Lotu Ua Faia e Tagata—Pe Faamalieina Moni Ai?

E tusa ma le 450,000,000 tagata o loo auai i le lotu Hinitu. Fai mai se tagata poto i le faalefilosofia o le faatuatuaga Hinitu o Dr. S Radhakrishnan: “O lotu e le o se faaaliga lea e maua o lo tatou faatuatua a e o se taumafaiga e faaalia ai faalogona loloto o le tagata.” Ua ia toe faaopoopo mai: “O le tagata, ua mautinoa o le fua faatatau o mea uma.”

E leai se vaega autu e pulea tagata tapuai Hinitu, e leai foi se faatulagana mautu o le tapuaiga. E le na o le tasi se tusi, e pei o le Tusi Paia, e avea ma pogai o o latou talitonuga. I le gasologa o senituri sa aliai mai ai ni tusitusiga se tele a Hinitu, ma ua faatuina foi ni aʻoaʻoga faafilosofia eseese se ono: Nyaya (vaevaeina ma suesueina), Vaiseshika (poto tau i le galueaina o mea), Sankhya (tuufaatasia o mea), Yoga (autasi ma atua), Mimamsa (sailiiliga), ma Vedanta (faataunuuga o tusitusiga paia a Hinitu).

O nei filosofia sa fafauina e faiaʻoga eseese o Hinitu i taimi eseese ma tulaga eseese i talafaasolopito, ma e taitoatasi ma faʻaaoga auala eseese i le auala taufelefele e faamaonia ai le i ai o le Atua i le faia o se faaiuga (mo se faaaoaoga, e faamaonia le i ai o le matagi i le gasēsē o laau).

O lenei auala e mautinoa e i ai sona aoga, e pei ona fai mai ai faapena le Tusi Paia: “Aua o ana mea e le vaaia talu ona faia o le lalolagi, e vaaia lava ia i le mafaufau i mea na faia, o lona mana lea e faavavau ma lona Atua.” (Roma 1:20) Ae peitai, e mafai e se faiga faamaonia ona faafesootai moni atu oe i Le na Faia Mea? E mafai e sea ituaiga o faiga ona faaalia mai lona suafa? E mafai ea ona ia faailoa le amataga o le vateatea ma pe ai se a ua faatagaina ai pea le puapuaga ma le amioleaga? E mafai ea ona ia avatua ia te oe se faamoemoe e faamalieina ai mo le lumanai? Sei tatou vaai po o le fea lotu o le a mafai ona sili atu ona faamalieina ai i tatou i le taliina o nei fesili— po o lotu fai e tagata po o le lotu na faaalia mai e mea moni.

Aʻoaʻoga a Tagata Faasaga i le Tusi Paia

Ua tuuina atu e tagata lotu Hinitu le tele o manatu i uiga o le Atua. O le filosofia Vedanta, mo se faaaoaoga e faavae na manatu i tusitusiga faalotu e taua o le Upanishads. O nei tusitusiga ua sailiili agai i uiga o le Atua atoa ma lana faiā i tagata.

Ae peitai, ua sili ona faailoa mai e le Tusi Paia uiga o le Atua, ma ua ia matuā faamanino mai ma le maumauai. Ua faasinoina o ia o Lē na Foafoaina mea uma lava. (Faaaliga 4:11) Ua faaatagia mai o ia o se Peresona, a e le o se malosi e leai se igoa. “Ia latou vivii atu i le suafa o Ieova; aua ua na o lona suafa e mamalu; o lona viiga ua sili lea i le lalolagi atoa ma le lagi,” ua fai mai ai le Tusi Paia i le Salamo 148:13. Ua faamatalaina o ia “o le Atua alofa mutimutivale ma le alofa fua, e telegese lona toasa, a e tele le alofa ma le faamaoni.” (Esoto 34:6) Na te valaauina e oo lava i tagata e lē lelei atoatoa ina ia latou iloa o ia ma ia faia se faiā ma ia! (Salamo 34:8) Pe le sili ea ona faamalieina i tatou i mea ua fai mai ai le Tusi Paia e uiga i le Atua na i lo o sailiiliga faafilosofia?

