Na foaʻi atu e Ieova le malosi i na tagata talaʻi maelega. I lenā tausaga na faateleina le aofaʻi o paeonia mai i le 225 i le 350. O le taimi muamua foʻi lenā na auina atu ai i le ofisa ulu lipoti a tagata talaʻi e silia ma le 8,000. Na matuā faamanuia e Ieova ona tagata.

I le aso 21 o Mati i le 1920, na faia ai e Joseph F. Rutherford sa taʻimua i Tagata Aʻoga o le Tusi Paia i lenā taimi le lauga na faamatuaina “Millions Now Living Will Never Die.” Na valaaulia e Tagata Aʻoga o le Tusi Paia so o se tagata fiafia na latou tau i ai e auai i lenā faatasiga. E pe ā ma le 320,000 valaaulia na latou tufatufaina. Na latou totogiina foʻi se tasi o fale telē na faia ai faafiafiaga i le aai o Niu Ioka mo le lauga.

Na mataʻina le auala na tali mai ai tagata i le valaaulia. Na faatumulia uma nofoa e 5,000 o le fale i le aofia, ma e leʻi mafai ona auai le isi 7,000. Na taʻua e le Watch Tower “o se tasi lea o sauniga ua sili atu ona taulau manuia ua faia e Tagata Aʻoga o le Tusi Paia.”

Na matuā lauiloa Tagata Aʻoga o le Tusi Paia i le faalauiloaina o lenei lauga “millions now living will never die.” I lenā taimi e latou te leʻi malamalama o le feʻau o le Malo e tatau ona faalauiloa atu i le lalolagi atoa, ma e umi se taimi e alu ai. E ui i lea, ae na mataʻina lo latou maelega. Na taʻua e Ida Olmstead o se tasi na amata ona auai i sauniga i le 1902, “Na matou iloa o le a tele faamanuiaga e maua e tagata uma, ma e matou te leʻi faavaivai e taʻu atu le tala lelei iā i latou na matou tau i ai.”

Ina ia faamautinoa e maua pea e le ʻauuso meaʻai faaleagaga, na amata ai ona lomia e uso i le Peteli nisi o lomiga. Na latou faatau ma faapipiiina masini lomitusi. O na masini na tuu i le fale na latou totogiina e fai ma ofisa. Na tū le fale i le 35 Myrtle Avenue, Brooklyn i Niu Ioka, e lē mamao ese mai i le Peteli.

Na amata auauna Leo Pelle ma Walter Kessler i Peteli iā Ianuari i le 1920. Na faapea mai Walter, “Ina ua ma taunuu, na fai mai le ovasia e vaaia le fale lomitusi, ʻE toe tasi ma le afa itula le taimi e fai ai le lua galuega, a o leʻi mālōlō mo le lunch.’ Na ia faatonuina i maʻua e laʻu mai pusa tusi na teu i le potu pito i lalo o le fale.”

Na manatua e Leo le mea na tupu i le aso na sosoo ai: “Na ma fufuluina puipui o le fogāfale muamua o le fale. O se galuega sili ona palapalā ua ou faia. Ae ona o le galuega a le Alii, o le māfuaaga lenā na ma fiafia ai e fai.”

 I ni nai vaiaso, ae ua mafai ona lomia le Watch Tower e ni tagata talaʻi maelega na tauofo. E 60,000 kopi o le Watch Tower o Fepuari 1, 1920 na lomia i se masini lomitusi mafolafola telē na i le fogāfale lona lua. O le taimi lenā, na faatulaga ai e uso se masini lomitusi na latou faaigoaina o le Battleship i le potu pito i lalo o le fale. Iā Aperila 14, 1920, na amata lolomiina ai foʻi le lomiga The Golden Age. E mautinoa na faamanuia e Ieova taumafaiga a i latou na lotomalilie e galulue.

Na olioli tagata faamaoni o Ieova i le toe faia ma le maelega o le galuega talaʻi ma autasi ai. Peitaʻi, na tuua e nisi Tagata Aʻoga o le Tusi Paia le faalapotopotoga i taimi faigatā mai i le 1917 i le 1919. O le ā na mafai ona fai e fesoasoani ai iā i latou?

Na tusia i Le Olomatamata faa-Peretania o Aperila 1, 1920 se mataupu na faamatuaina “Seʻi o Tatou Autasi i le Filemu.” Na talosagaina ai ma le māfana i latou: “E matou te mautinoa . . . o i latou uma e mananaʻo e usitaʻi i le Alii . . . e lotomalilie e faagalo mea ua tuanaʻi . . . ae nonofo faatasi i le autasi ma faaauau ona avea o se tino e tasi.”

E toʻatele na tali lelei mai i na upu timaʻi. Na tusi se ulugalii faaipoipo: “Ua ma iloa lo ma sesē i lo ma lē talaʻi i nei tausaga e tele ua mavae, ae o loo fai e isi le galuega talaʻi. . . . E ma te maumauaʻi ia aua lava neʻi o ma toe tafetafea ese.” E tele galuega e fai e tagata na toe talaʻi.

Iā Iuni 21, 1920, na matuā tinoū ai Tagata Aʻoga o le Tusi Paia e tufatufa atu le “ZG” o le tusi The Finished Mystery * e vaivai lona faavaa. E tele kopi o le tusi na teuina ina ua faasā le lomiga i le 1918.

