1. O le ā le manatu o isi e faatatau i le ola e faavavau?

 O LE toʻatele o tagata, e aai i meaʻai paleni ma faamalositino e lē aunoa ina ia tausia ai o latou soifua mālōlōina. Peitaʻi, e lē faatalitalia ai o le a latou ola e faavavau. Atonu e latou te mafaufau e lē taitai mafai ona ola pea se tasi e oo i le faavavau. E ui i lea, na fetalai Iesu e mafai e tagata ona maua le “ola e faavavau,” e pei ona taʻua i le Ioane 3:16 ma le 5:24.

2. O le ā le manatu o loo taʻua i le Ioane mataupu e 6 e faatatau i le ola e faavavau? (Ioane 6:​39, 40)

² I se tasi aso, na fafaga faavavega ai e Iesu se motu o tagata i falaoa ma iʻa. a E ui e mataʻina lenā mea, ae i le aso na sosoo ai, na ia faia ai se faamatalaga e sili atu ona mataʻina. Na mulimuli atu le motu o tagata iā te ia i Kapanaumi, e lata i le talafatai o Kalilaia, ma o i inā na ia taʻua ai e mafai e tagata ona toetutū mai ma maua le ola e faavavau. (Faitau le Ioane 6:​39, 40.) Seʻi mafaufau la i au uō ma ē e pele iā te oe ua maliliu! Ua faamautinoa mai i fetalaiga a Iesu, o le a toetutū mai le toʻatele ua maliliu, ma e mafai ona outou olioli faatasi ma ē e pele iā te oe i le ola e faavavau! Peitaʻi, e faigatā i le toʻatele ona malamalama i isi fetalaiga  a Iesu o loo mulimuli mai i le Ioane mataupu e 6. Seʻi o tatou iloiloina na fuaiupu.

3. O le ā ua faailoa mai e Iesu i le Ioane 6:51 e faatatau iā te ia lava?

³ Na iloa e le motu o tagata na iai i Kapanaumi le fesootaʻiga o falaoa na fafagaina ai i latou e Iesu, ma le manai na saunia e Ieova mo o latou augātamā. O le mea moni, o loo taʻua i le Tusi Paia le manai o le “areto [falaoa] mai i le lagi.” (Sala. 105:40; Ioa. 6:31) O lea, na faaaogā ai e Iesu le manai e aʻoaʻo mai ai se lesona tāua. E ui lava na saunia faavavega e le Atua le manai, ae na mulimuli ane maliliu i latou na aai ai. (Ioa. 6:49) Ae i se faaeseesega, na fetalai Iesu o ia o le “areto moni mai i le lagi,” o le “areto mai i le Atua,” ma o le “areto o le ola.” (Ioa. 6:​32, 33, 35) Na faamatilatila mai e Iesu le māfuaaga autū e eseese ai o ia ma le manai. Na fetalai o ia: “O aʻu o le areto ola na sau mai i le lagi. Pe a ʻai se tasi i lenei areto, o le a ola o ia e faavavau.” (Faitau le Ioane 6:51.) O lenā faamatalaga na lē mautonu ai tagata Iutaia. E faapefea ona faapea mai Iesu o ia o le “areto” mai i le lagi, lea e sili atu nai lo o le manai na saunia faavavega e le Atua mo o latou augātamā? Na fetalai atili atu Iesu: “O le areto ou te avatua, o loʻu tino lea.” O le ā le uiga o lana fetalaiga? E tāua lo tatou malamalama i le uiga o lana fetalaiga, ina ia iloa ai le auala e tatou te maua ai ma ē e pele iā i tatou le ola e faavavau. Sei o tatou iloiloina lenā manatu.

ARETO OLA MA LE TINO O IESU

4. Aiseā na faateʻia ai nisi i fetalaiga a Iesu?

⁴ Na faateʻia nisi ina ua faapea atu Iesu, o le a ia tuuina atu lona “tino . . . e fai ma sui o ola o le lalolagi.” Atonu na latou mafaufau na manaʻo Iesu ia latou aai i lona tino faaletino. (Ioa. 6:52) Ae na atili ona faateʻia i latou ina ua toe faapea atu Iesu: “Pe afai tou te lē aai i le tino o le Atalii o le tagata ma inu i lona toto, e lē i totonu iā te outou le ola.”—Ioa. 6:53.

