SUʻESUʻEGA 43
PESE 90 Ia Fefaalaeiauaʻi
Auala e Foʻia ai o Tatou Faalogona Lē Mautonu
“Ia faamautinoa i mea uma.”—1 TESA. 5:21.
AOTELEGA
Auala e foʻia ai ni faalogona lē mautonu e ono aafia ai la tatou auaunaga iā Ieova.
1-2. (a) O ā nisi o faalogona lē mautonu o feagai ma auauna a Ieova? (e) O le ā o le a tatou iloiloina i lenei mataupu?
PO O le ā lava lo tatou matutua, ae e iai taimi e tatou te aafia uma ai i faalogona lē mautonu. O se faataʻitaʻiga, ia mafaufau i se talavou Molimau a Ieova o loo tomānatu po o manatu mamafa mai Ieova iā te ia. Atonu e lē o mautinoa pe e tatau ona papatiso. Ia mafaufau foʻi i se uso ua silia i le 50 ona tausaga na filifili e faamuamua manaʻoga o le Malo a o talavou, nai lo o le saʻilia o se galuega e lelei le totogi. Ona ua utiuti le faasoa a lona aiga, ua taumānatu ai pe faamata na saʻo lana filifiliga na fai a o talavou. Seʻi mafaufau foʻi i se tuafafine matua ua amata ona mou atu lona malosi. Atonu ua lotovaivai ona ua lē mafai ona ia toe faia mea na faia i tausaga ua teʻa. Pe na e fesili ifo, ʻPo o manatu mamafa mai Ieova iā te aʻu? Pe na aogā faataulaga na ou faia e faamuamua ai Ieova i loʻu olaga? Pe e mafai ona ou faia pea nisi mea mo Ieova?’
2 Pe a faaauau ona tatou feagai ma faalogona lē mautonu, e mafai ona matuā aafia ai la tatou tapuaʻiga. O le a tatou iloiloina i lenei mataupu auala e fesoasoani ai mataupu silisili o le Tusi Paia pe a tatou lē mautonu i manatu nei: (1) po o manatu mamafa mai Ieova iā i tatou, (2) pe e lelei filifiliga na tatou faia i le taimi ua teʻa, (3) pe e mafai ona tatou faia pea nisi mea mo Ieova.
AUALA E FOʻIA AI O TATOU FAALOGONA LĒ MAUTONU
3. O le ā se tasi o auala e foʻia ai o tatou faalogona lē mautonu?
3 O se tasi o auala e foʻia ai o tatou faalogona lē mautonu, o le saʻili atu lea i le Afioga a le Atua mo tali o a tatou fesili. O le a faamalosia ai i tatou ma agaʻigaʻi i luma faaleagaga, ma mafai ai ona tatou “tutū mausalī i le faatuatua.”—1 Kori. 16:13.
4. E faapefea ona tatou “faamautinoa i mea uma”? (1 Tesalonia 5:21)
4 Faitau le 1 Tesalonia 5:21. Ua faalaeiauina i tatou e le Tusi Paia ina “ia faamautinoa i mea uma.” E faapefea ona tatou faia faapea? Pe a tatou feagai ma faalogona lē mautonu, e tatau ona tatou faamautinoa po o le ā le manatu o le Tusi Paia. O se faataʻitaʻiga, seʻi mafaufau i le talavou o loo tomānatu po o manatu mamafa mai Ieova iā te ia. Pe e tatau ona tuu ai pea ona faalogona lē mautonu e aunoa ma le foʻiaina? E leai! E tatau ona “ia faamautinoa i mea uma” e ala i le iloa o le silafaga a Ieova e tusa ai ma ona faalogona.
