1. E faapefea ona tatou iloa o se galuega faasaoola le faia o isi ma soo?

O LE faia o isi ma soo o se galuega faasaoola. E faapefea ona tatou iloa? I le Mataio 28:19,20 na faatonuina ai e Iesu ona soo: “Ia outou ō atu e fai tagata . . . ma soo, ma papatiso atu iā i latou.” Aiseā e tāua ai le papatisoga? O se faatulagaga e manaʻomia ona ausia e i latou e fia ola e faavavau. O se tasi e fia papatiso e tatau ona talitonu o le maliu o Iesu ma lona toetū mai, e na o le pau lenā o le auala e maua ai le ola e faavavau. O le māfuaaga lenā na taʻu atu ai e Peteru i ona uso Kerisiano: “O le papatisoga lea ua faaolaina ai nei outou . . . e ala i le toe faatūina mai o Iesu Keriso.” (1 Pete. 3:21) O lea la, pe a papatiso se soo fou, ua ia maua le faamoemoe e ola ai e faavavau.

2. E tusa ai ma le 2 Timoteo 4:1, 2 o le ā le ituaiga faiaʻoga e tatau ona iai i tatou?

² E manaʻomia ona tatou atiaʻe le “tomai e aʻoaʻo atu” ai ina ia faia ai isi ma soo. (Faitau le 2 Timoteo 4:1, 2.) Aiseā? Talu ai na faatonuina i tatou e Iesu: “Ia outou ō atu e fai tagata . . . ma soo, ma aʻoaʻoina i latou.” Na faapea mai foʻi le aposetolo o Paulo ia “tumau” i lenā galuega “auā o le faia faapea e faaolaina ai oe lava atoa ma i latou o faalogo iā te oe.” O se māfuaaga lelei la le toe faapea mai o Paulo: “Ia uaʻi totoʻa i lau aʻoaʻo atu.” (1 Timo. 4:16) Talu ai e fesootaʻi le aʻoaʻo atu ma le faia o isi ma soo, e tatou te mananaʻo la ia sili ona lelei le auala e tatou te aʻoaʻo ai.

3. O le ā o le a tatou talanoaina i lenei mataupu e faatatau i le faia o suʻesuʻega faale-Tusi Paia?

³ E faitau miliona tagata o loo tatou aʻoaʻoina i upu moni o le Tusi Paia. Peitaʻi na talanoaina i le mataupu ua mavae, e  tatou te fia iloa pe faapefea ona tatou fesoasoani i le toʻatele o i latou na, ina ia avea ma soo papatiso o Iesu Keriso. O le a talanoaina i lenei mataupu nisi auala se lima, e manaʻomia ona fai e so o se faiaʻoga ina ia fesoasoani ai i se tagata aʻoga e agavaa ai mo le papatisoga.

4. Aiseā e tatau ai i se faiaʻoga ona pulea le tautala soo pe a fai se suʻesuʻega faale-Tusi Paia? (Tagaʻi i le faaopoopoga)

⁴ E tatou te matuā fiafia i mea o loo tatou aʻoaʻo atu mai i le Afioga a le Atua. E ono faaosoosoina la i tatou e faamatala atu mea uma ua tatou iloa mai i le Tusi Paia. Peitaʻi, pe e te faia le Suʻesuʻega o le Olomatamata, le Suʻesuʻega faale-Tusi Paia a le Faapotopotoga po o se suʻesuʻega e faia i se fale o se tasi, e tatau i le fai suʻesuʻega ona aua le tautala soo. Ia pulea e le faiaʻoga le tautala soo, ma taumafai e aua le faamatalaina mea uma e na te iloa e faatatau i se mau po o se mataupu. * (Ioa. 16:12) Ia faatusatusa lou iloa o le Tusi Paia i le taimi na e papatiso ai ma le taimi lenei. Atonu e na o mataupu faavae o le Tusi Paia na e malamalama ai i le taimi na e papatiso ai. (Epe. 6:1) Ae e tele ni tausaga na e aʻoaʻoina ai mea ua e iloa i le taimi lenei. O lea la, aua e te taumafai e aʻoaʻo mea uma i le tagata aʻoga fou i le taimi e tasi.

5. (a) E tusa ai ma le 1 Tesalonia 2:13, o le ā e tatou te mananaʻo ia malamalama i ai la tatou tagata aʻoga? (e) E faapefea ona tatou faalaeiau le tagata aʻoga e faamatala mai mea o loo ia aʻoaʻoina?