5. Aiseā e tatou te mautinoa ai e leʻi uiga atu Iesu i le inuina e tagata o lona toto?

⁵ I aso o Noa, na faasā ai e le Atua ona ʻaina le toto. (Kene. 9:​3, 4) Na toe faatonuina e Ieova tagata Isaraelu e ala i le Tulafono ina ia aua neʻi ʻaina le toto, ma o so o se tasi e na te ʻaina le toto e ao ona “fasiotia.” (Levi. 7:27) Na tausia foʻi e Iesu lenā Tulafono. (Mata. 5:​17-19) E lē talafeagai la ona mafaufau na manaʻo o ia e aai tagata Iutaia i lona tino faaletino, ma inu i lona toto. Peitaʻi, o le faaaogā e Iesu o lenā faaupuga e lē masani ai, na ia aʻoaʻo ai tagata i le auala e maua ai le “ola e faavavau.”—Ioa. 6:54.

6. Aiseā e tatou te faapea atu ai e leʻi uiga atu Iesu i le aai o tagata i lona tino faaletino ma feinu i lona toto?

⁶ O le ā le uiga o le fetalaiga a Iesu? E manino mai, na fetalai Iesu i se uiga faafaatusa, e pei ona ia faia i se taimi muamua atu i le fafine Samaria e faapea: “O lē e inu i le vai ou te foaʻiina atu, e lē toe fia inu lava o ia. A o le vai lea ou te avatua mo ia, e avea o se vaipuna i totonu iā te ia e puna mai ai le ola e faavavau.” (Ioa. 4:​7, 14) b E leʻi uiga atu Iesu o le a maua e le fafine Samaria le ola e faavavau, pe a tau ina inu i se vai mai i se vaieli. I se tulaga taitutusa, e leʻi uiga atu o ia o le a maua e le motu o tagata sa iai i Kapanaumi le ola e faavavau, pe a latou aai i lona tino faaletino ma feinu i lona toto.

 ESEESEGA O FETALAIGA A IESU

7. O le ā le manatu o nisi e faatatau i le fetalaiga a Iesu o loo i le Ioane 6:53?

⁷ E manatu nisi tagata lolotu, o fetalaiga a Iesu o loo i le Ioane 6:53 e faatatau i le aai i lona tino ma inu i lona toto, ua faaata mai ai le mea e fai i le Talisuaga Afiafi a le Alii, auā e tai faapena foʻi ana fetalaiga ina ua ia faavaeina lenā talisuaga. (Mata. 26:​26-28) E latou te faapea mai, e tatau iā i latou uma e auai i le Talisuaga Afiafi a le Alii ona tagofia le areto ma le uaina. Ae pe e saʻo lenā manatu? E tāua lo tatou iloa pe e moni lenā manatu, ona e faitau miliona tagata i le lalolagi aoao e auai faatasi ma i tatou e faamanatu lenā Talisuaga i tausaga taʻitasi. O le a tatou iloiloina nisi o eseesega o le fetalaiga a Iesu o loo i le Ioane 6:​53, ma ana fetalaiga i le taimi o le Talisuaga Afiafi a le Alii.

8. E faapefea ona iloa e eseese le fetalaiga a Iesu o loo i le Ioane 6:​53, ma ana fetalaiga i le taimi o le Talisuaga Afiafi a le Alii? (Tagaʻi foʻi i le ata.)

⁸ Seʻi mātau mai nisi o eseesega se lua. Muamua, o anafea ma o fea na fetalai ai Iesu i upu o loo faamauina i le Ioane 6:​53-56? Na ia faia faapea a o ia talanoa atu i se motu o tagata Iutaia, a o iai i Kapanaumi i Kalilaia i le 32 T.A. O le taimi lea e pe ā ma le tausaga atoa a o ia leʻi faavaeina le Talisuaga Afiafi a le Alii i Ierusalema. Lua, o ai na fetalai i ai Iesu? O le toʻatele o lana ʻaufaalogologo i Kalilaia, na sili atu ona  naunau e faamalie o latou manaʻoga faaletino nai lo o o latou manaʻoga faaleagaga. (Ioa. 6:26) O lea, ina ua fai atu e Iesu se fetalaiga na faigatā ona latou malamalama i ai, na vave lava ona latou lē toe talitonu iā te ia. Na oo lava ina lē toe mulimuli atu nisi o ona soo iā te ia. (Ioa. 6:​14, 36, 42, 60, 64, 66) Peitaʻi, e ese mai ai le mea na tupu i le taimi na faavae ai e Iesu le Talisuaga Afiafi a le Alii, i le pe ā o le tausaga mulimuli ane ai i le 33 T.A. I lenā taimi, na iai pea ona aposetolo faamaoni e toʻa 11 faatasi ma ia, e ui lava e latou te leʻi malamalama atoatoa i ana fetalaiga. E ese mai iā i latou sa i Kalilaia, na talitonu aposetolo faamaoni o Iesu, o ia o le Alo o le Atua na afio mai i le lagi. (Mata. 16:16) Na ia faamālō atu iā i latou e ala i le faapea atu: “Ua outou tumau iā te aʻu i taimi o oʻu puapuaga.” (Luka 22:28) O nei eseesega e lua e iloa ai, o fetalaiga a Iesu o loo i le Ioane 6:​53, e lē o faaata mai ai le mea e fai i le taimi o le Talisuaga Afiafi a le Alii! Ae e iai foʻi nisi faamaoniga atili e iloa ai e eseese.

