1. O ā nisi o meaalofa ua tatou maua mai iā Iesu?

 E LEAI se tagata e sili atu le limafoaʻi nai lo o Iesu. A o soifua i le lalolagi, na ia faaaogā lona mana e fai ai vavega e fesoasoani i isi. (Luka 9:​12-17) O le meaalofa silisili na ia faia mo i tatou, o le foaʻiina mai lea o lona ola mo i tatou. (Ioa. 15:13) Talu lona toetū mai, o loo faaauau ona faaalia e Iesu le limafoaʻi. Na talosaga atu Iesu iā Ieova ina ia liligi mai le agaga paia e aʻoaʻo ma faamāfanafanaina i tatou, e pei ona sa ia folafolaina mai. (Ioa. 14:​16, 17; 16:13) E ala i sauniga a le faapotopotoga, o loo faaauau ona faaauupegaina i tatou e Iesu e faia isi ma soo i le lalolagi aoao.—Mata. 28:​18-20.

2. O ai e aofia ai i “meaalofa i tagata” o loo taʻua i le Efeso 4:​7, 8?

² Seʻi o tatou iloiloina se isi meaalofa mai iā Iesu. Na tusi le aposetolo o Paulo ina ua afio aʻe Iesu i le lagi, “na ia foaʻiina mai meaalofa i tagata.” (Faitau le Efeso 4:​7, 8.) Na faapea mai Paulo na foaʻiina mai e Iesu nei meaalofa ina ia fesoasoani i le faapotopotoga i ni auala eseese. (Efe. 1:​22, 23; 4:​11-13) I aso nei, o nei “meaalofa i tagata” e aofia ai auauna o le faiva, toeaina o le faapotopotoga, ma ovasia o matagaluega. a Peitaʻi, e lē lelei atoatoa nei tane ma e latou te faia foʻi mea sesē. (Iako. 3:2) E ui i lea, e faaaogā e lo tatou Alii o Iesu Keriso i latou o lana meaalofa e fesoasoani iā i tatou.

3. Ia faataʻitaʻi pe e faapefea ona tatou lagolagoina galuega o loo faia e “meaalofa i tagata.”

³ Na tofia e Iesu nei “meaalofa i tagata” e atiaʻe le faapotopotoga. (Efe. 4:12) Ae e mafai e i tatou uma ona fesoasoani  iā i latou e tauave lenā tiute tauave tāua. O se faataʻitaʻiga: O nisi o i tatou o loo galulue i le fausiaina o se Maota mo Sauniga. O isi e lagolagoina le galuega e ala i le saunia o taumafataga, o auala o femalagaaʻiga, ma isi auaunaga. I se tulaga talitutusa, e mafai e i tatou uma ona lagolagoina galuega a auauna o le faiva, toeaina, ma ovasia o matagaluega e ala i a tatou upu ma gaoioiga. O le a tatou iloiloina aogā e tatou te maua mai i a latou galuega fitā, ma auala e faaalia ai lo tatou talisapaia o i latou ma Iesu, o lē na foaʻiina mai nei “meaalofa i tagata.”

O “GALUEGA FESOASOANI” O LOO FAIA E AUAUNA O LE FAIVA

4. O ā nisi o “galuega fesoasoani” na faia e auauna o le faiva i le uluaʻi senituri?

⁴ Na tofia nisi o uso e avea o ni auauna o le faiva i le uluaʻi senituri. (1 Timo. 3:8) E foliga mai na latou faatinoina “galuega fesoasoani” e pei ona taʻua e Paulo. (1 Kori. 12:28) Na faia e auauna o le faiva nisi o galuega tāua ina ia mafai ai ona uaʻi atu toeaina i le aʻoaʻoina ma le leoleoina o le faapotopotoga. O se faaaʻoaʻoga, atonu na fesoasoani auauna o le faiva i le faia o kopi o Tusitusiga Paia, po o le faatauina mai o mea na manaʻomia mo lenā galuega.

