O Manatu Sesē Taatele e Uiga i le Tusi Paia

E SILI ATU i le 8,000,000 pauni i le tupe Peretania! Maeu se tau ina a tele e totogi mo se tusi e tasi! Ae peitai, ina ua paō le samala a le tagata na pulea le faatautui i se pau sa faia i Lonetona ia Tesema 1983, o le tau lena sa totogia e lē na faatauina, o se sui mai Malo o Siamani. O le a se tusi e talafeagai ma lena tau? O se vaega o le Tusi Paia, e mai lona 12 senituri o se tusi ua aofia ai le Tala Lelei.

Po o a lava mafuaaga mo le totogia o lenei tau tele mo lenei tusi manusikulipi, o le mea e fiafia ai ona o lea tau e mo se galuega o le atamai ua tatau i se vaega o le Tusi Paia. Ua atagia mai ai i tagata lo latou manatu faapea e lē mafai ona faatusatusaina i tupe le taua o le Tusi Paia. A e peitai, o isi, ua latou manatu i le Tusi Paia ma le masalosalo po o le faasaga tau i ai. Ai se ā?

Manatu Sese Taatele

O le tele o tagata, ae maise lava i atunuu Porotesano, ua latou fai mai faapea o le Tusi Paia ua pei o se laau ili tuai e mafai ona faaaogaina e tāina ai ni fati se tele. Ua latou manatu faapea o le Tusi Paia e mafai ona faaaogaina e faamaonia ai finauga tau aʻoaʻoga eseese. Ua latou fai mai: ‘E faalagolago lava i le auala e te faaliliuina ai.’ E moni ea lea?

Ioe, e mafai ona sii mai le Tusi Paia i taumafaiga e lagolagoina ai vaaiga eseese. Ae peitai afai e faia faamatalaga mai le tusi ae le taea ai le faatatauga atoa, pe o le a lē feteenai ea ma le manatu o le tusitala ia te ia lava? Po o se mea faamaonia ea lea? Ua tausisia e Molimau a Ieova faapea o le faitauina ma le faamaoni o le Tusi Paia o le a le faatagaina ai e faatava i le faamatalaina o aʻoaʻoga autu.

Ua faapea mai le Tusi Paia, “Ia muai iloa lenei mea, ua leai se valoaga o i le Tusi e faamatalafuaina.” (2 Peteru 1:20) I nisi upu, o le malosiaga sa uunaia e tusiaina o le Tusitusiga Paia faavaloaga ua le na o se malosi faaletagata, ae peitai o le agaga paia, po o le malosi galue, o le Atua. O Ia o le uluai o perofeta uma ma o lē na faagaeeina valoaga moni uma faale-Tusi Paia e ala i lona malosi galue.

O le tasi manatu sesē taatele e faapea, o le Atua o Tusitusiga Kerisiano Eleni faagaeeina  e alofa ma agalelei, a o le Atua o Tusitusiga Eperu faagaeeina e sauā toe taui ma sui. Sa tusia e se tusitala Falani o Stendhal faapea o le Atua “o se tagata sauā, ma e faapena foi, ona tumu i manatu o le taui ma sui; o lana Tusi Paia o loo tautala lava ia na o faasalaga mataʻutia.” O lenei manatu e lē ofo ai, aua e sau mai se tamaloa ua lauiloa o sē e lē talitonu ma le fia lolo atu i le Atua. Ae o le mea e faanoanoa ai, ona o lenei lava manatu ua lagolagoina e le toatele ua taʻua i latou lava o Kerisiano, e aofia ai ma nisi o taitai lotu.

