1-2. E tusa ai ma le 1 Timoteo 6:20, o le ā na tuuina atu iā Timoteo?

E MASANI ona tatou tuuina atu i isi mea e tautele iā i tatou e latou te vaaia. O se faaaʻoaʻoga, e ono teu a tatou tupe i faletupe. E tatou te faatalitalia o le a malupuipuia a tatou tupe i inā, ma e lē leiloa pe gaoia foʻi. O lea, ua tatou malamalama foʻi la i le tāua o le tuuina atu i isi e latou te vaaia mea e tautele iā i tatou.

² Faitau le 1 Timoteo 6:20. Na faamanatu atu e le aposetolo o Paulo iā Timoteo ua tuuina atu iā te ia se mea tautele, o le poto saʻo lea e faatatau i le finagalo o le Atua mo tagata. Na tuuina atu foʻi iā Timoteo le faaeaga e “talaʻi atu le upu,” ma “fai le galuega a le faievagelia.” (2 Timo. 4:2, 5) Na faalaeiau e Paulo Timoteo ina ia leoleoina mea na tuuina atu iā te ia. Ua tuuina mai foʻi iā i tatou ni mea tautele e pei ona tuuina atu iā Timoteo. O ā na mea? Aiseā e tatau ai ona tatou puipuia mea tautele ua tuuina mai e Ieova iā i tatou?

3-4. O ā ni māfuaaga e tautele ai upu moni o le Tusi Paia?

³ Ua tuuina mai e Ieova iā i tatou le poto saʻo o upu moni tautele o loo i lana Afioga, le Tusi Paia. E tautele nei upu moni ona ua aʻoaʻoina ai i tatou i auala e maua ai se faiā lelei ma Ieova, ma faamatala mai ai auala e maua ai le fiafia moni i le olaga. Pe a tatou talia na upu moni ma faatatauina, e tatou te saʻoloto mai ai i le faapologaina i aʻoaʻoga sesē ma amioga lē mamā.​—1 Kori. 6:9-11.

⁴ O se isi māfuaaga e tautele ai upu moni o loo i le Afioga a le Atua, ona e na o tagata lotomaulalo o ē “ua saunia o latou loto,” ua faailoa atu i ai e Ieova na upu moni. (Galu. 13:48)  Ua talia e na tagata le auala ua faaaogā e Ieova e faailoa mai ai upu moni i aso nei. (Mata. 11:25; 24:45) E lē mafai ona tatou malamalama i nei upu moni e aunoa ma se fesoasoani, ma e leai se isi mea e sili atu nai lo o le malamalama i na upu moni.​—Faata. 3:13, 15.

5. O ā isi mea ua tuuina mai e Ieova iā i tatou?

⁵ Ua tuuina mai foʻi e Ieova iā i tatou le faaeaga o le aʻoaʻo o isi i upu moni e faatatau iā te ia ma lona finagalo. (Mata. 24:14) E matuā tautele le feʻau o loo tatou talaʻia, ona e fesoasoani i tagata ia avea ma vaega o le aiga o Ieova, ma latou maua le avanoa e ola ai e faavavau. (1 Timo. 4:16) Pe e itiiti pe e tele lo tatou sao i le faiva, ae o loo tatou lagolagoina le galuega e sili ona tāua o loo faia i aso nei. (1 Timo. 2:3, 4) Maʻeu se faaeaga o le avea ma ʻaufaigaluega faatasi ma le Atua!​—1 Kori. 3:9.

6. O le ā na tupu i nisi e leʻi faaauau ona talisapaia lo latou faaeaga o le galulue faatasi ma le Atua?

⁶ E leʻi faaauau ona talisapaia e nisi o aumea a Timoteo lo latou faaeaga o le galulue faatasi ma le Atua. Talu ai na naunau tele Tema i lenei faiga o mea a le lalolagi, na ia tuua ai lona faaeaga o le auauna faatasi ma Paulo. (2 Timo. 4:10) Na tuua e Fogelu ma Emokene le la auaunaga ona na la fefefe ina neʻi sauāina i laʻua e pei o Paulo. (2 Timo. 1:15) Na liliuese mai i le upu moni Umenaio, Alesana ma Fileto. (1 Timo. 1:19, 20; 2 Timo. 2:16-18) O le mea moni, na malolosi faaleagaga i latou uma nei, peitaʻi e leʻi faaauau ona latou taofimau i mea tautele na tuuina atu iā i latou.

