Aikupito, ae faailoa atu e Ieova iā Mose Lona suafa ma ona uiga. Na fetalai o ia: “O Ieova, o Ieova, o le Atua e alofa mutimutivale ma alofa fua, e telegese lona toʻasā ae e tele lona alofa faamaoni ma fai mea moni, e tausia le alofa faamaoni e oo atu i afe o tupulaga, e  faamagalo mea sesē, o solitulafono ma agasala.” (Eso. 34:6, 7) O lenei faaupuga faalaeiau e faatatau i uiga o Ieova, na faailoa atu ai e Ieova iā Mose se mea mataʻina e uiga i Lona alofa faamaoni. O le ā lenā mea?

4-5. (a) O le ā le auala ua faamatala ai e Ieova o ia lava? (e) O ā fesili o le a tatou talanoaina?

⁴ Ua faamatalaina e Ieova o ia e lē na ona iā te ia o le alofa faamaoni, ae e ʻtele foʻi lona alofa faamaoni.’ E ono isi taimi o loo taʻua ai i le Tusi Paia lenā faamatalaga. (Nu. 14:18; Nee. 9:17; Sala. 86:15; 103:8; Ioe. 2:13; Iona 4:2) O le alofa faamaoni o loo faamatalaina i na mau uma, e na o Ieova e faasino atu i ai ae lē mafai ona faasino atu i tagata. Maʻeu le mataʻina o le auala ua faamatilatila mai ai e Ieova, lona uiga lenei o le alofa faamaoni. E lētioa la a tāua iā Ieova le alofa faamaoni. * O le māfuaaga lenā na uunaʻia ai le tupu o Tavita e faapea atu: “Ieova e, o loo i le lagi lou alofa faamaoni . . . Le Atua e, maʻeu lava le tāua o lou alofa faamaoni! Ua sulufaʻi atu le fanau a tagata i le paolo o ou apaʻau.” (Sala. 36:5, 7) E tatou te matuā talisapaia le alofa faamaoni o le Atua e pei o Tavita.

⁵ Ina ia faalolotoina lo tatou malamalamaga e faatatau i le alofa faamaoni, seʻi o tatou iloiloina ni fesili se lua: O ai e faaalia i ai e Ieova le alofa faamaoni? E faapefea ona aogā iā i tatou galuega o le alofa faamaoni o Ieova?

6. O ai e faaalia i ai e Ieova le alofa faamaoni?

⁶ O ai e faaalia i ai e Ieova le alofa faamaoni? E lē faaalia e Ieova le alofa faamaoni i so o se tagata. E na te faaalia iā i latou e iai sa latou faiā vavalalata ma ia. E alofa faamaoni lo tatou Atua i ana uō. E iai lana fuafuaga matagofie mo i latou, ma e lē mafai ona uma lona alofa mo ana uō.

7. O le ā le auala ua faaalia ai e Ieova le alofa i tagata uma?

⁷ Ua faaalia e Ieova le alofa i tagata uma. Na fetalai atu Iesu iā Nikotemo: “O le alofa tele o le Atua i le lalolagi [tagata], na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.”​—Ioa. 3:1, 16; Mata. 5:44, 45.

8-9. (a) Aiseā e faaalia ai e Ieova le alofa faamaoni i ana auauna? (e) O le ā o le a tatou talanoaina?

⁸ E pei ona taʻua muamua, e faaalia e Ieova le alofa faamaoni i ana auauna o i latou e iai se faiā vavalalata ma ia. Ua faamaonia lenei manatu i faaupuga a le tupu o Tavita ma le perofeta o Tanielu. O se faataʻitaʻiga, na  faapea mai Tavita: “Ia e alofa faamaoni pea i ē o loo iloa oe.” “O le alofa faamaoni o Ieova, e mai i le vavau e oo i le faavavau iā i latou e matataʻu iā te ia.” Na taʻua foʻi e Tanielu: “Ieova e, le Atua moni [o lē e] alofa faamaoni i ē e alolofa atu iā te ia ma ē e tausia ana poloaʻiga.” (Sala. 36:10; 103:17; Tani. 9:4) E tusa ai ma nei faamatalaga a le Tusi Paia, e faaalia e Ieova le alofa faamaoni i ana auauna ona e latou te iloa o ia, matataʻu ma alolofa iā te ia ma tausia ana poloaʻiga. E na o ona tagata tapuaʻi moni e faaalia i ai e Ieova le alofa faamaoni.

