1. O le ā e tatou te ono manatua pe a mafaufau i se tagata alofa mutimutivale?

PE A tatou mafaufau i se tagata e alofa mutimutivale, atonu e tatou te manatu i se tagata e agalelei, manatu mamafa, alofa faapelepele ma limafoaʻi. Atonu e faamanatu mai ai iā i tatou le tala a Iesu e faatatau i le Samaria agalelei. O lenā tagata, e ese le nuu e sau ai, ae na “alofa mutimutivale” o ia i se tagata Iutaia na fasia e tagata faomea. Ina ua iloa atu e le Samaria le tagata Iutaia ua faamanuʻalia, ona mutimutivale lea o lona alofa iā te ia ma ia saunia ai le tausiga o lenei tagata. (Luka 10:29-37) Ua faamatilatila mai i lenei talafaatusa le alofa mutimutivale o lo tatou Atua, o se tasi o ona uiga matagofie. O lenei uiga, o se tasi lea o vala o le alofa o le Atua, ma e na te faaalia i le auala e feutagaʻi ai ma i tatou i aso uma.

2. O le ā se isi vala o le alofa mutimutivale?

² E iai se isi vala o le alofa mutimutivale e tatou te ono manatua. E aofia ai le lē faaooina o se faasalaga i se tagata agasala pe afai e iai se māfuaaga tatau. O lona uiga la, o loo faaalia e Ieova le alofa mutimutivale iā i tatou. Na taʻua e le faisalamo: “E leʻi faia e ia iā i tatou e tusa ma a tatou agasala.” (Sala. 103:10) Ae o nisi taimi, atonu e avatu ai e Ieova se aʻoaʻiga malosi i se tagata faimea sesē.

3. O ā fesili o le a tatou talanoaina?

³ O le a tatou taliina i lenei suʻesuʻega ni fesili se tolu: Aiseā e faaalia ai e Ieova le alofa mutimutivale? Pe e iai se fesootaʻiga i le avatu o se aʻoaʻiga malosi i se tasi, ma le faaalia o le alofa mutimutivale? O le ā e fesoasoani iā i tatou e faaalia ai le alofa mutimutivale? Seʻi o tatou iloiloina tali o nei fesili mai i le Tusi Paia.

4. Aiseā e faaalia ai e Ieova le alofa mutimutivale?

⁴ E naunau Ieova e faaalia le alofa mutimutivale. Na tusi le  aposetolo o Paulo, o le Atua o lē e ʻtele lona alofa mutimutivale.’ I lenei fuaiupu, o loo faasino atu Paulo i le faaalia e le Atua o le alofa mutimutivale i lana ʻaufaauuina lē lelei atoatoa, e ala i le ofoina atu iā i latou o le faamoemoe e ola ai i le lagi. (Efe. 2:4-7) Peitaʻi, e lē na o le ʻaufaauuina e faaalia i ai e Ieova le alofa mutimutivale. Ua faapea mai le faisalamo o Tavita: “E agalelei Ieova i mea uma lava, e alofa mutimutivale foʻi o ia i ana galuega uma.” (Sala. 145:9) Talu ai e alofa Ieova i tagata, e na te faasafua atu la le alofa mutimutivale i taimi uma pe a iai se māfuaaga talafeagai.

5. Na faapefea ona aʻoaʻoina e Iesu e alofa mutimutivale Ieova?

⁵ E silafia lelei e Iesu le matuā naunau o Ieova e faaalia le alofa mutimutivale. Na faatasi Ieova ma Iesu i le lagi mo le faitau afe o tausaga talu ona faia le tagata. (Faata. 8:30, 31) E tele taimi na molimauina ai e Iesu auala na faaalia ai e lona Tamā le alofa mutimutivale i tagata agasala. (Sala. 78:37-42) E masani ona faamatilatila mai e Iesu i ana aʻoaʻoga lenei uiga matagofie o lona Tamā.

