1. Aiseā ua lē mautonu ai le toʻatele o tagata?

ATONU e faitau afe lotu Kerisiano ua faapea mai e talia e le Atua le auala o loo latou tapuaʻi ai. E lētioa a lē mautonu le toʻatele o tagata! E latou te faapea mai, “Pe e iai se tapuaʻiga moni, ma pe e talia e le Atua tapuaʻiga uma?” Po o tatou matuā mautinoa o le upu moni lea o loo tatou aʻoaʻoina? Pe e talia e Ieova le auala o loo tapuaʻi ai Molimau a Ieova i aso nei? Pe e mafai moni lava ona e mautinoa i na mea? Seʻi o tatou iloiloina faamaoniga.

2. I le 1 Tesalonia 1:5, aiseā na matuā mautinoa ai e le aposetolo o Paulo ua ia mauaina le upu moni?

² Na matuā mautinoa e Paulo ua ia mauaina le upu moni. (Faitau le 1 Tesalonia 1:5.) E leʻi faavae aʻe lona mautinoa i ona faalogona, ae na ia suʻesuʻe ma le faaeteete le Afioga a le Atua. Na ia talitonu “o Tusitusiga Paia uma e mai i le agaga o le Atua.” (2 Timo. 3:16) O le ā na ia aʻoaʻoina mai i ana suʻesuʻega? Na aʻoaʻoina e Paulo mai i le Tusi Paia faamaoniga maumaututū e iloa ai o Iesu o le Mesia na folafolaina mai. Peitaʻi, na teena e taʻitaʻi lotu Iutaia na faamaoniga. Na faapea mai na taʻitaʻi lotu faafiaamiotonu o i latou o sui o le Atua, peitaʻi na latou faafitia o ia e ala i a latou galuega. (Tito 1:16) E lē tutusa Paulo ma na taʻitaʻi lotu. E leʻi filifilia e Paulo po o fea vaega o le Tusi Paia e manaʻo e talitonu i ai, ae na nofosauni e aʻoaʻo ma faatatau le “finagalo uma o le Atua” i lona olaga.​—Galu. 20:27.

3. Pe e tatau ona tatou iloa tali o a tatou fesili uma, ina ia mautinoa ai ua tatou maua le upu moni? (Tagaʻi i le pusa “ O Galuega ma Manatunatuga o Ieova​—ʻUa Matuā Tele Lava ua Lē Mafaitaulia.’”)

 ³ E manatu nisi e tatau ona maua i le tapuaʻiga moni tali o fesili uma lava, e oo lava i fesili e lē o taliina i le Tusi Paia. Pe e talafeagai lenā manatu? Seʻi o tatou iloiloina le faaaʻoaʻoga a Paulo. Na ia faalaeiauina ona uso talitonu e “tofotofo i mea uma,” ae na ia taʻutino mai foʻi e tele mea e lē malamalama ai. (1 Tesa. 5:21) Na ia faapea mai foʻi, “e lē atoatoa lo tatou poto” ma “o loo tatou vaavaai atu i se faata nenefu.” (1 Kori. 13:9, 12) E leʻi malamalama Paulo i mea uma ma e faapena foʻi i tatou. Ae na malamalama Paulo i upu moni faavae e faatatau iā Ieova. Na lava mea na iloa e Paulo e mautinoa ai ua ia mauaina le upu moni.

4. E faapefea ona faamalosia lo tatou mautinoa ua tatou maua le upu moni, ma o le ā o le a tatou iloiloina e faatatau i Kerisiano moni?

⁴ O se tasi o auala e faamalosia ai lo tatou mautinoa ua tatou maua le upu moni, o le faatusatusa lea o le auala na faatulaga e Iesu ma le auala o loo tapuaʻi ai Molimau a Ieova i aso nei. I lenei suʻesuʻega, o le a tatou iloa ai o Kerisiano moni (1) e latou te teena le ifo i tupua, (2) e faaaloalo i le suafa o Ieova, (3) e faapelepele i le upu moni, ma le (4) e matuā alofa le tasi i le isi.

5. O le ā ua tatou aʻoaʻoina mai iā Iesu e faatatau i le auala saʻo e tapuaʻi ai i le Atua, ma e faapefea ona tatou faatatauina lana aʻoaʻoga?

