SUʻESUʻEGA 38
“Ia Outou ō Mai iā te Aʻu . . . Ona Ou Faafouina Lea o Outou”
“Ia outou ō mai iā te aʻu o outou uma ua tigāina ma mafatia i avega, ona ou faafouina lea o outou.”—MATA. 11:28.
PESE 17 “Ou te Loto i Ai”
AOTELEGA *
1. O le ā le folafolaga a Iesu o loo i le Mataio 11:28-30?
NA FAIA e Iesu se folafolaga matagofie i se motu o tagata e toʻatele na faalogologo atu iā te ia. Na ia faapea atu, “Ia outou ō mai iā te aʻu, ona ou faafouina lea o outou.” (Faitau le Mataio 11:28-30.) E lē na o ni upu lenei folafolaga. O se faaaʻoaʻoga, seʻi mafaufau i lana gaoioiga na fai mo se fafine na mafatia i se maʻi e matuā leaga.
2. O le ā na faia e Iesu mo se fafine maʻi?
2 Na matuā manaʻomia e le fafine le fesoasoani. Na ia saʻili atu i le tele o fomaʻi mo se vaifofō o lona gasegase. Ina ua mavae le 12 tausaga o mafatia, e leʻi mafai lava ona togafitia o ia. E tusa ai ma le tulafono, o ia o se tagata e lē mamā. (Levi. 15:25) Ae na ia faalogo e mafai e Iesu ona faamālōlō maʻi, o lea na ia saʻilia ai o ia. Ina ua maua e le fafine o ia, na ia paʻi atu i le pito o le ofu tele o Iesu, ma na malosi ai o ia i le taimi lava lenā! E lē gata na faamālōlō e Iesu le tino o le fafine, ae na toe lagona e le fafine le alofagia ma le faaaloalogia o ia. O se faaaʻoaʻoga, a o talanoa atu Iesu iā te ia, na ia faaaogā faaupuga māfana ma faaaloalo, “loʻu afafine e.” Maʻeu le faafouina ma le faamalosia o faalogona o lenā fafine!—Luka 8:43-48.
3. O ā fesili o le a tatou taliina?
3 Ia mātau, na alu le fafine iā Iesu. Na tausolomua le fafine. E faapena foʻi i aso nei, e tatau ona tatou faia taumafaiga uma e ō ai iā Iesu. I lenei taimi, e lē faavavega ona faamālōlō e Iesu
maʻi a i latou e ō atu iā te ia. Peitaʻi, o loo ia faasafua pea le valaaulia: “Ia outou ō mai iā te aʻu . . . ona ou faafouina lea o outou.” I lenei mataupu, o le a tatou taliina ai fesili e lima: E faapefea ona tatou ō iā Iesu? O le ā na uiga atu i ai Iesu ina ua ia fetalai: “Ia outou amoina laʻu amo”? O le ā e tatou te aʻoaʻoina mai iā Iesu? Aiseā e faafouina ai le galuega ua ia tuuina mai iā i tatou? Ma e faapefea ona tatou maua pea le faafouina i le amoina o le amo a Iesu?“IA OUTOU Ō MAI IĀ TE AʻU”
4-5. O ā nisi o auala e tatou te ō ai iā Iesu?
4 O se tasi o auala e tatou te ō ai iā Iesu, o le aʻoaʻoina lea o ana fetalaiga ma gaoioiga i le tele e mafai ai. (Luka 1:1-4) E leai se isi e faia lea gaoioiga mo i tatou, e tatau ai la ona suʻesuʻe lava e i tatou nei faaaʻoaʻoga. E tatou te ō foʻi iā Iesu e ala i le faia o le filifiliga e papatiso ma avea ma ona soo.