5. E faapefea ona tatou faalogo atu a o tali e Ieova a tatou fesili?
5 Pe a tatou faitauina le Afioga a le Atua, e tai pei o loo tatou faalogo atu a o fetalai mai Ieova iā i tatou. Ae e manaʻomia ona faia a tatou saʻiliʻiliga ina ia iloa ai le silafaga a Ieova i ni mea o loo tuufesili ai o tatou mafaufau. E tatau ona tatou taulaʻi i mau o le Tusi Paia e fesootaʻi i le mataupu o loo tatou popole ai. E mafai ona fai a tatou saʻiliʻiliga i lenā mataupu, e ala i le faaaogā o meafaigaluega mo suʻesuʻega ua saunia e le faalapotopotoga a Ieova. (Faata. 2:3-6) E mafai ona tatou tatalo ina ia taʻitaʻia e Ieova a tatou saʻiliʻiliga, ina ia tatou malamalama i lana silafaga e faatatau i a tatou fesili. Ona tatou saʻili lea i ni mataupu silisili o le Tusi Paia ma faamatalaga aogā e faatatau i lo tatou tulaga. E aogā foʻi le iloiloina o ni faaaʻoaʻoga a le Tusi Paia i tagata na tauivi ma faalogona e pei o i tatou.
6. E faapefea ona fesoasoani le auai i sauniga e foʻia ai ni o tatou faalogona lē mautonu?
6 E tatou te faalogo atu foʻi a o fetalai mai Ieova pe a tatou auai i sauniga. O le auai e lē aunoa i sauniga atonu o le a tatou faalogo ai i se manatu i se lauga po o se tali a se tasi, ma o le fesoasoani tonu lenā e tatou te manaʻomia e foʻia ai o tatou faalogona lē mautonu. (Faata. 27:17) Seʻi o tatou iloiloina auala e foʻia ai nisi o o tatou faalogona lē mautonu.
PE A E LĒ MAUTONU O LOO MANATU MAMAFA MAI IEOVA IĀ TE OE
7. O le ā le fesili e ono tuufesili ai isi?
7 Pe na e taumānatu, ʻPo o manatu mamafa mai Ieova iā te aʻu?’ Afai e te manatu e leai sou aogā, e te ono lagona e lē mafai ona e vavalalata i Lē na foafoaina le vateatea. Atonu o faalogona foʻi na o le tupu o Tavita. Na maofa Tavita i le uaʻi mai o Ieova i tagata faatauvaa, o lea na ia fesili ai: “Ieova e, o ai ea le tagata e te silasila mai ai iā te ia, ma le atalii o le tagata e te manatu mai ai iā te ia?” (Sala. 144:3) O fea e mafai ona e maua ai le tali o lenā fesili?
8. E tusa ai ma le 1 Samuelu 16:6, 7, 10-12, o le ā e mātau e Ieova e faatatau i tagata?
8 Ua tatou aʻoaʻoina mai i le Tusi Paia, e mātau e Ieova ē e faatauvaa i le vaaiga a tagata. O se faataʻitaʻiga, na auina atu e Ieova Samuelu i le aiga o Iese e faauu se tasi o ona atalii o le a avea ma tupu o Isaraelu. Na aami e Iese le toʻafitu o ona atalii e toʻavalu ina ia feiloaʻi iā Samuelu, ae e leʻi aofia ai Tavita le uii. a Peitaʻi, na filifilia e Ieova Tavita. (Faitau le 1 Samuelu 16:6, 7, 10-12.) Na silafia lelei e Ieova le loto o Tavita, o se talavou na faatāuaina mea faaleagaga.
9. Aiseā e mafai ai ona e mautinoa o loo manatu mamafa mai Ieova iā te oe? (Tagaʻi foʻi i le ata.)
9 Ia mafaufau i faamaoniga e iloa ai e manatu mamafa mai Ieova iā te oe. Ua saunia e Ieova fautuaga e fetaui tonu lava iā te oe. (Sala. 32:8) Aiseā? Auā e silafia lelei e Ieova ou manaʻoga. (Sala. 139:1) Pe a e faatatauina fautuaga a Ieova ma mātau aogā i lou olaga, o le a e talitonu ai o loo manatu mamafa mai o ia iā te oe. (1 No. 28:9; Galu. 17:26, 27) E silafia e Ieova au taumafaiga. O loo ia mātauina ou uiga ma e naunau e faalatalata mai iā te oe. (Iere. 17:10) E finagalo Ieova ina ia e tali atu i lana valaaulia e avea ma ana Uō.—1 Ioa. 4:19.
