1. E faapefea ona fesoasoani le 2 Korinito 3:1-3, e tatou te talisapaia ai le faaeaga o le faia o se suʻesuʻega faale-Tusi Paia ina ia agavaa mo le papatisoga? (Tagaʻi i le ata i le faavaa.)

O Ā NI ou lagona pe a papatiso se tagata aʻoga o lau faapotopotoga? Maʻeu lou fiafia tele! (Mata. 28:19) Ae afai o oe na suʻesuʻe ma le soo fou, e te matuā fiafia lava i le vaai atu ua papatiso lenā tagata! (1 Tesa. 2:19, 20) O soo papatiso fou o “ni tusi e taʻuleleia ai,” mo i latou na latou suʻesuʻe faapea le faapotopotoga atoa.​—Faitau le 2 Korinito 3:1-3.

2. (a) O le ā le fesili tāua e manaʻomia ona tatou iloiloina ma aiseā? (e) O le ā le mea e taʻu o le suʻesuʻega faale-Tusi Paia? (Tagaʻi i le faaopoopoga.)

² I le fā tausaga talu ai, o se mea mataʻina le lipotia mai o le pe ā ma le 10,000,000 suʻesuʻega faale-Tusi Paia * na faia i masina taʻitasi i le lalolagi aoao. I na tausaga, i se fua faatatau e sili atu ma le 280,000 i latou na papatiso i tausaga taʻitasi o ni Molimau a Ieova ma o ni soo fou o Iesu Keriso. E faapefea ona tatou fesoasoani i le faitau miliona o a tatou tagata aʻoga o le Tusi Paia ina ia papatiso? E tatou te mananaʻo e faia mea uma e fesoasoani ai iā i latou ina ia agavaa mo le papatisoga i le vave e mafai ai, a o onosaʻi pea Ieova e tuu mai le avanoa ma le taimi i tagata e avea ai ma soo o Keriso. Ua puupuu le taimi o totoe!​—1 Kori. 7:29a; 1 Pete. 4:7.

3. O le ā o le a tatou talanoaina i lenei suʻesuʻega e faatatau i le faia o suʻesuʻega faale-Tusi Paia?

 ³ Ona o le faanatinati o le faia o isi ma soo, na talosagaina ai e le Vaega Pule ofisa o lālā i ni auala e mafai ai ona tatou fesoasoani i a tatou tagata aʻoga o le Tusi Paia, ina ia agavaa mo le papatisoga. I lenei suʻesuʻega ma le suʻesuʻega o loo sosoo mai, o le a tatou aʻoaʻoina ai ni lesona mai i paeonia, misionare ma ovasia o matagaluega ua iai le poto masani. * (Faata. 11:14; 15:22) Ua latou faamatala mai mea e mafai ona fai e faiaʻoga o le Tusi Paia ma a latou tagata aʻoga, ina ia agaʻigaʻi ai i luma le tagata aʻoga. I lenei suʻesuʻega, o le a tatou talanoaina ai mea e lima e manaʻomia ona fai e so o se tagata aʻoga ina ia agavaa ai mo le papatisoga.

4. O le ā e tatau ona tatou iloa e faatatau i le faia o suʻesuʻega faale-Tusi Paia i faitotoʻa o fale o aiga?

⁴ E toʻatele o tatou uso ma tuafāfine o loo faia suʻesuʻega faale-Tusi Paia i faitotoʻa o fale o aiga. E ui o se amataga lelei lea e faatupu ai le fiafia o le tagata i le Tusi Paia, ae e masani lava ona pupuu nei talanoaga ma atonu e lē o faia i vaiaso taʻitasi. Ua talosaga atu nisi tagata talaʻi mo le numera o le telefoni a le tagata e ona le fale, ina ia atiaʻe ai pea lona naunau. E latou te vili pe text atu i ai ni manatu pupuu faale-Tusi Paia. Atonu e faia nei talanoaga mo ni masina e aunoa ma le faia o ni suʻesuʻega faale-Tusi Paia e agaʻigaʻi i luma. Pe afai e na o le pau lenā o le taimi ma taumafaiga e faaalu e lenei tagata aʻoga e suʻesuʻe ai le Tusi Paia, po o le a agavaa ai o ia e tuuina atu ma papatisoina? E mautinoa e leai.

5. E tusa ai o le Luka 14:27-33, o le ā na faamatilatila e Iesu e fesoasoani iā i tatou i la tatou galuega o le faia o isi ma soo?

