1. O le ā le filifiliga e sili ona lelei e mafai ona fai e se tasi?

E MASANI lava, o filifiliga e faia e mātua e aafia ai fanau mo se taimi umi. Pe a leaga filifiliga a mātua, o le a aafia fanau i faafitauli. Ae pe a lelei a latou filifiliga e fai, o le a latou fesoasoani iā latou fanau e maua se olaga fiafia ma faamalieina. E tatau foʻi i fanau ona fai filifiliga lelei. O le filifiliga e sili ona lelei e fai e se tasi, o le auauna lea iā Ieova lo tatou Tamā alofa i le lagi.​—Sala. 73:28.

2. O ā filifiliga lelei na fai e Iesu ma ona mātua?

² Na maumauaʻi mātua o Iesu e fesoasoani i le la fanau ia auauna iā Ieova, ma o filifiliga na la faia, na faamaonia ai o le sini autū lea i o la olaga. (Luka 2:40, 41, 52) Na faia foʻi e Iesu filifiliga lelei, na fesoasoani iā te ia e faataunuu ai lana matafaioi i le faia o le finagalo o Ieova. (Mata. 4:1-10) Na ola aʻe Iesu o se tagata agalelei, faamaoni ma lototele. E mautinoa e mitamita ma fiafia mātua e matataʻu i le Atua, pe a iai se la tama e pei o Iesu.

3. O ā fesili o le a tatou taliina i lenei mataupu?

³ O le a tatou taliina i lenei mataupu fesili nei: O ā filifiliga lelei na fai e Ieova mo Iesu? O ā mea e mafai ona aʻoaʻoina e mātua Kerisiano mai i filifiliga na fai e mātua o Iesu? O le ā e aʻoaʻoina e talavou Kerisiano mai i filifiliga na fai e Iesu?

4. O le ā le filifiliga tāua na faia e Ieova mo lona Alo?

⁴ Na filifili e Ieova mātua e sili ona lelei mo Iesu. (Mata. 1:18-23; Luka 1:26-38) O loo faamauina i le Tusi Paia faaupuga  mai i le loto o Maria, na faailoa mai ai le loloto o lona alofa mo Ieova ma lana Afioga. (Luka 1:46-55) O le usitaʻi o Iosefa i taʻiala a Ieova, na faaalia ai lona mataʻu i le Atua ma lona manaʻo e faafiafia o ia.​—Mata. 1:24.

5-6. O le ā na faataga e Ieova lona Alo e tofo i ai?

⁵ Seʻi mātau, e leʻi filifilia e Ieova ni mātua mauʻoa mo Iesu. O le taulaga na ofo atu e Iosefa ma Maria ina ua fanau Iesu, na iloa ai lo la tulaga mativa. (Luka 2:24) Atonu na iai i tafatafa i le fale o Iosefa i Nasareta se tamaʻi fale na fai ma faatau ai ana meafale. E leʻi tele ni a latou tupe po o meafaitino, aemaise lava le taimi na toʻatele ai le aiga ina ua faaopoopo isi tamaiti pe ā ma le toʻafitu.​—Mata. 13:55, 56.

⁶ Na puipuia e Ieova Iesu mai i ni lamatiaga, ae e na te leʻi puipuia Lona Alo mai i faafitauli uma. (Mata. 2:13-15) O se faaaʻoaʻoga, na feagai Iesu ma ona tauaiga e leʻi talitonu iā te ia. Seʻi manatu la i le ono lē fiafia o Iesu i ona tauaiga ona o lo latou lē taliaina o ia o le Mesia i lenā taimi. (Mare. 3:21; Ioa. 7:5) E foliga mai na maliu Iosefa a o talavou Iesu, ma na matuā faanoanoa o ia. O lona uiga ina ua maliu Iosefa, na fai e Iesu o le atalii ulumatua galuega na faia e lona tamā. (Mare. 6:3) A o tuputupu aʻe Iesu, na feagai o ia ma le tausiaina o le aiga ma na ia galue mamafa e tausia i latou. O lea la, na tofo Iesu i le lēlavā i le galue i le aso atoa.

7. (a) O ā fesili e fesoasoani i ulugalii faaipoipo i le tausia aʻe o a latou fanau? (e) E faapefea ona fesoasoani le Faataoto 2:1-6 i mātua e aʻoaʻo ai a latou fanau?

