E TOʻATELE mamoe pele e toe faaaʻe mai i le faapotopotoga Kerisiano i tausaga taʻitasi. Seʻi faaata le matuā ʻolioli o le lagi’ pe a toe foʻi mai na mamoe pele. (Luka 15:7, 10) Pe afai ua toe faaaʻe oe, e mautinoa le matuā olioli o Ieova, Iesu ma le ʻauagelu, ina ua e toe foʻi mai i le upu moni. Peitaʻi, atonu e iai luʻi e te fesagaʻia a o e taumafai e toe faaleleia le lua faauōga ma Ieova. O ā nisi o na luʻi, ma o le ā e mafai ona fesoasoani iā te oe?

E toʻatele e fesagaʻia faalogona sesē e faavaivaia ai pe a toe faaaʻe mai. Atonu e te malamalama i faalogona na oo i le tupu o Tavita. E ui lava ua uma ona faamagaloina ana agasala, ae na ia faapea mai: “Ua maua aʻu e le tele o aʻu mea sesē.” (Sala. 40:12; 65:3) E ono iai pea i se tasi ua toe faaaʻe mai faalogona nofosala po o le matamuli mo le tele o tausaga. Ua faapea mai Isabelle * na faateʻaina mo le 20 tausaga: “E matuā faigatā ona ou taliaina le manatu e faapea, ua faamagaloina aʻu e Ieova.” Pe a e lotovaivai, e mafai ona toe faavaivaia ai oe faaleagaga. (Faata. 24:10) Ia taumafai ina ia aua lava neʻi tupu lenā mea iā te oe.

E faavaivaia nisi ona o le tele o galuega e manaʻomia ona fai e toe faaleleia ai le latou faiā ma Ieova. Ina ua toe faaaʻe Antoine, na ia faapea mai: “Na ou lagona e pei ua galo uma iā te aʻu loʻu olaga na iai muamua o se Kerisiano.” Atonu la o le māfuaaga lenā e faatalatū ai nisi e faia mea uma ina ia auai ai i gaoioiga faaleagaga.

O se faaaʻoaʻoga, seʻi faapea ua matuā faaleagaina le fale o se tasi i se afā. Atonu e lofitūina lenā tagata pe a mafaufau i le tele o galuega e manaʻomia ona fai, ma le taimi e alu ai i le toe faaleleia o lona fale. E faapena foʻi pe a faaleagaina lau faiā ma Ieova ona o se agasala matuiā. Atonu e te lagona  le lofitūina ona e te manatu e matuā tele mea e manaʻomia ona e faia, ina ia toe faaleleia ai le lua faiā ma Ieova. Ae e mafai ona e maua le fesoasoani.

Ua valaaulia i tatou e Ieova: “Inā ō mai ia outou, seʻi o tatou talanoa faatasi, ina ia faaleleia la outou faiā ma aʻu.” (Isa. 1:18) Ua tele taumafaiga ua e faia ina ia faaleleia ai le lua faiā ma Ieova. Seʻi mafaufau: Ua e avatu iā Ieova se tali maumauaʻi e tali atu ai i taufaifaiga a Satani.​—Faata. 27:11.

O le faia faapea ua e faalatalata atu ai iā Ieova, ma ua ia folafola mai o le a ia faalatalata mai foʻi iā te oe. (Iako. 4:8) Peitaʻi, e tele mea e aofia ai nai lo o le tau ina iloa e isi ua toe avea oe o se vaega o le faapotopotoga. E manaʻomia ona faamalosia pea lou alofa mo Ieova lou Tamā ma lau Uō. E faapefea ona e faia lenā mea?

Ia taumafai e faatutū ni sini e mafai ona e ausia. Atonu o loo iai pea iā te oe le poto e faatatau iā Ieova ma ana folafolaga mo le lumanaʻi. Ae e manaʻomia ona toe faaleleia le auala e te ola ai o se Kerisiano. O na mea, e aofia ai le talaʻia o le tala lelei, ma le faifaimea faatasi ma ou uso ma tuafāfine. Seʻi manatu i sini nei.

