O le Soifuaga o Iesu ma Lana Faiva

Iesu ma le Au Makoi

E TOATELE tane e o mai mai Sasae. O le au makoi—o ni tagata faapea latou te suesueina ma faailoa mai le tulaga o fetu. A o latou i ai i o latou aiga i Sasaʻe, sa latou vaaia se fetu fou, ma sa latou mulimuli atu ai mo le faitau selau o maila i Ierusalema.

Ina ua taunuu le au makoi i Ierusalema, sa latou fesili atu: ‘O fea o i ai le ua fanau mai o le tupu o tagata Iutaia? Na matou vaaia lona fetu ma ua matou o mai ai e ifo atu ia te ia.’

Ina ua faalogo i ai le Tupu o Herota i Ierusalema, sa toatamai tele o ia. Na ia valaau ositaulaga sili ma fesili atu: ‘O fea o le a fanau ai le Keriso?’ Sa faavae la latou tali atu e mai le Tusi Paia, ma faapea atu: ‘I Peteleema.’ Ona faatonu lea e Herota ina ia aumaia le au makoi i ona luma ma fai atu ia te i latou: ‘Ina o ia outou ma saili le mea o fanau ai le tamaitiiti, a outou maua o ia, ia outou toe foi mai ma faailoa mai ia te aʻu, o aʻu foi ou te alu atu e ifo ia te ia.’ Ae i le loto o Herota, ua manaʻo o ia ina ia fasioti i le tamaitiiti.

Ina ua o i latou, sa tupu ai se mea uiga ese. O le fetu na latou iloa ao latou i ai i sasae ua muamua atu ia te i latou. E manino lava, o lenei fetu e le o se mea e masani ai, a o se fetu faapitoa na  aumaia e taʻitaʻiina ai i latou. Sa mulimuli ai pea le au makoi seia oo ina tu tonu le fetu i luga o le fale o loo i ai Maria ma Iosefa.

Ina ua ulufale atu le au makoi i le fale, sa latou iloa ai Maria ma lana tama, o Iesu. Ona latou ifo atu lea ia te ia. Sa latou avae mai a latou taga mea alofa o auro, o lipano ma pulu muro. Ina ua mavae lena, ua oo ina o le a latou toe foi atu e tau atu ia Herota le mea o i ai le tama, sa lapataia i latou e le Atua i se miti ina ia aua nei o latou faia lena mea. O lea sa latou o atu ai i lo latou nuu i le tasi ala.

O ai e te manatu na auamaia le fetu i le lagi na taitaia le au makoi? Manatua, sa lei taitaia sao i latou e le fetu ia Iesu i Peteleema. Na i lo o lea, sa tataʻiina i Ierusalema i le mea na latou feiloai ai ma le Tupu o Herota, o lē na manao e fasioti ia Iesu. Ma ana le laa ane le Atua ma lapataia le au makoi ina ia aua nei o latou tauina ia Herota, semanu na te faia lava faapea. O le fili o le Atua, o Satani le Tiapolo o lē na manao e fasioti Iesu, ma sa ia faaaoga le fetu e taumafai ai e faʻataunuʻuina lana fuafuaga. Mataio 2:1-12; Mika 5:2.

◆ O le a e faailoa ai o le fetu na iloa e le au makoi e le o se fetu e masani ai?

◆ O fea na i ai Iesu ina ua maua o ia e le au makoi?

◆ E faapefea ona tatou iloa o Satani na ia saunia le fetu e taʻitaʻiina ai le au makoi?