PE A E LĒ MAUTONU PE E LELEI FILIFILIGA NA E FAIA I LE TAIMI UA TEʻA
10. O ā ni fesili e tatou te ono fesili ifo ai pe a toe mafaufau i filifiliga na faia i tausaga ua teʻa?
10 E taumānatu nisi pe e saʻo filifiliga na latou faia i tausaga ua teʻa. Atonu na latou filifili e tuu se galuega lelei po o se pisinisi taulau manuia, ina ia faatele ai se sao i le auaunaga iā Ieova. O filifiliga na sa latou faia a o talavou, ae o lenei ua matutua. Ua latou vaavaai atu i a latou aumea na faamuamua sini faaletino o loo lelei lo latou tamaoaiga. Atonu e latou te fesili ifo, ʻPe na aogā faataulaga na ou faia e faamuamua ai Ieova i loʻu olaga? Pe na iai ni avanoa lelei na ou misia?’
11. Aiseā na atuatuvale ai lē na tusia le Salamo 73?
11 Afai na e tuufesili faapena, ia tomānatu i faalogona o lē na tusia le Salamo 73. Na ia mātauina le olioli o nisi i se olaga e foliga mai e fiafia ma taulau manuia, e aunoa ma ni faafitauli. (Sala. 73:3-5, 12) A o vaavaai atu i lo latou taulau manuia, na ia manatu ai ua lē aogā ana taumafaiga e auauna iā Ieova. Na atuatuvale o ia “i le aso atoa” ona o na mafaufauga lē lelei. (Sala. 73:13, 14) Na faapefea ona ia foʻia ona faalogona o le lotovaivai?
12. E tusa ai ma le Salamo 73:16-18, na faapefea ona foʻia e le faisalamo ona popolega?
12 Faitau le Salamo 73:16-18. Na alu atu le faisalamo i le fale o Ieova, o se siʻomaga toʻafilemu. O i inā na mafai ai ona toe faasaʻo ona mafaufauga. Na ia iloa ai e ui lava e foliga mai e faigofie olaga o isi, ae e leai so latou faamoemoe mo le lumanaʻi. Ina ua ia malamalama i lenā tulaga, na toʻafilemu ai lona mafaufau ma iloa ai o le saʻilia o mea faaleagaga o le filifiliga lea e sili ona lelei. O le iʻuga, na toe faamalosia ai lona faanaunauga e auauna pea iā Ieova.—Sala. 73:23-28.
13. E faapefea ona e maua le filemu o le mafaufau pe afai e te lē o mautonu i filifiliga na e faia i le taimi ua teʻa? (Tagaʻi foʻi i le ata.)
13 E mafai foʻi ona e maua le filemu o le mafaufau, e ala i le Afioga a le Atua. E faapefea? Ia manatunatu i faamanuiaga ua e maua e aofia ai ʻoa i le lagi, ma faatusatusa i le taui e maua e i latou e tausinio i mea a le lalolagi. E pau le mea e latou te faatāuaina, o se olaga sologa lelei i le taimi lenei auā e leai so latou faamoemoe i le lumanaʻi. Peitaʻi, e anoanoaʻi mea lelei ua faia e Ieova mo oe i le taimi lenei, ma e tele atu isi faamanuiaga ua ia folafolaina atu mo le lumanaʻi. (Sala. 145:16) Ia mafaufau i le manatu lenei: E lē mautinoa po o le ā le ituaiga olaga e te mauaina i le taimi lenei, pe ana faapea e ese ni au filifiliga na fai i le taimi ua teʻa. Ae o le mea lenei e mafai ona e mautinoa i ai: O ē e faavae a latou filifiliga i le alofa i le Atua ma tuaoi, e leai se mea lelei e latou te misia.
PE A E LĒ MAUTONU PE E MAFAI ONA E FAIA PEA NISI MEA MO IEOVA
14. Aiseā ua lē mautonu ai nisi, ma o le ā le fesili e latou te ono fesili ifo ai?
14 O loo tauivi nisi o auauna a Ieova ma āuga o le soifua matua, o maʻi, po o aafiaga tumau i le tino ma le mafaufau. E ono oo iā i latou faalogona e faapea ua leai so latou tāua i le silafaga a Ieova. Atonu e latou te fesili ifo, ʻPe e mafai ona ou faia pea nisi mea mo Ieova?’
