Faaolaolaina i Tatou ona o Faataunuuga o Afioga a Ieova

“E le na o mea e ʻai e ola ai le tagata, a o afioga uma e tulei mai i le fofoga o le Atua.” (Ieova)—MATAIO 4:4.

1. Ua faapefea ia Ieova ona avea o le Foai Sili o Mea ʻAi, ma o ā fa a Iesu e faatatau i manaoga o tagata?

O IEOVA o le Foai Sili o Mea e ʻai. Sa faailoa mai o ia e faapena i tagata i le ulu ai mataupu lava o le Tusi Paia. (Kenese 1:29, 30) Mulimuli ane, sa faapea atu ma le loto faafetai le faisalamo o Tavita ia Ieova: “E faasaga atu ia te oe mata o mea uma lava; e te avatua foi a latou mea e ʻai i ona aso e tatau ai. O loo e faamafola lou aao, ma faamaoona le manao o mea ola uma lava.” (Salamo 145:15, 16) Ioe, ua saunia e Ieova le anoanoai o mea e ʻai mo tagata atoa ma manu. Ui i lea e i ai sona eseesega. Talu ai o manu latou te manaomia na o mea e ʻai faaletino, sa faailoa mai e Iesu le sili atu o mea e manaomia e le tagata na i lo o areto faaletino, po o mea ʻai. E tatau foi ona ia ʻai i afioga uma e tulei mai i le fofoga o Ieova.’—Mataio 4:4.

2. O le ā e ao ona tatou iloa e uiga i upu a Iesu i le Mataio 4:4?

 ² Sa fetalai atu e Iesu nei upu ina o tali atu ia Satani, o lē sa taumafai e tofotofo ia te Ia i le faaliliuina lea faavavega o maa e fai ma areto. Sa lei uunaia e le tiapolo le manatu ae na vave oso foi i le isi tofotofoga. A manatu atu i le auala sesē na ia siia mai ai le Salamo 91:11, 12, atonu sa lei matua malamalama Satani po o le ā na auga i ai Iesu i Lana tali atu i le uluai tofotofoga. (Mataio 4:3-7) Peitai o i tatou o auauna a Ieova e faaalia le naunau atu i le mea na fetalai ai Iesu. O i tatou o ē olioli e suesue loloto i le Tusi Paia ina ia maua aogā e gata mai ai faaleagaga e mafai ona fesili: Ina ia taʻitaʻiina i se olaga atoatoa, pe sa faauiga ea e Iesu faapea e tatau i le tagata ona suesue ma atonu e taulotoina “afioga uma e tulei mai le fofoga o Ieova”? Po o le ā na ia faatatauina i ai?

Afioga a Ieova

3, 4. O ā uiga e lua o le upu Eleni ma le upu Eperu ua faauigaina i ai le upu “afioga” tulei? Faataitai mai.

³ I le talitualimaina o Satani, na siia mai e Iesu le Teuteronome 8:3 e tusa ai ma le Greek Septuagint version o le nei mau mai tusitusiga Eperu. O le upu Eleni ua faaliliuina “afioga” (rheʹma) e uiga lua. O nisi po o “tuleiga”. Peitai e tusa ai ma le soa Eperu (da·varʹ), e mafai foi ona uiga o “se mea.”

⁴ I le Luka 1:37 ua tatou faitau ai e faapea: “Auā e leai lava se mea [rheʹma] e tasi e le mafai e le Atua.” I le Luka 2:15 ua faitauina: “Ona fetautalatalaaʻi ai lea o leoleo mamoe: ‘Ina tatou o ia i Peteleema, tatou te vaavaai i lenei mea [rheʹma] ua faia, ua faailoa mai ia i tatou e le Alii.’” O lea, ae maise lava e pei ona faaaogaina e tusa ia Ieova, o lenei upu Eleni e mafai ona uiga i le “upu,” o “tautinoga” po o se “tuleiga” a le Atua. E mafai foi ona uiga o “se mea” tusa lava pe faasino i se “mea na tupu” po o le “gaoioiga” o loo faamatalaina, o le iuga o se mea na tautalagia, ua faataunuuina le upu.