⁵ Na faamatala e Iesu le tau e mafai ai e se tasi ona avea ma ona soo. Na ia fetalai e faatatau i se tasi na manaʻo e fau se olo, ma se tupu na manaʻo e alu e tau. Na fetalai Iesu, e tatau i lē o le a fausia le olo ona ʻmuamua nofo i lalo ma faitau tupe o le a faaalu’ ai ina ia faauma ai le olo. E tatau foʻi i se tupu ona ʻmuamua nofo i lalo ma talanoa ma isi’ pe e mafai e lana ʻautau ona manumalo i le taua. (Faitau le Luka 14:27-33.) Na silafia foʻi e Iesu o se tasi e manaʻo e avea ma ona soo, e tatau ona iloilo lelei mea e manaʻomia ona ia faia ina ia mulimuli ai iā Iesu. O le māfuaaga lenā, e manaʻomia ai ona tatou faalaeiau i latou e ono mafai ona avea ma soo e fai a latou suʻesuʻega i vaiaso uma. E faapefea ona tatou faia lenā mea?

6. O le ā e tatou te ono faia ina ia agaʻigaʻi ai i luma a tatou tagata aʻoga?

 ⁶ Ia amata i le taumafai e faaumiumi le taimi e faia ai suʻesuʻega i faitotoʻa o fale o aiga. Atonu e mafai ona e talanoaina se isi manatu faaopoopo mai i le Tusi Paia i taimi uma e te asiasi i ai. Pe a masani lē e ona le fale i asiasiga faaumiumi, fesili i ai pe e iai se isi nofoaga e te lua nonofo lelei ai ma faaauau ai le lua talanoaga. O lana tali o le a iloa ai po o naunau moni lava e suʻesuʻe le Tusi Paia. Ina ia vave ona agaʻigaʻi i luma le tagata aʻoga, e iai le taimi e te ono fesili i ai pe e manaʻo e fai faalua lana suʻesuʻega i le vaiaso. Peitaʻi, e iai isi mea e tatau ona fai nai lo o le tau ina fai o lana suʻesuʻega i vaiaso uma.

7. E faapefea ona sauniuni lelei le faiaʻoga mo suʻesuʻega taʻitasi?

⁷ Talu ai o oe o le faiaʻoga, e manaʻomia la ona e sauniuni lelei mo suʻesuʻega taʻitasi. E mafai ona e amata i le faitauina o le mataupu ma mau. Ia suʻesuʻe ina ia e malamalama lelei i manatu autū o le mataupu. Ia mafaufau i le ulutala o le lesona, o tamaʻi ulutala, o fesili o le suʻesuʻega, o mau “faitau,” o ata ma ni vitiō e ono fesoasoani e faamatala ai le mataupu. Ia mafaufau i lau tagata aʻoga ma se auala faigofie ma manino e fai ai le suʻesuʻega, ina ia faigofie ai ona ia malamalama ma faatatau.​—Nee. 8:8; Faata. 15:28a.

8. O le ā e tatou te aʻoaʻoina mai i upu a Paulo o loo i le Kolose 1:9, 10, e faatatau i le tatalo mo lau tagata aʻoga o le Tusi Paia?

⁸ E aofia i au sauniuniga lou tatalo iā Ieova mo lau tagata aʻoga ma ona manaʻoga. Ia talosaga iā Ieova e fesoasoani iā te oe ina ia aʻoaʻo lau tagata aʻoga mai i le Tusi Paia i se auala e pāʻia ai lona loto. (Faitau le Kolose 1:9, 10.) Ia taumafai e muaʻi sauniuni i se mea e ono faigatā ona malamalama pe e talia e lau tagata aʻoga. Ia manatua o lou sini, o le fesoasoani i lau tagata aʻoga ia agavaa mo le papatisoga.

9. E faapefea ona fesoasoani le faiaʻoga i le tagata aʻoga e sauniuni mo le suʻesuʻega? Ia faamatala.

⁹ E tatou te faamoemoe o le faia e lē aunoa o le suʻesuʻega faale-Tusi Paia, o le a talisapaia ai e le tagata aʻoga mea uma ua faia e Ieova ma Iesu ma o le a fia iloa atili ai. (Mata. 5:3, 6) Ina ia maua atoatoa aogā mai i le suʻesuʻega, e tatau i le tagata aʻoga ona uaʻi atu i mea o loo ia aʻoaʻoina. Ina ia fesoasoani iā te ia e faia faapea, ia faamatala atu iā te ia le tāua o lona sauniuni lelei mo suʻesuʻega taʻitasi, e ala  i le faitau muamua o le mataupu ma manatunatu i le auala e na te faatatauina ai. E faapefea ona fesoasoani le faiaʻoga i le tagata aʻoga e sauniuni mo le suʻesuʻega? Ia sauniuni faatasi ni palakalafa o le a oulua suʻesuʻeina ma lau tagata aʻoga, e na te iloa ai le auala e sauniuni ai. * Ia faamatala i ai le auala e maua ai tali saʻo i fesili o le suʻesuʻega, ma vase na o upu po o faaupuga autū o le a fesoasoani iā te ia e manatua ai le tali. Ia faalaeiau foʻi lau tagata aʻoga e tali i ana lava upu. O lona faia faapea, o le a e iloa ai po o malamalama lelei lau tagata aʻoga i le mataupu. E iai foʻi se isi mea e mafai ona e faalaeiauina lau tagata aʻoga e fai.