5. O ā nisi o galuega fesoasoani o loo faia e auauna o le faiva i aso nei?

⁵ Seʻi manatu i nisi o galuega fesoasoani o loo faia e auauna o le faiva i la outou faapotopotoga. (1 Pete. 4:10) E mafai ona tofia i latou e vaaia tala o le tupe a le faapotopotoga po o oganuu, ota lomiga ma tufa atu i le ʻautalaʻi, galulue i masini faaleotele leo ma vitiō, auauna o ni tautua, pe fesoasoani e faaleleia le Maota mo Sauniga. E tāua nei auaunaga uma auā le sologa lelei ma le maopoopo o le faapotopotoga. (1 Kori. 14:40) E taulima e nisi auauna o le faiva vaega i le Sauniga o le Faiva ma le Olaga Faa-Kerisiano ma faia lauga lautele. E mafai foʻi ona tofia se auauna o le faiva e fesoasoani i se ovasia mo vaega o le talaʻiga. E iai taimi e galulue ai foʻi auauna o le faiva agavaa ma toeaina i le faia o asiasiga faaleoleo mamoe.

6. O ā nisi o māfuaaga e tatou te talisapaia ai auauna o le faiva o loo galulue mamafa?

⁶ E faapefea ona aogā i le faapotopotoga galuega o loo faia e auauna o le faiva? Ua faapea mai Beberly b o se tuafafine i Polivia: “E ese loʻu fiafia i sauniga ona o galuega a auauna o le faiva. Ua mafai ai ona ou usuina pese, faia ni oʻu sao, faalogologo i lauga, ma aʻoaʻoina ni lesona mai i vitiō ma ata. E latou te faamautinoa le tulaga saogalemu i taimi o sauniga, ma fesoasoani i ē o loo auai e faaaogā ai le Initaneti. Pe a māeʻa sauniga, e taulamua i latou i galuega faamamā, le vaaia o foaʻi tauofo, ma faamautinoa e maua lomiga e tatou te manaʻomia. Ou te matuā talisapaia i latou.” Ua faapea mai Leslie, o lē e nofo i Kolomepia ma o loo auauna o se toeaina lana tane: “E faalagolago laʻu tane i auauna o le faiva e faia nisi o galuega. Pe ana leai i latou, semanū e leai se taimi e mālōlō ai laʻu tane. Ou te faafetai i lo latou sogasogā ma le naunau e fesoasoani.” E mautinoa o o tatou faalogona foʻi na.—1 Timo. 3:13.

7. E faapefea ona faaalia lo tatou lotofaafetai mo auauna o le faiva? (Tagaʻi foʻi i le ata.)

⁷ O le mea moni, e tatou te lagona le lotofaafetai i uso o loo avea ma auauna o le faiva. Peitaʻi, o loo timaʻi mai le Tusi Paia: “Ia faaalia foʻi lo outou lotofaafetai.” (Kolo. 3:15) O le auala lenei e faaalia ai le lotofaafetai o Krzysztof, o se toeaina mai i Finilani: “E lafo laʻu card po o se feʻau tusitusia e taʻua ai se  mau po o se auala patino na faalaeiauina ai aʻu e se auauna o le faiva, po o māfuaaga foʻi ou te talisapaia ai ana galuega.” E masani ona faaaofia auauna o le faiva i tatalo a Pascal ma Jael, o ē e nonofo i Niu Kaletonia. Ua faapea mai Pascal, “Ua faaaofia nei uso i a ma talosaga, ōlega, ma tatalo o le faafetai.” E mautinoa e faafofogaina e Ieova na tatalo, lea e aogā i le faapotopotoga atoa.—2 Kori. 1:11.