O le mea moni o vaega uma e lua na tusia i le faa-Eperu ma le vaega sa tusia i le gagana Eleni, o Tusitusiga uma na o loo taʻua ai e na o le “Atua e toatasi.” (1 Korinito 8:6; Teuteronome 6:4) O vaega uma e lua o loo faaalia mai ai e le Atua o lē e alofamutimutivale, faamasinotonu, e alofa ma e mausali. (Esoto 34:6, 7; Salamo 103:6-8; 1 Ioane 4:8; Eperu 12:28, 29) O nisi o tala e sili ona faagauloto o loo maua i le vaega o Tusitusiga Eperu i le Tusi Paia, e pei ona i ai i Salamo. I sona faaeseesega, o le “Feagaiga Fou” o loo aofia ai faamatalaga malolosi o faamasinoga mataʻutia sa tuuina atu i ē amioleaga. (2 Tesalonia 1:6-9; Faaaliga, mataupu e 18 ma le 19) O loo faataatia e le Tusi Paia mai le amataga e oo i le iuga se faamoemoe matagofie mo ē amiotonu. (Kenese 22:17, 18; Salamo 37:10, 11, 29; Faaaliga 21:3, 4) O lea, o le Tusi Paia e le feteenai mai lona amataga e oo i le faaiuga.

O se “Tusi Porotesano”?

O se talitonuga sesē taatele i le faitau selau o miliona o Katoliko i le lalolagi faapea o le Tusi Paia o se “tusi Porotesano.” O Katoliko faamaoni e le faitioina ona o lea manatu. Mo le tele o senituri sa faasaina ai e le Lotu Katoliko Roma le faitauina o le Tusi Paia i soo se gagana vagana ai le faa-Latina. O le mea lea sa faigata ai i le toatele o tagata Katoliko ona maua le Tusi Paia. E moni, talu mai le 1897 ae maise foi talu mai le Fono Vatikana lona lua (1962-1965), faatoa i ai i Katoliko le aiā tatau e faitau ai le Tusi Paia i soo se gagana ua faamaonia e Roma. Ae peitai sa faigata ona momotu agaifanua. O le mea lea i atunuu e toatele ai Katoliko, o le faitau Tusi Paia ua manatu i ai o se tu faa-Porotesano.

O le toatele o Katoliko toaaga o ē na maua i tausaga talu ai le Tusi Paia e lē mafai ona tago i ai e aunoa ma le faalemautonu. Ai se ā ua faapea ai? Talu ai ona o loo aʻoaʻoina pea ia latou lotu faapea o le faitauina o le Tusi Paia e ono seʻe atu ai i se mataʻutia. Ai se a? Aua foi fai mai le Lotu Katoliko faapea e lē o aumaia i le Tusi Paia le atoatoaga o faaaliga tau le upu moni faa-Kerisiano; ma e manaomia ona faamaeʻaina i “tu ma aganuu.” I lana tusi o le La Parole de Dieu (O le Afioga a le Atua), sa tusia ai e Geogia Auzou, o se polofesa Katoliko o Tusitusiga Paia: “E taimua aganuu, ua aofia ai, ua o faatasi ma e maotua foi i lo Tusitusiga Paia . . . [O Lenei] mea ua fesoasoani ia i tatou e malamalama ai i le mafuaaga ua lē faataatia ai e le lotu le faitau Tusi Paia po o le suesueina o le Tusi Paia o se tiute tauave manaomia po o se mea e matuā tatau ona faia.”

Ai se ā e Faitau ai le Tusi Paia?

Ae ui i lea, e toatele Katoliko faamaoni i le lalolagi aoao ua faatauina se Tusi Paia ma o loo sailia se fesoasoani ina ia malamalama i ai. Ua moni foi lea i Porotesano atoa ma isi sa tuu atu lo latou faamoemoe i le faakomenisi, pulega e fai toatele ma le faasaienisi.

I le iloiloina o mafuaaga mo le fiafia faafouina i mea faaleagaga, sa tusia ai e le tusitala o mea faalotu o Alain Woodrow i le nusipepa Pale o le Le Monde: “Muamua lava o lenei gaoioiga o se tulaga faalenatura ua faia ona o le lē taulau o le faiga o mea tetele o mafaufauga, talitonuga eseese, faapolotiki, ma le faasaienisi.” Sa ia aumaia o ni mafuaaga maopoopo “le iuvale o lotu faavae talu ai lo latou auaufaatasi i polotiki ma malosiaga tau tupe o lenei lalolagi,” na mulimuli ane, o le mea ua ia taʻua o le “iuga taufaamataʻu.”

Atonu o oe o se tasi o e ua amata ona faitauina le Tusi Paia. Afai o lea, o le a e manaomia ona iloa pe faapefea ona faia lau faitau tusi Paia ina ia fua tele mai.