Aʻoaʻo I Le Tomai ma le Maelega

“O lenei, ia outou o atu e fai nuu uma lava ma soo, . . . ia outou aʻoaʻo atu ia te i latou ia tausi i mea uma ua ou fai atu ai ia te outou.”—MATAIO 28:19, 20.

1. O e a ua faamalosia mai e le Faataoto 22:29, ma e faapefea?

O LE AFIOGA A IEOVA ua na faamalosia le i ai o le tomai ma le toaga. Mo se faataitaiga, ua faapea mai: “Ua e iloa le tagata ua faataalise [tomai] i ana galuega? E tu o ia i luma o tupu, a e le tu i luma a tagatanuu. (Faataoto 22:29) O le mea moni, e leai se mea e taufaatauvaaina ai le tu i luma “o tagatanuu.” Ae peitai o le tomai ma galuega lelei a tagata popoto o le a lē natia. Aua foi, o tala o lona tomai atonu o le a oo atu i taliga o se tupu, o lē atonu o le a sailia lana auaunaga!

2. (a) Ina ia atiae le tomai i soo se galuega, o le a e tatau ona faia? (e) I le avea o se faiaʻoga ai se a e taua ai i le faifeau Kerisiano ona sogasoga?

² E manaomia le poto ma le tomai i soo se galuega. Atonu e aʻoaʻo e se tamaloa le faakamuta ma aʻoaʻoina foi le tele i le mataʻia o le tomai i totonu ia te ia lava, e tatau ona faaaoga le poto maua e galue ai i le galuega. E manaomia ona aʻoaʻoina se fomaʻi tipitipi. Ae peitai ina ia tomai, e tatau ona ia sogasogā i le faaaogaina o lona poto i totonu o le potu tipitipi. Ma i lena galuega e taua tele le tomai, aua o le tomai e masani  lava ona faalagolago i ai le eseesega i le va o le oti ma le ola o le tagata maʻi. Ui i lea, e sili atu ona taua le tomai e avea ma faifeau. Ai se a? Aua o le tomai o le faifeau e avea ma faiaʻoga e mafai ona aafia ai le auala e tali mai ai tagata i le tala lelei. Mulimuli ane, o la latou tali mai e mafai ona mafua ai le eseesega i le va o le ola e faavavau ma le oti e faavavau mo i latou.—Teuteronome 30:19, 20; Ioane 17:3.

3. O le faia o soo e manaomia ai le a?

³ O le tofiga na tuuina atu e Iesu i ona soo e aafia ai le aʻoaʻo atu. Na ia fetalai: “O lenei, ia outou o atu e fai nuu uma lava ma soo, ma papatiso atu ia te i latou i le suafa o le Tama, ma le Atalii, ma le Agaga Paia; ia outou aʻoaʻo atu ia te i latou ia tausi i mea uma ua ou fai atu ai ia te outou; faauta foi, ou te ia te outou i aso uma lava e oo lava i le gataaga o le lalolagi.” (Mataio 28:19, 20) O le mea moni, e manaomia le tomai e aʻoaʻo ai e loto faaamoni i mea uma na poloai mai ai Iesu.

4. (a) O le tomai e aʻoaʻo atu e ao ona faia faatasi ma a uiga? (e) Na faapefea ona maua e Apolo aoga mai lona auaufaatasi ia Akula ma Pisila?

⁴ O lena ituaiga o tomai e aʻoaʻo atu e ao ona faia ma le maelega. Ioe, e ao i Kerisiano ona “maelega i galuega lelei,” ma o le mea moni e aofia ai le avatua o faatonuga faaleagaga i le faiva ma totonu foi o le faapotopotoga. (Tito 2:14) I le avea o ni faiaʻoga tomai, na ave ai e Akula ma Pisila “ia te ia, [Apolo] ma faamatala atu atili [i Efeso] le ala o le Atua.” Sa aoga tele lenei mea ia Apolo, aua mulimuli ane i Akaia sa “finau mauaʻi o ia i tagata Iutaia ma le faamalosi i luma o le nuu, ua faasino atu i Tusi, o Iesu o le Keriso lea.” (Galuega 18:24-28) E manino lava sa aʻoaʻo atu Apolo i le tomai ma le maelega.

