E Manaomia Moni Tagata Fifilemu!

O LE matua sa aumaia ai se folafolaga: “Fonotaga Faava-o-malo o Lomiga—Tusitala mo le Filemu.” O lona nofoaga e matagofie naua: o le aai anamua o Siamani o Cologne, e iloa atu ai le vaitafe o le Rhine River. Sa toafilemu taualumaga o le tauaofiaga seia oo ina galulu ona o se feupuaiga i le va o sui. E tusa ai ma tala na lipotia i le tauaofiaga i le 1982, o nisi sa auai sa feʻei, fetuleiai, tulei ese—e oo lava ina tauivi mo le pulea o le tulaga. O le vevesi na mafua i le po o le malo o ai o loo faamisa i fetauaiga a le lalolagi.

Tusa lava po o le tafa o le taua o se atunuu mamao, o se tauaofiaga, po o le potu malolo o le fale o lou tuaoi, ai se a ua le mafai ai e le toatele o tagata ona ola i le filemu? E faigofie lava le tali: E le mafai ona oo mai le filemu moni pe afai e taumamao ma Ieova le Atua o le filemu, mai olaga o tagata.—1 Tesalonia 5:23.

I le Kalatia 5:22, 23, ua lisiina ai e le Tusi Paia le filemu o se tasi o fua o le agaga o le Atua. O le filemu moni e faavavau e mafai ona i o tatou olaga pe a uunaia e le agaga o le Atua ia tupu i totonu o o tatou loto. E faapefea ona faia o lenei mea? Muamua lava e tatau ona tatou iloa Ieova le Atua ma lona Alo Iesu Keriso, ma faatuatua ia i laua. (Ioane 17:3) O lea, o le a faataunuuina ia i tatou le faatoga ma le loto a le aposetolo o Paulo: “O le Atua foi e tupu mai ai le faamoemoe, ia faatutumuina outou e ia i le olioli uma atoa ma le filemu, ina ua faatuatua; ina ia tele lava lo outou faamoemoe ona o le mana o le agaga paia.” Ma ia matau ua faaiuina mai e Paulo lana tusi lava lea le taʻutinoga i lenei olaga: “Ia ia te outou uma lava le Atua e ona le manuia.”—Roma 15:13, 33.

O le filemu e aumaia e le agaga paia o le Atua e ese mai i le filemu o loo sailia e le lalolagi. I le ā le auala?

O Se Filemu Ese

I le faava-o-malo, o sē faatupu le filemu o se tasi e lelei ana upu ma le faasoa; o se tasi e mafai ona faia ni feutagaiga ina ia faatoafilemu ai itu tetee e lua atonu e aunoa ma le faia o ni suiga i o latou uiga ma gaoioiga. Atonu o se komunisi e mafai ona faia se maliega ma se tagata mauoa e aunoa ma le suia e soo se tasi o i laua o lana filosofia. E ui i lea, o le faia o se filemu ma le Atua e ese. E tuupoina e le Atua tuutuuga mo le filemu. Na te faailoa mai pe faapefea ona faatatauina. Ia Ieova le Atua e le o se maliega a o le matua lafoaia aiai o a tatou gaoioiga, uiga, amioga o le olaga o o tatou tagata atoa.—Mataio 22:37.

O le mea lea, o le mea o loo manaomia i aso nei o le filemu e mauaa i le poto tauatua, a e lē o le poto faʻaletagata. I le faitauina o le Iakopo 3:13-18, ua tatou iloa ai le aoga e aumaia e le poto faalelagi:

“O ai ea so outou ua poto ma ua malamalama? Ina faaali mai ia e ia ai le amio lelei o ana lava galuega, i le agamalu o i ai le poto. A e afai o ia te outou le finau leaga ma le misa i o outou loto, soia le mitamita, aua foi le pepelo e faaleaga ai le upu moni. E le o le poto lenei ua alu ifo mai luga; a o la le lalolagi ia, o le mea faaletino, o le faatemoni ia . . . A o le poto mai luga e muamua ona  mama, i le ua filemu, e agamalu, e ganagofie, e tumu i le alofa ma fua lelei, e le alofa faapito, e le faataga fai. Ua luluina foi le fua o le amiotonu ma le filemu e i latou o e faatupuina le filemu.

