E silia ma le tausaga na galulue ai uso i le Peteli e fausia le alāleo o le WBBR i Staten Island, i le aai o Niu Ioka. Ina ua uma ona faamamā le fanua, na latou fausia ai se fale telē mo le ʻaugalulue ma se isi fale e teu ai meafaigaluega. Ina ua māeʻa lenā galuega, na amata ona saʻili ma faamaopoopo e uso meafaigaluega na manaʻomia mo le alāleo. Peitaʻi, e tele luʻi na tulaʻi mai.

Na iloa ane e uso na matuā faigatā lava ona faatū le enatena autū lea na manaʻomia ina ia ola ai le alāleo. Na manaʻomia ona faatautau le enatena e 91 mita (300 futu) le umī i le vā o ni pou laau se lua e taʻi 61 mita (200 futu) le maualuluga. I le taimi muamua, e leʻi taulau a latou taumafaiga. Peitaʻi, o lo latou maufaatuatuaina o le fesoasoani a Ieova, na iʻu ai ina latou taulau. Na taʻua e Calvin Prosser, o se tasi o uso na galue i lenā poloketi: “Pe ana faapea na matou taulau i le taimi muamua, semanū e matou te manatu, o i matou lava lea na mafai ona faia lenei galuega.” Peitaʻi, na avatu e uso le viiga iā Ieova. E leʻi gata ai i inā faafitauli na latou fesagaʻia.

I na taimi o se mea fou le iai o se alāleo faasalalau, ma e leʻi faigofie ona maua meafaigaluega sa manaʻomia. Peitaʻi, na maua e uso ni meafaigaluega ua faaaogā i se nofoaga lata ane. Nai lo o le faatau mai o se maikorofoni, na latou faaaogā se telefoni masani. I se tasi o pō iā Fepuari, na filifili ai uso e faataʻitaʻi po o ola nei meafaigaluega. Na manaʻomia ona iai se polokalame e faasalalau, o lea na usu ai e uso pese o le Malo. Na faamatala e Ernest Lowe, o se tasi o na uso se mea mālie na tupu i lenā aso. A o latou usuina pese o le  Malo ae vili mai le faamasino o Rutherford, b lea na faalogologo mai i le leitiō i Brooklyn i a latou pesepesega, e pe ā ma le 25 kilomita (15 maila) le mamao.

Na faapea mai le uso o Rutherford: “Tuu ia na pese. Ua tigā taliga iā outou.” O le māsiasi o uso na latou taofia ai le polokalame. Ae o le mea tāua, na latou mautinoa ua ola le alāleo ma ua mafai ona faaaogā e faasalalauina ai polokalame.

Iā Fepuari 24, 1924, o le taimi muamua lea na faasalalauina aloaʻia ai se polokalame, na taʻua ai e le uso o Rutherford o le a faaaogā le alāleo e faaauiluma ai “manaʻoga o le malo o le Mesia.” Na ia faapea atili mai, o le fuafuaga o le alāleo “ina ia mafai ai e tagata ona malamalama i le Tusi Paia, e tusa lava po o le ā le lotu po o talitonuga, ma ia malamalama ai i le tāua o taimi o loo tatou ola ai.”

Na taulau manuia taumafaiga e faasalalauina le uluaʻi polokalame i le alāleo o le WBBR. I tausaga e 33 na sosoo ai, na faaaogā lenā alāleo e faasalalau ai polokalame a le faalapotopotoga a Ieova.

Iā Iulai i le 1924, na faapotopoto ai Tagata Aʻoga o le Tusi Paia mo se tauaofiaga na faia i Columbus i Ohio. Na auai ai uso ma tuafāfine mai i vaipanoa eseese o le lalolagi, ma faalogologo ai i lauga sa faia i le gagana Arapi, Eleni, Italia, Ukraine, Falani, Lithuania, Peretania, Polani, Siamani, Hagakeri, Rusia, ma gagana a Scandinavia. E iai lauga na faasalalauina i le leitiō, ma na talosagaina e uso le nusipepa o le Ohio State Journal e tusi e faatatau i mataupu na talanoaina i aso taʻitasi o le tauaofiaga.

I le Aso Tofi, Iulai 24, e silia i le 5,000 sui usufono na ō e talaʻi i le aai sa faia ai le tauaofiaga. E toetoe 30,000 tusi na latou tuuina i tagata, ma na amataina ai le faitau afe o suʻesuʻega faale-Tusi Paia. Na faamatalaina lenā aso i le The Watch Tower “o le vaega lea o le tauaofiaga na sili ona fiafia i ai le ʻauuso.”