‘Tumau i Au Aʻoaʻoga’

5. E tusa ai ma le 1 Timoteo 4:16, ai se a e ao ai ona tatou tomai ma maelega i le aʻoaʻo atu?

⁵ Sa taʻu atu e le aposetolo o Paulo i lana aumea Kerisiano o Timoteo: “Ia oe lava ia te oe, atoa ma lau e aʻoaʻo atu, ia e tumau pea i ai; aua a e fai lena mea, e faaolaina ai oe e oe atoa ma e faalogologo ia te oe.” (1 Timoteo 4:16) Talu ai o le faaolataga o le faiaʻoga ma le tagata aʻoga ua faalagolago i ai o le mea moni o nei poloaiga e ao ona tuuina atu i le tomai ma le maelega.

6. E faapefea ona avea oe o sē agavaa i le taulimaina o le Tusi Paia, ma o a fesili tatau ua talafeagai ona talanoaina?

⁶ E mautinoa lava le tatau i fomaʻi ma kamuta ona vaai totoʻa ia i latou lava. E tatau ona latou iloa faaaoga a latou mea faigaluega ma le poto. O lea, e tatau foi i le faifeau Kerisiano, o le o lana auupega sili o le ‘pelu o le agaga’ le Afioga a le Atua. (Efeso 6:17) E faapefea ona avea oe o sē e tomai i le taulimaina o le Tusi Paia? E ala i le suesue e le aunoa ma, o le mea moni ia faaaoga. O lea, ua e faitauina ea le Tusi Paia ma i le amataga e oo i le faaiuga, ma faaalu se taimi e mafaufau loloto ai i ana faatonuga matagofie? O e faitauina ea i aso taitasi? O e faaaogaina ea e le aunoa i le faiva i le fanua? O e mauaina ea le aoga atoatoa o mea ʻai susua faaleagaga ua tuuina mai e Ieova e ala i le “auauna faamaoni ma le mafaufau”?—Mataio 24:45-47.

7. O a fautuaga ua ofoina mai e faatatau i taimi mo suesuega, ma e faapefea ona faaalia faale-Tusi Paia le manaoga mo le suesue?

⁷ Ia mautinoa ua e faaavanoa se taimi mo le suesueina o le Afioga a le Atua ma lomiga faa-Kerisiano moni. O le a faatumuina e lenei mea lou mafaufau i faamatalaga atoatoa o le a aoga ia te oe ma mafai ai ona faaaoga e taliina ai tagata suesue faamaoni. (1 Peteru 3:15; Kolose 4:6) O taimi mo suesuega ma le manatunatu loloto e eseese mo aiga ma tagata taitoatasi. O le a iloa e nisi atonu e aoga le suesue i le iuga o le aso. O isi e sili atu ona mataala i le faatoa ala mai. A o isi o se itula i le aoauli e sili atu ona fetaui. Po o le a lava le tulaga, o le faia e lē aunoa ma le maelega e sili atu ona taua. Sa faitauina e Iosua ma tupu o Isaraelu le  Afioga a le Atua e le aunoa.—Iosua 1:7, 8; Teuteronome 17:18-20.

Galue ina ia Avea ma Faiaʻoga e Sili Ona Lelei

8. E faapefea ona faaleleia lou tomai e aʻoaʻo atu i le faaaogaina o fesootaiga faalemafaufau?

⁸ O le faaleleia o le tomai e aʻoaʻo atu e manaomia ai le galue malosi. O se tasi o auala e faaleleia ai lou tomai e avea o se faiaʻoga o le faaaoga o fesootaiga faalemafaufau pe a suesueina le Tusi Paia po o lomiga faa-Kerisiano. Faafesootai manatu fou ma ia ua uma ona e iloa. O le a fesoasoani lenei mea ia te oe e faaauivi ai manatu i lou mafaufau ina ia mafai ona e faamatala ma le manino mea pe a e aʻoaʻoina isi. E mautinoa sa e faaaoga fesootaiga a o e suesue i taimi ua tuanai. Mo se faataitaiga atonu sa e le iloa faapea e tatau i Kerisiano ona usiusitai faatatau i “faipule silisili” faalemalo. Ae ua e iloa nei o le usiusitai i le Atua e tatau ona muamua. (Roma 13:1-8; Mareko 12:17; Galuega 5:29) Ua e malamalama i lenei mea aua ua e faafesootai manatu fou ma ia ua uma ona e iloa.