O le filemu e sau mai le poto o le Atua na te faia e sili atu na i lo o le puipuia o feteʻenaiga; na te matuā gaoioi moni ma le tiotio e tausia le faiā lelei ma isi.

E faaopoopo i lea, o le tausia o le filemu i auala faaleatua e mafai ona fesoasoani e puipuia manaoga e faaleagaina ai, na totoina i loto o le fanau a tagata talu ma le taimi o le fouvalega i Etena, mai le tupu ae i le faia o le agasala e oti ai. (Kenese 8:21; Mataio 15:19; Roma 5:12) I le faasino atu i le aoga o lenei talita e puipuia ai, sa tusia e le aposetolo o Paulo faapea “O le manuia [filemu] foi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau ia Keriso Iesu.”—Filipi 4:7.

Ua faailoa mai e lenei mea faapea o le “filemu mai le Atua” e aumaia e ala i le Alo. Sa fetalai Iesu: “O loʻu manuia ou te avatu ai ia te outou; ou te le avatua ia te outou faapei ona avatua i le lalolagi.” (Ioane 14:27) O le filemu moni e lē o se iuga o ni taumafaiga a ni faalapotopotoga, tamaoaiga, faʻapolotiki, po o siomaga ae peitai na i lo o lena, o se iuga o le tapuaiga ia Ieova i le faʻataitai lea i lona Alo o Iesu Keriso. O le mea lea, ua talafeagai lelei lava faapea, o le tele o tusi a Paulo e amata lava i faaupuga e pei o le: “Ia ia te outou le alofa tunoa ma le manuia mai le Atua lo tatou Tama, atoa ma le Alii o Iesu Keriso.”—Roma 1:7; 1 Korinito 1:3; 2 Korinito 1:2.

O oe Ea o Sē Tausia le Filemu?

O Kerisiano e tausia le filemu ua latou iloa e leai so latou tomai e faatumauina ai le filemu e faavavau. O le tino faʻaletagata e vaivai. E manaomia ona lagolagoina e le agaga o le Atua. Sa faʻamanatu mai e Paulo i Kerisiano: “Ia e alofa atu i le lua te tuoi, ia pei o oe lava ia te oe.” Ona ia toe  faaopoopo mai lea: “A e afai tou te feutai ma feʻainaʻi, ia outou ina nei faaumatia outou ia te outou. Ou te fai atu, ia outou savavali i la le Agaga, ona le faia lea e outou o le tuʻinanau o le tino. Aua o le tino ua tuʻinanau lea e tetee atu i le Agaga, ua feteenai foi ia mea, o le mea lea tou te le fai ai mea tou te loto i ai.”—Kalatia 5:14-17.

Pe a tetee mai se tasi, o le a faaseseina se tagata e ona manaoga faaletino e talitonu o ia e sao a o le mea moni o ia e sese. O uiga mataga, manatu faapito, lotoviʻi, tauvaga le pulea o ni mea sese ua latou le amanaiʻa. I le mafaufau o le tagata, ua tino mai nei mea i le faafia malosi ma le tinoū, ma ia te ia lava, o nei mea ua avea ma ki i le manumalo, po o le taulau foi. O le mea lena na tupu i nisi o uluai Kerisiano i Kalatia. Sa latou faatagaina o latou ‘manaoga faaletino’ e faaleagaina le matagofie o le filemu e le gata i o latou lava olaga a e faapea foi ma le faapotopotoga. “O le feitagai, o le femisai, o le losilosi vale, o le lotoa, o le finau vale” na pisipisia ai le tino mai faʻaleagaga o la latou faapotopotoga, ma sa tatau ona latou aveesea na ila ina ia maua ai le filemu.—Kalatia 5:20, 22.