Ua iloiloina foi e le Upanishads le solu o le tagata. Ae peitai, ua faamatalaina manino mai e le Tusi Paia “Ona faia lea e Ieova le Atua o le tagata i le efuefu o le eleele, ma ua  manava i ona Pogaiisu o le manava ola; ona avea ai lea o le tagata ma tagata ola.” (Kenese 2:7) O lea la o le tagata o le solu—a e lē o se nofoaga o se agaga lē vaaia o mea na oo i ai nisi o le a toe aliai mai foi. O lenei foi solu e lē ola pea. Fai mai le Tusi Paia, “O le tagata e agasala e oti ia.”—Esekielu 18:4.

Ua iloiloina foi e Upanishsads le natura o le Tagata ma lona Lagona. Peitai ua na o le Tusi Paia lava ua aumaia le ki i le malamalamaga tau le tagata ma folasia lona tulaga agasala. “Aua ua agasala tagata uma lava, ma ua le oo i le viiga mai le Atua.” (Roma 3:23) Ma o le mea lea, ua tatau i le tagata ona tauivi maumauai faasaga i uunaiga sese.—Roma 7:20, 25.

Ua saili foi e Upanishads faatatau i le moni o le amioleaga ma lona taui. Peitai ua faamanino mai e le Tusi Paia faapea o le amioleaga i luga o le lalolagi o le iuga o le filifilia e le tagata lava ia lona auala fia tutoatasi. “Faauta, na o lenei lava mea ua ou iloa, na faia e le Atua le tagata e amiotonu, a o i latou ua sailiili i latou i togafiti e tele.” (Failauga 7:29) Ma o le iuga o le taui mo le amioleaga, fai mai le Tusi Paia: “O le na te tuuina atu le taui taitasi i tagata e tusa ma a latou galuega? E tuuina atu foi le ola e faavavau i e tumau pea i le galuega lelei, a ua latou saili ai le viiga ma le mamalu . . . ; a o le toatamai ma le toasa i e finau vale, ma e le gauai i le upu moni, a e gauai i le amio leaga; ma o le puapuaga ma le atuatuvale i tagata uma lava o e fai amioleaga . . . Aua e le faailogaina e le Atua ni tagata.” Roma 2:6-9, 11.

Ma a o tauivi le Upanishads e faamalamalama le ala i le faaolataga, ua fai mai ma le faigofie lava le Tusi Paia, “O loo ia Ieova le faaolataga.” (Salamo 3:8) O i latou uma o loo mulimuli i ala o Ieova ua folafolaina mo i latou: “E fai lava le nuu mo tagata amiotonu, e nonofo ai pea i latou.”—Salamo 37:29.

Ua aumai e le Tusi Paia tali malamalama, tuusao i fesili ua puaoa ai le vaaiga faaletagata. E leai se tagata poto faalefilosofia na mafai ona ia fausia ae nei tali e ia lava.

O Le Tusi Paia Se Faaaliga Ea Mai Le Atua?

O lea, pe o le uiga moni ea o lenei mea, faapea e mafai ona e faalagolago i le Tusi Paia o se faaaliga mai le Atua? E tele ni mafuaaga e tatau ai.

Muamua lava, o se mea tatau ona manatu faapea e mafai e le Atua ona faaali mai ia lava i le tagata i nisi o auala. O le a sou manatu i se tamaloa e i ai sana fanau ae peitai ua sola ese ma lafoaia i latou? Ae  faapefea pe afai o lea tamaloa ua tuua lana fanau ua matuā aunoa ma so latou iloa o ia, e oo lava i lona igoa e lei faailoina atu foi ia i latou? Pe o le a lē matuā ita ea ia te ia? O le mea lea, pe lē tatau ai ea la ona manatu faapea o se na Foafoaina mea e alofa ua faaalia mai o ia i lana fanau faalelalolagi i nisi auala?

