1-2. O le ā le fesootaʻiga o le Failauga 11:6 ma le talaʻia o le tala lelei o le Malo?

I NISI atunuu e talia ma le fiafia e tagata le tala lelei. O le mea tonu lava lea na latou faatalitali i ai. Ae i isi atunuu, e lē fia faalogo tagata e uiga i le Atua po o le Tusi Paia. O le ā le tali e taatele i le vaipanoa o loo e alaala ai? Po o le ā lava le tali mai a tagata, ae e finagalo Ieova ina ia tatou talaʻi pea seʻia oo ina fetalai mai o ia ua māeʻa le galuega.

² I le taimi atofaina a Ieova, o le a faamāeʻa ai le galuega talaʻi, ona “oo mai ai lea o le iʻuga.” (Mata. 24:14, 36) Ae i le taimi nei, e faapefea ona tatou usitaʻia lenei timaʻiga “aua neʻi mālōlō lou lima”? *​—Faitau le Failauga 11:6.

3. O le ā o le a tatou talanoaina i lenei mataupu?

³ I le mataupu ua mavae na talanoaina ai mea e fā e manaʻomia ona tatou faia ina ia taulau ai o ni “faifaiva i tagata.” (Mata. 4:19) Ae i lenei mataupu, o le a talanoaina ai auala e tolu e faamalosia ai lea tatou filifiliga e talaʻi e tusa lava po o ā tulaga e tatou te fesagaʻia. O le a tatou aʻoaʻoina ai foʻi māfuaaga e tāua ai ona (1) uaʻi atu pea i le talaʻiga, (2) onosaʻi ma le (3) faatumauina se faatuatua malosi.

4. Aiseā e manaʻomia ai ona tatou uaʻi atu pea i le galuega ua tofia ai i tatou e Ieova?

⁴ Na valoia e Iesu mea o le a tutupu ma tulaga e faailoga ai  aso e gata ai, ma o na tulaga e ono tosina ese ai ona soo mai i le galuega talaʻi. Na apoapoaʻi atu Iesu i ona soo ʻia faaauau ona mataala.’ (Mata. 24:42) I aso nei, o loo tatou fesagaʻia tulaga e pei o mea na tosina ese ai tagata i aso o Noa, ma lē mafai ai ona latou uaʻi i lapataʻiga na talaʻia e Noa. (Mata. 24:37-39; 2 Pete. 2:5) O lea la, e tatou te mananaʻo e uaʻi atu pea i le galuega ua tofia ai i tatou e Ieova.

5. Ua faapefea ona faamatalaina e le Galuega 1:6-8 le mamao o le a oo i ai le galuega talaʻi?

⁵ E tatau ona tatou uaʻi lelei atu i le galuega o le talaʻia o le Malo. Na valoia e Iesu o le a faateleina lenei galuega ma faaauau mo se taimi umi pe a mavae lona maliu. (Ioa. 14:12) Ina ua mavae le maliu o Iesu na toe foʻi isi ona soo e faifaiva. Ina ua toe faatūina Iesu, na ia faia ai se vavega ma maua ai e nisi o ona soo le tele o iʻa. Na ia faaaogāina lenā avanoa e faamautinoa atu ai i ona soo e sili atu le tāua o lo latou tofiga o le faifaiva i tagata nai lo o se isi lava galuega. (Ioa. 21:15-17) A o leʻi afio Iesu i le lagi, na ia faailoa atu i ona soo o le galuega talaʻi lea na ia amataina, e lē na o Isaraelu e faia ai ae o le a oo atu foʻi i tuluʻiga uma o le lalolagi. (Faitau le Galuega 1:6-8.) I tausaga mulimuli ane, na faailoa atu ai e Iesu i le aposetolo o Ioane i se faaaliga mea o le a tutupu “i le aso o le Alii.” * I le tele o mea na vaaia e Ioane, na aofia ai foʻi lenei tulaga ofoofogia: O le taʻitaʻiga a agelu o le a talaʻia ai le “tala lelei e faavavau” i “nuu uma, ma ituaiga uma, ma gagana uma, ma tagata uma.” (Faaa. 1:10; 14:6) E manino mai la, o le finagalo o Ieova mo i tatou i aso nei o le faia lea o se sao i lenei galuega talaʻi i le lalolagi aoao seʻia oo ina māeʻa.