7. O ā ni togafiti o loo faaaogā e Satani?

⁷ E faapefea ona taumafai Satani e faaosooso i tatou ina ia tatou tuua mea tautele ua tuuina mai e Ieova iā i tatou? O nisi nei o togafiti a Satani. E na te faaaogā faafiafiaga ma auala o faasalalauga ina ia faaauiluma ai tapulaa, o mafaufauga, ma amioga ina ia tatou faamaamulu ai mai i lo tatou taofimau i le upu moni. E taumafai o ia e faafefe i tatou e ala i omiga mai i aumea po o sauāga ina ia taofia ai la tatou galuega talaʻi. E na te taumafai foʻi e uunaʻia i tatou e faalogo i aʻoaʻoga a ē ua liliuese mai i le upu moni, ina ia tatou tuulafoaʻia ai le upu moni.​—1 Timo. 6:20, 21.

8. O le ā e tatou te aʻoaʻoina mai i le mea na tupu iā Tanielu?

⁸ Pe a tatou lē faaeteete, o le a faasolosolo mālie ona tatou faamaamulu le upu moni. Seʻi mātau le mea na tupu iā Tanielu, * o lē na fiafia i taaloga vitiō. Na ia faapea mai: “Na amata ona ou taalo i taaloga vitiō ina ua  sefulu oʻu tausaga. I le taimi muamua e lelei taaloga na ou taalo ai. Ae na faasolo ina ou taalo i taaloga sauā ma taaloga e iai faiga faatemoni.” Na iʻu ina faaalu e Tanielu le 15 itula i aso taʻitasi e taalo ai i taaloga vitiō. Na ia faapea mai: “O le mea moni, na ou iloa o nei taaloga ma le tele o le taimi e alu ai, na matuā aafia ai la ma faiā ma Ieova. Ae na maaa loʻu loto ma ou manatu ai e lē faatatauina iā te aʻu mataupu silisili o le Tusi Paia.” O aafiaga iloagatā o a tatou faafiafiaga, e faigofie ai ona tatou faamaamulu le upu moni. Pe a tupu lenā tulaga, e iʻu ina tatou tuulafoaʻia ai mea tautele na tuuina mai e Ieova iā i tatou.

9. E tusa ai ma le 1 Timoteo 1:18, 19, o le ā na faatusa i ai e Paulo Timoteo?

⁹ Faitau le 1 Timoteo 1:18, 19. Na faatusa e Paulo Timoteo i se fitafita, ma faalaeiau o ia ʻina ia faaauau ona tau le taua lelei.’ O lenā taua e lē faaletino ae faaleagaga. O ā auala e pei ai Kerisiano o fitafita o loo tau i se taua? O ā uiga e tatau ona tatou atiaʻe o ni fitafita a Keriso? Seʻi o tatou talanoaina ni lesona se lima e tatou te aʻoaʻoina mai i talafaatusa a Paulo. E fesoasoani nei lesona iā i tatou e taofimau ai i le upu moni.

10. O le ā le faamaoni i le Atua, ma aiseā e tatou te manaʻomia ai?

¹⁰ Atiaʻe le faamaoni i le Atua. O se fitafita lelei e faamaoni. E tau malosi o ia e puipuia se tasi e alofa i ai, po o se mea e tautele iā te ia. Na faalaeiau e Paulo Timoteo e atiaʻe le faamaoni i le Atua, o lona uiga o le tuutoina atu ma le faamaoni i le Atua. (1 Timo. 4:7) O le loloto o lo tatou alofa ma lo tatou faamaoni i le Atua, o le malosi foʻi lenā o lo tatou faanaunauga e taofimau i le upu moni.​—1 Timo. 4:8-10; 6:6.

11. Aiseā e manaʻomia ai ona tatou amio pulea?

¹¹ Atiaʻe le amio pulea. Ina ia tumau le malosi o se fitafita e tau ai, e ao ona pulea o ia lava. Na tumau ona malosi faaleagaga Timoteo, ona na ia mulimuli i fautuaga faagaeeina a Paulo e sola ese mai tuʻinanauga sesē, ia tausisi i uiga o le Atua, ma aufaatasi ma uso talitonu. (2 Timo. 2:22) O le faia faapena, na manaʻomia ai le amio pulea. E manaʻomia foʻi ona tatou amio pulea ina ia manumalo ai i le taua faasaga i tuʻinanauga o o tatou tino. (Roma 7:21-25) E manaʻomia foʻi le amio pulea ina ia faaauau ai ona tatou tuu ese le tagata tuai, ae oofu i le tagata fou. (Efe. 4:22, 24) Pe a tatou lagona le vaivai i le faaiʻuga o se aso pisi, e manaʻomia ona tatou faamalolosi ina ia auai i sauniga.​—Epe. 10:24, 25.

