1-2. O le ā le faamoemoe matagofie mo auauna a Ieova?

E TĀUA tele le iai o se faamoemoe. E faamoemoe isi tagata i le mauaina o se faaipoipoga e taulau manuia, tausia aʻe o se fanau e soifua mālōlōina, po o le toe malolosi mai i se maʻi tugā. E faamoemoe foʻi Kerisiano i na mea. Ae e sili atu ona tāua le faamoemoe o loo tatou tulimataʻia. E aofia ai i lenā faamoemoe lo tatou lumanaʻi e faavavau faapea le toetutū mai o ē pele ua maliliu.

² Ua faapea mai le aposetolo o Paulo: “Ou te faamoemoe foʻi i le Atua . . . e toetutū mai tagata amiotonu ma tagata amiolētonu.” (Galu. 24:15) E lē o Paulo le tagata muamua na talanoa e faatatau i le faamoemoe o le toetū. Na talanoa ai foʻi Iopu. Na talitonu Iopu o le a manatua o ia e le Atua ma faatūina o ia mai i le oti.​—Iopu 14:7-10, 12-15.

3. O ā aogā e tatou te maua mai i le 1 Korinito mataupu 15?

³ “O le toetū mai i le oti” o se vaega o le aʻoaʻoga “faavae” po o “aʻoaʻoga muamua” o talitonuga uma faa-Kerisiano. (Epe. 6:1, 2) O le mataupu e faatatau i le toetū na talanoa i ai Paulo o loo faamauina i le 1 Korinito mataupu 15. O mea na ia tusiaina e mautinoa na faalaeiau ai Kerisiano o le uluaʻi senituri. O le 1 Korinito mataupu 15, e mafai ona atiaʻe ma faamalosia ai lo tatou faamoemoe lea ua leva ona tatou momoo i ai.

4. O le ā le māfuaaga autū e tatou te mautinoa ai i le faamoemoe o le a toetutū mai ē pele ua maliliu?

⁴ O le toetū o Iesu Keriso o le māfuaaga autū lea ua tatou  mautinoa ai i le faamoemoe, o le a toetutū mai ē pele ua maliliu. O se vaega o le “tala lelei” lea na faailoa atu e Paulo i tagata Korinito. (1 Kori. 15:1, 2) O le mea moni, na ia faapea mai afai e lē talitonu se Kerisiano i le toetū, e lē aogā la lona faatuatua. (1 Kori. 15:17) O le talitonu i le toetū o Iesu, o le māfuaaga autū lea o lo tatou faamoemoe o le toetū.

5-6. O le ā le aogā iā i tatou o upu o loo faamauina i le 1 Korinito 15:3, 4?

⁵ Ina ua amata ona tusia e Paulo lana tusi e faatatau i le toetū, na ia taʻua ai ni mea moni se tolu. (1) “Na maliu Keriso mo a tatou agasala.” (2) Na “tanu o ia.” (3) Na “toe faatūina mai i le aso lona tolu e tusa ai ma Tusitusiga Paia.”​—Faitau le 1 Korinito 15:3, 4.

⁶ O le ā le aogā mo i tatou o le maliu o Iesu, o lona tanuga ma lona toetū mai? Na valoia e le perofeta o Isaia, o le a “vavaeese [le Mesia] mai i ē o loo soifua” ma “fai . . . lona tuugamau faatasi ma tagata amioleaga.” Ae e iai isi mea e aofia ai. Na faapea atili mai Isaia, o le a tauave e le Mesia “agasala a le toʻatele o tagata.” Na faia faapea e Iesu e ala i le togiola. (Isa. 53:8, 9, 12; Mata. 20:28; Roma 5:8) O lea, o le maliu, tanuina ma le toe faatūina o Iesu ua saunia ai se faavae mausalī o lo tatou faamoemoe, o le tuusaʻoloto mai i le agasala ma le oti ma toe faatasi ma ē e pele iā i tatou ua maliliu.

7-8. O le ā e fesoasoani i Kerisiano e mautinoa ai na toe faatūina Iesu?

⁷ O lo tatou faamoemoe i le toetū e fesootaʻi atu i le toetū o Iesu. O lea la, e manaʻomia ona tatou mautinoa na toetū Iesu. Aiseā e tatou te mautinoa ai na toe faatūina e Ieova Iesu?