⁵ E tatou te mananaʻo ia malamalama le tagata aʻoga, o mea o loo ia aʻoaʻoina e mai i le Afioga a le Atua. (Faitau le 1 Tesalonia 2:13.) O le ā le auala e tatou te faia ai lenā mea? Ia faalaeiau le tagata aʻoga e faamatala mai mea o loo ia aʻoaʻoina. Nai lo o lou faamatalaina o mau uma i le tagata aʻoga, fai i ai e faamatala mai nisi mau iā te oe. Ia fesoasoani i le tagata aʻoga ia iloa le auala e na te faatatauina ai mau o le Tusi Paia i lona olaga. Ia fai ni fesili e tataʻi ai le tagata aʻoga i manatu o le Tusi Paia po o ni fesili faatupu manatu, ina ia faamatala mai ai ona manatu ma ona lagona e faatatau i mau e na te faitauina. (Luka 10:25-28) O se faataʻitaʻiga, ia fesili i ai: “O le ā se uiga o Ieova ua e iloa mai i lenei mau?” “O le ā se aogā o lenei mau iā te oe?” “O le ā sou lagona i lenā mea?” (Faata. 20:5) O le mea e sili ona tāua, e lē o le tele o mea e iloa e le tagata aʻoga, ae o le tele o lona talisapaia o mea ua ia aʻoaʻoina ma faatatau i lona olaga.

6. Aiseā e lelei ai ona ō ma se faiaʻoga ua iai le poto masani e fai se suʻesuʻega faale-Tusi Paia?

⁶ Pe a faia se suʻesuʻega faale-Tusi Paia, pe e  iai ni taimi e tou te ō ai ma faiaʻoga o le Tusi Paia ua iai le poto masani? E mafai ona e fai atu iā i latou e mātau mai le auala e te faia ai le suʻesuʻega, ma po o e aʻoaʻo mai i le Tusi Paia. Pe a e manaʻo e faaleleia ou tomai o se faiaʻoga, e tatau la ona e lotomaulalo. (Faatusatusa i le Galuega 18:24-26.) Pe a uma le suʻesuʻega, ia fesili mo se manatu o le tagata talaʻi na lua ō, po o malamalama le tagata aʻoga i le suʻesuʻega. Ia talosaga i le tagata talaʻi lenā pe e mafai ona ia faia le suʻesuʻega pe a e lē avanoa. O le a fesoasoani lenā e faaauau ai pea le suʻesuʻega ma o le a iloa ai e le tagata aʻoga le tāua o lana suʻesuʻega. Ia tuu ese le manatu o “lau” suʻesuʻega lea, ma e leai ma se isi e mafai ona ia faia. O le mea tāua, e te manaʻo i le mea e sili ona lelei mo lau tagata aʻoga, ina ia faaauau ai pea ona agaʻigaʻi i luma i le aʻoaʻoina o le upu moni.

7. O le ā e fesoasoani i se tagata aʻoga ina ia fiafia ai i mea o loo ia aʻoaʻoina?

⁷ E tatau ona iloa e le tagata aʻoga lou fiafia ma lou mautinoa i upu moni o le Tusi Paia. (1 Tesa. 1:5) O le a fiafia ai foʻi lau tagata aʻoga i mea o loo ia aʻoaʻoina. Atonu e te faamatalaina atu i ai le auala ua faaleleia ai lou olaga ona o lou faatatauina o mataupu silisili o le Tusi Paia. O le a ia iloa ai, o loo i le Tusi Paia taʻiala e aogā foʻi iā te ia.

8. O ā isi mea e mafai ona e fesoasoani ai i lau tagata aʻoga, ma aiseā e te faia ai faapea?

⁸ I le suʻesuʻega, ia taʻu i lau tagata aʻoga faafitauli na fesagaʻia e nisi o uso ma tuafāfine e pei foʻi o faafitauli o loo ia fesagaʻia. Ia taʻu i ai ma le auala na foʻia ai e uso ma tuafāfine na faafitauli. E mafai ona e alu ma ave i lau suʻesuʻega se tasi o le faapotopotoga e avea o se faaaʻoaʻoga lelei i lau tagata aʻoga. E mafai foʻi ona e maua tala faalaeiau o mea na tutupu i le jw.org i le vaega “Suia e le Tusi Paia Olaga.” * O tala ma vitiō o loo iai i inā, e na te iloa ai le atamai o le faatatauina o mataupu silisili o le Tusi Paia i lona olaga.