I aso nei o uiga o le faa-Kerisiano e faigofie ona gaoia ai le filemu mai lo tatou parataiso faaleagaga. Ua aumaia e pisinisi, galuega, aoga, ma gaoioiga o le faalapotopotoga tulaga e tofotofoina ai po o mau la tatou uʻu i le fua o le filemu pe leai. Ina ia mautinoa la po o oe o se tausia le filemu nai lo o se gaoi o le filemu, fesili ifo ia te oe i fesili nei:

□ Pe o ou faatulagaina ea lou tagata e taua ma taualoa, pe o ou agamalu ma lotomaulalo?—Faataoto 11:2; Mataio 18:1-4.

□ Po o ia te au ea se faanaunauga malosi mo mea faitino, po o ou loto malie i mea ua i ai ma fale e nonofo ai?—1 Timoteo 6:4-10; Eperu 13:5.

□ Pe o faaalia ea sou faailoga tagata i e ua lauiloa, po o e mauoa i mea faitino i le faapotopotoga, pe o ou talia tagata uma i le faatuatua.?—Roma 15:7; Iakopo 2:1-4.

Suia le Poto Faaletagata I le Poto Tauatua

O le agaga o le agasala na te faagaee le amoga masani o le gaoia o le filemu e sau mai manaoga manatu faapito. Matau pe ua faapefea ona faamatilatila mai e le soo o Iakopo le amataga o fua leaga i le Iakopo 4:1, i lona tusi mai: “Maifea taua ma misa o ia te outou? E le o lenei ea, mai o outou manao leaga o loo tau i o outou tino uma?” O e faaleagaina le nofo lelei o le faapotopotoga ua latou teena le avea ma e tausia le filemu aua ua latou faatagaina manaoga manatu faapito ‘e tau i totonu o i latou.’ Ua latou faatagaina le agaga faamisa e nofo i totonu o o latou tino. O lea, o o latou manaoga manatu faapito, ua pei o se ʻau tau e osofai atu, o loo agai atu i le ala o le taua o loo aga atu mo le fia iloa, aafiaga matautia, fia pule, ma isi mea faapena, a o aveesea le filemu mai la latou faia ma le Atua atoa ma uso talitonu.

E faapena foi, o aso uma lava tatou te fesagai ai ma ni tulaga, po o se tasi, o le iuga lava e le ioe faatasi. E faapefea ona tatou taulimaina le mataupu? Atonu o le a le malilie nisi ma alalaga mai ma le ita, ma le faamoemoe o le a solomuli ai le faafitauli ma suia ai. Ua faanaunau isi e puipuia o latou tulaga ma uiga o le olaga, atonu o le a matuā tetee atoatoa ai faasaga i ni goioiga ua uma ona faataatia. O na gaoioiga e faaumatia ua uma ona faataatia. O na gaoioiga e faaumatia ai le filemu. Ua latou faagesegese ai le agai i luma ma le faataunuuina o mea i totonu o aiga, i galuega, o le faapotopotoga. I le isi aiga, i galuega, po o le faapotopotoga. I le isi itu “o le poto mai luga . . . ua filemu.” (Iakopo 3:17) Ma o le filemu i gaoioiga e fesootai ai tagata ma tagata, atoa ma tagata o le Atua. (Efeso 4:3) O le mafuaaga lena ua faatonu atili mai ai le poto tauatua:

□ “Pe afai foi e te avatu lau taulaga i le fata faitaulaga, ona e manatua ai lea ua i lou uso se mea e tiga ai o ia i te oe, ina tuu ia i lea  mea o lau taulaga i luma o le fata faitaulaga, a e alu oe ia muai faalelei i lou uso, i le e sau ai, ma avatua lau taulaga.”—Mataio 5:23, 24.

□ “Afai e mafaia ia te outou, ia outou nofo lelei ma tagata uma.”—Roma 12:18.

□ “O lenei, ia tatou tausisi i mea e tupu ai le filemu, ma mea e fefaamafanafanai.”—Roma 14:19.