⁸ E toʻatele molimau na vāaitino iā Iesu ina ua uma ona toe faatūina mai. (1 Kori. 15:5-7) O le molimau muamua na taʻua e Paulo o le aposetolo o Peteru (Kefa). Na faamaonia e se vaega o le ʻausoo le vaai o Peteru iā Iesu ina ua uma ona faatūina mai. (Luka 24:33, 34) E lē gata i lea, na vāai le “toʻasefulu lua” o ona aposetolo iā Iesu ina ua uma ona toe faatūina mai. Ona faaali atu foʻi lea o ia i le ʻauuso pe ā ma le toʻalima selau, atonu i le faatasiga fiafia i Kalilaia lea o loo faamauina i le Mataio 28:16-20. Na ʻfaaali atu foʻi Iesu iā Iakopo’ lona ʻafa uso, lea e leʻi talitonu i lenā taimi o ia o le Mesia. (Ioa. 7:5) Na mautinoa e Iakopo ua toe faatūina Iesu ina ua vaai iā te ia. O le mea e mataʻina ai, ona e toʻatele molimau na vāaitino iā Iesu ina ua uma ona toe faatūina, na soifua pea i le taimi na tusia ai e Paulo lenei tusi i le pe ā ma le 55 T.A. O lea, pe afai na iai nisi na masalosalo pe na toetū Iesu, na mafai lava ona latou fesili atu i nei molimau.

9. A o tatou faitau i le Galuega 9:3-5, e faapefea ona faamaonia atili mai e Paulo le toetū o Iesu?

⁹ Mulimuli ane, na faaali atu Iesu iā Paulo. (1 Kori. 15:8) A o agaʻi atu Paulo (Saulo) i Tamaseko, na ia faalogoina ai le leo o Iesu lea ua toetū. Na ia vaaia ai foʻi se faaaliga mai iā te ia i le lagi. (Faitau le Galuega 9:3-5.) O le mea na tupu iā Paulo, ua faamaonia atili ai na toetū moni lava Iesu.​—Galu. 26:12-15.

10. O le ā na uunaʻia Paulo e fai ona o lona mautinoa na toe faatūina Iesu mai i le oti?

¹⁰ E mataʻina le molimau a Paulo i nisi, ona na iai le taimi na ia sauāina ai Kerisiano. Ae ina ua mautinoa e Paulo ua toe faatūina Iesu, na ia galue mamafa loa e faatalitonu isi i lenei upu moni. Na ia onosaia sauāga, faafalepuipuiina, afātia i ana folauga a o ia faailoa atu le upu moni na maliu Iesu ae ua toe faatūina.  (1 Kori. 15:9-11; 2 Kori. 11:23-27) Na matuā mautinoa Paulo ua toe faatūina Iesu mai i le oti, o lea na ia lotomalie ai e oti mo ona talitonuga. Pe e te lē mautinoa ai ea la mai i nei molimau a uluaʻi Kerisiano, na toe faatūina Iesu mai i le oti? Pe e lē faamalosia ai foʻi lou talitonu i le toetū?

11. Aiseā atonu na sesē ai manatu o nisi o Kerisiano i Korinito i le toetū?

¹¹ Na iai i nisi i le aai o Eleni i Korinito ni talitonuga sesē e faatatau i le toetū, ma na oo lava ina latou faapea mai “e leai se toetū o ē ua oti.” Aiseā? (1 Kori. 15:12) Na aamu le ʻaufaifilosofia mai i Atenai le isi aai o Eleni i le talitonuga na toe faatūina Iesu mai i le oti. O na manatu na ono taaʻina ai nisi tagata i Korinito, e oo lava i le faapotopotoga Kerisiano. (Galu. 17:18, 31, 32) Na ono manatu nisi i le toetū i se uiga faafaatusa, o se tagata na “oti” i le agasala ae ua “toe ola” mai o se Kerisiano. Po o le ā lava le māfuaaga, ae o lo latou lē talitonu i le toetū ua faailoa mai ai e lē aogā lo latou faatuatua. Afai e leʻi faatūina e le Atua Iesu, o lona uiga la e leʻi totogiina le togiola, ma e lē mafai ona faamagaloina a tatou agasala. O lea, o i latou e teena le toetū e leai so latou faamoemoe.​—1 Kori. 15:13-19; Epe. 9:12, 14.