5 O le isi auala e tatou te ō ai iā Iesu, e ala i le tatou ō i toeaina o le faapotopotoga pe a manaʻomia le fesoasoani. E faaaogā e Iesu nei “meaalofa i tagata” e tausia ana mamoe. (Efe. 4:7, 8, 11; Ioa. 21:16; 1 Pete. 5:1-3) E tatau ona tatou tausolomua e saʻili mo la latou fesoasoani. E tatou te lē faatalitalia toeaina e iloa mea o loo i o tatou mafaufau ma mea o loo tatou manaʻomia. Seʻi mātau le mea na taʻua e se uso e igoa iā Julian: “Na ou tuua loʻu tofiga i le Peteli ona o māfuaaga tau le soifua mālōlōina, ae na faalaeiau mai se tasi o aʻu uō ou te talosaga mo se asiasiga faaleoleo mamoe. I le taimi muamua, na ou manatu ou te lē manaʻomia. Ae mulimuli ane, na ou talosaga mo le fesoasoani, ma o lenā asiasiga faaleoleo mamoe o se tasi o meaalofa sili na ou mauaina!” O toeaina faamaoni e pei o i laʻua na asiasi iā Julian, e mafai ona fesoasoani iā i tatou e iloa “le finagalo o Keriso,” o le malamalama lea i le auala e mafaufau ai Iesu ma ona uiga, ma faaaʻoaʻo i ai. (1 Kori. 2:16; 1 Pete. 2:21) O la latou fesoasoani, o se tasi lea o meaalofa sili ua latou saunia mo i tatou.
“IA OUTOU AMOINA LAʻU AMO”
6. O le ā na uiga i ai Iesu ina ua ia fetalai: “Ia outou amoina laʻu amo”?
6 Ina ua faapea mai Iesu: “Ia outou amoina laʻu amo,” atonu e uiga atu i le “ia amanaʻia laʻu pule.” E mafai foʻi ona uiga atu i le “sau ta amo faatasi, ma ta galulue faatasi mo Ieova.” Po o le ā lava le manatu, o le amo e uiga atu i le galulue mo lo tatou matai.
7. I le Mataio 28:18-20, o le ā le galuega ua tuu mai e tatou te faia, ma o le ā le faamautinoaga o loo i ai?
7 E tatou te talia le valaaulia a Iesu pe a tuuina atu o tatou ola iā Ieova ma papatiso. O loo faasafua atu lenā valaaulia i tagata uma, ma e lē teena e Iesu se isi e manaʻo moni e auauna i le Atua. (Ioa. 6:37, 38) Ua iai i soo uma o Iesu se faaeaga o le faia o se sao i le galuega na tuuina atu e Ieova iā Iesu e fai. E mafai ona tatou mautinoa o le a fesoasoani mai pea Iesu iā i tatou, e faatino lenā galuega.—Faitau le Mataio 28:18-20.
IA “FAAAʻOAʻO MAI IĀ TE AʻU”
Ia faafouina isi e pei ona sa faia e Iesu (Tagaʻi i palakalafa e 8-11) *
8-9. Aiseā na tosina ai tagata lotomaulalo iā Iesu, ma o ā fesili e tatau ona tatou fesili ifo ai iā i tatou lava?
8 Na tosina tagata lotomaulalo iā Iesu. (Mata. 19:13, 14; Luka 7:37, 38) Aiseā? Ia mātau le eseesega o Iesu ma le ʻau Faresaio. O nei taʻitaʻi lotu e lē alolofa ma e faamaualuluga. (Mata. 12:9-14) Ae o Iesu e māfana ma lotomaulalo. E fia matamuamua le ʻau Faresaio ma mimita i o latou tulaga maualuluga. Peitaʻi na faalaeiau e Iesu ona soo e ʻalofia le faauaʻi atu o tagata iā i latou. Na ia aʻoaʻo foʻi i latou ina ia manatu iā i latou o ni auauna faatauvaa. (Mata. 23:2, 6-11) Na faamataʻu e le ʻau Faresaio tagata ina ia usitaʻi iā i latou. (Ioa. 9:13, 22) Ae na faafouina e Iesu tagata i ana gaoioiga agalelei ma ana upu faalaeiau.
9 Po ua e faaaʻoaʻo i faaaʻoaʻoga nei a Iesu? Ia fesili ifo iā te oe lava: Po o i ai soʻu talaaga o sē e agamalu ma lotomaulalo? Pe ou te faia ma le lotomalie ni galuega faatauvaa mo isi? Po o oʻu faaalia le agalelei i isi?