10. Aiseā e tāua ai i le tagata aʻoga le faitau e lē aunoa o le Tusi Paia, ma e faapefea ona aogā atoatoa iā te ia lana faitauga Tusi Paia?

¹⁰ E lē gata e suʻesuʻe le tagata aʻoga ma lona faiaʻoga i vaiaso uma, ae e aogā foʻi i le tagata aʻoga lona faia o nisi mea e ia lava i aso uma. E manaʻomia ona talanoa ma Ieova. E faapefea? E ala i le faalogo atu ma talanoa iā Ieova. E mafai ona ia faalogo atu i le Atua e ala i le faitau o le Tusi Paia i aso uma. (Iosua 1:8; Sala. 1:1-3) Ia faaali iā te ia le auala e faaaogā ai se kopi o le “Faasologa mo le Faitauga Tusi Paia” o loo i le jw.org. * Ina ia aogā atoatoa iā te ia lana faitauga Tusi Paia, ia faalaeiau o ia e mafaufau loloto i mea ua aʻoaʻoina mai i le Tusi Paia e uiga iā Ieova ma le auala e faatatau ai mea ua ia aʻoaʻoina i lona olaga.​—Galu. 17:11; Iako. 1:25.

11. E faapefea ona aʻoaʻoina e lau tagata aʻoga le auala e tatau ona tatalo ai, ma aiseā e tāua ai ona ia tatalo e lē aunoa iā Ieova?

¹¹ Ia faalaeiau lau tagata aʻoga e talanoa iā Ieova e ala i le tatalo i aso taʻitasi. Ia tatalo mai i le loto pe a amata ma faaiʻuina suʻesuʻega taʻitasi, ma ia tatalo faatasi ma lau tagata aʻoga ma taʻua o ia i le tatalo. A o faalogo o ia i au tatalo, o le a ia aʻoaʻoina ai le auala e tatalo ai iā Ieova mai i lona loto ma e faaauala atu ana tatalo i le suafa o Iesu Keriso. (Mata. 6:9; Ioa. 15:16) Maʻeu se faaeaga o le (faalogo atu iā Ieova) e ala i le faitau o le Tusi Paia i aso taʻitasi ma (talanoa iā Ieova) e ala i le tatalo! O le a fesoasoani lenā i lau tagata aʻoga e vavalalata atu ai i le Atua. (Iako. 4:8) O le atiaʻe o nei masaniga, o le a maua ai e lau tagata aʻoga se isi mea e fesoasoani iā te ia e agavaa ai mo le tuuina atu ma le papatisoga.

12. E faapefea ona fesoasoani le faiaʻoga i le tagata aʻoga e atiaʻe se faiā ma Ieova?

¹² O mea e aʻoaʻoina mai e le tagata aʻoga i lana suʻesuʻega, e lē gata e tatau ona ia fiafia i ai ae ia pāʻia ai foʻi lona loto. Aiseā? Talu ai o tatou loto e aofia ai o tatou faanaunauga, faalogona ma lagona lea e uunaʻia ai i tatou e faatatauina mea ua aʻoaʻoina. E manino ma faigofie aʻoaʻoga a Iesu, ma na fiafia i ai tagata. Ae na mulimuli tagata iā Iesu ona na pāʻia foʻi o latou loto i ana aʻoaʻoga. (Luka 24:15, 27, 32) E tatau ona moni Ieova i lau tagata aʻoga, o se tasi e mafai ona atiaʻe se la faiā, ma o ia o lona Tamā, o lona Atua ma o lana Uō. (Sala. 25:4, 5) O lea la, i le taimi o le suʻesuʻega, ia faamatilatila i le tagata aʻoga uiga matagofie o lo tatou Atua. (Eso. 34:5, 6; 1 Pete. 5:6, 7) Po o le ā lava le mataupu o loo oulua suʻesuʻeina, ia faauaʻi le tagata aʻoga i le ituaiga Atua e iai Ieova. Ia fesoasoani i le tagata aʻoga e talisapaia uiga matagofie o Ieova e pei o le alofa, agalelei ma le tigā alofa. Na fetalai Iesu, ʻo le poloaʻiga silisili ma muamua’ ia “alofa atu iā Ieova lou Atua.” (Mata. 22:37, 38) O lea la, ia taumafai e totō i le loto o lau tagata aʻoga le alofa tele mo le Atua.