12. E tusa ai ma le 1 Peteru 3:18, 22, o le ā le auala na ese ai le toetū o Iesu mai i isi na toetutū muamua?

¹² Na iloa lelei e Paulo “ua toe faatūina Keriso mai i ē ua oti.” E sili atu le toetū o Iesu, nai lo o le toetutū o i latou na toetutū aʻe muamua i le lalolagi ona na toe feoti i latou. Na faapea mai Paulo, o Iesu “na muamua faatūina mai i ē ua oti.” O le ā le auala na muamua ai le toe faatūina mai o Iesu? O ia o le tagata muamua na toetū mai i le agaga, ma o le tagata muamua na afio aʻe i le lagi.​—1 Kori. 15:20; Galu. 26:23; faitau le 1 Peteru 3:18, 22.

13. O le ā le eseesega o le mea na faia e Atamu ma le mea na faia e Iesu lea na taʻua e Paulo?

¹³ E faapefea i le oti o le tagata e toʻatasi ona faaolaina ai le toʻatele? Na aumai e Paulo se tali manino o lenā fesili. Na ia faamatalaina le eseesega o le mea ua oo i le tagata ona o le mea na faia e Atamu, ma le mea e mafai ona tupu i le tagata ona o le taulaga a Keriso. Na tusi Paulo e faatatau iā Atamu, “Ua oo mai le oti ona o le tagata.” Ina ua agasala Atamu na oo mai ai le oti iā te ia ma ē uma na tupuga mai iā te ia. O loo tatou mafatia pea i āuga o lona lē usiusitaʻi. Ae maʻeu le ese ai o le mea e mafai ona tupu iā i tatou ona na toe faatūina e le Atua lona Alo! Na taʻua e Paulo, “Ua toe faatutūina foʻi o ē ua oti ona o le tagata” o Iesu. “Auā e pei ona oti uma lava iā Atamu, e faapena foʻi ona toe faaolaina uma lava e ala i le Keriso.”​—1 Kori. 15:21, 22.

14. Po o le a toe faatūina mai Atamu? Ia faamatala.

¹⁴ O le ā na uiga i ai Paulo ina ua ia faapea mai, ua “oti uma lava iā Atamu”? Na uiga atu Paulo i ē na tupuga mai iā Atamu, ua tuufaasolo atu i ai le agasala ma le tulaga lē lelei atoatoa o Atamu ma iʻu uma ai i le oti. (Roma 5:12) E lē aofia Atamu iā i latou e “toe faaolaina” mai. E lē aogā iā te ia le togiola a Keriso, talu ai na lelei atoatoa o ia ae na lē usitaʻi ma le loto i ai i le Atua. O le mea na oo iā Atamu, o le a oo foʻi iā i latou o le a faamasinoina o ni “ʻoti” e “le Atalii o le tagata.” O le a oo iā i latou le “faaumatiaga e faavavau.”​—Mata. 25:31-33, 46; Epe. 5:9.

15. O ai e aofia iā i latou “uma” o le a “toe faaolaina”?

¹⁵ Ia mātau, na faapea mai Paulo, e “toe  faaolaina uma lava e ala i le Keriso.” (1 Kori. 15:22) Na tusi e Paulo lenei tusi i Kerisiano faauuina i Korinito o ē o le a toetutū aʻe e ola i le lagi. O na Kerisiano “ua faapaiaina ma ua autasi ma Keriso Iesu, ua valaauina e fai ma ʻaupaia.” Na taʻua foʻi e Paulo “ua fano i latou o ē ua oti o autasi ma Keriso.” (1 Kori. 1:2; 15:18; 2 Kori. 5:17) I le isi tusi faagaeeina a Paulo, na ia taʻua ai o i latou ua ʻfaatasia ma Iesu i le faatusa o lona maliu’ o le a ʻfaatasia foʻi ma ia i le faatusa o lona toetū mai.’ (Roma 6:3-5) Na faatūina Iesu i se tino agaga ma afio aʻe i le lagi. O le a toe faatutūina foʻi i ni tino agaga i le lagi i latou ʻe autasi ma Keriso’ po o Kerisiano faauuina uma.