10. O le ā le ituaiga siʻomaga na atiaʻe e Iesu?
10 Na atiaʻe e Iesu se siʻomaga filemu ma faaleuō mo ē na latou galulue faatasi, ma na ia fiafia e toleni i latou. (Luka 10:1, 19-21) Na ia faalaeiau ona soo e fesili, ma na ia fia iloa o latou manatu. (Mata. 16:13-16) E pei lava ona ola lelei o laau i se togālaau ua faasūsūina lelei, sa faapena foʻi ona taulau manuia le faiva a soo o Iesu, ona o le siʻomaga na ia toleniina ai i latou. Na latou faatatauina lesona mai i mea na aʻoaʻoina ai i latou e Iesu, ma fua mai ai fua lelei o a latou galuega.
Ia avea ma se tasi e faigofie ona talanoa i ai ma ia faaleuō
Ia toʻaga ma maelega
Ia lotomaulalo ma ia galue mamafa *
11. O ā fesili e manaʻomia ona tatou fesili ifo ai iā i tatou lava?
11 Po o iā te oe se tofiga e pulea ai ni tagata? Afai o lea, ia fesili ifo: ʻO le ā le ituaiga siʻomaga o oʻu atiaʻe i le galuega ma le aiga? Po o oʻu faatupuina le filemu? Pe ou te faalaeiau isi e fesili? Ma pe ou te lotomalie e faalogo atu i o latou manatu?’ E tatou te lē fia pei o le ʻau Faresaio, o ē na feita i tagata na fesiligia i latou. Na latou sauāina foʻi tagata e faaali ni manatu e ese mai i o latou manatu.—Mare. 3:1-6; Ioa. 9:29-34.
“ONA FAAFOUINA AI LEA O OUTOU”
12-14. Aiseā e faafouina ai le galuega ua tuuina mai e Iesu e tatou te faia?
12 Aiseā e faafouina ai i lo tatou faia o le galuega na tuu mai e Iesu iā i tatou? E tele māfuaaga, ae mātau nisi o māfuaaga nei.
13 Ua iā i tatou ovasia e sili ona lelei. O Ieova o lo tatou Ovasia Silisili, e lotofaafetai ma e lē o se matai sauā. E na te talisapaia galuega tatou te faia. (Epe. 6:10) E na te foaʻi mai foʻi le malosi e tatou te manaʻomia, e tauave ai a tatou avega. (2 Kori. 4:7; Kala. 6:5) Ua faataatia e Iesu lo tatou Tupu se faaaʻoaʻoga lelei i le auala na feutagaʻi ai ma isi. (Ioa. 13:15) E taumafai foʻi toeaina o loo leoleoina i tatou, e faaaʻoaʻo iā Iesu “le leoleo mamoe sili o mamoe.” (Epe. 13:20; 1 Pete. 5:2) A o latou fafaga ma puipuia i tatou, e latou te taumafai malosi e faaalia le agalelei, fefaalaeiauaʻi ma lototetele.
14 Ua iā i tatou uō e sili ona lelei. E iai se fuafuaga o o tatou olaga ma le fusi o le alofa, lea e lē maua i isi tagata. Seʻi mafaufau: Ua iā i tatou le faaeaga o le galulue faatasi ma tagata e i ai tapulaa tauamio e sili ona maualuluga, ae e lē faafiaamiotonu. E talenia ae e iloa le mea e gata ai lo latou malosi, ma e latou te manatu e sili isi nai lo o i latou. E latou te manatu foʻi o i tatou o ni ʻaufaigaluega faatasi ma i latou, ma o ni uō foʻi. O le matuā māfana o lenā faiā, ua lotomalilie ai e faataulaga o latou ola mo i tatou!
15. O ā o tatou faalogona e faatatau i le galuega o loo tatou faia?
15 Ua tatou maua le galuega e sili ona lelei. E tatou te aʻoaʻoina tagata i le upu moni e faatatau iā Ieova, ma e tatou te faailoa atu pepelo a le Tiapolo. (Ioa. 8:44) Ua faaee e Satani i tagata avega mamafa e lē mafai ona amoina. O se faataʻitaʻiga, e manaʻo ia tatou talitonu e lē faamagaloina e Ieova a tatou agasala, ma e lē alofa foʻi iā i tatou. O se pepelo matuiā ua avea ma avega mamafa! Pe a tatou ō iā Keriso, o le a faamagaloina a tatou agasala. Ma o le mea moni, e alofa tele Ieova iā i tatou uma. (Roma 8:32, 38, 39) O se faaeaga iā i tatou le fesoasoani i tagata ina ia latou faalagolago iā Ieova, ma faaleleia o latou olaga!