5. O le ā le uiga o le Luka 1:37?

⁵ I le malamalamaaga, e le o le uiga o le Luka 1:37 faapea e mafai e le Atua ona soona tulei atu ni upu. Atonu e saʻo lena i se tagata, e tusa lava pe le taunuu mea na ia fai mai ai pe leai foi sona uiga. Peitai e tusa ai ma fetalaiga a le Atua, o le taua o le Luka 1:37 ona e leai se afioga po se tuleiga a Ieova e le faataunuuina. O le tautinoga na faia e le agelu ia Maria sa tatau lava ona faataunuuina. O le manatu o loo i tua o le upu Eperu ma le Eleni ua faaaogaina mo le “afioga” a Ieova, “tuleiga,” “faaupuga,” po o “tautinoga” o loo  matua matagofie ona faamatalaina mai i le tusi a Isaia. Ua fetalai Ieova: “Auā e pei ona totō ifo o le ua ma le kiona mai le lagi, a e le toe foi atu i ai, a e peitai e faasūsūina ai le laueleele, ma fua mai ai, ma totogo mai ai, e tupu mai ai i lē lulu saito ma mea e ʻai i le ua ʻai; e faapea foi laʻu upu (Eperu, da·varʹ; Eleni, rheʹma) e alu atu ai loʻu gutu, e le foi mai fua ia te au; a e peitai e faia le mea ou te loto i ai, e manuia foi i le mea ou te auina atu ai.”—Isaia 55:10, 11.

“E le Na o Mea ʻAi”

6, 7. O ā faamatalaga faaletalatuufaasolo faale-natura sa faamatalaina i le Teuteronome 8:2, 3?

⁶ Nei la, sei toe foi i le manatu, o le a sa auga i ai Iesu, ina o ia siia mai le Teuteronome 8:3, sa fetalai ai o ia “e le na o mea e ʻai e ola ai tagata ao mea uma e tulei mai i le fofoga o Ieova”? (Mataio 4:4) Sa ia fai mai ea faapea o le tagata tauatua e mafai ona ola i na o tuleiga, afioga, po o tautinoga? Pe ua lava ea le na ona poto i le ulu i faamatalaga tauatua? Sei tatou iloiloina faamatalaga o talafaasolopito e uiga i upu na siina mai e Iesu mai le Teuteronome.

⁷ O le fesoasoani mo le suesueina o le Tusi Paia o le “All Scripture Is Inspired of God and Beneficial” ua faailoa mai ia i tatou i le itulau e 36: “Ua i le tusi o Teuteronome se feau malosi tele mo tagata o Ieova. Ina ua uma ona faataamilo i le vao mo tausaga e fagafulu, ma ua tutu nei le fanauga a Isaraelu i faitotoa o Nuu o le Folafolaga.” O le tausaga e 1473 T.L.M. O le nuu? O fanua laugatasi o Moapi. I lana lauga e lua i le faapotopotoga o Isaraelu sa faapea atu Mose: “Ia e manatua le ala uma lava na taʻitaʻiina mai ai oe e Ieova lou Atua i ia tausaga e fagafulu i le vao, ina ia faatigaina oe, ma tofotofo ai ia te oe, e iloa ai mea o i lou loto, pe e te tausiusi i ana poloaiga pe leai. Na ia faatigaina foi oe, ma faalaina oe, ua na fafaga ia te oe i manai, o le mea na e le iloa, na le iloa foi e ou tamā, ina ia na faailoa atu ia te oe e le na o mea e ʻai e ola ai tagata, a o mea uma e tulei mai i le fofoga o Ieova e ola ai tagata.”—Teuteronome 8:2, 3.

8. O le ā le tulaga sa i ai tagata Isaraelu, ma ai se ā na faatagaina ai e Ieova lea tulaga?

⁸ Sei manatu! E faitau miliona tagata Isaraelu—o e matutua, talavou, tane, fafine, ma tamaiti—sa savavali mo tausaga e tele e 40 “i le vao e tele ma le matautia, e i ai gata uogo akarava, o le nuu naumati foi, e le o [i ai] se vai.” (Teuteronome 8:15) Sa latou manaomia ni mea e ʻai ma se vai inu. Sa faatagaina i latou e Ieova i nisi taimi ia galala matelaina. Ai se ā? Ina ia tumau i o latou mafaufau “e le na o mea e ʻai e ola ai le tagata, a o afioga uma e tulei mai i le fofoga o le Atua.”