O TOEAINA O LE FAAPOTOPOTOGA “O LOO GALULUE FITĀ MO OUTOU”

8. Aiseā na tusi ai Paulo e faapea na “galulue fitā” toeaina i le uluaʻi senituri? (1 Tesalonia 5:​12, 13)

⁸ Na galulue fitā toeaina mo le faapotopotoga i le uluaʻi senituri. (Faitau le 1 Tesalonia 5:​12, 13; 1 Timo. 5:17) Na latou “vaavaaia” le faapotopotoga, lea na aofia ai le faia o sauniga ma le faia o faaiʻuga o se ʻautoeaina. Na latou “apoapoaʻi” atu i uso ma tuafāfine, e ala i le saunia o fautuaga patino i se auala agalelei ina ia puipuia ai le faapotopotoga. (1 Tesa. 2:​11, 12; 2 Timo. 4:2) I le taimi e tasi, na galulue mamafa nei tane e tausia o latou aiga ma faamalosia lo latou lava itu faaleagaga.—1 Timo. 3:​2, 4; Tito 1:​6-9.

9. O ā nisi o tiute tauave o loo gafa ma toeaina i as o nei?

⁹ E matuā pisi foʻi toeaina i aso nei. O i latou o ni faievagelia. (2 Timo. 4:5) E latou te maelega e taʻimua i le faiva i le fanua, faamaopoopo le galuega talaʻi i oganuu i o latou vaipanoa, ma saunia toleniga lelei mo i tatou i le galuega talaʻi ma le aʻoaʻo atu. E avea foʻi i latou o ni faamasino e alolofa mutimutivale ma lē faailoga tagata. Pe a faia e se Kerisiano se agasala matuiā, e naunau toeaina e fesoasoani i lenā tagata ia toe faaleleia lana faiā ma Ieova. I le taimi e tasi, e latou te faaeteete e tausia pea le tulaga mamā o le faapotopotoga. (1 Kori. 5:​12, 13; Kala. 6:1) O le galuega autū a toeaina, o le avea o ni leoleo mamoe. (1 Pete. 5:​1-3) E latou te tauaaoina lauga faale-Tusi Paia ua lava saunia, taumafai e faamasani i sui uma o le faapotopotoga, ma faia asiasiga faaleoleo mamoe. E faaopoopo atu i isi tofiga, e fesoasoani foʻi nisi toeaina i le fausiaina ma le toe faaleleia o Maota mo Sauniga, faamaopoopo tauaofiaga, faapea galuega a Komiti mo Mataupu Tau Falemaʻi ma Vaega e Asiasi i Tagata Mamaʻi. Ioe, e galulue mamafa toeaina mo i tatou!

10. O ā nisi o māfuaaga e tatou te talisapaia ai toeaina galulue mamafa i a tatou faapotopotoga?

¹⁰ Na valoia e Ieova o le a tausia lelei i tatou e leoleo mamoe, ma e tatou te ʻlē toe fefefe pe matataʻu.’ (Iere. 23:4) Na tofo Johanna o se tuafafine i Finilani, i le moni o na upu ina ua maua lona tinā i se gasegase tugā. Na faapea mai o ia: “E ui e faigatā ona ou faamatala atu oʻu faalogona i se tasi, ae na iai se toeaina ou te leʻi masani lelei ai na faalogologo mai ma le onosaʻi, faia se tatalo mo aʻu, ma faamautinoa mai e alofa Ieova iā te aʻu. Ou te leʻi manatua lelei ana faamatalaga, ae ou te manatua le toʻafilemu o oʻu faalogona. Ou te talitonu na auina mai o ia e Ieova i le taimi tonu na ou manaʻomia ai le fesoasoani.” O ā ni auala ua fesoasoani atu ai toeaina o lau faapotopotoga iā te oe?