⁷ Pe afai ua oulua faaipoipo, ma e te lua mananaʻo e fai se fanau, ia fesili ifo: ʻPo o i maʻua o ni tagata lotomaulalo ma faaleagaga, ua filifilia e Ieova e tausia lenei pepe fou o se meaalofa tautele?’ (Sala. 127:3, 4) Ae pe afai ua avea oe ma matua, ia fesili ifo: ʻPo o oʻu aʻoaʻo laʻu fanau i le tāua o le galue mamafa?’ (Fai. 3:12, 13) ʻPo o oʻu faia le mea sili e puipuia ai laʻu fanau i lamatiaga i le itu faaletino ma amioga mai i le lalolagi a Satani?’ (Faata. 22:3) E lē mafai ona e puipuia lau fanau mai faafitauli uma e latou te ono fesagaʻia. E lē mafai ona e faia lenā mea. Ae e mafai ona tatou aʻoaʻoina pea i latou i se  auala alofa, ina ia saʻili i le Afioga a le Atua mo fautuaga pe a tutupu mai faafitauli. (Faitau le Faataoto 2:1-6.) O se faataʻitaʻiga, pe a filifili se tauaiga e tuua le tapuaʻiga moni, ia fesoasoani i lau fanau e aʻoaʻo mai i le Afioga a le Atua le māfuaaga e matuā tāua ai le faamaoni pea iā Ieova. (Sala. 31:23) Pe a maliu se tasi e pele iā i tatou, ia faailoa atu i lau fanau mau mai i le Afioga a le Atua e feagai ai ma lagona faavauvau ma maua ai le filemu.​—2 Kori. 1:3, 4; 2 Timo. 3:16.

8. E tusa ai ma le Teuteronome 6:6, 7, o ā mea na faia e Iosefa ma Maria?

⁸ Na fesoasoani Iosefa ma Maria iā Iesu ia avea o se tagata matua e finagalo malie i ai le Atua. Na la mulimuli i faatonuga a Ieova mo matua. (Faitau le Teuteronome 6:6, 7.) Na matuā alolofa Iosefa ma Maria iā Ieova, ma o le sini na sili ona tāua iā i laʻua, o le faalaeiau o le la fanau e atiaʻe foʻi lenā alofa.

9. O ā filifiliga tāua na faia e Iosefa ma Maria?

⁹ Na filifili Iosefa ma Maria e faatumauina pea se faasologa lelei faaleagaga mo le aiga. E mautinoa na latou auai i sauniga i vaiaso uma i le sunako i Nasareta. Na latou auai foʻi i Paseka i tausaga uma i Ierusalema. (Luka 2:41; 4:16) Atonu na la faaaogā taimi a o faimalaga i Ierusalema, e aʻoaʻo ai Iesu ma nai ona tei e faatatau i le talafaasolopito o tagata o Ieova. Atonu na latou asiasi foʻi i nofoaga o loo taʻua i Tusitusiga Paia, i taimi o na faigāmalaga. E leʻi faigofie iā Iosefa ma Maria ona faatumauina se faasologa lelei faaleagaga ina ua toʻatele le la fanau. Ae e maʻeu le tele o aogā na latou maua i le faamuamua o le tapuaʻiga iā Ieova! O le iʻuga, na latou maua ai se faiā lelei ma Ieova.

10. O ā lesona e aʻoaʻoina e mātua Kerisiano mai iā Iosefa ma Maria?

¹⁰ O le ā e aʻoaʻoina e mātua e matataʻu i le Atua mai iā Iosefa ma Maria? O le mea e sili ona tāua, o le aʻoaʻo lea o lau fanau i au upu ma gaoioiga e faailoa atu ai lou alofa tele iā Ieova. Ia iloa o le meaalofa sili e te avatu i lau fanau, o le fesoasoani iā i latou e alolofa iā Ieova. O se tasi o lesona e sili ona aogā e te aʻoaʻoina i lau fanau, o le auala e faatumauina ai se faasologa lelei faaleagaga o le  suʻesuʻe, tatalo, auai i sauniga ma le talaʻiga. (1 Timo. 6:6) E tatau ona avatu i le fanau meafaitino e latou te manaʻomia. (1 Timo. 5:8) Peitaʻi, ia manatua e lē o meafaitino, ae o le faiā vavalalata a lau fanau ma Ieova o le a faasaoina ai i latou mai i le iʻuga o lenei faiga o mea, ma ulu atu ai i le lalolagi fou a le Atua.—Eseki. 7:19; 1 Timo. 4:8.