9. Sa faapea ona faatumuina manaoga o tagata Isaraelu e ala i afioga a Ieova?

⁹ O le ā le sootaga i le va o manaoga o tagata Isaraelu ma afioga, po o tuleiga, mai le fofoga o Ieova? O lea, o ā mea moni na oo ia Isaraelu e avea o se iuga o tuleiga a Ieova? Sa tusi Mose: “Na le pala ou ofu na e ofu ai, o ou vae foi na le fulafula i ia tausaga e fagafulu . . . Ua faapunaina e ia [Ieova] le vai mo oe nai le papa alā; na ia fafaga ia te oe i le manai i le vao.” (Teuteronome 8:4, 15, 16) O le sootaga la lenei: Se manū e le maua e tagata Isaraelu nei mea uma pe ana le poloaiina e Ieova ia faapea ona i ai. O lea la, na faapea ai ona ola tagata Isaraelu i “afioga uma [po o, poloaiga] e tulei mai le fofoga o Ieova.”

Faaolaina Ona o Afioga a Ieova

10, 11. I ā isi auala sa mafai ai ona faaolaina tagata Isaraelu i afioga a Ieova?

¹⁰ E le gata ina sa faalagolago ia Ieova mo mea aogā e pei o mea ʻai, vai, ma lavalava, ae sa faapefea foi ona ola Isaraelu i afioga a Ieova? Sa i ai foi mea aogā  faaleagaga. Sa taʻu atu e Mose i le nuu o Isaraelu faapea na faatigaina i latou e Ieova i luga o toafa ‘ina ia faalotomaulaloina i latou, ma tofotofo ia te i latou ina ia iloa ai mea o i o latou loto, pe tausiusi i ana poloaiga pe leai.’ Sa ia faaopoopo atu: “E te iloa foi i lou loto e faapei o se tagata ona aoai i lona atalii, e faapea lava ona aoai o Ieova le Atua ia te oe . . . e faamanuia ia te oe i ou tausaga amuli.”—Teuteronome 8:2, 5, 16.

¹¹ Ioe, ana faaaoga atoatoa e Isaraelu le aogā o mea na oo ia te i latou i le vao, semanu e aʻoaʻoina i latou e ‘ola i afioga uma e tulei mai le fofoga o Ieova,’ ia le gata i le aʻoaʻoina ia usiusitai i ana poloaiga tusia ae peitai i lo latou matuā tofo i iuga o tuleiga mai le fofoga o Ieova i o latou olaga i le avea o se nuu atoa ma o latou olaga taitoatasi. Sa tuuina atu ia i latou se avanoa tele e “tofotofo ai ma iloa e lelei Ieova.” (Salamo 34:8) O nei mea e tamaoaiga ai na oo ia i latou e fesootai ma afioga a Ieova—na tulei mai ma faataunuuina—sa tatau ona faaolaina ai i latou faaleagaga.

12, 13. Sa faapefea ona mafuta Iosua i afioga a Ieova, ma o le ā na ia faamaonia?

¹² O Iosua, o le na sui ia Mose i le taʻitaʻiina o Isaraelu, sa faamasani ona ia i afioga a Ieova i le faatumuina lea o lona mafaufau i na afioga. Sa faamalosia lona faatuatua i le vaaia lea o ō latou faataunuuga. Ina ua mavae le oti o Mose, sa tulei mai Ieova ia Iosua: “E le teʻa ma lou gutu le tusi o lenei tulafono, a ia e mafaufau i ai i le ao atoa ma le po, ina ia e anaana e fai e tusa ma mea uma ua tusia i ai; ona manuia ai lea ia te oe o lou ala, ona e manuia ai lea.”—Iosua 1:8.

¹³ I le taimi mulimuli o lona ola, ina ua uma ona ia usiusitai faamaoni i afioga a Ieova ma vaaia lona faataunuuga i luga o  tagata o Ieova, sa taʻutino mai e Iosua: “Ua foaiina atu e Ieova ia Isaraelu le nuu uma na ia tauto ai e foai atu i o latou tamā, ua latou fai mo latou, ma nonofo ai. Ona avatua lea e Ieova le mapusaga ia te i latou i itu uma, e pei o mea uma na ia tauto ai i o latou tamā; e lei tu mai i o latou luma se tagata o i latou uma e na ita ia te i latou; ua tuuina atu e Ieova o i latou uma e na ita ia i latou i o latou lima. E lei iuvale se upu [Eperu, da·varʹ; Eleni, rheʹma] i upu lelei uma na fetalai mai ai Ieova i le aiga o Isaraelu; ua taunuu uma lava.” (Iosua 21:43-45) Sa ola moni Iosua ma sa faaolaina, e le na o mea e ʻai, “a o afioga uma e tulei mai i le fofoga o Ieova.”