11. E faapefea ona faaalia lo tatou talisapaia o toeaina? (Tagaʻi foʻi i le ata.)

¹¹ E finagalo Ieova e faaalia lo tatou talisapaia o toeaina “ona o la latou galuega.” (1 Tesa. 5:​12, 13) Na faapea mai Henrietta o lē nofo i Finilani: “E naunau toeaina e fesoasoani i isi, ae e lē faapea ai ua tele atu lo latou taimi avanoa po o le malosi nai lo o isi tagata, pe e leai foʻi ni luʻi o loo latou fesagaʻia. O isi taimi ou te faapea atu iā i latou, ʻE te iloa oe,  e ese loʻu talisapaia o au galuega lelei.’” Na faapea mai se tuafafine e igoa iā Sera i Türkiye: c “E manaʻomia e toeaina faalaeiauga ina ia galulue ai pea. E mafai ona ave i ai se card, valaaulia i latou mo se taumafataga, pe galulue ma i latou i le faiva i le fanua.” Pe e iai se toeaina e te talisapaia ana galuega? Ia saʻili ni avanoa e faailoa i ai lou lototalisapaia.—1 Kori. 16:18.

E ATIAʻE E OVASIA O MATAGALUEGA FAAPOTOPOTOGA

12. O le ā le faatulagaga na saunia e atiaʻe ai faapotopotoga i le uluaʻi senituri? (1 Tesalonia 2:​7, 8)

¹² Na saunia foʻi e Keriso Iesu “meaalofa i tagata” e latou te auauna i se isi auala. O le taʻitaʻiga a Iesu na aauina atu ai e toeaina i Ierusalema Paulo, Panapa, ma isi uso e auauna o ni ovasia femalagaaʻi. (Galu. 11:22) Aiseā? E pei foʻi o le māfuaaga na tofia ai auauna o le faiva ma toeaina, ina ia atiaʻe faapotopotoga. (Galu. 15:​40, 41) E tele faataulaga na faia e nei tane ma na oo foʻi ina lamatia o latou ola, ina ia aʻoaʻo ma faalaeiau faapotopotoga.—Faitau le 1 Tesalonia 2:​7, 8.

13. O ā nisi o tiute tauave o loo gafa ma ovasia o matagaluega?

¹³ E faimalaga i le tele o taimi ovasia o matagaluega. O nisi o i latou e faimalaga mo le faitau selau o kilomita i le vā o faapotopotoga. I vaiaso taʻitasi, e tauaao e se ovasia o le matagaluega ni lauga, faia asiasiga faaleoleo mamoe, fono a paeonia, fono a toeaina, ma taʻimua i faatasiga mo talaʻiga. E na te saunia ni lauga ma faamaopoopo fonotaga matagaluega ma tauaofiaga. E avea foʻi o ia ma faiaʻoga i aʻoga paeonia, faatulaga se fono faapitoa ma paeonia i le matagaluega, ma taulimaina isi mataupu ua tofia ai o ia e le lālā  aemaise lava pe afai o ni mataupu faanatinati.

14. O ā nisi o māfuaaga e tatou te talisapaia ai a tatou ovasia o matagaluega e galulue mamafa?

¹⁴ E faapefea ona aogā i faapotopotoga galuega tāua a ovasia o matagaluega? Na faapea mai se uso i Türkiye e faatatau i asiasiga a ovasia femalagaaʻi: “O a latou asiasiga uma e faalaeiauina ai aʻu e faaalu se taimi e fesoasoani ai i oʻu uso ma tuafāfine. E tele ovasia o matagaluega ua ou feiloaʻi i ai, ae na ou mātauina e leai ma se tasi o nei uso na foliga mai na pisi naʻuā pe e leʻi manaʻo e talanoa mai iā te aʻu.” Na galulue Johanna lea na taʻua muamua, ma se ovasia o le matagaluega i le faiva. Na faapea mai Johanna, “E lē galo iā te aʻu lenā aso, e ui e leʻi maua se isi i le fale. Na ou matuā misia lava oʻu uso e toʻalua, lea na faatoʻā siitia atu i se isi nofoaga. Ae na faalaeiauina aʻu e le ovasia matagaluega ina ia ou iloa, atonu e lē mafai ona tatou nonofo vavalalata ma o tatou aiga ma uō i le taimi lenei, ae i le lalolagi fou o le a tele avanoa e tatou te faatasitasi ai ma i latou.” I se tulaga talitutusa, e toʻatele ovasia o matagaluega e māfana a latou faauōga ma ē o loo i a latou matagaluega.—Galu. 20:37–21:1.