⁵ Na matuā alofa Iesu i lona Tamā, ma na uunaʻia ai o ia e tapuaʻi tau lava o lona Tamā a o i ai i le lagi ma le lalolagi. (Luka 4:8) Na ia aʻoaʻoina foʻi ona soo ina ia latou faia faapea. E leʻi faaaogāina e Iesu po o ona soo faamaoni ni faatusa e tapuaʻi i ai. Talu ai o le Atua o le  agaga, e leai la se tasi e mafai ona faia se faatusa e foliga iā te ia. (Isa. 46:5) Ae ā le faia o faatusa o tagata paia ma tatalo i ai? O le tulafono lona lua o Tulafono e Sefulu na fetalai ai Ieova: “Aua neʻi e faia se tupua ua tā po o se faatusa o se mea o i le lagi i lugā, po o se mea i lalo nei i le laueleele . . . Aua e te ifo i ai.” (Eso. 20:4, 5) E malamalama lelei i latou e mananaʻo e faafiafia le Atua i na faaupuga.

6. O le ā le auala o loo tapuaʻi ai Molimau a Ieova i aso nei?

⁶ Ua faapea mai tagata e suʻesuʻeina le talafaasolopito, e na o le Atua lava na tapuaʻi i ai uluaʻi Kerisiano i taimi o le ʻauaposetolo. O se faataʻitaʻiga, o loo taʻua i le tusi History of the Christian Church e “matuā ʻinoʻino” na uluaʻi Kerisiano i le faaaogāina o faatusa i nofoaga e tapuaʻi ai. I aso nei, e mulimuli foʻi Molimau a Ieova i le auala na tapuaʻi ai Kerisiano i le uluaʻi senituri. E tatou te lē tatalo i faatusa o “tagata paia” po o agelu, e tatou te lē tatalo foʻi iā Iesu. E tatou te lē faʻalo foʻi i tagāvai a so o se atunuu, pe faia so o se mea lava e tapuaʻi ai i na atunuu. E tusa lava pe e taumafai se tasi e faamalosia i tatou, ae e tatou te maumauaʻi e usiusitaʻi i fetalaiga a Iesu :“E tatau ona e tapuaʻi iā Ieova lou Atua.”​—Mata. 4:10.

7. O ā vala ua matilatila ese ai Molimau a Ieova mai i isi lotu?

⁷ I aso nei, e toʻatele o loo mulimuli i taʻitaʻi lotu taʻutaʻua. O nisi taimi ona o le matuā fiafia o tagata i na taʻitaʻi lotu, ua pei ai lava ua latou tapuaʻi iā i latou. E lolofi atu tagata i a latou lotu, faatau a latou tusi, ma foaʻi tupe e tele e faaauilumaina ai mea o loo faia e taʻitaʻi lotu. O nisi tagata e talitonu i mea uma e fai mai ai na taʻitaʻi lotu. Pe a faaali atu Iesu i nei tagata, e faigatā ona tatou talitonu o le a sili atu lo latou fiafia iā Iesu nai lo o latou taʻitaʻi lotu. Ae o tagata tapuaʻi moni o Ieova e lē mulimuli i ni tagata. E ui e tatou te faaaloalo i uso o loo taʻimua i le faapotopotoga, ae e tatou te mulimuli i le aʻoaʻoga manino a Iesu “o le ʻauuso uma outou.” (Mata. 23:8-10) E tatou te lē tapuaʻi i tagata, taʻitaʻi lotu po o taʻitaʻi o malo. E tatou te lē lagolagoina foʻi a latou faiga faalotu ma faiga faapolotiki, ae e tumau ona tatou solitū ma vavaeese mai i le lalolagi. O na vala, ua matilatila ese mai ai i tatou i le tele o lotu ua faapea mai o Kerisiano.​—Ioa. 18:36.

8. E faapefea ona tatou iloa e finagalo Ieova ia faamamaluina lona suafa ma faalauiloa atu i tagata uma?

⁸ I se tasi taimi, na tatalo ai Iesu: “Loʻu Tamā e, ia faamamaluina lou suafa.” Na tali e Ieova lenā tatalo i se siʻufofoga leotele mai i le lagi, lea na ia folafola mai ai o le a ia faamamaluina lona suafa. (Ioa. 12:28) Na faamamaluina e Iesu le suafa o lona Tamā i lana faiva. (Ioa. 17:26) E talafeagai la ona faatalitalia Kerisiano moni, e mitamita i le faaaogāina o le suafa o le Atua ma faailoa atu i isi lenā suafa.

9. Na faapefea ona faamaonia e Kerisiano i le uluaʻi senituri, e latou te faaaloalo i le suafa o le Atua?

⁹ Ina ua faatoʻā faavaeina le faapotopotoga Kerisiano i le uluaʻi senituri T.A., na “silasila ai le Atua i nuu ese, ina ia filifilia mai ai ni tagata mo lona suafa.” (Galu. 15:14) Na mitamita Kerisiano i le uluaʻi senituri e faaaogā le suafa o le Atua ma faalauiloa atu i isi. Na latou faaaogāina le suafa o le Atua i taimi uma i a latou talaʻiga ma a latou tusitusiga. * O lenā auala, na latou faamaonia ai o i latou o tagata mo le suafa o le Atua.​—Galu. 2:14, 21.