⁹ Na faaalia e Ieova iā i tatou le alofa lea e na te faaalia i tagata uma, a o tatou leʻi auauna iā te ia. (Sala. 104:14) Ae ona o i tatou o ona tagata tapuaʻi, e faaalia mai foʻi e Ieova iā i tatou lona alofa faamaoni. Ua faamautinoa mai e Ieova i ana auauna: ʻE lē aveesea loʻu alofa faamaoni mai iā te outou.’ (Isa. 54:10) Na tofo i ai Tavita, o lea na ia faapea mai ai: “E faamamaluina lava e Ieova o lē e faamaoni iā te ia.” (Sala. 4:3) E faapefea ona tatou tali atu i le alofa faamaoni o Ieova iā i tatou? Na faapea mai le faisalamo: “O ai ea lē ua atamai? E tausia e ia nei mea uma ma e uaʻi atu o ia i galuega o le alofa faamaoni o Ieova.” (Sala. 107:43) E tusa ai ma lenā fautuaga faagaeeina, seʻi o tatou iloiloina ni auala se tolu e aogā ai i auauna a Ieova ana galuega o lona alofa faamaoni.

10. E faapefea ona fesoasoani iā i tatou le iloaina e faavavau le alofa faamaoni o le Atua? (Salamo 31:7)

¹⁰ E faavavau le alofa faamaoni o le Atua. E 26 taimi o loo taʻua ai i le Salamo 136 lenei vala tāua o le alofa faamaoni. O loo taʻua i le fuaiupu muamua: “Inā faafetai atu ia iā Ieova, auā e lelei o ia: auā e faavavau lava lona alofa faamaoni.” (Sala. 136:1) I le fuaiupu e 2 i le 26, o loo taʻua ai le faaupuga “e faavavau lava lona alofa faamaoni.” A o tatou faitauina isi fuaiupu o lenei Salamo, e tatou te matuā maofa ai i le tele o auala ua faaalia ai pea e Ieova lona alofa faamaoni. O le faaupuga “e faavavau lava lona alofa faamaoni,” ua faamautinoa mai ai iā i tatou e lē mafai ona suia le alofa o le Atua i ona tagata. Maʻeu le faalaeiauina  o i tatou i le iloa, e lē vave ona faamuta e Ieova lona alofa mo ana auauna. E faaauau pea ona faaalia e Ieova le alofa faamaoni i ana auauna, ma e na te lē tuulafoaʻia i latou aemaise lava i taimi o mafatiaga. Le auala e aogā ai iā i tatou: O le iloaina e lē mafai ona tuulafoaʻia i tatou e Ieova, e tatou te maua ai le olioli ma le malosi e manaʻomia e fesagaʻia ai mafatiaga, ma faaauau ai pea ona tatou auauna iā Ieova.​—Faitau le Salamo 31:7.

11. I le Salamo 86:5, o le ā e uunaʻia ai Ieova e faamagalo?

¹¹ O le alofa faamaoni o le Atua e uunaʻia ai o ia e faamagalo. Pe a silasila mai Ieova ua faaalia e se tagata agasala le salamō ma teena ona ala sesē, o lona alofa faamaoni e uunaʻia ai o ia e faamagalo lenā tagata. Na taʻua e le faisalamo o Tavita e faatatau iā Ieova: “E leʻi faia e ia iā i tatou e tusa ma a tatou agasala; e leʻi taui mai foʻi e ia iā i tatou e tusa ma a tatou mea sesē.” (Sala. 103:8-11) Na tofo Tavita i le tigā ma le mamafatū o faalogona nofosala, ona o se lotofuatiaifo ua ōia. Ae na iloa e Tavita, e ʻnofosauni Ieova e faamagalo.’ O le ā e uunaʻia ai Ieova e faamagalo? O loo maua le tali i le Salamo 86:5. (Faitau.) Na faapea mai Tavita i lana tatalo, e faamagalo Ieova ona e tele lona alofa faamaoni mo i latou e valaau atu iā te ia.

12-13. O le ā e mafai ona fesoasoani iā i tatou, pe a lofitūina i faalogona nofosala ona o mea sesē na tatou faia i le taimi ua teʻa?