9. Faataʻitaʻi mai pe faapefea ona e vaai faalemafaufau i se ma na tupu o faamauina i le Tusi Paia?

⁹ O le tasi auala e faaleleia ai lou tomai e aʻoaʻo atu o le vaai faalemafaufau lea i mea na tutupu o loo faamauina i le Tusi Paia. Ai se a e lē faia ai nei lenei mea i le tusi o Faamasino 7:19-22? Ona o le pogisa, sa siomia ai e Kitiona ma tagata e 300 le togalauapi o tagata Mitiana faatoa uma lava ona faatulaga o tagata o leleoleoga. Ua faafuasei, ona e faalogo ua ilia e le au a Kitiona e toa 100 a latou pu, ma ua e vaaia i latou o taei a latou kate o vai sa latou tauaveina. Ua faia foi e le isi toa 200 o tagata Isaraelu lena lava mea e tasi. Ao latou uʻu i luga a latou sulu, ona e faalogo lea o alalaga: “O le pelu a Kitiona!” Ao amata ona sosola Mitiana i le fefefe ua faaauau pea e vaegaau e tolu a Kitiona ona ili a latou pu, ma ua e iloa ai ua faatulagaina e Ieova pelu a le fili ua solomuli ina ia faaoo e le tasi le pelu i le isi. Talu ai ua uma ona e vaai faalemafaufau lenei mea na tupu e mautinoa lava o le a e manatua lelei ma o le a mafai foi ona faaaoga pea a aʻoaʻoina isi. O le mea moni, o se lesona na te aʻoaʻoina e mafai e Ieova ona faasaoina ona tagata e aunoa ma se vaegaau malosi faaletagata.—Salamo 94:14.

10. I le aʻoaʻo atu, e faapefea ona atonu e te faaaogaina le faataʻitaʻiga o loo maua i le Faamasino 9:8-15?

¹⁰ O faataitaiga lelei, e aofia ai ma ia o loo i le Tusi Paia, e mafai foi ona faamalosia lou tomai o se faiaʻoga. Mo se faaaʻoaʻoga, manatunatu i le Faamasino 9:8-15. Sa faamatala e Iotama le atalii o Kitiona se taimi na  o atu ai laau e faauʻu se tupu mo i latou. E ui ina teena e le laau o le olive, le mati, ma le vine le tulaga pule, a e na talia ma le fiafia e le laau tuitui. Sa faaatagia e laau taua tagata na tatau i ai o e sa leʻi sailia le tulaga tau tupu i luga o latou uso Isaraelu. Ae peitai, o le laau tuitui o lona aoga e fai ma fafie e tafu ai le afi, na faaatagia ai le pulega tau tupu mataʻutia, fasioti tagata a Apimeleko, o le na manao na te pulea isi a e na fetaiaʻi ma se iuga leaga i le faataunuuga o le valoaga a Iotama. (Faamasino 9:50-57) O lenei faataitaiga atonu e faaaogaina e faamamafa ai le manaoga e faia le mea tonu ma ia loto maulalo, a e le o le faamaualuga.—Salamo 18:26, 27; 1 Peteru 5:5.

11. (a) O a manatu o loo faamamafaina i le faataʻitaʻiga a Iesu o loo tusia i le Mataio 13:45, 46? (e) O le autu o lena faataʻitaʻiga ua fautuaina le a e faatatau i faataʻitaʻiga sa faaoga e faiaʻoga Kerisiano?