IA FAAFOUINA PEA I LE AMOINA O LE AMO A IESU
16. O le ā le eseesega o le avega o loo finagalo Iesu e tatou te tauaveina, mai i isi avega tauave?
16 O le avega o loo finagalo Iesu e tatou te tauaveina, e ese mai i isi avega tauave. O se faataʻitaʻiga, pe a mānava mai i se galuega totogi, e toʻatele e matuā vaivai ma lē faamalieina. I se faaeseesega, e tatou te lagona le matuā faamalieina pe a māeʻa ona faaalu le taimi e auauna ai iā Ieova ma Keriso. E tatou te ono lagona le matuā vaivai pe a mānava mai i galuega, ae e tatou te faamalolosi e auai i se sauniga i lenā pō. E masani lava, pe a toe foʻi i le fale ina ua māeʻa le sauniga, e lagona le faafouina ma faamalosia ai. E faapena foʻi pe a fai a tatou taumafaiga e talaʻi, pe faia foʻi a tatou lava suʻesuʻega o le Tusi Paia. E sili atu le taui e tatou te maua nai lo o le malosi na alu ai!
17. Aiseā e tatau ai ona tatou talia le tulaga moni o mea ma ia faaeteete?
17 E tatau ona tatou talia le tulaga moni o mea. E eseese uma o tatou malosi ma mea e tatou te mafaia. O lea, e tatau ona tatou faaeteete i le tele o mea e tatou te faia. O se faaaʻoaʻoga, e mafai ona maʻimau lo tatou malosi i le saʻilia o meafaitino. Ia mātau le fetalaiga a Iesu i se tauleʻaleʻa mauʻoa na fesili atu iā te ia: “O ā ni mea e tatau ona ou faia ina ia ou maua ai le ola e faavavau?” O loo usitaʻi le tauleʻaleʻa i le Tulafono. Atonu o ia o se tauleʻaleʻa lelei auā i le tusi a le Evagelia o Mareko, o loo manino ai faaupuga, ʻua alofa Iesu iā te ia.’ Na valaaulia e Iesu le tauleʻaleʻa ma faapea atu, “Ia e alu e faatau atu au meafaitino ona e sau ai lea ma mulimuli mai iā te aʻu.” Na matuā faanoanoa le tauleʻaleʻa, ma e foliga mai e lē mafai ona ia tuua le ʻtele o ana meafaitino.’ (Mare. 10:17-22) O le iʻuga, e na te leʻi taliaina le amo a Iesu na ofo atu iā te ia, ae na faaauau pea ona ia pologa i “ʻOa.” (Mata. 6:24) Pe a na o oe, o le ā lau filifiliga e fai?
18. O le ā e ao ona tatou faia mai i lea taimi i lea taimi, ma aiseā?
18 Mai i lea taimi i lea taimi, e lelei ona toe iloilo mea e faamuamua i le olaga. Aiseā? Ina ia mafai ai ona tatou faamautinoa o loo faaaogā tatau o tatou malosi. Ia mātau le tala a le talavou e igoa iā Mark: “Mo le tele o tausaga, na ou manatu sa ou ola i se olaga faigofie. Na ou paeonia, ae tele a na ou mafaufau i tupe ma le mauaina o se olaga sologa lelei. Na ou taumānatu pe aiseā ua lē fiafia ai loʻu olaga. Ae na faatoʻā ou iloa ane, na ou faamuamua le saʻilia o oʻu lava manaʻoga, ae avatu iā Ieova le taimi ma le malosi na totoe.” Sa faia e Mark ni fetuunaʻiga i le auala e mafaufau ma ola ai. Na ia faaalu le tele o lona taimi e faia ai le tele o mea i le auaunaga iā Ieova. Ua faapea atili mai o ia, “Ou te lagona le popole i nisi taimi, ae o le fesoasoani a Ieova ma Iesu, ua mafai ai ona foʻia oʻu faafitauli.”