O se isi vala mataʻina o le tauaofiaga sa faia i le Aso Faraile, Iulai 25, ina ua faalauiloa mai ma le lototele e le uso o Rutherford se faamatalaga na taʻusalaina ai taʻitaʻi lotu. Na ia faapea mai, ʻo loo taofia e taʻitaʻi o malo, taʻitaʻi lotu, ma le ʻaufaipisinisi ia tagata mai i le aʻoaʻoina o le mea moni e faatatau i le Malo o le Atua, lea o le a faaaogā e le  Atua e aumaia faamanuiaga mo tagata.’ Na ia toe faapea mai, ʻe sesē nei tagata ona e latou te lagolagoina Malo Sosoo ma faapea mai o le auala lea a le Atua e pulea ai le lalolagi.’ O lea, na matuā manaʻomia e Tagata Aʻoga o le Tusi Paia le lototele e faailoa atu ai lenei feʻau.

I se taimi mulimuli ane, na faamatalaina ai i se mataupu i le The Watch Tower le tauaofiaga sa faia i Columbus e faapea, ʻna faamalosia ai le faatuatua o na uso ma tuafāfine maelega, ma na latou maua ai le lototele e talaʻi ai e tusa po o ā teteega e latou te fesagaʻia.’ Na faapea mai Leo Claus, o se tasi na auai i lea tauaofiaga: “E māeʻa ane le tauaofiaga ua matuā faamalosia i matou ma matuā naunau e faailoa atu lenei feʻau i tagata i le matou oganuu.”

I le masina o Oketopa, na tufatufaina atu ai e Tagata Aʻoga o le Tusi Paia le faitau miliona o kopi o le sāvali Ecclesiastics Indicted, lea na lomia ai le faamatalaga a le uso o Rutherford e faasaga i taʻitaʻi lotu. Sa talaʻi Frank Johnson i le tamaʻi aai o Cleveland i Oklahoma, ma e faatoʻā 20 minute talu ona māeʻa ona ia tufaina atu sāvali o le Ecclesiastics Indicted. O lea, na ia faatali ai loa i le taimi e ō atu ai isi uso ma tuafāfine e piki o ia. E leʻi saogalemu mo ia le faatalitali i se nofoaga faitele, auā na saʻili o ia e tamāloloa o lenā aai ona e latou te leʻi fiafia i lana talaʻiga. O lea na alu ai le uso o Frank ma lafi i se falesā na lata ane. E leʻi iai nisi i le falesā. O lea na ia tuu ai ni sāvali i totonu o le Tusi Paia a le faifeʻau ma nofoa taʻitasi o le falesā. Na vave ona ia alu ese mai i le falesā, ma na lava le taimi e alu ai i isi falesā e lua ma tuu ai foʻi ni sāvali.

Na toe faanatinati atu le uso o Frank i le nofoaga lea sa tatau ona piki ai o ia. Na ia lafi i tua o se pamu penisini, ma vaavaai po o fea o iai tamāloloa na ō atu e suʻe o ia. E leʻi leva ae pasi ane le taavale a nei tamāloloa ae e latou te leʻi iloa ane o ia. O le taimi lava lenā na ō ane ai loa uso ma tuafāfine sa ia faatali ai e piki o ia.

Na faapea mai se tasi o uso: “A o alu ese le matou taavale mai i lenā aai, na matou ui ane i luma o falesā e tolu. E pe ā ma le toʻa 50 tagata sa tutū i fafo o falesā taʻitasi. O nisi o loo faitau sāvali, ae o isi na tuu i luga sāvali ma faaali atu i le faifeʻau. Na matuā fetaui lelei le taimi na matou ō ese ai. Ae e matou te faafetaia Ieova lo tatou Atua mo lana puipuiga, ma le atamai na foaʻi mai ia iloa ai le gaoioiga e fai ina ia sosola ese ai mai i na fili o le Malo.”

Na talaʻi foʻi ma le lototetele Tagata Aʻoga o le Tusi Paia sa iai i isi atunuu. I le itu i mātū o Falani, na talaʻi atu ai Józef Krett i tagata na siitia mai i Polani o ē e galulue i maina. Na faatulaga e na te faia le lauga ua faamatuaina “Ua Toeitiiti Ona Toetutū Mai Lea o Ē ua Maliliu.” Ina ua tufaina atu valaaulia i tagata, na fai atu le latou faifeʻau ina ia teena le valaaulia. Peitaʻi, e ese le iʻuga na oo i ai. E silia i le 5,000 tagata na auai i le lauga e aofia ai ma le faifeʻau. Na valaaulia e le uso o Krett le faifeʻau e fai sana faamatalaga e faatatau i ona talitonuga, ae na musu o ia. Ina ua māeʻa le lauga, na tufaina atu e le uso o Krett i tagata sa ia talaʻi i ai lomiga uma sa iai iā te ia, auā sa latou galala i le itu faaleagaga.—Amo. 8:11.