¹¹ O le Faiaʻoga Sili o Iesu Keriso, ua lauiloa ai ana faataitaiga sili. Mo se faaaoaoga, manatu i ana fetalaiga: “E tusa foi le malo o le lagi ma le tagata faatauoa, ua sailiili penina lelei; ua iloa e ia le tasi penina tau tele, ona alu ai lea o ia ua faatau atu ana mea uma, i le faatau aʻi mai.” (Mataio 13:45, 46) I lea, ua faataitaia mai ai e Iesu le taua o le Malo ma faaalia ai o le tagata na te talisapaia le taua moni o le mauaina o le Malo ua loto malie na te lafoai soo se mea ina ia faia faapea. E leai se mea o faanunumi e uiga i lena faataitaiga, ma o faiaʻoga Kerisiano e faia le mea sili ina ia taofi mau ai i le mafaufau lena tapulaa pe a faaaogaina faataitaiga e avea ma fesoasoani i le aʻoaʻo atu.

E Mafai e Sauniga ona Faia i Tatou ia Sili Ona Tomai

12. E faapefea ona fesoaosani lou auai i lauga mo le lautele e faaleleia ou tomai e aʻoaʻo atu?

¹² O sauniga faa-Kerisiano e i ai sana vaega aoga i le faia o auauna a Ieova ia avea o ni faiaʻoga tomai ma le maelega. E pei ona faaalia mai i le lauga a Iesu i luga o le Mauga, o lauga mo le lautele o se avanoa sili e aumaia ai le faatonuga faaleagaga. (Mataio 5:1-7:29) O lea foi la, o lauga mo le lautele o se tasi lea vaega o sauniga a Molimau a Ieova i aso nei. E te auai ea e le aunoa.? O oe ea o sē faalogo ma lagona? E te sueina ea lau Tusi Paia pe a faitauina e le failauga mau? Po o sau masani ea le faia o ni faamaumauga? O auala na e faaleleia ai lou tomai e avea o se faiaʻoga, ma o faatonuga lelei mai le Tusi Paia e ao ona faateleina ai e le gata i lou tomai a o lou maelega foi e faia soo.

13, 14. (a) O anafea na aumaia ai se tulaga iloga i auauna a Ieova e le galue o le faia o soo? (e) O a fesili e lelei ona fesiligia e faatatau i le Suesuega o le Olomatamata ma le Suesuega o Tusi a le Faapotopotoga?

¹³ O le galuega o le faia o soo sa i ai sona iuga faitalia i auauna a Ieova ona o le valaau ina ia ‘Faalauiloa le Tupu ma lona Malo,’ lea na uluai faaleoina i la latou tauaofiaga i Cedar Point, Ohio, i le 1922. O le tausaga foi lena, na faatoa faatuina ai suesuega a vaega o Le Olomatamata. O le mea moni o lenei mekasini ua ia tausia aʻoaʻoga faale-Tusi Paia ma le talaiga o le Malo i se tulaga auiluma, o lona igoa patino o Le Olomatamata Faasilasilaina Le Malo O Ieova. O oe o sē naunau e faitau le Afioga a le Atua faatasi ai ma Le Olomatamata o se fesoasoani? O e auai ma le sogasoga i suesuega faalevaiaso o le Olomatamata?

¹⁴ O Suesuega Tau Tusi a le Faapotopotoga faalevaiaso ua aumaia ia foi avanoa ina ia faaleleia ai lou tomai o se faiaʻoga o le tala lelei. Pe a taliina fesili inei faatasiga laiti, faapea foi ma Suesuega o le Olomatamata ma faamatalaina mea i au lava upu? O atagia i au tali mea o talitonu i ai lou loto?