¹² Pe a tatou agasala, e talafeagai ma e lelei mo i tatou pe a faaalia le salamō. E uunaʻia ai i tatou e faasaʻo a tatou mea sesē na fai. O nisi auauna a le Atua ua lofitūina i faalogona nofosala, ona o mea sesē na latou faia i le taimi ua teʻa. Ua taʻusalaina i latou e o latou loto ma latou talitonu ai, e lē mafai ona faamagaloina i latou e Ieova e tusa lava pe e latou te faaalia le salamō. Pe afai o loo e feagai ma na faalogona, e fesoasoani iā te oe le iloaina e nofosauni Ieova e faaali atu iā te oe le alofa faamaoni, ona o oe o se tasi o ana auauna.

¹³ Le auala e aogā ai iā i tatou: E ui i lo tatou lē lelei atoatoa, ae e mafai ona tatou olioli i le auaunaga iā Ieova ma se lotofuatiaifo mamā. Ua mafai ona tatou faia faapea, ona ua ʻfaamamāina i tatou mai i agasala uma i le toto o lona Alo o Iesu.’ (1 Ioa. 1:7) Pe a tatou  lotovaivai ona o a tatou vaivaiga, ia manatua e nofosauni ma e naunau Ieova e faamagalo tagata agasala ua salamō. Mātau le auala na faafesootaʻi ai e Tavita le alofa faamaoni ma le lotofaamagalo. Na faapea mai o ia: “E pei ona maualuga atu o le lagi i le lalolagi, e faapea foʻi ona sili atu lona alofa faamaoni iā i latou e matataʻu iā te ia. E pei ona vavamamao o le mea e oso aʻe ai le lā mai i le mea e goto ifo ai, e faapea foʻi ona faamamao e ia o a tatou solitulafono mai iā i tatou.” (Sala. 103:11, 12) Ioe, e nofosauni Ieova ʻe matuā faamagalo’ iā te oe.​—Isa. 55:7.

14. Na faapefea ona faamatala e Tavita le auala e puipuia ai i tatou, e le alofa faamaoni o le Atua?

¹⁴ O le alofa faamaoni o le Atua e na te saunia ai le puipuiga faaleagaga. Na tatalo Tavita iā Ieova: “Ua fai oe ma mea ou te lafi ai; e te leoleo iā te aʻu mai i mafatiaga. E te siʻosiʻomia aʻu i le alaga fiafia ona ua e saunia se mea ou te sao ai. . . . A o lē e faatuatua iā Ieova, e siʻosiʻomia o ia e le alofa faamaoni.” (Sala. 32:7, 10) E pei ona puipuia tagata o se aai anamua e pa maualuluga na siʻomia ai, e faapena foʻi ona puipuia faaleagaga i tatou e galuega o le alofa faamaoni o Ieova o loo siʻomia ai i tatou, mai i lamatiaga e ono luʻia ai lo tatou faamaoni. O le alofa faamaoni foʻi o Ieova, e uunaʻia ai o ia e tosina atu i tatou iā te ia.​—Iere. 31:3.

15. O le ā le fesootaʻiga o le alofa faamaoni o Ieova i le sulufaʻiga ma le ʻolo malosi?

¹⁵ Na faaaogā e Tavita nisi faaupuga e faamatala ai le puipuiga a le Atua i ona tagata. Na ia taʻua: “O le Atua o loʻu ʻolo lea e saogalemu ai, o le Atua e alofa faamaoni mai iā te aʻu.” Na toe taʻua foʻi e Tavita: “O lē e alofa faamaoni iā te aʻu, ma o loʻu lafitaga, o loʻu ʻolo e saogalemu ai ma o Lē e saunia se mea ou te sao ai, o loʻu talita ma o Lē ou te sulufaʻi atu i ai.” (Sala. 59:17; 144:2) Aiseā na faafesootaʻi atu ai e Tavita le alofa faamaoni o Ieova, i se sulufaʻiga ma se ʻolo malosi? Po o fea lava o le lalolagi e tatou te nonofo ai, ae pe a tatou auauna pea iā Ieova o le a ia saunia puipuiga uma e tatou te manaʻomia, ina ia puipuimalu ai la tatou faiā tautele ma ia. E tatou te maua foʻi lenā faamautinoaga i le Salamo 91. Na faapea mai le tusitala o lenā Salamo: “Ou te fai atu iā Ieova: ʻO oe o loʻu sulufaʻiga ma o loʻu ʻolo malosi.’” (Sala. 91:1-3, 9, 14) Na faaaogā foʻi e Mose se faaupuga talitutusa e faatatau i le sulufaʻiga. (Sala. 90:1) E lē gata i lea a o lata ina maliu Mose, na ia faaaogā ai se faaupuga e pāʻia ai o tatou loto. Na ia faapea mai: “O lou lafitaga o le Atua mai i anamuā, ma o loo i ou lalo ifo aao o le faavavau.” (Teu. 33:27) O le ā ua taʻu mai e le faaupuga “o loo i ou lalo ifo aao o le faavavau” e faatatau iā Ieova?