Na malaga atu le uso o Claude Brown i Ghana i Aferika, e talaʻi ai le tala lelei. Na maua e le toʻatele o tagata le upu moni, ona sa ia faia le tele o lauga ma tufaina atu lomiga i le toʻatele o tagata i inā. O se faataʻitaʻiga, o John Blankson. Na aʻoga o ia ina ia avea ma sē e saunia vailaau faafomaʻi. Ina ua ia auai e faalogologo i se tasi o lauga a le uso o Brown, na vave lava ona ia iloa ai o le upu moni lea. Na ia faapea mai: “Na ou lagona le matuā fiafia,  ma na ou faamatalaina atu i le toʻatele o i latou sa matou aʻoʻoga faatasi.”

I se tasi aso, na alu ai John e fesili i le faifeʻau o le lotu Egelani e faatatau i le Tolutasi, auā o lea ua ia malamalama lelei e leai se faavae faale-Tusi Paia o lea aʻoaʻoga. Ae na ita le faifeʻau ma tuliese o ia ma valaau mai: “E lē o oe o se Kerisiano. O oe o le Tiapolo. Alu ese!”

Ina ua toe foʻi John i le fale, na tusi atu o ia i le faifeʻau e valaaulia o ia e faamatala ona talitonuga i le Tolutasi i se faatasiga i le lautele. Na tali mai le faifeʻau e ala i le faatonuina o John e alu i le ofisa o le faiaʻoga sinia o le aʻoga lea e saunia vailaau faafomaʻi. Na fesili i ai le faiaʻoga pe e moni na tusi i le faifeʻau.

Na tali atu John, “O lea lava lau susuga.”

Na faatonu e le faiaʻoga John e tusi se tusi e faatoese atu ai i le faifeʻau. O lea na tusi atu ai John:

“Lau susuga i le faifeʻau, ua faatonuina aʻu e le faiaʻoga e tusi atu e faatoese iā te oe. Ua ou lotomalie e tusi atu laʻu faatoesega, pe afai e muamua ona e amanaʻia le sesē o mea o loo e aʻoaʻoina.”

Na faateʻia le faiaʻoga ma fesili mai: “Blankson, o lau tusi lenā i le faifeʻau?”

Na tali atu John: “O lea lava lau susuga. E lelei le faailoa saʻo i ai o oʻu manatu.”

Na faapea mai le faiaʻoga: “O le a tuli nei oe. E lē mafai ona e aʻoga pea i inei, ae e te tetee i le faifeʻau o le lotu e tāua i le malo.”

Na fai atu John: “A fai vasega a lau susuga ma e iai ni manatu e matou te lē malamalama ai, po o lona uiga e lē mafai ona fai atu ni matou fesili?”

Na faapea mai le faiaʻoga: “E mafai ona tou fesili mai.”

Na faapea atu John: “Lau susuga, o le mea tonu lava lenā na tupu. Na fai lesona faale-Tusi Paia a le faifeʻau, ma na ou fesili i ai. Afai e na te lē iloa le tali, aiseā la e tatau ai ona ou tusi e faatoese i ai?”

O le iʻuga, e leʻi tuliesea Blankson mai le aʻoga, ma e leʻi tusi faatoese atu foʻi i le faifeʻau.

E tusa ai ma galuega o lenā tausaga, na taʻua i le The Watch Tower: “E tatou te ioe i le manatu o Tavita: ʻUa e fusia aʻu i le malosi mo le taua.’ (Salamo 18:39; Tusi Paia Samoa—Lomiga 1884) E tele faalaeiauga ua tatou maua i lenei tausaga, ona o le faatasi mai o le aao o le Alii . . . O loo olioli i le avatuina o se molimau . . . ana auauna ua papatisoina.”

Mulimuli ane i lenā lava tausaga, na fuafua uso e faaopoopo nisi alāleo. O lea la, na amata ai galuega i se alāleo e lata i Chicago. Na taʻua lenei alāleo fou o LE UPU. Na latou faaaogāina masini e sili ona malolosi ina ia mafai ai ona faasalalau atu le feʻau o le Malo i tagata i nofoaga mamao, e oo atu lava i le itu i mātū o Kanata.

E mataʻina nisi o malamalamaga faaleagaga na faasusulu mai i le 1925, lea na manino atili ai Tagata Aʻoga o le Tusi Paia i le Faaaliga mataupu 12. E ui na iai nisi na tausuai i na suiga, ae o le toʻatele o tagata aʻoga na latou taliaina ma le fiafia nei malamalamaga fou e tusa ai ma mea na tutupu i le lagi, ma aafiaga o na mea i tagata o le Atua i le lalolagi.