6. Na faapefea ona faaata mai e Iesu i lana talafaatusa le alofa mutimutivale o lona Tamā?

⁶ E pei ona taʻua i le suʻesuʻega ua mavae atu, na faaaogā e Iesu se talafaatusa e faatatau i se atalii faamaumauʻoa e faamatala mai ai faalogona māfana o Ieova, e matuā naunau o ia e faaalia le alofa mutimutivale. Na tuua e le atalii lona aiga ma “faamaʻimau . . . ana mea e ala i le ola i se olaga soonafai.” (Luka 15:13) Mulimuli ane, na ia salamō mai i ana amioga lē mamā, faaalia le faamaulalo ma toe foʻi i lona aiga. O le ā le auala na tali mai ai lona tamā? Na fetalai Iesu: “Ua iloa mamao atu o ia e lona tamā, ona mutimutivale ai lea o lona alofa iā te ia. Ua ia tamoʻe atu ma fusi i lona ua, ma sogi lemū atu iā te ia.” Ioe, e leʻi umi ona faatali lenei tama talavou i le tali a lona tamā. E leʻi faamāina foʻi e le tamā lona atalii, ae na ia faaalia le alofa mutimutivale e ala i le faamagalo o lona atalii ma toe talia fiafia i lona aiga. Na matuā agasala le atalii faamaumauʻoa i lona tamā, ae na faamagalo o ia e lona tamā ona na ia faaalia le salamō. O le tamā alofa mutimutivale i le talafaatusa, o loo faaata mai ai Ieova. Ua faataʻitaʻi mai e Iesu i lenei auala faamāfanafanaloto, le finagalo malie o lona Tamā e faamagalo tagata agasala e faaalia le salamō moni.​—Luka 15:17-24.

7. O le ā le fesootaʻiga o le atamai o Ieova ma lona faaalia o le alofa mutimutivale?

⁷ E faaalia e Ieova le alofa mutimutivale ona o lona atamai e lē mafaatusalia. O le atamai o Ieova e lē na o ni manatu po o le poto e  aunoa ma ni faalogona. Ae ua faapea mai le Tusi Paia, “o le atamai mai i lugā . . . e tumu i le alofa mutimutivale ma fua lelei.” (Iako. 3:17) Ua faatusaina Ieova i se matua alofa, e na te silafia o lona alofa mutimutivale e aogā mo lana fanau. (Sala. 103:13; Isa. 49:15) O le alofa mutimutivale la o Ieova ua maua ai e lana fanau se faamoemoe, e ui i lo latou tulaga lē lelei atoatoa. O lea la, ua uunaʻia Ieova e lona atamai e lē masuʻesuʻeina e faasafua atu lona alofa mutimutivale pe a iai se māfuaaga talafeagai. Ae i le taimi e tasi e paleni le auala e faaalia ai e Ieova lona alofa mutimutivale. E na te silafia lelei le taimi e faaalia ai le alofa mutimutivale ma le taimi e lē tatau ai, pe afai o le a tuufau ai se tagata e faia pea le agasala.

8. I nisi taimi o le ā le gaoioiga e manaʻomia ona fai, ma aiseā?

⁸ Ae e faapefea pe afai ua filifili se auauna a Ieova e ola i se olaga agasala? Na faagaeeina Paulo e le agaga o le Atua e tusi: “Aua neʻi outou toe faifaimea faatasi” ma lenā tagata. (1 Kori. 5:11) E faateʻaina mai i le faapotopotoga tagata faimea sesē ae lē salamō. E talafeagai lenā gaoioiga e puipuia ai o tatou uso ma tuafāfine faamaoni, ma faaatagia mai ai le paia o ala o Ieova. Ae atonu e faigatā i nisi ona vaai i le faatulagaga o le faateʻaina, o se faaaliga o le alofa mutimutivale o le Atua. Seʻi o tatou vaai.

9-10. E tusa ai ma le Eperu 12:5, 6, aiseā e faapea atu ai o le faateʻaina o se faatulagaga alofa mutimutivale? Ia faataʻitaʻi.

⁹ E tatou te matuā faanoanoa, pe a faasilasila i sauniga faa-Kerisiano “ua lē toe avea . . . o se Molimau a Ieova” se tasi e tatou te iloa ma alolofa i ai. Atonu e tatou te taumānatu, pe na tatau ona faateʻaina lea tagata. Po o se alofa mutimutivale le faateʻaina o se tasi? Ioe. E lē o se faiga alofa, atamai ma alofa mutimutivale le taofia o le aʻoaʻiga mai i se tasi o loo manaʻomia. (Faata. 13:24) Pe e mafai ona fesoasoani le faateʻaina i se tagata faimea sesē ae lē salamō, ina ia suia ai lona ala? E mafai. E toʻatele i latou na faia agasala matuiā ua latou iloa, o le gaoioiga maumauaʻi na faia e toeaina e fesoasoani iā i latou e iloa ai le matuiā o a latou gaoioiga na fai, faasaʻo ai o latou ala ma toe foʻi mai iā Ieova.​—Faitau le Eperu 12:5, 6.