11. (a) E faapefea ona fesoasoani i mātua le fautuaga i le 1 Timoteo 6:17-19, e faia ai filifiliga lelei a o tausia aʻe fanau? (e) O ā sini e ono talanoaina e lo outou aiga, ma o ā faamanuiaga e maua mai ai? (Tagaʻi i le pusa “ O ā ni Sini E te Manaʻo e Ausia?”)

¹¹ Maʻeu le faalaeiauina o i tatou i le mātauina o le toʻatele o mātua Kerisiano, o loo faia filifiliga lelei faaleagaga mo latou aiga! E latou te tapuaʻi faatasi e lē aunoa. E auai i sauniga a le faapotopotoga ma tauaofiaga. E latou te galulue faatasi foʻi i le galuega talaʻi. Ua mafai ona talaʻi nisi aiga i oganuu e seāseā talaʻia. O isi ua asiasi atu i Peteli pe e galulue foʻi i galuega faufale. O aiga ua filifili e faia nei galuega, ua latou faaalu tupe ma atonu o le a latou fesagaʻia ai ni luʻi. Ae ua faatamaoaigaina i latou faaleagaga ona o aogā ua latou maua mai i le faia o filifiliga lelei. (Faitau le 1 Timoteo 6:17-19.) E masani lava o fanau e tausia aʻe i nei aiga, e faaauau pea ona latou faia nei masaniga lelei na aʻoaʻoina ai i latou, ma e latou te lē salamō i na filifiliga! *​—Faata. 10:22.

12. O le ā na faia e Iesu ina ua matua?

¹² E fai e le Tamā i le lagi o Iesu filifiliga lelei i taimi uma, ma na fai foʻi e ona mātua faaletagata filifiliga lelei. Ae ina ua matua Iesu, na ia faia ana lava filifiliga. (Kala. 6:5) Na iā Iesu le meaalofa o le saʻolotoga e filifili ai, e pei foʻi o i tatou. Na ono filifili Iesu e saʻili lona lava lelei, peitaʻi na ia filifili e faatumauina le la faiā lelei ma Ieova. (Ioa. 8:29) E faapefea ona fesoasoani le faaaʻoaʻoga a Iesu i talavou i aso nei?

13. O le ā le filifiliga tāua na faia e Iesu a o laʻitiiti?

¹³ E mai lava i le laʻitiiti o Iesu, na filifili o ia e gauaʻi i ona mātua. E leʻi iai se taimi na teena ai e Iesu le taʻitaʻiga a ona mātua, ona na manatu e sili atu mea e na te iloa nai lo o i laʻua. Na “gauaʻi pea o ia iā i laʻua.” (Luka 2:51) E mautinoa na matuā faatāua e Iesu lona tiute o le ulumatua. Na galue mamafa Iesu e aʻoaʻoina le tomai faakamuta mai i lona tamā fai, ina ia fesoasoani i le saʻilia o se tupe e tausi ai lona aiga.

14. E faapefea ona tatou iloa o Iesu o se tagata aʻoga maelega o le Afioga a le Atua?

¹⁴ Na ono faamatala atu e mātua o Iesu iā te  ia lona fanau mai faavavega, ma faamatalaga a avefeʻau a le Atua na fai e faatatau iā te ia. (Luka 2:8-19, 25-38) Ae e leʻi faamalieina Iesu i le na ona iloa o mea na taʻu atu iā te ia. Na ia suʻesuʻeina foʻi Tusitusiga Paia. E faapefea ona tatou iloa o Iesu o se tagata aʻoga maelega o le Afioga a le Atua? Talu ai a o laʻitiiti Iesu, na “matuā ofo” faiaʻoga i Ierusalema ʻi lona malamalama ma ana tali na fai atu.’ (Luka 2:46, 47) E na o le 12 tausaga o Iesu ae ua mafai ona ia faamaonia atu o Ieova o lona Tamā.​—Luka 2:42, 43, 49.