16. O le ā na uiga i ai Paulo ina ua ia taʻua Iesu “o lē na muamua”?

¹⁶ Na tusi Paulo o Keriso “na muamua faatūina mai i ē ua oti.” Ia manatua, o nisi e pei o Lasalo na faatūina i le lalolagi, ae o Iesu o le tagata muamua na faatūina aʻe i se tino agaga ma maua le ola e faavavau. Na faatusaina o ia o uluaʻi fua o le seleselega lea na ofo atu e tagata Isaraelu i le Atua. O le taʻua foʻi e Paulo o Iesu “o lē na muamua,” e faaalia ai e iai isi o le a faatūina aʻe mai i le oti e ola i le lagi. O le ʻauaposetolo ma isi na “autasi ma Keriso,” na mulimuli ane faatutū e pei o le auala na faatūina aʻe ai Iesu ma ola faatasi ai ma Iesu i le lagi.

17. O anafea na maua ai e i latou na “autasi ma Keriso” lo latou taui faalelagi?

¹⁷ I le taimi na tusi atu ai Paulo i Kerisiano i Korinito, e leʻi faatutūina i le lagi i latou na “autasi ma Keriso.” Nai lo o lea, na faasino atu Paulo i se taimi i le lumanaʻi: “E taʻitoʻatasi ma lona lava tulaga: e muamua lava Keriso, ona sosoo lea ma soo o Keriso i le taimi o lona faatasi mai.” (1 Kori. 15:23; 1 Tesa. 4:15, 16) I aso nei, o loo tatou ola i le taimi na valoia ai le “faatasi mai” o Keriso. Ioe, o le ʻauaposetolo ma isi Kerisiano faauuina ua maliliu, na latou faatali i le faatasi mai o Iesu ina ia latou maua ai lo latou taui faalelagi. O le a faatasia foʻi i latou ma Iesu i le faatusa o lona toetū mai.

18. (a) Aiseā e tatou te faapea atu ai e iai le isi toetū e sosoo ma le toetū i le lagi? (e) E pei ona taʻua i le 1 Korinito 15:24-26, o ā mea o le a tutupu i le lagi?

¹⁸ Ae e faapefea Kerisiano faamaoni uma, o ē e lē mauaina le faamoemoe e ola faatasi ma Keriso i le lagi? E iai foʻi iā i latou le faamoemoe o le toetū. Ua faapea mai le Tusi Paia na  faatutūina i le lagi Paulo ma isi i le “uluaʻi toetū mai i le oti.” (Fili. 3:11) Po o lona uiga la e iai se isi toetū e sosoo ai? E talafeagai lenā manatu pe a fua i le mea na talitonu i ai Iopu o le a tupu iā te ia i le lumanaʻi. (Iopu 14:15) O le a faatasi i le lagi Iesu ma ona soo i le taimi o lona faatasi mai pe a ia faaumatia malo uma, ma pule ma ē malolosi uma. E oo foʻi i le “fili mulimuli, o le oti” o le a lē toe i ai. E mautinoa o i latou e faatutū i le lagi e lē mafai ona toe oo i ai le oti. Ae e faapefea isi?​—Faitau le 1 Korinito 15:24-26.

19. O le ā e faatalitalia e i latou e lē mauaina le faamoemoe e ola i le lagi?

¹⁹ O le ā e faatalitalia e i latou e lē mauaina le faamoemoe e ola i le lagi? E faavae lo latou faamoemoe i upu nei a Paulo: “Ou te faamoemoe . . . e toetutū mai tagata amiotonu ma tagata amiolētonu.” (Galu. 24:15) E manino mai e leai se tagata amiolētonu e mafai ona alu i le lagi, o lea la e faasino atu na upu i le toetū i le lalolagi.

20. Ua faapefea ona faamalosia lou faamoemoe?

²⁰ E mautinoa “e toetutū mai tagata”! O i latou o le a toe faatutū i le lalolagi o le a ola e faavavau i inei. E mafai ona e maufaatuatuaina lenā folafolaga. O lenā faamoemoe e mafai ona faamāfanafanaina ai oe ona o ē e pele ua maliliu. O le a toe faatutūina mai i latou i le taimi e nofotupu ai Keriso ma isi mo le afe tausaga. (Faaa. 20:6) E faapena foʻi ona tatou mautinoa i lo tatou faamoemoe. Pe a tatou feoti a o leʻi amata le pulega a Iesu i le Afe Tausaga e mautinoa o le a tatou toetutū mai. O lenei “faamoemoe e lē iʻu ai i le faanoanoa.” (Roma 5:5) E mafai ona faamalosia ai oe i le taimi lenei ma atili olioli ai i le auaunaga iā Ieova. Ae e iai isi mea e tatou te aʻoaʻoina mai i le 1 Korinito 15, lea o le a tatou talanoaina i le mataupu e sosoo mai.