Ola i Afioga a Ieova i Aso Nei

14. (a) I le sailiili lolotoina o le Mataio 4:4, e mafai faapefea ona tatou malamalama atili i le fetalaiga a Iesu? (e) O le ā sa faamalosia ai le lagona talisapaia o tagata Isaraelu?

¹⁴ Pe a suesue loloto teisi i upu o loo i luga na siia mai e Iesu i lana tali atu i le tofotofoga a le Tiapolo, o le ā sili atu ona mafai ona tatou malamalama po o le a na auga ai le fetalaiga a Iesu. O nei upu faatalatuufaasolo ma le natura o mea i le lauga a Mose, na sii mai e Iesu, e faailoa ai o afioga a Ieova ia e tatau ona ola ai tane ma fafine tauatua e le na o ni upu na aʻoaʻoina. Mo na tagata Isaraelu, “o afioga uma e tulei mai le fofoga o Ieova” sa fesootai ma le manai, vai, ma ofu e lei pala. Ioe, o tuleiga e aofia ai le faataunuuina, o mea ofoofogia na faia e Ieova mo ona tagata. Ona o lo latou asā o nei mea na oo ia i latou, e faataunuuina ai afioga a Ieova, sa faamalosia ai Isaraelu e talisapaia.

15. E mafai faapefea ona fafagaina i tatou i afioga a Ieova?

¹⁵ E faapena foi aso nei, o le fafagaina o tagata o Ieova e le na o le faitau ma suesue i ana afioga, e ui lava ina tatau ai ona faia. O lo latou tofoina, o se faapotopotoga ma taitoatasi foi, o le auala matagofie i le feagai ai o Ieova ma i tatou ao gaoioi e fai mo tatou sui. O le tele o lo tatou malamalama i le feagai ai o Ieova ma i tatou, o le tele foi lena o le fafagaina o tatou e le faataunuuga o na afioga, faamalosia lo tatou faatuatua, lo tatou tulaga faaleagaga.

16. (a) Faatasi ai ma le ā sa auga i ai le faisalamo e faatatau ia te ia lava? (e) E ao faapefea ona tatou faia faapena ma o le a faapefea ona fesoasoani lena mea ia i tatou?

¹⁶ Sa tusia e se tasi o faisalamo: “Ou te manatu i galuega a Ioa; e moni, ou te matuā manatua ou vavega anamua. Ou te manatunatu foi i au galuega uma, ou mafaufau i mea na e faia.” (Salamo 77:11, 12) Afai tatou te mafaufauina Ieova, ma mea na ia faia, gaoioiga, ma lona laa mai e fai ma sui o ona tagata, ma iloa ai o na mea o le faatinoga o ana tuleiga, ona avea ai lea, o nei mea tauatua mo lo tatou lelei o ni mea e ʻai faaleagaga mo i tatou. O le a latou tosina ia tatou i se faiā totino vavalalata ma Ieova. O le a pei i tatou o Iesu. Na ia teena le faaliliuina o maa i areto i le faatonuga a le Tiapolo. E faapena foi ona tatou faaeteete ina ia le faatagaina mea faitino po o le lē manatu mamafa i manaoga faaletino e mafai ai ona tatou paūū atu i mailei a le Tiapolo ma lafoaʻia ai le tapuaiga a Ieova.

17. I le ā le auala sa avea ai Iesu ma faaaʻoaʻoga ofoofogia?

¹⁷ Sa fetalai Iesu: “O laʻu mea e ʻai, ia ou faia le finagalo o le na auina mai aʻu, ma faaiu lana galuega.” (Ioane 4:34) O Ia o se faaaʻoaʻo sili, ua faailoa mai ai ia i tatou i se auala aogā faapea “e le na o mea e ʻai e ola ai le tagata, a o afioga uma e tulei mai i le fofoga o Ieova.”—Mataio 4:4.

Faatalitali mo Nisi Faatonuga

18. O le ā le afioga tauatua o loo faataunuuina nei?

¹⁸ Sa fetalai Ieova, e ala i lona Alo, faapea “e talaiina atu foi lenei tala lelei o le malo i le atu laulau uma” ona oo mai ai lea o le gataaga. (Mataio 24:14) Ua faataunuuina  nei lena afioga tauatua e avea o se iuga o le galuega talai a Molimau a Ieova i le lalolagi atoa. O e “ola” ea i lena afioga mai le fofoga o Ieova i le auai atoatoa lea i le galuega talai ma i lea fale o le a maua mai ai le faaolaina faaleagaga aua o loo e faia lona finagalo?