12. E faapefea ona faaleleia o tatou tomai i le faaaogāina o le Tusi Paia?

¹² E manaʻomia ona toleni se fitafita i le faaaogāina o ana auupega. Ina ia maua le tomai i le faaaogāina o auupega, e manaʻomia ona ia toleni e lē aunoa. E manaʻomia foʻi ona iā i tatou le tomai e taulima ai le Afioga a le Atua. (2 Timo. 2:15) E mafai ona tatou aʻoaʻoina nisi o na tomai i a tatou sauniga. Peitaʻi, ina ia mafai ona tatou faatalitonuina isi i le tautele o upu moni o le Tusi Paia, e tatau ona tatou pipii i a tatou faasologa o le suʻesuʻeina e lē aunoa o le Tusi Paia. E manaʻomia ona tatou faaaogā le Afioga a le Atua e faamalosia ai lo tatou faatuatua. O lona uiga e tele mea e aofia ai nai lo o le tau ina faitau o le Tusi Paia. E aofia ai le manatunatu loloto i mea ua tatou faitau i ai, ma faia saʻiliʻiliga i a tatou lomiga ina ia saʻo lo tatou malamalamaga ma saʻo le faatatauina o mau o le Tusi Paia. (1 Timo. 4:13-15) O le faia faapea o le a mafai ai ona tatou faaaogā le Afioga a le Atua e aʻoaʻo ai isi. Ia manatua, e tele mea e aofia  ai nai lo o le tau ina faitau atu o se mau. E tatou te mananaʻo e fesoasoani i tagata ina ia malamalama i mau, ma le auala e faatatau ai. O le pipii i a tatou faasologa o le suʻesuʻeina e lē aunoa o le Tusi Paia, o le a faaleleia ai o tatou tomai i le faaaogāina o le Afioga a le Atua e aʻoaʻo ai isi.​—2 Timo. 3:16, 17.

13. E tusa ai ma le Eperu 5:14, aiseā e tāua ai ona tatou mafaufau lelei?

¹³ Ia mafaufau lelei. E tatau ona iloa e se fitafita lamatiaga ma ʻalofia. E tatau foʻi ona tatou iloa tulaga e tatou te lamatia ai, ma gaoioi e ʻalofia na lamatiaga. (Faata. 22:3; faitau le Eperu 5:14.) O se faataʻitaʻiga, e manaʻomia ona filifili lelei a tatou faafiafiaga ma faigāmālōlōga. E masani ona faaalia i televise ma ata tifaga amioga lē mamā. O na amioga e inosia e le Atua ma e iʻu ina faaleagaina ai i tatou. O lea la, e tatou te ʻalofia faafiafiaga e faavaivaia ai lo tatou alofa i le Atua.​—Efe. 5:5, 6.

14. Na faapefea ona fesoasoani le mafaufau lelei iā Tanielu?

¹⁴ Na iloa mulimuli ane e Tanielu lea na taʻua muamua, o se lamatiaga le taalo i taaloga sauā ma taaloga e iai faiga faatemoni. Na ia faia saʻiliʻiliga i le Watchtower Library mo mataupu e fesoasoani iā te ia e feagai ai ma lona faafitauli. Na faapefea ona aafia ai o ia? Na tuu lana masaniga o le taalo i taaloga vitiō e lē lelei. E leʻi toe taaalo faatasi foʻi ma isi tagata i luga o le Initaneti. Ua faapea mai Tanielu, “Nai lo o loʻu nofo i le fale e taalo i taaloga vitiō, na ou alu ese mai i loʻu fale ina ia mafai ona ou tafao, po o le faifaimea faatasi ma uō mai i le faapotopotoga.” Ua avea nei Tanielu o se paeonia ma o se toeaina.