15. (a) E tusa ai ma le 3 Ioane 5-8, e faapefea ona faaalia lo tatou talisapaia o ovasia o matagaluega? (Tagaʻi foʻi i le ata.) (e) Aiseā e ao ai ona tatou manatu mamafa i avā a uso tofia, ma e faapefea ona tatou faia faapea? (Tagaʻi i le pusa “ Ia Manatua a Latou Avā.”)

¹⁵ Na faalaeiau atu le aposetolo o Ioane iā Kaio ina ia talimālō i uso asiasi, ma “tapena la latou malaga e tusa ai ma le finagalo o le Atua.” (Faitau le 3 Ioane 5-8.) O se tasi o auala e tatou te faia ai faapea, o le valaaulia lea o le ovasia o le matagaluega mo se taumafataga. O se isi auala, o le lagolagoina lea o faatulagaga mo talaʻiga i taimi o ana asiasiga. E iai isi auala e faaalia ai e Leslie lea na taʻua  muamua lona lotofaafetai. Na ia faapea mai: “Ou te tatalo ina ia tausia e Ieova o latou manaʻoga. Na tusi a ma tusi ma laʻu tane e faailoa i ai le telē o le aogā o a latou asiasiga iā i maʻua.” Ia manatua, e feagai foʻi ovasia o matagaluega ma faafitauli ma lagona le vaivai e pei o i tatou. E iai taimi e aafia ai i maʻi, popolega, ma le lotovaivai. Atonu o le a avea au upu faalaeiau po o sina meaalofa, e fai ma tali o tatalo a la outou ovasia o le matagaluega mo se fesoasoani.—Faata. 12:25.

E TATOU TE MANAʻOMIA “MEAALOFA I TAGATA”

16. E tusa ai ma le Faataoto 3:​27, o ā ni fesili e ono fesili ifo ai uso iā i latou lava?

¹⁶ O loo iai le manaʻoga i le lalolagi aoao mo uso e auauna o ni “meaalofa i tagata.” Afai o oe o se uso ua papatiso, pe e “mafai ona e fesoasoani” atu? (Faitau le Faataoto 3:27) Pe e mafai ona e galue ia agavaa e avea o se auauna o le faiva? Pe e mafai ona e aapa atu e avea o se toeaina ina ia fesoasoani i manaʻoga o uso? d Pe e mafai ona fetuunaʻi lou tulaga ina ia e auai i le Aʻoga mo Tagata Talaʻi o le Malo? E saunia e lenā aʻoga toleniga ina ia atili ai ona e agavaa e faaaogā oe e Iesu mo le auaunaga. Pe afai e te lagona e lē mafai ona e faia faapea, ia tatalo iā Ieova. Ia talosaga atu mo lona agaga paia e fesoasoani iā te oe e faatino so o se tofiga ua tuuina mai.—Luka 11:13; Galu. 20:28.

17. O le ā ua faamaonia mai i “meaalofa i tagata” e faatatau i lo tatou Tupu o Keriso Iesu?

¹⁷ O se faamaoniga o le taʻitaʻiga a Iesu i nei aso e gata ai, o tane ua ia tofia o ni “meaalofa i tagata.” (Mata. 28:20) Pe e tatou te lē lotofaafetai ea ona e lotoalofa, limafoaʻi, ma mataala lo tatou Tupu i le saunia o uso agavaa e tausia o tatou manaʻoga? Ia tatou saʻili avanoa e faaalia ai lo tatou talisapaia o nei tane galulue mamafa. Ia tatou faafetai e lē aunoa iā Ieova, auā o ia o le Puna “o meaalofa lelei uma ma mea uma e atoatoa ona lelei.”—Iako. 1:17.