¹⁰ Seʻi mātau le faaaʻoaʻoga lenei. Ua mātauina e se leoleo mamoe, ua maʻi se tasi o ana mamoe. E iloa lelei e le leoleo mamoe, o le togafitia o lenei maʻi, e manaʻomia ai ona faanofoesea le mamoe maʻi mai i isi mamoe o le lafu. Peitaʻi, e fiafia mamoe e faifaimea faatasi. E mananaʻo mamoe e nonofo faatasi ma e fetagisi pe a tuueseese. Po o lona uiga la e lē alofa ma e sauā le leoleo mamoe ona o le auala o loo togafitia ai le mamoe maʻi? E leai. E iloa lelei e le leoleo mamoe, o le a pipisi le maʻi ma aafia ai le lafu atoa pe a faataga le mamoe maʻi e faifaimea faatasi ma isi mamoe. O le faanofoesea o le mamoe maʻi e puipuia ai le lafu atoa.​—Faatusatusa i le Levitiko 13:3, 4.

11. (a) O ā itu e faatusaina ai se tagata ua faateʻaina i se mamoe ua maʻi? (e) O ā fesoasoani e mafai ona maua e tagata ua faateʻaina?

¹¹ Atonu e tatou te faatusaina se Kerisiano faateʻaina i lenā mamoe maʻi. Ua maʻi faaleagaga o ia. (Iako. 5:14) O le maʻi faaleagaga e tai pei o isi maʻi faaletino e matuā pipisi lava. O lea, i nisi tulaga e manaʻomia ona faanofoesea mai i le faapotopotoga se tagata ua maʻi faaleagaga. O lenā aʻoaʻiga ua faailoa mai ai le alofa o Ieova i ana auauna faamaoni, ma atonu e pāʻia ai le loto o le tagata faimea sesē ma faaalia ai le salamō. A o faateʻaina o ia, e mafai ona auai i sauniga e faamalosia ma fafagaina ai faaleagaga. E mafai foʻi ona ia faaaogā so o se lomiga mo ana ia lava suʻesuʻega, pe matamata foʻi i le TV i le Initaneti. A o mātauina e toeaina lona agaʻigaʻi i luma, e latou te ono avatu ni fautuaga ma ni taʻitaʻiga mai i lea taimi i lea taimi e fesoasoani iā te ia e toe faaleleia  ai lona itu faaleagaga, ina ia toe faaaʻe e avea ma se tasi o Molimau a Ieova. *

12. O le ā le gaoioiga alofa ma alofa mutimutivale, e fai e toeaina i se tagata faimea sesē ae lē salamō?

¹² E tāua ona manatua, e na o tagata faimea sesē e lē salamō e faateʻaina mai i le faapotopotoga. E iloa e toeaina e tatau ona latou mafaufau lelei a o leʻi faia se faaiʻuga e faateʻaina se tasi. E latou te iloa foʻi, pe a aʻoaʻia e Ieova se tasi, e na te “aʻoaʻi faatatau” lenā tagata. (Iere. 30:11) E latou te alolofa i o latou uso ma tuafāfine ma e latou te lē mananaʻo e faia se mea e faaleagaina ai lo latou itu faaleagaga. E ui i lea, o nisi taimi o le faateʻaina o se tagata faimea sesē mai i le faapotopotoga, o se gaoioiga alofa ma alofa mutimutivale e tatau ona fai.

13. Aiseā na manaʻomia ai ona faateʻaina se Kerisiano i Korinito?

¹³ Seʻi mātau le auala na feutagaʻi ai le aposetolo o Paulo ma se tagata faimea sesē e lē salamō i le uluaʻi senituri. Na nonofo se Kerisiano i Korinito ma le avā a lona tamā ma la faia ai le mulilua. Pagā le matagā o lenā mea! Na fetalai Ieova i tagata Isaraelu anamua e faatatau i lenei mea: “O le tane e momoe ma le avā a lona tamā, ua ia faalumaina ai lona tamā. E ao ona fasiotia lava i laʻua.” (Levi. 20:11) E leʻi faatonuina e Paulo e fasioti le tamāloa, ae na ia faatonuina le faapotopotoga i Korinito e faateʻaina o ia. O amioga lē mamā a lenā tamāloa na aafia ai nisi o le faapotopotoga. O nisi na latou manatu o le amioga faauamaaa na faia e lenā tamāloa, e lē o se agasala matuiā.​—1 Kori. 5:1, 2, 13.