LE UIGA O FETALAIGA A IESU MO OE

9. O ai le vaega na uiga atu i ai fetalaiga a Iesu i le taimi o le Talisuaga Afiafi a le Alii?

⁹ I le Talisuaga Afiafi a le Alii, na avatu ai e Iesu le areto e lē faafefeteina i ona aposetolo, ma faapea atu o le faatusa lea o lona tino. Na ia faapea atu foʻi ina ua ia avatu le uaina, o le faatusa lea o le “toto o le feagaiga.” (Mare. 14:​22-25; Luka 22:20; 1 Kori. 11:24) E matuā tāua lana fetalaiga e faatatau i le feagaiga. O lenei feagaiga fou e lē aofia ai tagata uma, ae e faia aʻe i le “aiga o Isaraelu [faaleagaga],” o ē o le a iai “i le Malo o le Atua.” (Epe. 8:​6, 10; 9:15) I lenā taimi, e leʻi malamalama atoatoa le ʻauaposetolo i le uiga o lana fetalaiga, ae na mulimuli ane faauuina i latou i le agaga paia ma avea ai ma vaega o le feagaiga fou e pule faatasi ma Iesu i le lagi.—Ioa. 14:​2, 3.

10. O le ā le isi eseesega o fetalaiga a Iesu i Kalilaia ma ana fetalaiga i le taimi o le Talisuaga Afiafi a le Alii? (Tagaʻi foʻi i le ata.)

¹⁰ Ia mātau, i le taimi o le Talisuaga Afiafi a le Alii, na taulaʻi faapitoa atu Iesu i le “lafu mamoe itiiti.” O lenā vaega toʻaitiiti, na amata mai i ona aposetolo faamaoni na iai faatasi ma ia i lenā taimi. (Luka 12:32) O i latou na sa fetalai i ai Iesu e tagofia le areto ma le uaina i lenā afiafi. E iai foʻi nisi o le a faaopoopo atu i lenā vaega i se taimi mulimuli ane, ma e latou te tagofia foʻi le areto ma le uaina pe a faamanatuina le Talisuaga Afiafi a le Alii. O i latou nei o le a faatasi ma Iesu i le lagi. O le isi la lea eseesega, ona na ia fetalai atu i le taimi o le Talisuaga Afiafi a le Alii i se vaega toʻaitiiti o tagata, ae i Kapanaumi i Kalilaia, na ia fetalai atu i se vaega toʻatele o tagata.

11. O le ā le fetalaiga a Iesu na faia i Kalilaia e iloa ai e leʻi faasino atu o ia i se vaega toʻaitiiti o tagata?

¹¹ A o iai Iesu i Kalilaia i le 32 T.A., na ia talanoa patino atu i tagata Iutaia na mananaʻo i meaʻai mai iā te ia. Na ia faauaʻi atu i latou i se mea e sili atu ona tāua nai lo o meaʻai, o le sauniuniga lea e mafai ona latou maua ai le ola e faavavau. Na fetalai foʻi Iesu, o ē ua maliliu o le a toetutū mai i le aso mulimuli ma maua le ola e faavavau. E leʻi faasino atu o ia i se vaega toʻaitiiti ua filifilia, e pei ona ia faia i se taimi mulimuli ane, iā i latou na iai i le Talisuaga Afiafi a le Alii. Nai lo o lea, na ia talanoa patino atu i tagata i Kalilaia e faatatau i le faamanuiaga  o le ola e faavavau, lea ua saunia mai mo tagata uma. O le māfuaaga lea na ia faapea atu ai: “O le areto ou te avatua, o loʻu tino lea e fai ma sui o ola o le lalolagi.”—Ioa. 6:51.