13. Ia aumai se faataʻitaʻiga o se auala e fesoasoani ai i le tagata aʻoga e aʻoaʻoina uiga matagofie o Ieova.

¹³ I a oulua talanoaga ma lau tagata aʻoga, ia faamatala atu i ai ou faalogona loloto mo Ieova. E ono fesoasoani lenā i lau tagata aʻoga e iloa ai, e manaʻomia ona ia atiaʻe sana ia lava faiā māfana ma le Atua. (Sala. 73:28) O se faataʻitaʻiga, pe e iai se faaupuga i le lomiga o loo lua suʻesuʻeina po o se mau o loo faaalia ai se mea e faatatau iā Ieova e pei o lona alofa, atamai, faamasinotonu po o lona malosi na pāʻia ai lou loto? Ia faailoa atu i lau tagata aʻoga, ma ia taʻu atu iā te ia o se tasi lenā o māfuaaga e te alofa ai i lou Tamā i le lagi. E iai se isi mea e manaʻomia ona faia e tagata aʻoga uma ina ia agavaa ai mo le papatisoga.

14. O le ā ua taʻua i le Eperu 10:24, 25 e faatatau i sauniga a le faapotopotoga lea e mafai ona fesoasoani i se tagata aʻoga ina ia agaʻigaʻi ai i luma?

¹⁴ E tatou te mananaʻo uma ia agavaa a tatou tagata aʻoga mo le papatisoga. O se tasi o auala tāua e fesoasoani ai iā i latou, o le faalaeiau lea e auai i sauniga a le faapotopotoga. Ua faapea mai faiaʻoga e iai le poto masani, o tagata aʻoga e vave ona auai i sauniga e vave foʻi ona agaʻigaʻi i luma. (Sala. 111:1) Ua faamatala atu e nisi faiaʻoga i a latou tagata  aʻoga, e tele isi mea e faatatau i le Tusi Paia e na te lē o aʻoaʻoina i le suʻesuʻega, ae e na te aʻoaʻoina pe a auai i sauniga. Ia faitau le Eperu 10:24, 25 faatasi ma lau tagata aʻoga ma faamatala atu iā te ia aogā e na te maua pe a auai i sauniga. Ia faaali i ai le vitiō O ā Mea o Loo Faia i se Maota mo Sauniga? * Ia fesoasoani i lau tagata aʻoga ia avea le auai i sauniga i vaiaso taʻitasi ma vala tāua o lona olaga.

15. O le ā e tatou te faia e faalaeiau ai se tagata aʻoga e auai e lē aunoa i sauniga?

¹⁵ O le ā e te faia pe afai e leʻi auai lava lau tagata aʻoga i se sauniga pe e seāseā foʻi auai? Ia faamatala atu i ai lou fiafia i se mea na e aʻoaʻoina mai i le sauniga talu ai. O lenā auala o le a sili ai ona uunaʻia le tagata e auai i sauniga, nai lo o le tau ina valaaulia o ia. Ia ave i ai sana Olomatamata po o se kopi o La Tatou Faiva ma le Olaga Faa-Kerisiano o loo suʻesuʻeina i le sauniga. Ia faailoa i ai mea o le a talanoaina i le sauniga o le a sosoo mai, ma fesili i ai po o le ā se vaega e sili ona fiafia i ai. O mea o le a molimauina e lau tagata aʻoga i lana sauniga muamua, o le a sili atu i mea na ia molimauina i so o se faatasiga faalelotu na auai ai. (1 Kori. 14:24, 25) I sauniga, o le a ia feiloaʻi ai foʻi i isi o ni faaaʻoaʻoga lelei e mafai ona ia faataʻitaʻi i ai, ma o le a latou fesoasoani iā te ia e agavaa ai mo le papatisoga.

16. O le ā e manaʻomia ona fai mo suʻesuʻega faale-Tusi Paia ina ia agavaa ai mo le papatisoga, ma o le ā o le a talanoaina i le suʻesuʻega o loo sosoo mai?

¹⁶ O le ā le auala e tatou te faia ai suʻesuʻega faale-Tusi Paia ina ia agavaa ai mo le papatisoga? E mafai ona tatou fesoasoani i tagata aʻoga taʻitoʻatasi ina ia latou faatāuaina le suʻesuʻega, e ala i le faalaeiauina o i latou e suʻesuʻe i vaiaso taʻitasi ma sauniuni mo suʻesuʻega uma. E tatou te mananaʻo foʻi e faalaeiau tagata aʻoga ina ia talanoa ma Ieova i aso uma, atiaʻe sa latou faiā ma Ieova ma ia auai i sauniga. (Tagaʻi i le pusa “ O Mea e Manaʻomia Ona Fai e Tagata Aʻoga Ina ia Agavaa ai mo le Papatisoga”) I le suʻesuʻega o loo sosoo mai, o le a talanoaina ai nisi mea e lima e mafai ona fai e faiaʻoga o le Tusi Paia, ina ia agavaa ai tagata aʻoga mo le papatisoga.