16. O ā auala e lua ua faamanuia ai e Ieova i tatou? (Salamo 136:23)

¹⁶ E tatou te lagona le malupuipuia, pe a avea Ieova ma o tatou Sulufaʻiga. Peitaʻi, atonu e iai aso e tatou te lagona ai le lotovaivai ma e matuā faigatā ai iā i tatou ona aveese na faalogona. I taimi faapena, o le ā e faia e Ieova mo i tatou? (Faitau le Salamo 136:23.) E na te siiina ma tauave ma le faaeteete i tatou i ona aao, ma fesoasoani iā i tatou ina ia aveese na faalogona. (Sala. 28:9; 94:18) Le auala e aogā ai iā i tatou: O le iloaina e mafai ona tatou faalagolago i le fesoasoani a Ieova i so o se taimi, e fesoasoani iā i tatou e manatua ai ua faamanuia i tatou e Ieova i ni auala se lua. Muamua, ua iā i tatou se sulufaʻiga malupuipuia, e tusa lava po o fea o le lalolagi e tatou te nonofo ai. Lua, e matuā manatu mamafa lo tatou Tamā alofa i le lagi iā i tatou.

17. O le ā e tatou te mautinoa i ai? (Salamo 33:18-22)

¹⁷ E pei ona tatou talanoaina pe a tatou feagai ma luʻi, e tatou te mautinoa o le a gaoioi Ieova e fesoasoani iā i tatou ina ia tatou tumau ma le faamaoni iā te ia. (2 Kori. 4:7-9) Na taʻua e le perofeta o Ieremia: “O galuega o le alofa faamaoni o Ieova ua lē faaumatiaina ai i tatou, auā e lē taitai uma lona alofa mutimutivale.” (Aue. 3:22) E tatou te mautinoa e tumau pea ona iā i tatou le alofa faamaoni o Ieova, auā ua faamautinoa mai e le faisalamo, “o fofoga o Ieova e faasaga iā i latou e matataʻu iā te ia, iā i latou foʻi o loo faatalitali i lona alofa faamaoni.”​—Faitau le Salamo 33:18-22.

18-19. (a) O le ā e tatau ona tatou manatua? (e) O le ā o le a tatou talanoaina i le mataupu o sosoo mai?

¹⁸ O le ā e tatau ona tatou manatua? A o tatou leʻi auauna iā Ieova, na ia alofa mai iā i tatou e pei ona ia alofa i tagata uma. Ae ona o i tatou o ona tagata tapuaʻi, ua aogā ai foʻi iā i tatou lona alofa faamaoni. Ua uunaʻia Ieova e lenā alofa e opo atu i tatou, ma maua ai le puipuigamalu. E latalata mai pea o ia, ma o le a ia faataunuuina lana fuafuaga mo i tatou. E finagalo o ia ina ia avea i tatou ma ana uō e faavavau! (Sala. 46:1, 2, 7) O lea la, e tusa lava po o ā luʻi e tatou te fesagaʻia, e foaʻi mai e Ieova le malosi e tatou te manaʻomia, ina ia tumau faamaoni ai iā te ia.

¹⁹ Ua tatou aʻoaʻoina auala na faaalia ai e Ieova le alofa faamaoni i ana auauna. E na te faatalitalia foʻi i tatou e faaalia le alofa faamaoni o le tasi i le isi. O le ā le auala e faia ai faapea? O le a talanoaina i le mataupu o loo sosoo mai, le tali o lenā fesili tāua.