Tapuaiga Moni—Faia e Tagata pe na Faaalia mai e le Atua?

TOEITIITI lava o mea uma ua iloa e le tagata, sa tatau ona ia tau ane ai.

I le poto faavae i nai ona tosi—o le faapefea ona totō mea ʻai ma faavela, e faapefea ona fau se fale mo ia—ua maua nei mea i le tau tagotago ma le tiga. Ae peitai i le senituri ua faatoa mavae sa vaaia ai le oso vave ae o le faateleina e le tagata o ana taumafaiga e sili atu i lo o mea manaomia e se aiga. Nei ua ia faataape le atomi, ua sili atu lona saosaoa na i lo o le alu atu o le leo—ua oo lava i lona fai ma masani le auina atu o tagata i fafo atu o le vateatea. Ae peitai, o le uiga ea la o lenei mea faapea, ua tatau nei ma lelei mo le tagata ona galueaiina e ia lava po o le a le auala sili e auauna ai i le Atua?

Ua talafeagai lea ma le mea na tusia e le tusitala o le Salamo 143:10, o le na faapea mai: “Ia e aʻoaʻo mai ia te au e fai lou finagalo; aua o oe lava loʻu Atua; ia taʻitaʻiina atu aʻu e lou Agaga lelei i le laueleele laulelei.” O lea ua iloa lelei ai lava e le faisalamo faapea o le poto uma faaletagata ma lona tomai, e manaomia le taʻitaʻiga tauatua ina ia aʻoaʻoina le finagalo o le Atua. (Faatusatusa le Ieremia 10:23) O lona uiga, e ao lava i le Atua, ona faaalia ia lava i le tagata.

Pe na tupu ea lenei mea? Mo le faitau miliona, ua faamaonia e le Tusi Paia faapea ua uma ona aumaia lea faaaliga tauatua. Peitai o nisi e ioe i ai. Ua matua faasīoaina i latou e le poto faaletagata ua latou le manaomia ai se faaaliga. Atonu e faapea mai nei tagata o le poto faalotu ua “fanauina i totonu o tagata uma” po o lena ituaiga o poto “e mafai ona maua i le faauigaina” na i lo o se “faaaliga po o ni aʻoaʻoga a se lotu.”

Ae peitai, afai e moni lea, o lona uiga o le taunuuga ua tatau ona tuu atu i le tagata e amataina lana lava lotu, ma faatuina ana lava aʻoaʻoga ma tapulaa tau amio. Pe tino mai ea e tatau lea mea ia te oe? O le ā le fuafuaga o le a aumaia e lotu ua faia e tagata lava latou? E mafai ea ona faamalieina ai manaoga faaleagaga o le tagata? (Mataio 5:3) Pe o le a taliina ai ma le tonu le fesili o loo fesili ai tagata uma o e saili i le upu moni e uiga i le Atua?

Sei tatou suesueina nei fesili i le faia o sina vaaiga puupuu i se lotu sa taumafai e sailia le Atua e ala i faauigana a tagata lava latou ma le poto faafilosofia—le faatuatuaga Hinitu.