Na valaaulia tagata talaʻi uma ae e lē na o paeonia e fai so latou sao i le tufatufaina o lenei tusi. “O tagata papatiso uma o so o se faapotopotoga  e mafai ona auai, ma e tatau ona latou fiafia e fai lenei galuega. O lea, ia avea lenei faaupuga ma uunaʻiga i tagata taʻitoʻatasi: ʻO le mea e tasi ou te faia,’ ia tufatufa atu le ZG.” Na taʻua e Edmund Hooper o le toʻatele na auai i lenei tauiviga, o le taimi muamua lenei na latou auai ai i le galuega talaʻi mai i le fale i le fale. Na toe faapea mai le uso: “O lea na matou iloa lelei ai le telē o le galuega na fai, nai lo o le mea na matou mafaufau i ai.”

Talu ai na faigatā fesootaʻiga a Tagata Aʻoga o le Tusi Paia i le Taua Muamua a le Lalolagi, na manaʻo ai le uso o Rutherford e faalaeiau uso i isi atunuu, ma toe faatulaga le galuega talaʻi. O lea, iā Aokuso 12, 1920, na asiasi atu ai le uso o Rutherford ma isi uso e toʻafā i Peretania, Europa ma Sasaʻe Tutotonu.

Ina ua asiasi atu Rutherford i Peretania, na faia ai e Tagata Aʻoga o le Tusi Paia ni tauaofiaga se tolu, ma ni sauniga mo le lautele se 12. E pe ā ma le 50,000 tagata uma na auai i nei faatasiga. Na faamatalaina i le Watch Tower lenei faatasiga: “Na faafouina ma faalaeiauina ai le ʻauuso. Na māfana ai ma autasi uso i le faaalia o le alofa ma le faia o la latou auaunaga, ma e toʻatele i latou na toe maua le fiafia.” Na toe faia foʻi e le uso o Rutherford i Pale i Falani le lauga, “Millions Now Living Will Never Die.” Na matuā faatumulia le fale ina ua amata le lauga. E 300 tagata na toe talosaga mo nisi faamatalaga.

I ni nai vaiaso mulimuli ane na asiasi atu ai nisi uso i Atenai, Cairo ma Ierusalema. Ina ia mafai ona maua e tagata na faaalia le fiafia i na nofoaga lomiga, na faatulaga ai e le uso o Rutherford se nofoaga e taunuu i ai lomiga i le aai o Ramallah, e latalata i Ierusalema. Ona toe foʻi lea o le uso o Rutherford i Europa, ma faatulaga ai le ofisa i Europa Tutotonu ma na lolomi ai i inā lomiga.

Iā Setema 1920, na tatalaina ai e Tagata Aʻoga o le Tusi Paia se lomiga faapitoa e taʻua The Golden Age No. 27. Na faaalialia ai i lenā lomiga sauāga na faia i Tagata Aʻoga o le Tusi Paia i le 1918. E leʻi mālōlō le masini lomitusi na taʻua o le Battleship, i le lolomiina o le silia ma le 4,000,000 o kopi o lenā mekasini.

Na iloa ai e i latou na faitauina lenā mekasini se mea na tupu iā Emma Martin. Na paeonia le tuafafine o Emma i San Bernardino, i Kalifornia. Iā Mati 17, 1918 na auai ai Emma ma nisi uso e toʻatolu  o E. Hamm, E. J. Sonnenburg, ma E. A. Stevens i se faatasiga a Tagata Aʻoga o le Tusi Paia.

Na iai i lenā faatasiga se tamāloa, ae e ese le māfuaaga na auai ai. Na taʻutino le tamāloa: “Na ou alu i lenā faatasiga . . . ona o le faatonuga a le lōia a le malō. Na ou alu i inā e suʻe ai ni faamaoniga e molia ai Tagata Aʻoga o le Tusi Paia.” Na maua e le tamāloa le “faamaoniga” na ia saʻilia, o se kopi o le The Finished Mystery. Ina ua mavae ni nai aso, na puʻea ai Emma ma na uso e toʻatolu. Na molia i latou i le solia o le tulafono, ina ua latou tufa atu kopi o le tusi na faasā.

Na faamaonia le solitulafono a Emma ma uso e toʻatolu, ma faasala ai e falepuipui mo le tolu tausaga. Iā Me 17, 1920 na lē toe taliaina ai sa latou apili, ma na auina atu ai loa i latou i le falepuipui. Ae e leʻi umi lava ae iai loa se suiga lelei.

Iā Iuni 20, 1920, na faamatala ai e le uso o Rutherford le mea na tupu iā Emma Martin ma uso e toʻatolu, i se tauaofiaga na faia i San Francisco. Na faateʻia le aofia i faiga lē tonu na feagai ma nei Kerisiano, ma na latou auina atu ai se tusi i le peresitene o le malo o Amerika. Na latou tusi atu, “E matou te manatu e lē tonu le faasalaga . . . o Mrs Martin . . . O le faaaogāina e leoleo o le malo o le pule ua iā i latou e . . . maileia . . . ai Mrs. Martin, . . . ma latou faia se gaoioiga e foliga ai ua ia solia le tulafono ma faasala ai i le falepuipui, e matou te taʻusalaina . . . o se gaoioiga e lē tonu.”

I le aso lava na sosoo ai, na vave lava ona faalēaogāina e le peresitene o Amerika o Woodrow Wilson moliaga o le tuafafine o Martin, ma uso o Hamm, Sonnenburg, ma Stevens. Ua saʻoloto i latou mai i faiga lē tonu.

I le taufaaiʻuiʻuga o le 1920, na tele isi mea na tutupu na olioli ai Tagata Aʻoga o le Tusi Paia. Na faateleina pea galuega i le ofisa ulu, ma na atili ai ona faalauiloa atu e Kerisiano moni le Malo o le Atua o le vaifofō o faafitauli o tagata. (Mata. 24:14) I le tausaga na sosoo ai i le 1921, na matuā sili atu le auala na faalauiloa ai upu moni o le Malo.