9. E faapefea ona e faalaeiau le tagata aʻoga e faamatala atu mea o loo ia aʻoaʻoina i lona aiga ma ana uō?

⁹ Pe afai ua faaipoipo lau tagata aʻoga, po o suʻesuʻe lana paaga? Pe afai e leai, ia valaaulia o ia e auai i le suʻesuʻega. Ia faalaeiau lau tagata aʻoga e faamatala i lona aiga ma ana uō mea o loo ia aʻoaʻoina. (Ioa. 1:40-45) E faapefea ona e faalaeiau lau tagata aʻoga e faia  faapea? E mafai ona e fesili i ai: “E faapefea ona e faamatalaina le aʻoaʻoga lenei i lou aiga?” “O le ā se mau e te faamaonia ai i sau uō le aʻoaʻoga lenei?” O lou faia faapea o le a e toleniina ai le tagata aʻoga e avea ma faiaʻoga. O lea, pe a agavaa le tagata aʻoga e avea ma tagata talaʻi e leʻi papatisoina, o le a mafai loa ona ia talaʻi faatasi ma le faapotopotoga. E mafai foʻi ona e fesili i le tagata aʻoga, po o iai se isi e na te iloa e manaʻo e suʻesuʻe le Tusi Paia. Pe afai e iai, ia vave ona faafesootaʻi lenā tagata ma ofo atu i ai se suʻesuʻega faale-Tusi Paia ma faaali i ai le vitiō O le ā e Faia i se Suʻesuʻega Faale-Tusi Paia? *

10. E pei ona faamatalaina i le 1 Tesalonia 2:7, 8, o le ā le auala e faaaʻoaʻo ai se faiaʻoga iā Paulo?

¹⁰ E tatau ona naunau moni ma māfana faiaʻoga i a latou tagata aʻoga. Ia vaai iā i latou, o le a avea ma ou uso ma tuafāfine faaleagaga. (Faitau le 1 Tesalonia 2:7, 8.) E lē faigofie iā i latou ona tuua uō i le lalolagi, ae fai suiga uma ia e manaʻomia ina ia agavaa ai e auauna iā Ieova. O lea la, e manaʻomia ona fesoasoani iā i latou e saʻili ni uō moni i le faapotopotoga. Ia avea oe o se uō moni i lau tagata aʻoga. Ia faaalu se taimi ma ia, e ese mai i le taimi e fai ai le suʻesuʻega. O lou vili, text po o le asiasi foʻi i ai mo sina taimi, o le a ia iloa ai lou manatu mamafa iā te ia.

11. O le ā e tatou te mananaʻo ia maua e tagata aʻoga i le faapotopotoga, ma aiseā?

¹¹ E iai se faaupuga e faapea: “E manaʻomia le fesoasoani a tagata uma i se nuu e tausia se tamaitiiti.” Ae e mafai ona tatou faapea atu: “E manaʻomia le fesoasoani a le faapotopotoga atoa i le faia o se soo.” O le māfuaaga lenā e faamasani ai e faiaʻoga atamamai a latou tagata aʻoga, i isi o le faapotopotoga e mafai ona avea o ni faaaʻoaʻoga lelei iā i latou. O le a fiafia ai tagata aʻoga e faatasitasi ma tagata o le Atua lea e fesoasoani iā i latou i le itu faaleagaga, ma faalaeiau i latou pe a feagai ma faafitauli. E tatou te mananaʻo e lagona e tagata aʻoga taʻitoʻatasi o i latou o se vaega o le faapotopotoga ma lo tatou aiga faaleagaga. E tatou te mananaʻo foʻi ia tosina atu le tagata aʻoga i le māfana ma le alofa o lo tatou ʻauuso Kerisiano. O le a faigofie ai la ona taofia le toe faifaimea faatasi o le tagata aʻoga ma i latou e lē fesoasoani iā te ia e alofa iā Ieova. (Faata. 13:20) Pe afai e teena o ia e ana uō na iai muamua i le lalolagi, e na te iloa la e mafai ona ia maua uō moni i le faalapotopotoga a Ieova.—Mare. 10:29, 30; 1 Pete. 4:4.

12. Aiseā e tatau ai ona faamanatu pea i la tatou tagata aʻoga le tuuina atu ma le papatisoga?

¹² Ia faamanatu pea i le tagata aʻoga le tāua o le tuuina atu ma le papatisoga. Auā o lo tatou sini i le faia o suʻesuʻega faale-Tusi Paia, o le fesoasoani lea i se tasi e avea ma soo papatiso. I nai masina talu ona faia e lē aunoa le suʻesuʻega faale-Tusi Paia ma ua amata ona auai i sauniga, e tatau ona malamalama le tagata aʻoga o le fuafuaga o le suʻesuʻega faale-Tusi Paia, e fesoasoani iā te ia e auauna ai iā Ieova o se tasi o Ana Molimau.