15. O le a le fuafuaga o le Sauniga o le Auaunaga ma e faapefea ona maua le taʻitaʻiga mo lea?

¹⁵ A o lumanai le 1922, sa fai ma tu a auauna a Ieova ona aufaatasi mo Talosaga, Viiga ma Sauniga o Taʻutinoga. O se faatasiga mo pesega, le avatuina o taʻutinoga, a auai i talosaga. Ae peitai faatasi ma le faatelega o le faamamafaina o le faalauiloaina  o le Malo mai lea fale i lea fale, sa agai atu ai lenei faatasiga e avea o le Sauniga o le Auaunaga, ua faamamafaina ai le galuega talai. O se fesoasoani faapitoa o le Bulletin, sa maua ai faatonuga mo le auaunaga i le fanua ma “molimau,” po o taʻutinoga, e mafai ona faaaoga i le faiva. I aso nei ua aumaia e La Tatou Faiva o le Malo fesoasoani faapena atoa foi ma taiala mo “Sauniga e Fesoasoani ia i Tatou e Faia Soo” faalevaiaso. O e auai e le aunoa i na sauniga? O e faatatauina faatonuga ua fuafuaina e fesoasoani ia te oe e aʻoaʻoina atu i le tomai ma le maelega?

16. E pei ona faamatalaina i lona amataga, o le a le fuafuaga mo le Aʻoga o le Faiva Faatiokarate?

¹⁶ Ina ia siitia le tomai e aʻoaʻo atu, sa faatuina ai i le 1943 le Aʻoga o le Faatiokarate i totonu o faapotopotoga o Molimau a Ieova. E tusa ai ma fuafuaga autu o lenei aʻoga, ua faapea mai lona uluai tusi taiala: “O lenei laasaga ua faia e lē ina ia aveesea ai ou taimi e faaalu i le auaunaga i le fanua, a e ua fuafuaina ina ia sili atu ona tele lou tomai i le faia. Ua faapea mai atili i se tulaga patino, o le fuafuaga o lenei ‘Laasaga i le Faiva Faatiokarate’ ina ia saunia ai ‘tagata faamaoni’ uma lava, o e ua faalogo i le Afioga a le Atua ma faamaonia lo latou faatuatua i ai, ina ‘ia mafai foi ona aʻoaʻoina isi’ i le o atu mai lea fale i lea fale, i le faia o toe asiga, [return visits], i le faia o suesuega faataʻitaʻi ma suesuega o tusi, mai le faapuupuuina, o le auai i soo se matamata o le auaunaga o le Malo. E mo le iuga lava e tasi o le faia lea o tagata taitoatasi uma o ni faifeau agavaa Faatiokarate e viia ai le suafa o le Alii; ina ia sili ona faaauupegaina ai e taʻuina atu i luma o le lautele le faamoemoe ua ia te ia; ina ia ‘mafai ona aʻoaʻo atu, ia onosai, aʻoaʻo atu ma le agamalu.’ (2 Timoteo 2:24, 25) O lea mea moni e lē tatau ona puaoa le vaaiga a se tasi e uiga i lenei laasaga autu.” (Course in Theocratic Ministry, itulau 4) O loo tumau pea ona avea ma fuafuaga autu o le Aʻoga o le Faiva Faatiokarate. Ua e faatatauina ea faamatalaga lelei tau le aʻoaʻo, faitau, tautala i luma o le lautele, ma isi mea faapena o loo i le tusi taiala o le aʻoga? * Ua tusia ea lou suafa? O e talia ma le faafetai ma faataunuu ou tofiga i le polokalama o le aʻoga? O lenei sauniuniga a Ieova e ala i lana faalapotopotoga e mafai ona fesoasoani ina ia avea ai oe o se faifeau tomai ma le maelega.

 Toleni mo Aʻoaʻoga Maelega

17. O sauniuniga faaleagaga ua faia e Ieova mo i latou o e aʻoaʻo lana upu moni paia i isi?

¹⁷ Ua aumaia e Ieova le anoanoai o mea alofa faaleagaga mo i latou ua faaeaina i le aʻoaʻoina o isi i lana upu moni paia. Faatasi ai ma le tele o isi mea, ua ia aumaia lomiga faale-Tusi Paia, sauniga faalevaiaso, ma fonotaga tetele. O nei sauniuniga matagofie ua mafai ai e ana Molimau tuuina atu ona avea o ni faiaʻoga tomai ma le maelega.

18. I le mulimuli atu i faaaoaoga a Iesu ma Paulo, o a fuafuaga atonu e ao ona faia e le au toeaina ina ia agai i luma o le faiva i le fanua i aso nei?