6. E faapefea ona tatou uaʻi atu pea i le galuega talaʻi?

⁶ E mafai ona tatou uaʻi atu pea i le galuega  talaʻi, pe a mafaufau i le tele o le fesoasoani a Ieova iā i tatou. O se faataʻitaʻiga, ua ia saunia le anoanoaʻi o meaʻai faaleagaga e ala i lomiga ua lomia ma lomiga o loo i le Upega tafaʻilagi, o lomiga ua uma ona puʻeina ma vitiō, ma le TV i le Initaneti. Seʻi mafaufau i le mea lenei: Ua sili atu ma le 1,000 gagana ua mafai ona faaliliuina ai la tatou Upega tafaʻilagi. (Mata. 24:45-47) I se lalolagi ua fevaevaeaʻi i faiga faapolotiki, lotu, ma faiga faapisinisi, e sili atu ma le valu miliona auauna a le Atua ua autasi o se ʻauuso i le lalolagi aoao. O se faataʻitaʻiga, i le Aso Faraile o Aperila 19, 2019, sa lotogatasi ai Molimau a Ieova i le lalolagi aoao i le talanoaina o le mau o le aso. I le afiafi o lenā aso, na faapotopoto ai tagata e toʻa 20,919,041 mo le Faamanatuga o le maliu o Iesu. E uunaʻia i tatou e uaʻi atu pea i le galuega o le Malo, pe a tatou mafaufau i lo tatou faaeaga o le molimauina o lenei vavega ma faia ai so tatou sao.

7. E faapefea i le faaaʻoaʻoga a Iesu ona fesoasoani iā i tatou e uaʻi atu ai pea i le talaʻiga?

⁷ O le isi auala e tatou te uaʻi atu ai pea i le galuega talaʻi, o le mulimuli lea i le faaaʻoaʻoga a Iesu. E leai se mea na mafai ona tosina ese ai Iesu mai i le molimau atu i le upu moni. (Ioa. 18:37) E leʻi lolo atu ina ua ofo atu e Satani “malo uma o le lalolagi ma o latou mamalu,” ma e leʻi faaosoosoina foʻi o ia ina ua mananaʻo isi e fai o ia ma tupu. (Mata. 4:8, 9; Ioa. 6:15) E leʻi taaʻina o ia i le manaʻo i meafaitino, ma e leʻi fefe foʻi o ia i teteega ogaoga. (Luka 9:58; Ioa. 8:59) Pe a tofotofoina lo tatou faatuatua, e mafai ona tatou uaʻi atu pea i le talaʻiga pe a tatou manatua le fautuaga a le aposetolo o Paulo. Na ia faalaeiauina Kerisiano e mulimuli i le faaaʻoaʻoga a Iesu, ina ia aua ai neʻi o latou “lē lavavā ma faavaivai ai.”​—Epe. 12:3.

8. O le ā le onosaʻi, ma aiseā ua matuā manaʻomia ai i le taimi lenei?

⁸ O le onosaʻi, o le mafai lea ona tatou faatalitali ma le toʻafilemu i le suiga o se tulaga. E manaʻomia ona tatou onosaʻi a o tatou tulimataʻia le iʻuga o se tulaga lē lelei, po o le faataunuuina o se mea ua leva ona moomoo i ai. Na naunau le perofeta o Sapakuka ina ia faaiʻuina tulaga sauā i Iuta. (Sapa. 1:2) Na faamoemoe soo o Iesu e “faaalia mai loa” le Malo, ma laveaʻia i latou mai i le pulega sauā a Roma. (Luka 19:11) E tatou te naunau i le taimi e tafiesea ai e le Malo o le Atua amioga leaga, ma aumai le lalolagi fou amiotonu. (2 Pete. 3:13) Peitaʻi, e manaʻomia ona tatou onosaʻi ma faatalitali i le taimi atofaina a Ieova. Seʻi mātau nisi o auala ua aʻoaʻoina ai i tatou e Ieova ia onosaʻi.