12. O le ā e manaʻomia ina ia maua ai le ola e faavavau?

¹² E leʻi faapea atu Iesu i tagata Iutaia na iai i Kalilaia, o le a maua e tagata uma lava le ola e faavavau. Peitaʻi, e na o i latou e ʻaai i lenei areto’ ma faaalia le faatuatua iā Iesu. I aso nei, e toʻatele tagata e faapea mai e talitonu iā Iesu ma vaai iā te ia o lo latou faaola. (Ioa. 6:29) Ae na iai foʻi nisi i le motu o tagata na talitonu iā Iesu, ae na mulimuli ane latou tuua o ia. O le ā le māfuaaga?

13. O ā mea e aofia ai i le avea ma soo moni o Iesu?

¹³ O le toʻatele na iai i le motu o tagata sa fafagaina e Iesu, na fiafia e mulimuli atu iā te ia ona na ia saunia mea na latou manaʻomia. Na latou naunau i faamālōlōga faavavega, o meaʻai maua fua, ma aʻoaʻoga e fetaui ma o latou manatu. Peitaʻi, na faailoa atu e Iesu e tele isi mea e aofia ai i le avea ma ona soo moni. E leʻi afio mai o ia i le lalolagi e tau ina faamalie manaʻoga faaletino o tagata. Na tatau ona latou tali atu i lana valaaulia ina ia “ō mai iā te [ia],” e ala i le talia ma usitaʻi i mea na ia aʻoaʻoina atu.—Ioa. 5:40; 6:44.

14. O le ā e ao ona tatou faia ina ia maua ai aogā mai i le tino ma le toto o Iesu?

¹⁴ Na faamatilatila atu e Iesu i le motu o tagata, e manaʻomia ona latou faaalia le faatuatua. Na tatau ona latou faatuatua ma talitonu, o le taulaga na faia e Iesu i lona  tino ma lona toto o le a latou maua ai le ola e faavavau. E pei lava ona tāua ona faaalia e na tagata Iutaia le faatuatua, e faapena foʻi i tatou i aso nei. (Ioa. 6:40) O lea, o le fetalaiga a Iesu o loo i le Ioane 6:​53, e iloa ai e tāua ona tatou faaalia le faatuatua i lana taulaga togiola ina ia maua ai le ola e faavavau. O lenā faamanuiaga ua saunia mai mo tagata uma.—Efe. 1:7.

15-16. O ā ni lesona tāua ua tatou aʻoaʻoina mai i le Ioane mataupu e 6?

¹⁵ E tele mea ua tatou aʻoaʻoina mai i le Ioane mataupu e 6, lea e matuā tāua ma faalaeiauina ai i tatou uma. O loo faailoa manino mai ai le manatu mamafa o Iesu i tagata. A o iai i Kalilaia, na ia faamālōlō ē mamaʻi, aʻoaʻo atu e faatatau i le Malo, ma faamautinoa o loo lava meaʻai mo tagata. (Luka 9:11; Ioa. 6:​2, 11, 12) Ae o le mea e sili ona tāua, na ia aʻoaʻo atu e faapea o ia o “le areto o le ola.”—Ioa. 6:​35, 48.

¹⁶ O i latou na ia faasino atu i ai o “isi mamoe,” e lē tatau ona latou tagofia le areto ma le uaina pe a faamanatuina le Talisuaga Afiafi a le Alii i tausaga taʻitasi. (Ioa. 10:16) E ui i lea, e latou te maua foʻi aogā mai i le tino ma le toto o Keriso. E latou te faia faapea e ala i le faaalia o le faatuatua i le taulaga togiola a Iesu, ma mea ua mafai ona faataunuuina ai. (Ioa. 6:53) I se faaeseesega, o i latou e tagofia le areto ma le uaina, ua iloa ai ua avea i latou ma vaega o le feagaiga fou, ma o ni suli e pule faatasi ma Iesu i le Malo i le lagi. O lea, e tusa po o i tatou o se vaega o le ʻaufaauuina po o isi mamoe, ae e tele aogā ua mafai ona tatou aʻoaʻoina mai i le tala o loo i le Ioane mataupu e 6. Ua faamatilatila mai ai le tāua o le faaalia o le faatuatua, ina ia maua ai le ola e faavavau.