¹⁸ Ae peitai e faapefea pe a tofia i tatou o ni toeaina po o le avea foi o ni molimau a Ieova ua i ai le poto masani? O le alofa mo isi o lea e ao ona uunaia i tatou e fesoasoani i e fou ma Kerisiano e le lava lo latou poto masani ina ia avea o ni faiaʻoga tomai ma le maelega. O le mea moni o le mea tatau lenei, aua sa auina atu e Iesu soo e 70 ina ua uma ona tuuina atu ia i latou o faatonuga mo la latou faiva. (Luka 10:1-24.) Sa aʻoaʻoina e Paulo Ovasia i Efeso “i luma o le nuu, atoa foi ma lea fale ma lea fale.” Ma e aofia ai foi i lenei le toleniina o i latou ia molimau atu i ē e le talitonu a o o atu mai lea fale i lea fale i le faiva i le fanua. (Galuega 20:20, 21) E faapena foi i toeaina, paeonia, ma isi atonu e fiafia e toleni uso a Molimau i le faiva i le fanua i aso nei. O logo i ou tino se manaoga mo lenei toleniina? O lea ia saili i ai ma ia talia. O oe o se toeaina? Ia fai ni fuafuaga mo le toleniina o isi i le faiva a o e taimua ma le maelega i le auaunaga i le fanua.

Ia Faaauau ona Atiaʻe le Tomai

19. Ai se a e ao ai ona tatou tatalo mo la tatou faiva?

¹⁹ O fomaʻi tipitipi, kamuta, ma isi e mafai ona atili maua le tomai e ala i le suesue ma faatatauina le poto manaomia. E moni foi lea pe a faatatau atu i faifeau Kerisiano. O le mea lea, maeu le taua pe afai e galulue malosi molimau taitoatasi tuuina atu a Ieova ina ia faateleina lona tomai i le avea o se faiaʻoga o le tala lelei! Ma e talu ai o le galuega lenei a Ieova, e ao ai ona avea lenei ma mataupu o a tatou tatalo faatauanau. Afai tatou te sailia le fesoasoani a le Atua ma lana taitaiga, tatou te mautinoa lava o le a ia faamanuiaina lo tatou maelega i le faiva. E pei ona faapea mai le aposetolo o Ioane: “O mea uma foi tatou te ole atu ai, e maua mai ia te ia [Ieova le Atua], aua ua tatou tausi i ana poloaiga, tatou te faia foi mea e lelei i ona luma.”—1 Ioane 3:22.

20. I le avea o Molimau a Ieova, o le a lo tatou faanaunauga e ao ona i ai, a o tulata atu lenei faiga o mea i lona iuga?

²⁰ A o tu lata atu lenei faiga o mea i lona iuga, o lea, sei o tatou sagai atu atoatoa i le faiva. Sei tatou ‘tumau i mea ua aʻoaʻoina,’ mo lo tatou lava faaolataga atoa ma i latou e utagia le feau o le Malo. Ioe, sei o tatou faia taumafaiga uma e aʻoaʻo atu ai i le tomai ma le maelega.

[Faaopoopoga i lalo]

O a Fa Oe?

□ E ese ai mai le talaiga, o le a le isi mea manaomia e le galuega o le faia o soo?

□ Ai se a e taua tele ai le ‘tumau i mea ua e aʻoaʻoina’?

□ O a nisi auala e ono siitia ai le tomai e aʻoaʻo atu?

□ E faapefea ona fesoasoani sauniga faaKerisiano ia i tatou ina ia maua le tomai ma maelega i le avea ma faiaʻoga o le Afioga a le Atua?

□ O le a atonu e faia e toeaina ma isi Molimau ua i ai le poto masani e faatatau i le faiva i le fanua?

[Fesili mo le Suʻesuʻega]

[Ata i le itulau 17]

O le vaai faalemafaufau i mea tutupu o le Tusi Paia e mafai ona fesoasoani ia te oe e avea ma faiaʻoga e sili ona lelei

[Ata i le itulau 19]

O le faatonu o le Aʻoga o le Faiva Faatiokarate e fesoasoani i tagata aʻoga ina ia tomai i le auaunaga o le Malo