9. O ā faaaʻoaʻoga ua faaalia ai le onosaʻi o Ieova?

⁹ O Ieova o le faaaʻoaʻoga silisili o le onosaʻi. Na lava le taimi na tuu atu e Ieova iā Noa e fau ai le vaa, ma auauna ai o sē “e talaʻi le amiotonu.” (2 Pete. 2:5; 1 Pete. 3:20) Na faafofoga Ieova iā Aperaamo a o tuufesili atu i Lana faaiʻuga, e faaumatia tagata amio leaga o aai o Sotoma ma Komoro. (Kene. 18:20-33) Na matuā onosaʻi Ieova i le nuu lē faamaoni o Isaraelu, mo le faitau selau o tausaga. (Nee. 9:30, 31) Ua tatou iloa faamaoniga o le onosaʻi o Ieova i aso nei, a o ia tuu mai le taimi e “salamō” ai tagata uma ua ia tosina atu iā te ia. (2 Pete. 3:9; Ioa. 6:44; 1 Timo. 2:3, 4) Ua avea le faaaʻoaʻoga a Ieova ma māfuaaga lelei e tatou te onosaʻi ai, a o faaauau ona tatou talaʻi ma aʻoaʻo atu. Ua aʻoaʻoina foʻi i tatou e Ieova ia onosaʻi, e ala i se talafaatusa o loo i lana Afioga.

10. E pei ona taʻua i le Iakopo 5:7, 8, o le ā e tatou te aʻoaʻoina mai i le faataʻitaʻiga a le faifaatoʻaga?

¹⁰ Faitau le Iakopo 5:7, 8. Ua aʻoaʻoina  i tatou e onosaʻi mai i se faataʻitaʻiga a le faifaatoʻaga o loo totō se faatoʻaga. E moni e iai laau e vave ona ola. Peitaʻi, o le tele o laau aemaise laau e iai fua, e umi se taimi o faatali ona matua lea o ona fua. I Isaraelu, e pe tusa ma le ono masina e faatalitali ai mo le seleselega. E totō e le faifaatoʻaga ana fatu saito pe a uma timuga muamua o le tau e afu ai mea, ae e na te seleseleina fua o saito pe a uma timuga mulimuli o le tau e totogo ai mea. (Mare. 4:28) E tatou te atamamai pe a tatou faaaʻoaʻo i le onosaʻi o le faifaatoʻaga. Peitaʻi, e lē faigofie ona tatou faia faapea.

11. E faapefea ona fesoasoani le onosaʻi iā i tatou i le faiva?

¹¹ O le faanaunauga o tagata lē lelei atoatoa, ia vave ona fua mai a latou galuega. Peitaʻi, pe a tatou mananaʻo e fua tele mai a tatou faatoʻaga, e tatau ona tatou uaʻi pea i ai e ala i le eli, totō, vele, ma faasūsū. E tatau foʻi ona tatou galulue pea i le faia o isi ma soo. E umi se taimi e fesoasoani ai i tagata o loo tatou suʻesuʻe, ina ia liaʻiese o latou uiga faailoga tagata ma le lē ano i mea faaleagaga. O le onosaʻi e fesoasoani iā i tatou e ʻalofia ai le lotovaivai, pe a fesagaʻia faafitauli. Pe a tali lelei mai nisi tagata, e ao ona tatou onosaʻi pea. E lē mafai ona tatou faamalosia le tuputupu aʻe o le faatuatua o se tagata suʻesuʻe o le Tusi Paia. E oo foʻi i soo o Iesu, na iai taimi na tuai ai ona latou malamalama i uiga o aʻoaʻoga a Iesu. (Ioa. 14:9) Aua neʻi galo e tatou te totō ma faasūsū, a o le Atua e na te faatupuina.​—1 Kori. 3:6.