‘Ae, ai se a ua faia ai faapea e auala i se tusi?’ atonu o le a e fesili ai. ‘Pe le faaaogaina ea e se Atua e Ona Le Malosi uma lava se mea e sili atu ona mātaina—atonu o se leo mai le vanimonimo?’ Ioe, sa fetalai mai le Atua mai le lagi i nisi o mea na tutupu, e pei o lona tuuina atu o Tulafono e Sefulu. I lena taimi sa matuā matataʻu tagata i le faaalia mai o lenei faaaliga uiga ese lea na latou talosaga atu ai ia Mose, “Aua le fetalai mai le Atua ia te i matou, neʻi matou oti.” O lea sa tutu mamao ai le nuu a o fetalai le Atua ia Mose. (Esoto 20:18-22)  * Ae peitai e oo lava ia Mose e mafai ona galo upu ia sa fetalai atu ai le Atua. O le mea lea ua filifilia ai ma le poto e Ieova Mose, ma mulimuli ane, o nisi tane faamaoni e faasaoina Ana afioga i tusitusiga. (Esoto 34:28) O lea, ua mafai ai e tagata ona faitau manatu o le Atua i o latou taimi paganoa. E mafai ona latou manatunatu, mafaufau loloto i ai, ma suesue mea na fetalai mai ai le Atua.—Tagai i le Iosua 1:8; faapea foi le 1 Timoteo 4:15.

E moni, o le Tusi Paia na tusia e tagata, e pei lava ona mautinoa na tusia e tagata tusitusiga Hinitu. Ae peitai o tagata na tusia le Tusi Paia sa i lalo o aafiaga o le agaga paia o Ieova le Atua. (2 Peteru 1:21) O a latou tusitusiga ua le na o ni manatunatuga faafilosofia. Ma o le Tusi Paia ua i ai faailoaga vaaia o le taʻitaʻiga a le Atua. Pe mafai e soo se mea na i lo o le taʻitaʻiga a le Atua o lo taʻua i le Tusi Paia ona faamatalaina ma le saʻo le faasologa na ala ai ona aliai mai le ola i luga o le lalolagi? (Kenese mataupu 1) Pe mafai e se isi mea e ese mai i le taʻitaʻiga a le Atua ona faamatala ma le saʻo faapea, e sili atu i le 2,700 tausaga ua mavae faapea, o le lalolagi e le gata ina lapotopoto a e leai foi “se tautaulaga.” (Iopu 26:7; Isaia 40:22) E mafai ea e se isi mea nai lo le faamatalaga a le taʻitaʻiga tauatua mai le Tusi Paia lē masese pe a oo mai i valoaga, e pei o lea o loo i le Isaia 44:28, lea na taʻua ai le manumalo o le malo Peresia o Kuresa le Sili lea sa taʻua lona igoa e tusa ma le 130 tausaga a o lei fanau mai o ia? Sa mafai ea e soo se tagata ona valoia mai e tusa ma le 2,500 tausaga ua mavae le tuputupu aʻe o malo malolosi tauva e lua o loo la taofia le ogatotonu o taualumaga a le lalolagi i aso nei?—Tanielu 11:27, 36-40.

O lea o loo i ai mafuaaga malolosi e talitonu ai i le Tusi Paia o se faaaliga o le finagalo o le Atua. Ua matou valaaulia oe ina ia e suesueina ma le lotomatala le mea o loo ia fai mai ai. E fiafia tele Molimau a Ieova e fesoasoani i tagata taitoatasi ina ia faia lenei mea. Ma i lea auala o le a lē avea ai lau tapuaiga o se mea lē aoga o poto faaletagata. (Mataio 15:9) O le a lē pei foi oe o tagata Samaria anamua, le tapuai “i le mea e te le iloa.” (Ioane 4:22) Faatasi ai ma le fesoasoani a le agaga o le Atua, e oo lava ina e iloa foi “mea loloto a le Atua.” (1 Korinito 2:10) Aua “afai foi tou te sailiili ia te ia, tou te maua o ia.”—2 Nofoaiga a Tupu 15:2.

[Faaopoopoga i lalo]

[Ata i le itulau 5]

E faitau miliona ua auai i lotu fai e tagata, ae peitai pe ua latou aumaia ea ni tali faamalie loto e faatatau i fesili e uiga i le Atua?

[Ata i le itulau 6]

Ua taʻua mai e le Tusi Paia faapea e le gata ina lapotopoto le lalolagi, a e o loo ia faapea mai foi e “leai sona tautaulaga.” Pe le faamaonia ai ea i lenei mea le faagaeega tauatua?