15. Na faapefea ona faaalia e Iesu ua ia filifili e fai le finagalo o Ieova?

¹⁵ Ina ua iloa e Iesu lana matafaioi i le faia o le finagalo o Ieova, na ia filifili loa e talia lona tofiga. (Ioa. 6:38) Na ia silafia o le a inosia o ia e le toʻatele, o se mea atonu na mamafa i lona mafaufau. Peitaʻi, na ia filifili e gauaʻi i le faia o le finagalo o Ieova. Ina ua papatiso Iesu i le 29 T.A., na ia uaʻi atu ai i le mea e sili ona tāua i lona olaga, o le faia o le finagalo o Ieova. (Epe. 10:5-7) E oo lava i le taimi o le a maliu ai i le laau e faapuapuagatia ai, na maumauaʻi pea Iesu e fai le finagalo o lona Tamā.​—Ioa. 19:30.

16. O le ā se lesona e aʻoaʻoina e fanau mai iā Iesu?

¹⁶ Ia usitaʻi i ou mātua. E lē lelei atoatoa ou mātua e pei foʻi o Iosefa ma Maria. E ui i lea, ua tofia e Ieova ou mātua e puipui, toleni ma taʻitaʻia oe. Pe a e faatāuaina a la fautuaga ma faaaloalo i le la pule, o le a e “manuia ai.”​—Efe. 6:1-4.

17. E tusa ai ma le Iosua 24:15, o le ā le filifiliga e tatau ona fai e talavou mo i latou lava?

¹⁷ Ia filifili po o ai e te auauna i ai. E tatau ona faamaonia e oe lava le ituaiga Atua e iai Ieova, o mea e aofia i lona finagalo, ma pe e faapefea ona e ola e tusa ma lona finagalo. (Roma 12:2) O le faia faapea o le a mafai ai ona e faia le filifiliga e sili ona tāua i lou olaga o le auauna iā Ieova. (Faitau le Iosua 24:15; Fai. 12:1) Pe a e faitau ma suʻesuʻe e lē aunoa le Tusi Paia, o le a faateleina ai lou alofa mo Ieova ma atili faamalosia ai lou faatuatua iā te ia.

18. O le ā le filifiliga e tatau ona fai e talavou, ma o le ā e iʻu i ai?

¹⁸ Ia filifili e faamuamua le finagalo o Ieova  i lou olaga. Ua folafola mai e le lalolagi a Satani, e te maua le fiafia pe a faaaogā au taleni mo lou lava lelei. Ae o le mea moni, o i latou e uaʻi atu i sini faaletino, ua latou tuia i latou lava “i le tele o tigā.” (1 Timo. 6:9, 10) I le isi itu, pe a e faalogo iā Ieova ma filifili e faamuamua lona finagalo i lou olaga, o le a e manuia ma “gaoioi ai ma le poto.”​—Iosua 1:8.

19. O le ā e tatau ona manatua e mātua?

¹⁹ Matuā e, ia fai le mea sili e fesoasoani ai i lou aiga e auauna iā Ieova. Pe a e faalagolago iā te ia, o le a ia fesoasoani iā te oe e fai filifiliga atamai. (Faata. 3:5, 6) Ia manatua, e sili atu le aafiaga o au gaoioiga i lau fanau nai lo o au upu. O lea, ia fai filifiliga e avatu ai i le fanau le avanoa e sili ona lelei, ina ia latou maua ai le finagalo malie o Ieova.

20. O ā faamanuiaga e maua e talavou pe a filifili e auauna iā Ieova?

²⁰ Talavou e, e mafai e ou mātua ona fesoasoani iā te oe e fai filifiliga atamai i lou olaga. Ae o lau lava filifiliga e te maua ai le finagalo malie o le Atua. O lea, ia faaaʻoaʻo iā Iesu ma ia filifili e auauna i lou Tamā alofa i le lagi. O lou faia faapea, o le a pisi ai lou olaga, tauia ma fiafia i le taimi nei. (1 Timo. 4:16) I le lumanaʻi, o le a e olioli ai i se olaga e sili ona faamalieina!