12. E faapefea ona tatou onosaʻi a o molimau atu i tauaiga lē talitonu?

¹² O se tasi o vala e faigatā ai ona tatou onosaʻi, o le molimau atu lea i o tatou aiga lē talitonu. E fesoasoani mai le mataupu silisili o loo i le Failauga 3:1, 7: “E iai le taimi . . . e filemu ai ma le taimi e tautala ai.” E mafai ona avea a tatou amioga lelei o se molimau lē  leoa, ae e tatou te mataalia pea i avanoa e talanoa atu ai i le upu moni. (1 Pete. 3:1, 2) E tatou te onosaʻi pea i tagata uma e aofia ai o tatou tauaiga, a o tatou talaʻi ma aʻoaʻo atu ma le maelega.

13-14. O ā nisi o faaaʻoaʻoga o le onosaʻi e mafai ona tatou faaaʻoaʻo i ai?

¹³ E mafai ona tatou aʻoaʻoina le onosaʻi mai i faaaʻoaʻoga a auauna faamaoni i le Tusi Paia ma aso nei. Na naunau Sapakuka e faaiʻuina amioga leaga, ae na ia taʻutino mai ma le mautinoa: “Ou te tū pea i le mea ou te leoleo ai.” (Sapa. 2:1) Na faailoa mai e le aposetolo o Paulo lona faanaunauga e “faauma” lana faiva. Ae na ia onosaʻi pea e “molimau māeʻaeʻa i le tala lelei.”​—Galu. 20:24.

¹⁴ Seʻi mātau le faaaʻoaʻoga a se ulugalii na faauu mai i Kiliata ma na tofia i se atunuu e toʻaitiiti ai Molimau a Ieova, ae o le toʻatele o tagata e lē o ni Kerisiano. E leʻi toʻatele ni tagata na fia suʻesuʻe i le Tusi Paia. Peitaʻi, na lafo mai e nisi na latou aʻoʻoga faatasi i Kiliata ni tala mataʻina o le tele o a latou suʻesuʻega faale-Tusi Paia na agaʻigaʻi i luma. E ui e leʻi toʻatele nisi i la laʻua oganuu na fia faalogo, ae na talaʻi pea ma le onosaʻi lenei ulugalii. E valu tausaga na la talaʻi ai i lenei oganuu ae e leʻi fua mai. Peitaʻi, na iʻu ina faafiafiaina i laʻua ina ua papatiso se tasi o a la suʻesuʻega faale-Tusi Paia. O le ā ua tatou aʻoaʻoina mai i na faaaʻoaʻoga o aso anamua ma aso nei? E leʻi paiē nei auauna faamaoni pe e mālōlō o latou lima, ma na tauia e Ieova lo latou onosaʻi. Tau ina ia tatou “faaaʻoaʻo iā i latou o ē ua maua le folafolaga ona o lo latou faatuatua ma le onosaʻi.”​—Epe. 6:10-12.

15. O le ā se tasi o auala e faamalosia ai e lo tatou faatuatua la tatou filifiliga e talaʻi?

¹⁵ E tatou te maufaatuatuaina le feʻau o loo tatou talaʻia, o le māfuaaga lea e tatou te naunau ai e faasoa atu i le toʻatele o tagata. E tatou te faatuatua i folafolaga o loo i le Afioga a le Atua. (Sala. 119:42; Isa. 40:8) Ua tatou vaaia le faataunuuga o valoaga o le Tusi Paia i o tatou aso. Ua tatou molimauina suiga lelei i olaga o tagata ina ua latou faatatauina fautuaga a le Tusi Paia. O nei faamaoniga ua faamalosia ai lo tatou mautinoa, e manaʻomia e tagata uma ona faalogo i le tala lelei o le Malo.

16. E tusa ai ma le Salamo 46:1-3, e faapefea i le faatuatua iā Ieova ma Iesu ona faamalosia ai la tatou filifiliga e talaʻi?