15. Aiseā e mataʻutia ai faamatalaga sesē?

¹⁵ E tatau foʻi ona tatou pei o Timoteo, ia iloa lamatiaga o faamatalaga sesē ua faasalalau e ē ua liliu ese mai i le upu moni. (1 Timo. 4:1, 7; 2 Timo. 2:16) O se faaaʻoaʻoga, atonu e latou te taumafai e faasalalau ni tala sesē e faatatau i o tatou uso, pe e faatupu foʻi ni masalosaloga i le faalapotopotoga a Ieova. O na faamatalaga sesē e faavaivaia ai lo tatou faatuatua. E tatau ona tatou ʻalofia le faasesēina o i tatou i nei faamatalaga. Aiseā? Talu ai o na faamatalaga sesē ua faasalalau e “tane ua lē sagatonu o latou mafaufau, ma ua ō ese ai mai le upu moni.” O lo latou sini o le “finau i upu.” (1 Timo. 6:4, 5) E latou te mananaʻo  ina ia tatou talitonu i a latou faamatalaga taufaaleaga, ma faatupu ai o tatou masalosaloga i o tatou uso.

16. O ā faatosinaga e tatau ona tatou ʻalofia?

¹⁶ ʻAlofia faatosinaga. “I le avea ai o se fitafita lelei a Keriso Iesu,” na tatau ona taulaʻi Timoteo i lana faiva nai lo o le tosina ese i le saʻilia o sini o le lalolagi ma meafaitino. (2 Timo. 2:3, 4) I le pei o Timoteo, e tatau ona tatou ʻalofia le tosina atu i o tatou tuʻinanauga e saʻilia le tele o meafaitino. E mafai e “le malosi taufaasesē o le ʻoa” ona tineia lo tatou alofa iā Ieova, lo tatou talisapaia o le Afioga a le Atua, ma lo tatou faanaunauga e faasoa atu i isi. (Mata. 13:22) E tatau ona faafaigofie o tatou olaga, ma faaaogā o tatou taimi ma le malosi ina ia “faaauau pea ona . . . saʻili muamua le malo.”​—Mata. 6:22-25, 33.

17-18. O le ā e mafai ona tatou faia e ʻalofia ai lamatiaga faaleagaga?

¹⁷ Ia nofosauni e vave gaoioi. E sauniuni mamao se fitafita i le auala e gaoioi ai. Ina ia tatou leoleoina mea ua tuuina mai e Ieova iā i tatou, e manaʻomia foʻi ona tatou vave gaoioi pe a iloa atu lamatiaga. O le ā e fesoasoani iā i tatou e faia ai faapea? E manaʻomia ona tatou sauniuni mamao i le auala e tatou te tali atu ai i se lamatiaga.

¹⁸ O se faataʻitaʻiga, seʻi faapea o loo e auai i se faatasiga. A o leʻi amata le polokalame, e masani ona fautuaina le aofia ina ia mātau se faitotoʻa e lata ane e ulufafo ai. Aiseā? Ina ia vave ona latou ō ese pe a tulaʻi mai se faalavelave faafuaseʻi. I se tulaga talitutusa, e tatau foʻi ona faataʻitaʻi muamua le auala e tatou te vave ō ese ai pe a faafuaseʻi ona tatou vaaia ni ata lē mamā, ata sauā, o faamatalaga a ē ua liliu ese mai i le upu moni a o tatou faaaogā le Initaneti, pe matamata se ata tifaga, po o se polokalame i le TV. Pe a tatou sauniuni i ni mea e ono tutupu, e mafai ona tatou vave gaoioi e sosola ese mai i lamatiaga faaleagaga, ma tumau ai pea ona tatou mamā i le silafaga a Ieova.​—Sala. 101:3; 1 Timo. 4:12.

19. O ā faamanuiaga e tatou te maua pe a leoleoina mea tautele ua tuuina mai e Ieova iā i tatou?

¹⁹ E tatau ona tatou leoleoina mea tautele ua tuuina mai e Ieova iā i tatou: O upu moni tautele o le Tusi Paia ma le faaeaga o le aʻoaʻoina o isi i na upu moni. Pe a tatou faia faapea, o le a tatou olioli ai i se lotofuatiaifo mamā, o se olaga e iai se fuafuaga moni, ma le olioli e maua i le fesoasoani i isi ina ia latou iloa Ieova. O le fesoasoani a Ieova, o le a mafai ai ona tatou leoleoina mea ua tuuina mai iā i tatou.​—1 Timo. 6:12, 19.