13. O ā laasaga e uia e se tagata aʻoga ina ia agavaa ai mo le papatisoga?

¹³ E iai laasaga e tatau ona uia e le tagata aʻoga ua fia papatiso moni lava ina ia agavaa ai e papatiso. Muamua, e tatau ona iloa e le tagata aʻoga Ieova, ia alofa ma faatuatua iā te Ia. (Ioa. 3:16; 17:3) O lea, o le a atiaʻe ai e le tagata aʻoga se faiā māfana ma Ieova ma le faapotopotoga. (Epe. 10:24, 25; Iako. 4:8) O le iʻuga, o le a lafoaʻia ai e le tagata aʻoga mea leaga na ia faia ma salamō mai i ana agasala. (Galu. 3:19) O le a uunaʻia foʻi o ia e lona faatuatua e faamatala atu le upu moni i isi. (2 Kori. 4:13) Mulimuli ane, o le a tuuina atu e le tagata aʻoga o ia iā Ieova ma papatisoina. (1 Pete. 3:21; 4:2) Maʻeu le fiafia o tagata uma o le a iai i lenā aso! A o faasolosolo ona uia e le tagata aʻoga laasaga e agavaa ai mo le papatisoga, ia faamālō ma faalaeiau atu pea i le tagata aʻoga ina ia tumau pea i le ala saʻo.

14. E faapefea ona iloilo e se faiaʻoga le agaʻigaʻi i luma o se tagata aʻoga?

¹⁴ E manaʻomia ona tatou onosaʻi a o fesoasoani i se tagata aʻoga ina ia agavaa mo le tuuina atu ma le papatisoga. A o faagasolo le suʻesuʻega, e iai le taimi e manaʻomia ai ona tatou iloa po o fia auauna moni lava le tagata aʻoga iā Ieova le Atua. Po o e mātauina ni faailoga e iloa ai o loo taumafai le tagata aʻoga e usitaʻi i poloaʻiga a Iesu? Pe e na o le pau le mea e manaʻo i ai, o le aʻoaʻoina o mea e fiafia i ai mai le Tusi Paia?

15. O ā ni faailoga e iloa ai e se faiaʻoga le agaʻigaʻi i luma o se tagata aʻoga?

¹⁵ Ia iloilo e lē aunoa le agaʻigaʻi i luma o lau tagata aʻoga. O se faaaʻoaʻoga, pe e na te faailoa mai ona faalogona e faatatau iā Ieova? Pe e tatalo iā Ieova? (Sala. 116:1, 2) Pe e fiafia e  faitau le Tusi Paia? (Sala. 119:97) Pe e auai e lē aunoa i sauniga? (Sala. 22:22) Po o ia faia ni suiga i lona olaga e faailoa mai ai o loo ia faatatauina mea o loo ia aʻoaʻoina? (Sala. 119:112) Po o ia faamatala atu mea o loo ia aʻoaʻoina i lona aiga ma ana uō? (Sala. 9:1) Ae o le mea e sili ona tāua, po o manaʻo e avea o se Molimau a Ieova? (Sala. 40:8) Pe afai e lē o agaʻigaʻi i luma le tagata aʻoga i nisi o na vala, taumafai e iloa le māfuaaga i se auala faautauta, ma ia talanoa i ai i se auala agalelei ma manino. *

16. E faapefea ona tatou iloa ua tatau ona faamuta le suʻesuʻega?

¹⁶ Ia fai ma iloilo pe e tatau ona faaauau le suʻesuʻega. Ia fesili ifo: ʻPe e suʻesuʻe lana tusi mo le suʻesuʻega? Pe e fiafia e auai i sauniga? Po ua tuu ana masaniga leaga? Po o auai lava i se lotu sesē? Pe afai o le tali i na fesili e faailoa mai ai e lē o agaʻigaʻi i luma le tagata aʻoga, o le faaauau la o le suʻesuʻega, e tai pei o loo e aʻoaʻoina se tagata ia iloa aau ae e lē o manaʻo e susū. Pe afai e lē talisapaia moni e le tagata aʻoga mea o loo ia aʻoaʻoina ma e lē lotomalie e fai ni suiga i lona olaga, aiseā la e faaauau ai le suʻesuʻega?

17. E tusa ai ma le 1 Timoteo 4:16, o le ā e tatau ona fai e faiaʻoga uma o le Tusi Paia?

¹⁷ E tatou te faatāuaina la tatou matafaioi o le faia o isi ma soo, ma e tatou te mananaʻo e fesoasoani i a tatou tagata aʻoga e agavaa mo le papatisoga. O le māfuaaga lenā e tatou te aʻoaʻo mai ai i le Tusi Paia ma fiafia e aʻoaʻo atu ma le mautinoa. E tatou te faalaeiau foʻi le tagata aʻoga e saʻili ni uō i le faapotopotoga. E tatou te faamanatu pea i le tagata aʻoga le sini o le tuuina atu ma le papatisoga, ma iloilo mai i lea taimi i lea taimi lona agaʻigaʻi i luma. (Tagaʻi i le pusa “ O Mea e Manaʻomia Ona Fai e Faiaʻoga Ina ia Agavaa ai Tagata Aʻoga mo le Papatisoga.”) Maʻeu lo tatou olioli i le faia o so tatou sao i lenei galuega faasaoola! Seʻi o tatou maumauaʻi e fai le mea sili e faia ai suʻesuʻega faale-Tusi Paia ina ia agavaa mo le papatisoga.