O E Tausia Le Filemu E Fai Evagelia

I le iloa o Ieova le Atua o Le e aumai ai le feau o le filemu i le lalolagi atoa, sa faapea mai le aposetolo o Ioane, “ua outou iloa le upu na molia e ia i le fanauga a Isaraelu, ua folafola ai le tala lelei o le manuia [filemu] ia Iesu Keriso, o le Alii ia o tagata uma lava.” (Galuega 10:36) Sa le gata ina “maliu mai Iesu e folafola mai le tala lelei o le leleiga [filemu]” a e sa aʻoaʻo foi ona soo ia faia faapea. (Efeso 2:17) Sa ia taʻu atu o lenei mea e ala i le o atu mai lea fale i lea fale mo le ‘sailia o e naunau’ ma sa ia faatonu atu ia i latou “O le fale tou te ulu atu i ai, tou te muai fai tau, ‘Ia manuia le aiga nei.”—Mataio 10:11; Luka 10:5.

Ae peitai, e pei o le uluai senituri, e faapena foi aso nei, o le toatele latou te lē talisapaia “le tala lelei o le leleiga. [filemu].” Na fagua ai i latou, e le ma se uiga filemu, a e o se agaga o le fia misa. Sa muai taʻuina atu e Iesu lenei ituaiga o tali mai i le galuega faaevagelia, aua na ia faapea mai: “A outou ulufale atu i se aiga, ia outou ofo alofa atu i ai. Pe afai foi ua tatau lea aiga, ia oo atu i ai la outou faamanuia; a e afai ua le tatau, ia toe foi mai ia ia te outou la outou faamanuia.” (Mataio 10:12, 13) O le a matuā talia e nisi lenei filemu mai le Atua; a e o le a le talia e isi. A e o le Kerisiano i soo se itu, o le a lē lafoaia ai lona filemu ma le Atua po o tagata foi.

O i latou e teena le filemu mai le Atua ua latou matuā faasagatau moni lava ia te ia. Ua aofia ai i le valoaga a Iesu o loo lisiina mai ai mea tutupu e fai ma faailoga o lona afio mai i le mana o le Malo faa-Mesia le lapataiga faataʻitaʻi lenei: “Pe a sau le Atalii o le tagata i lona mamalu, ma le au agelu paia uma faatasi ma ia, . . . ona tuu eseeseina lea o i latou e ia, e pei o le leoleo mamoe ona tuueseeseina o mamoe ma ʻoti.” (Mataio 25:31-33) O le finauga ua mafua ai le vaevaeina ua autu i le Malo o le Atua e ala ia Keriso. Po o le a lava le tali atu a tagata taitoatasi i le “tala lelei o le malo” o loo aumaia ia i latou e ‘lē aupito itiiti o uso o Keriso’ o le a mamafa tele i ai lo latou faamasinoga. (Mataio 24:14; 25:34-46) I lana galuega o le vaevaeina, ua faaaoga lava e na o ē tausia le filemu e faaooina atu le feau o le tala lelei. I lea auala o le a leai se faavae e faapea mai ai sē e tetee: ‘Sa latou faaita tele ia te aʻu na le mafai ai ona ou malamalama i le “feau o le filemu.”’

O le mea lea, i le lalolagi ua tō faaua ifo i ai fevaevaeaiga mai lea aso i lea aso, e le gata i tagata taitoatasi a o uiga faavaomalo, ua manaomia moni ai lava ni tagata e tausisi i le filemu. O le a e maua na tagata i le faapotopotoga Kerisiano moni. Tuu atu ia i le “Atua o le manuia [filemu]” na te aumaia ia te oe lona agaga paia. O le saogalemu, malu, ma le manuia o le saoloto foi mai fevaevaeaiga, femisaaʻi, o le lē mautonu, ma le mataʻu, o le a avea ma mea e te fiafia ai. (Isaia 32:17, 18). Ae e le gata i lea, o le a e olioli i faamanuiaga sili o le fesoasoani atu lea i isi ina ia avea ma e tausia le filemu e ala i le faasalalauina atu o le “tala lelei o le manuia [filemu].”—Efeso 2:17; Mataio 28:19, 20.

[Faamatalaga faaopoopo i le itulau 11]

O le filemu e sau mai le poto o le Atua na te faia e sili atu i lo o le puipuia o feteenaiga; na te matuā tausia i le naunau ai ma le faamaoni le faiā lelei ma isi.

[Ata i le itulau 9]

O le filemu e aumaia e le agaga paia o le Atua e ese mai le filemu o loo sailia e le lalolagi.