19. Aiseā e matuā tāua ai le i ai o se vaaiga saʻo?
19 E faafouina pea i tatou i le amoina o le amo a Iesu, pe a tatou faia mea nei e tolu. Muamua, ia faatumau pea le vaaiga saʻo. O loo tatou faia le galuega a Ieova, e tatau la ona fai i le auala a Ieova. O i tatou o tagata galulue, a o Ieova o le Matai. (Luka 17:10) Pe a tatou taumafai e fai lana galuega i la tatou auala, o le a faigatā la ona tatou amoina le amo a Iesu. E oo lava i se povi poʻa malosi, e mafai ona faamanuʻalia ma vaivai, pe a taumafai pea e alu i le ala o loo manaʻo ai, ma faasagatau ai i le taʻitaʻiga a lona matai. I le isi itu, e mafai ona tatou faia mea e sili atu ma foʻia so o se faafitauli, pe a mulimuli i le taʻitaʻiga a Ieova. Ia manatua, e lē mafai e se tasi ona taofia le faataunuuina o lona finagalo!—Roma 8:31; 1 Ioa. 4:4.
20. O le ā e uunaʻia ai i tatou e amo faatasi ma Iesu lana amo?
Ioa. 6:25-27, 51, 60, 66; Fili. 3:18, 19) I se faaeseesega, o i latou na uunaʻia i le alofa lē manatu faapito i le Atua ma le alofa i tuaoi, na amoina ma le fiafia le amo i o latou olaga atoa i le lalolagi, ma faamoemoe e auauna faatasi ma Keriso i le lagi. E pei o i latou, o le a tatou fiafia pea i le amoina o le amo a Iesu ma le uunaʻiga saʻo.
20 Lua, ia gaoioi ma se uunaʻiga saʻo. O lo tatou sini o le faamamaluina o lo tatou Tamā alofa, o Ieova. O i latou i le uluaʻi senituri na uunaʻia i le manaʻo tele po o le manatu faapito, na vave mou ese lo latou fiafia ma lafoaʻia le amo a Iesu. (21. E tusa ai o le Mataio 6:31-33, o le ā e tatou te faatalitalia o le a faia e Ieova?
21 Tolu, ia saʻo mea e faatalitalia. Ua tatou filifilia se olaga faataulaga ma galuega mamafa. Na lapataʻi mai Iesu o le a sauāina i tatou. Ae e tatou te faatalitalia e foaʻi mai e Ieova le malosi e onosaia ai so o se faafitauli. O le tele e tatou te onosaʻi ai, o le atili foʻi lenā ona tatou malolosi. (Iako. 1:2-4) E tatou te faatalitalia foʻi o le a saunia e Ieova mea e tatou te manaʻomia, o le a leoleoina i tatou e Iesu, ma o le a faalaeiauina i tatou e o tatou uso ma tuafāfine. (Faitau le Mataio 6:31-33; Ioa. 10:14; 1 Tesa. 5:11) Ua iā i tatou mea uma e tatou te manaʻomia e fesagaʻia ai so o se faafitauli!
22. O le ā e tatou te lotofaafetai ai?
22 O le fafine lea na faamālōlōina e Iesu na faafouina i lenā lava aso. Ae e mafai ona faafouina e faavavau o ia, pe afai na avea o ia ma soo faamaoni o Keriso. O le ā sou manatu, o le ā na ia faia? Afai na ia filifili e amo faatasi ma Iesu, maʻeu se taui o le auauna faatasi ma Iesu i le lagi! O so o se faataulaga na ia faia e mulimuli ai i le Keriso, e matuā itiiti lava pe a faatusatusa i le faamanuiaga o le auauna faatasi ma Iesu i le lagi. Po o le ā lava lo tatou faamoemoe, pe ola e faavavau i le lagi po o le lalolagi, e tatou te lotofaafetai ona o lo tatou taliaina o le valaaulia a Iesu: “Ō mai iā te aʻu!”
PESE 13 O Keriso lo Tatou Faaaʻoaʻo
^ pala. 5 O loo valaaulia i tatou e Iesu e ō atu iā te ia. O le ā e aofia i le taliaina o lana valaaulia? O le a taliina i lenei suʻesuʻega lenā fesili, ma o le a faamanatu mai ai auala e tatou te maua ai le faafouina pe a galulue faatasi ma Keriso.
^ pala. 60 FAAMATALAGA O ATA: E tele auala na faafouina ai e Iesu isi.
^ pala. 66 FAAMATALAGA O ATA: E pei o Iesu, na faafouina e se uso isi i auala eseese.