10. O ā faamaoniga e iloa ai, o Molimau a Ieova o tagata mo le suafa o Ieova?

 ¹⁰ Po o Molimau a Ieova o tagata mo le suafa o Ieova? Seʻi mātau faamaoniga nei. E toʻatele taʻitaʻi lotu i aso nei ua faia mea uma e latou te mafaia, e taofia ai le faaaogāina o le suafa patino o le Atua. Ua latou aveesea lenā suafa mai i a latou faaliliuga o le Tusi Paia, ma i nisi lotu ua latou faasāina le faaaogāina o lenā suafa. * E matuā manino lava, e na o Molimau a Ieova e faaaloalo ma faamamaluina lenā suafa. Ua matuā sili atu ona tatou faalauiloaina le suafa patino o le Atua, nai lo o se isi lava lotu. O lea, ua tatou faia ai le mea sili e tatou te mafaia ina ia ola e tusa ai ma lo tatou igoa, o Molimau a Ieova. (Isa. 43:10-12) Ua tatou lomiaina le silia ma le 240 miliona kopi O le Tusi Paia​—O le Faaliliuga a le Lalolagi Fou, lea ua toe tuu i ai le suafa o Ieova i mau na aveese ai e nisi tagata faaliliu o le Tusi Paia. Ua tatou saunia foʻi lomiga faale-Tusi Paia i le silia ma le 1,000 gagana lea o loo faaauilumaina ai le suafa o Ieova.

11. Na faapefea ona faaalia e uluaʻi Kerisiano lo latou faapelepele i le upu moni?

¹¹ Na faapelepele Iesu i le upu moni e faatatau i le Atua ma lona finagalo. Na ola Iesu e tusa ai ma lenā upu moni ma na ia faalauiloa atu foʻi i isi. (Ioa. 18:37) Na matuā faapelepele foʻi soo moni o Iesu i le upu moni. (Ioa. 4: 23, 24) Na faasino atu le aposetolo o Peteru i le faatuatuaga Kerisiano, o le “ala o le upu moni.” (2 Pete. 2:2) Talu ai na matuā faapelepele uluaʻi Kerisiano i le upu moni, na latou teena ai talitonuga ma aganuu faalotu ma manatu o tagata e lē ōgatusa ma le upu moni. (Kolo. 2:8) E faapena foʻi i aso nei, e maumauaʻi Kerisiano moni e ʻsavavali pea i le upu moni,’ e ala i le faavae o o latou talitonuga uma ma auala e latou te ola ai i le Afioga a Ieova.​—3 Ioa. 3, 4.

12. O le ā e faia e i latou o loo taʻimua i le faalapotopotoga, pe a latou iloa ua manaʻomia ona toe fetuunaʻi lo tatou malamalamaaga i le upu moni, ma aiseā e latou te faia ai faapea?

¹² I aso nei, e lē manatu Molimau a Ieova ua latou malamalama atoatoa i mea uma i le Tusi Paia. E iai taimi e latou te sesē ai i le auala e faamatalaina ai aʻoaʻoga a le Tusi Paia, ma le auala e faamaopoopo ai le faalapotopotoga. E lē faateʻia ai i tatou i lenā mea. O loo faailoa manino mai i le Tusi Paia, e faatuputeleina le poto saʻo a o faagasolo taimi. (Kolo. 1:9, 10) E faasolosolo ona faailoa mai e Ieova le upu moni, ma e tatau ona tatou lotomalilie e faatalitali ma le onosaʻi seʻia oo ina faateleina lo tatou malamalama i le upu moni. (Faata. 4:18) Pe a iloa e i latou o loo taʻimua i le faalapotopotoga e manaʻomia ona toe fetuunaʻi lo tatou malamalamaga i se vala o le upu moni, e latou te lē faatalatū e faia faapea. E tele lotu e latou te faia suiga ina ia faamalie ai tagata o latou lotu pe ina ia talia ai e le lalolagi. Peitaʻi, e faia e le faalapotopotoga a Ieova suiga ina ia vavalalata atu ai i le Atua ma tapuaʻi iā te ia i le auala na faatulaga e Iesu. (Iako. 4:4) E tatou te lē faia suiga ona ua suia manatu o tagata o le lalolagi, ae ona ua tatou malamalama lelei i le Tusi Paia. E tatou te matuā faapelepele lava i le upu moni!​—1 Tesa. 2:3, 4.