Ia tatalo e lē aunoa iā Ieova. E malamalama Ieova lou Tamā i faalogona nofosala o loo feagai pea ma oe, lea e faigatā ai ona e tatalo atu iā te ia. (Roma 8:26) Peitaʻi, ʻia finafinau e tatalo’ atu iā Ieova e te matuā naunau ia toe faaleleia le lua faauōga. (Roma 12:12) Na faamatala mai e Andrej e faapea: “Na ou matuā lagona le nofosala ma le mā. Ae o taimi uma ou te tatalo ai, e toe lelei ai oʻu faalogona ma matuā filemu ai loʻu mafaufau.” Pe afai e te lē iloa mea e tatalo atu ai iā Ieova, e mafai ona e iloiloina le Salamo e 51 ma le 65, lea o loo iai tatalo a le tupu o Tavita na faaalia ai lona salamō.

Ia suʻesuʻe e lē aunoa le Tusi Paia. O le a fafagaina ai oe faaleagaga ma faamalosia ai lou alofa mo Ieova. (Sala. 19:7-11) Ua faapea mai Felipe: “O le māfuaaga na ou vaivai ai ma faatigā iā Ieova, ona e leʻi iai saʻu faasologa faaleagaga. Ou te leʻi manaʻo e toe fai lenā mea sesē, o lea na ou filifili ai e fai aʻu lava suʻesuʻega ina ia puipuia ai aʻu.” E mafai foʻi ona e faataʻitaʻi iā Felipe. Pe a e manaʻomia se fesoasoani i mataupu e fai ai au lava suʻesuʻega, ia saʻili le fesoasoani a se uō taʻumatuaina.

Ia toe atiaʻe a outou faauōga ma uso ma tuafāfine. E popole nisi ua toe faaaʻe mai i le faapotopotoga ina neʻi sesē le vaaiga a uso ma tuafāfine iā i latou. Na taʻutino mai Larissa: “Na matuā ou mā lava. Na ou lagona ua taʻuvalea le faapotopotoga iā te aʻu. Na umi se taimi o iā te aʻu na faalogona.” Ia e mautinoa e matuā naunau toeaina, uso ma tuafāfine taʻumatuaina e fesoasoani iā te oe, ina ia toe faaleleia lou itu faaleagaga. (Tagaʻi i le pusa “ Mea e Mafai Ona Faia e Toeaina”) Ua latou matuā olioli ona ua e toe foʻi mai, ma e latou te naunau ina ia e maua le fiafia.​—Faata. 17:17.

E faapefea ona e vavalalata atu i le faapotopotoga? Ia auai atoatoa i gaoioiga faaleagaga o loo faia e uso ma tuafāfine, e pei o le auai i sauniga, faia e lē aunoa o se sao i le galuega talaʻi. E faapefea ona fesoasoani na mea iā te oe? Ua faapea mai Felix: “Na matuā tulimataʻia e le faapotopotoga loʻu toe foʻi atu. Na ou lagona ai e tāua aʻu iā i latou. Na latou fesoasoani uma mai iā te aʻu ina ia toe avea o se vaega o le aiga o Ieova, ia ou mautinoa ua faamagaloina aʻu, ma ia ou agaʻigaʻi pea i luma.”​—Tagaʻi i le pusa “ O ā Mea e Mafai Ona E Faia?”

O le a faaauau pea ona aumaia e Satani faafitauli e faavaivaia ai oe, a o e taumafai e faaleleia le lua faauōga ma Ieova. (Luka 4:13) Ia mataala pea e ala i le faamalosia pea o lou itu faaleagaga i le taimi lenei.

Ua folafola mai e Ieova e faatatau i ana mamoe: “O le a ou saʻilia lē ua sē, ou te toe aumaia lē ua tulia, ou te fusifusia i se ʻie lē ua gau, o le a ou faamalosia lē ua maʻi.” (Eseki. 34:16) Na fesoasoani Ieova i le toʻatele o uso ma tuafāfine ina ia toe faaleleia la latou faauōga ma ia. Ia mautinoa, e finagalo o ia e fesoasoani atu ina ia faamalosia pea se faiā e sili ona malosi ma ia.