19, 20. O ā nisi afioga tauatua ua toeitiiti aumaia o le a vevesi ai?

¹⁹ O isi afioga a Ieova o le a faafiafiaina ai i le lumanai e le o toe mamao. “O nifo e sefulu” ma le “manu feai” o le a liliu atu faasaga i le “fafine talitane”, o Papelonia Tele. Ioe, o le faaumatiaga o lena emepaea faalelalolagi o tapuaiga sesē e ala i se vaega e faasagatau i lotu i totonu o Malo Aufaatasi o le a avea ma gaoioiga mātaina e faataunuuina ai se tasi o afioga a Ieova na tulei i ai.—Faaaliga 17:16, 17.

²⁰ O se tasi tuleiga tauatua ofoofogia o le a faataunuuina pe a tuu faafaatusa e Ieova “mama” i auvae o Koku, po o Satani, ma luia o ia “ma lau itu taua uma” ia osofaia Ona tagata i luga o le lalolagi. (Esekielu 38:2-4, 8-12) O lea, o le a aumaia e le isi afioga tauatua le faaumatiaga o ʻau tau a Koku. (Esekielu 39:1-6) * O le uiga o lenei mea o le “taua o le aso tele o le Atua e ona le malosi uma lava” ia Amaketo. (Faaaliga 16:14, 16; 19:11-21) Maeu le faamanititino o le a i ai o tagata faamaoni o Ieova i le vaaia o le faataunuuga o nei faailoga tauatua ma, i le taulotoaiga o le taua, o le a faalogo ai faafaatusa i le isi tuleiga: “Tutū ia outou, ma ia outou tumau, ma outou vaai atu i le olataga mai ia Ieova.”—2 Nofoaiga a Tupu 20:17.

21. I le faalauiloaina atu o afioga a Ieova o le a aumaia ai ā taualumaga?

²¹ I lea, i le tauaveina o le isi afioga tauatua, o le a saisaia ai e Keriso Satani ma ana temoni ma lafo i le to e le gata mo le “afe o tausaga.” (Faaaliga 20:1-3) O lena afe tausaga o le a mafai ai ona faataunuuina isi afioga a Ieova, e aofia ai le toe faatutuina mai o e ua oti ma le “faamaloloina o nuu,” le fanau a tagata usiusitai. (Faaaliga 20:11-15; 22:1, 2) I totonu o lena afe tausaga o le faamasinoga, e foliga mai o le a aumaia e Ieova nisi faatonuga faaopoopo, e le o faailoa maia ia i tatou i le taimi nei, e pei o le fofolaina o isi “tusi.” (Faaaliga 20:12) Maeu se tulaga ofoofogia mo e faasaoina ma le “puapuaga tele” ma ē o le a toe faatutuina nai le oti e maua faatonuga ma taiala mai na afioga ua faatulagaina i nei “tusi” e lei tatalaina a Ieova ma faapea ona faatinoina o i latou i le maʻimaʻi!

22. O le ā ua faamalosia i tatou ia faia nei?

²² Faatasi ai ma na faamoemoega ofoofogia i o tatou luma, sei o tatou matuā faaaoga atoatoa avanoa ua tatou maua nei e faamasani i afioga a Ieova ma faia ni suesuega loloto i lana Afioga ma auai i le galuega talai faatasi ma se lagona auiluma o gaoioiga a Ieova e fai ma o tatou sui.

[Faaopoopoga i lalo]

E te Manatua?

□ Na faapefea ona aʻoaʻoina e tagata Isaraelu ina ia ola i “afioga uma e tulei mai le fofoga o Ieova”?

□ Sa mafai faapefea ona fafagaina faaleagaga tagata Isaraelu i afioga a Ieova?

□ E faapefea ona tatou ola i aso nei i afioga a Ieova?

□ O a isi afioga a Ieova o le a faataunuuina?

[Fesili mo le Suʻesuʻega]

[Ata i le itulau 16]

O le a le uiga ia te oe o le tali atu a Iesu i le tofotofoga a Satani?

[Ata i le itulau 18]

O tagata Isaraelu sa ola i “afioga uma e tulei mai le fofoga o Ieova” na maua aoga tuusaʻo faaletino.