¹⁶ E tatou te faatuatua foʻi iā Ieova, o le Puna o le feʻau o loo tatou talaʻia ma Iesu o lē ua ia tofia e avea ma Tupu o le Malo. (Ioa. 14:1) Po o ā lava tulaga e tatou te fesagaʻia, ae e avea pea Ieova ma o tatou malu ma lo tatou malosi. (Faitau le Salamo 46:1-3.) E lē gata i lea, ua tatou mautinoa o loo taʻitaʻia e Iesu mai i le lagi le galuega talaʻi, e ala i le mana ma le pule ua tuuina atu e Ieova iā te ia.​—Mata. 28:18-20.

17. Aumai se faaaʻoaʻoga o se māfuaaga e tatau ai ona tatou talaʻi pea.

¹⁷ E faamalosia e le faatuatua lo tatou mautinoa e faamanuia e Ieova a tatou taumafaiga. O nisi taimi e faamanuia Ieova i auala e tatou te lē faatalitalia. (Fai. 11:6) O se faataʻitaʻiga, e faitau afe tagata e ui atu i nofoaga o loo faatutū ai a tatou fata tusi i aso taʻitasi. Pe e taulau lenei auala e talaʻi ai? Ioe! Na taʻua i La Tatou Faiva o le Malo o Novema 2014 se talavou e aʻoga i se iunivesite na manaʻo e tusi sana tala e faatatau i Molimau a Ieova. E na te leʻi mauaina se Maota mo Sauniga, ae na tau o ia i la tatou fata tusi i le lotoā o le iunivesite, ma na ia maua ai ni faamatalaga e tusia ai lana tala. Mulimuli ane, na papatiso o ia o se Molimau a Ieova, ma o loo auauna  nei o se paeonia sauatoa. O tala faapena e uunaʻia ai i tatou e talaʻi pea, auā ua faaalia ai o loo iai lava tagata e manaʻomia ona tatou saʻilia ina ia latou faalogo i le feʻau o le Malo.

18. Aiseā e tatou te mautinoa ai o le a faamāeʻaina le galuega talaʻi o le Malo e pei ona finagalo i ai Ieova?

¹⁸ E tatou te mautinoa o le a māeʻa le talaʻia o le tala lelei i le taimi atofaina. Seʻi tatou iloiloina le mea na tupu i aso o Noa, lea na faamaonia ai e Ieova o ia o le Tausi Taimi silisili. E pe ā ma le 120 tausaga a o lumanaʻi le Lolo, na atofa e Ieova le taimi e oo mai ai. I le tele o tausaga mulimuli ane ai, na faatonuina ai e Ieova Noa ina ia fau le vaa. Na galue mamafa pea Noa i le pe ā ma le 40 i le 50 tausaga a o leʻi oo mai le Lolo. E ui e leʻi fia faalogo tagata iā Noa, ae na ia talaʻia pea le feʻau lapataʻi seʻia oo i le taimi na fetalai atu ai Ieova e aumai manu i totonu o le vaa. I lana taimi atofaina, na ʻtapuni ai e Ieova le faitotoʻa.’​—Kene. 6:3; 7:1, 2, 16.

19. O le ā e tatou te tulimataʻia pe a lē mālōlō o tatou lima?

¹⁹ E lē o toe umi ona faamāeʻaina lea e Ieova o le galuega talaʻi o le Malo. E peiseaʻī o le a ʻtapuni e Ieova le faitotoʻa’ e ala i le faaumatia o lenei faiga o mea a Satani, ae aumai le lalolagi fou amiotonu. A o leʻi oo mai lenā taimi, tau ina ia tatou faaaʻoaʻo iā Noa, Sapakuka ma isi o ē e leʻi mālōlō o latou lima. Tau ina tatou uaʻi atu pea i le talaʻiga, ia onosaʻi ma faatumauina se faatuatua malosi iā Ieova ma ana folafolaga.