14. Na faapefea ona faaalia e Paulo le alofa mutimutivale i le tamāloa na faateʻaina i Korinito, ma aiseā? (2 Korinito 2:5-8, 11)

¹⁴ I se taimi mulimuli ane, na iloa ai e Paulo suiga tetele na faia e lenei tamāloa. Na faaalia e le tamāloa faimea sesē le salamō moni. E ui ina taʻuvalea le faapotopotoga ona o le agasala na ia faia, ae na taʻu atu e Paulo i toeaina e lē manaʻo e “soona” faaumiumi le aʻoaʻiga o lenā tamāloa. Na ia taʻu atu iā i latou ia “faamagalo atu ma le agalelei ma faamāfanafana atu iā te ia.” Aiseā na faia ai faapea e Paulo? “Ina ia aua neʻi lofitūina lenā tagata i le faanoanoa tele.” Na lagona e Paulo le tigā alofa mo le tamāloa na faaalia le salamō. E leʻi manaʻo Paulo e vaai atu o matuā lofitūina ma faanoanoa lenā tamāloa ona o lana agasala na fai ma lē toe manaʻo ai e saʻili le faamagaloga a Ieova.​—Faitau le 2 Korinito 2:5-8, 11.

15. E faapefea ona faaalia e toeaina le maumauaʻi ma le alofa mutimutivale i le taimi e tasi?

¹⁵ E faaaʻoaʻo toeaina i le alofa mutimutivale o  Ieova, ma e latou te naunau e faaalia lenā uiga. E latou te maumauaʻi e avatu se aʻoaʻiga malosi i se tagata faimea sesē pe a manaʻomia. E latou te faaalia le alofa mutimutivale pe a talafeagai, pe a iai se māfuaaga moni e faia ai faapea. Pe afai e lē aʻoaʻia e toeaina le tagata faimea sesē, ua latou lē faaalia la le alofa mutimutivale ae ua tuufau lenā tagata e faia pea le agasala. Pe e na o toeaina e manaʻomia ona faaalia le alofa mutimutivale?

16. E tusa ai ma le Faataoto 21:13, e faapefea ona tali atu Ieova iā i latou e lē faaalia le alofa mutimutivale?

¹⁶ Aiseā e taumafai ai Kerisiano uma e faaaʻoaʻo i le alofa mutimutivale o Ieova? O se tasi o māfuaaga, ona e lē faafofoga Ieova iā i latou e lē faaalia le alofa mutimutivale i isi. (Faitau le Faataoto 21:13.) E leai se isi o i tatou e manaʻo e teena e Ieova ana tatalo. O lea la, ia matuā faaeteete ina ia ʻalofia le atiaʻeina o se lotomaaa. E tatou te mananaʻo e fesoasoani i mafatiaga o tatou uso ma tuafāfine Kerisiano. E tatau la ona tatou nofosauni e faalogo atu i le “alaga a le tagata lē taualoa.” E tatou te faia foʻi le mea sili e faatatau ai le fautuaga lenei mai i le Tusi Paia: “O le tagata e lē alofa mutimutivale, e faamasinoina o ia e aunoa ma le alofa mutimutivale.” (Iako. 2:13) Pe afai e tatou te lotomaulalo ma manatua e tatou te matuā manaʻomia le alofa mutimutivale, o le tele foʻi lenā e tatou te matuā faaalia ai le alofa mutimutivale. E tatou te mananaʻo e faaalia le alofa mutimutivale, aemaise lava pe a toe foʻi mai i le faapotopotoga se tagata faimea sesē ua faaalia le salamō.

17. Na faapefea ona faaalia e le tupu o Tavita le alofa mutimutivale?

¹⁷ E mafai ona fesoasoani iā i tatou faaaʻoaʻoga i le Tusi Paia e faaalia ai le alofa mutimutivale ma ʻalofia ai uiga inainā. O se faataʻitaʻiga, o le tupu o Tavita. E masani ona ia faaalia le alofa mutimutivale. E ui ina manaʻo Saulo e fasiotia Tavita ae na ia faaalia pea le alofa mutimutivale iā Saulo le tupu faauuina a le Atua. E leʻi fia tauimasui Tavita.​—1 Samu. 24:9-12, 18, 19.

18-19. O ā taimi e lua e leʻi faaalia ai e Tavita le alofa mutimutivale?