15. O le ā na mautinoa i ai lē na tusia le Salamo 71?
15 O le popolega foʻi lenā o lē na tusia le Salamo 71. Na ia tatalo: “Aua e te tuulafoaʻia aʻu ina ua mou atu loʻu malosi.” (Sala. 71:9, 18) E ui i lea, na mautinoa pea le faisalamo pe afai e auauna ma le faamaoni i le Atua, o le a taʻitaʻia ma lagolagoina o ia e Ieova. Na malamalama le faisalamo e faafiafiaina le finagalo o Ieova e i latou e faia le mea sili e auauna ai iā te Ia, e ui e faatapulaa lo latou malosi.—Sala. 37:23-25.
16. O ā mea e mafai ona faia pea e uso ma tuafāfine matutua mo Ieova? (Salamo 92:12-15)
16 Pe afai ua afu lou soifua, ia mafaufau i le silafaga a Ieova iā te oe. E mafai ona ia fesoasoani iā te oe ina ia e tutumau faaleagaga, e ui ua lē atoatoa lou malosi. (Faitau le Salamo 92:12-15.) Nai lo o le popole i mea ua lē mafai ona e faia, ia taulaʻi i mea e mafai ona e faia. O se faataʻitaʻiga, e mafai ona e faamalosiau i isi e ala i lau faaaʻoaʻoga faamaoni ma lou naunau moni i isi. Ia faasoa atu i isi auala na tausia ai oe e Ieova i tausaga ua teʻa, ma faailoa i ai lou faamoemoe i le faataunuuina o ana folafolaga. Aua foʻi e te manatu māmā i le telē o le aafiaga lelei o au tatalo mo isi. (1 Pete. 3:12) Po o le ā lava lo tatou tulaga, e iai mea e mafai ona tatou faia mo Ieova ma o tatou uso.
17. Aiseā e lē tatau ai ona tatou faatusatusaina i tatou i isi?
17 Afai ua e lotovaivai ona ua faatapulaa mea ua mafai ona e faia i le auaunaga iā Ieova, ia e mautinoa e matuā talisapaia e Ieova au taumafaiga. Aua e te faatusatusaina mea e te faia i mea o loo faia e isi. Aiseā? Auā e lē faatusatusaina e Ieova oe i isi. (Kala. 6:4) O se faaaʻoaʻoga, na foaʻi e Maria se suāuu manogi taugatā mo Iesu. (Ioa. 12:3-5) E tuufaafeagai lenā meaalofa i tupe iti e lua na foaʻi atu e le fafine mativa mo le malumalu. (Luka 21:1-4) E ui i lea, na silasila Iesu i foaʻi a na fafine e toʻalua, o se faamaoniga o lo la faatuatua. E matuā talisapaia foʻi e Ieova so o se mea e te faia ona o lou faamaoni ma lou alofa iā te ia, e tusa lava pe e faatauvaa i lou manatu.
18. O le ā e fesoasoani iā i tatou e foʻia ai o tatou faalogona lē mautonu? (Tagaʻi foʻi i le pusa “ E Mafai Ona Fesoasoani le Afioga a Ieova e Foʻia Ou Faalogona Lē Mautonu.”)
18 O i tatou uma lava, e iai taimi e tatou te aafia ai i faalogona lē mautonu. Ae e pei ona tatou iloiloina, e mafai ona foʻia na faalogona e ala i le fesoasoani a le Afioga a le Atua. Ia taumafai malosi e foʻia ou faalogona lē mautonu, ona mafai ai lea ona suia ou faalogona popole i le mautinoa. O le mea moni, e manatu mamafa mai Ieova iā te oe. E na te talisapaia au faataulaga, ma e finagalo o ia e tauia au taumafaiga. Ia e mautinoa e alofa ma e naunau mai Ieova i ana auauna faamaoni uma.
PESE 111 O Māfuaaga o lo Tatou Olioli
a E ui e lē o taʻua i le Tusi Paia le matua o Tavita ina ua filifilia o ia e Ieova, ae atonu e leʻi atoa le 20 o ona tausaga.—Tagaʻi i Le Olomatamata o Setema 1, 2011, itu. 29, pala. 2.