13. O le ā le uiga e sili ona tāua na faaalia e Kerisiano moni, ma e faapefea ona faaalia e Molimau a Ieova lenā uiga i aso nei?

¹³ E ui e tele uiga lelei na iloa ai le faapotopotoga Kerisiano i le uluaʻi senituri, ae o le uiga sili ona tāua na lauiloa ai i latou, o le alofa. Na fetalai Iesu: “O le mea lea e iloa ai e tagata o oʻu soo outou, pe afai ua outou alolofa o le tasi i le isi.” (Ioa. 13:34, 35) I aso nei, o loo olioli Molimau a Ieova i le faaalia o le alofa moni ma le autasi i le lalolagi aoao. E leai se isi faalapotopotoga e pei o Molimau a Ieova, e māfana le faiā a le ʻauuso i le lalolagi aoao e ui e eseese o latou atunuu, lanu ma o latou tulaga. E tatou te vaaia faamaoniga o le alofa moni i a tatou sauniga, fonotaga ma tauaofiaga. O na faamaoniga, e faamalosia ai lo tatou mautinoa e faamaonia e Ieova le auala o loo tatou tapuaʻi ai.

14. E tusa ai o le Kolose 3:12-14, o le ā se tasi o auala tāua e tatou te faaalia ai le tele o le alofa o le tasi i le isi?

¹⁴ O loo uunaʻia e le Tusi Paia i tatou ia faaalia le ʻtele o le alofa o le tasi i le isi.’ (1 Pete. 4:8) O se tasi o auala e faaalia ai lenā alofa, o le fefaamagaloaʻi ma ia onosaʻi i tulaga lē lelei atoatoa o isi. E tatou te saʻili foʻi avanoa e faaalia ai le limafoaʻi ma le agaga talimālō, iā i latou uma i le faapotopotoga e oo lava iā i latou e ono faatigā mai. (Faitau le Kolose 3:12-14.) Pe afai e tatou te faaalia lenā alofa, e faamaonia atu ai o i tatou o Kerisiano moni.

15. O ā isi mea e tatou te faaaʻoaʻo ai, i le auala e tapuaʻi ai lea na faataatia e Kerisiano i le uluaʻi senituri?

¹⁵ E iai foʻi isi mea e tatou te faaaʻoaʻo ai i le auala e tapuaʻi ai, lea na faataatia e le faapotopotoga Kerisiano i le uluaʻi senituri. O se faataʻitaʻiga, o loo faatulaga la tatou faalapotopotoga  i le auala na faavae e le ʻauaposetolo i le uluaʻi senituri. E iai a tatou ovasia femalagaaʻi, o toeaina ma auauna o le faiva e pei ona iai i le uluaʻi senituri. (Fili. 1:1; Tito 1:5) O la tatou vaaiga e faatatau i feusuaʻiga ma le faaipoipoga, o lo tatou faatāuaina o le paia o le toto ma lo tatou faanaunauga e puipuia le faapotopotoga mai i tagata faimea sesē ae lē salamō, e faavae uma i le auala lea na faataatia e Kerisiano i le uluaʻi senituri.​—Galu. 15:28, 29; 1 Kori. 5:11-13; 6:9, 10; Epe. 13:4.

16. O le ā e tatou te aʻoaʻoina mai i se faaupuga o loo i le Efeso 4:4-6?

¹⁶ Na fetalai Iesu e toʻatele e faapea mai o i latou o ona soo, ae e lē o i latou uma o ona soo moni. (Mata. 7:21-23) Na lapataʻia foʻi e le Tusi Paia o aso e gata ai, o le a toʻatele ai i latou e foliga mai “e faamaoni i le Atua.” (2 Timo. 3:1, 5) Peitaʻi, ua taʻua manino mai i le Tusi Paia e “tasi le faatuatuaga” e talia e le Atua.​—Faitau le Efeso 4:4-6.

17. I aso nei, o ai o loo mulimuli iā Iesu ma tapuaʻi i le auala moni e tasi e talia e le Atua?

¹⁷ I aso nei, o ai o loo tapuaʻi i le auala moni e tasi e talia e le Atua? Ua tatou iloiloina faamaoniga. Ua tatou iloiloina foʻi le auala e tapuaʻi ai lea na aʻoaʻoina e Iesu ma na faaaʻoaʻo ai Kerisiano i le uluaʻi senituri. E na o le tasi lava le tali, o Molimau a Ieova. Maʻeu se faaeaga o le avea o i tatou ma tagata o Ieova, ma iloa le upu moni e faatatau iā te ia ma lona finagalo! Seʻi faaauau pea ona tatou taofimau i le upu moni, ma matuā mautinoa i ai.