¹⁸ Peitaʻi, e leʻi faaalia e Tavita le alofa mutimutivale i taimi uma. O se faataʻitaʻiga, ina ua tautala lē mafaufau Napalu o se tamāloa inainā, ma na musu e auina atu ni meaʻai mo Tavita ma ona tagata, na matuā ita Tavita ma sauni ai e fasioti Napalu ma tamāloloa uma o lona ʻauaiga. Ae e tatou te matuā faafetaia le vave gaoioi o Apikaila le avā agalelei ma onosaʻi a Napalu, ma na taofia ai Tavita mai i le nofosala i le toto.​—1 Samu. 25:9-22, 32-35.

¹⁹ Ae i se tasi taimi, na faamatala atu ai e le perofeta o Natano iā Tavita se tamāloa mauʻoa na fāoa le mamoe faapelepele a lona tuaoi mativa. Na matuā ita Tavita ma faapea atu: “O loo soifua Ieova, e tatau ona oti le tagata ua faia lenei mea!” (2 Samu. 12:1-6) Na iloa e Tavita le tulafono a Mose. Pe a gaoia e se tasi se mamoe, e fā mamoe e totogi atu ai e le tagata gaoi le mamoe na ia gaoia. (Eso. 22:1) Ae ua mamafa tele le faasalaga oti na taʻua e Tavita. Na faaaogā e Natano se talafaatusa e faamatala ai le matuā matuiā o agasala na faia e Tavita. Na faamaonia le matuā sili atu ona alofa mutimutivale o  Ieova iā Tavita, nai lo le faaalia e Tavita o le alofa mutimutivale i le tagata mauʻoa, na fāoa le mamoe a le tagata mativa i le talafaatusa a Natano.​—2 Samu. 12:7-13.

20. O le ā e tatou te aʻoaʻoina mai i le faaaʻoaʻoga a Tavita?

²⁰ Ina ua matuā ita Tavita, na ia manatu ai e tatau ona oo le oti iā Napalu ma lona aiga. Mulimuli ane, na nofosauni Tavita e fasioti le tagata i le talafaatusa a Natano. I lenā talafaatusa, e tatou te ono taumānatu pe aiseā na manaʻo ai Tavita o se tagata e alofa ma agalelei e fasiotia le tamāloa. Seʻi manatu i le mea na tupu. Na iai le taimi na taʻusalaina ai Tavita e lona lotofuatiaifo. O uiga inainā ma le faamasinosino o se faailoga o le lē malosi faaleagaga o se tasi. E matuā tuufaafeagai lava ma le lapataʻiga malosi a Iesu i ona soo: “Aua tou te toe faamasino atu ina neʻi faamasinoina outou; auā o le faamasinoga tou te faamasino atu ai, e toe faamasinoina ai foʻi outou.” (Mata. 7:1, 2) O lea, seʻi faaauau pea ona tatou ʻalofia le faaalia o uiga inainā, ma fai le mea sili e tatou te mafaia e faaalia ai le ʻtele o le alofa mutimutivale’ e pei o lo tatou Atua.

21-22. O ā nisi auala aogā e mafai ona tatou faaalia ai le alofa mutimutivale?

²¹ E tele mea e aofia i le alofa mutimutivale nai lo se faalogona. O le alofa mutimutivale e uiga atu i le faia o gaoioiga e fesoasoani ai i isi. O lea, e tatou te vaavaai lelei i mea e manaʻomia ai e isi le fesoasoani, i o tatou aiga, faapotopotoga ma vaipanoa o loo tatou nonofo ai. E mautinoa e matuā tele avanoa e tatou te faaalia ai le alofa mutimutivale. Pe e iai se isi o loo manaʻomia se faamāfanafanaga? Pe e mafai ona tatou ofo atu se fesoasoani? Atonu e tatou te avatu i ai ni meaʻai po o le faia o isi gaoioiga agalelei e fesoasoani i ai. Faamata e lē o manaʻomia e se Kerisiano ua faaaʻe ni faamāfanafanaga ma ni faauōga e atiaʻe ai? Pe e mafai ona tatou faailoa atu le feʻau faamāfanafana o le tala lelei i isi? O nisi na o auala e sili ona lelei e tatou te faaalia ai le alofa mutimutivale, i tagata uma e tatou te feiloaʻi i ai.​—Iopu 29:12, 13; Roma 10:14, 15; Iako. 1:27.

²² Pe a tatou mataala i na manaʻoga, o le a tatou iloa ai le tele o avanoa e tatou te maua e faaalia ai le alofa mutimutivale. Pe a faaalia le alofa mutimutivale, o le a tatou faafiafiaina lo tatou Tamā i le lagi, o le Atua ʻo lē e tele lona alofa mutimutivale.’