Kerisiano Moni o Tagata Talai o le Malo

“E talaiina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.”—MATAIO 24:14.

1, 2. (a) Ai se a e tatau ai nei ona faalauiloaina le feau o le Malo i le lalolagi aoao? (e) O a fesili atonu o le a fesili ai molimau taitoatasi a Ieova?

FAALAUILOA LE MALO O IEOVA. Ua avea lena ma matua autu o lenei mekasini mo le tele o tausaga. O le mea moni, o se vaega lenei o lona taʻu ua iloa ai na o ia lava. Ma o se mea faitaulia le faalauiloaina nei o le feau o le Malo i le lalolagi atoa. Ai se a? Ona o mea na fetalai i ai Iesu Keriso ina ua uma ona ia faailoa mai isi taualumaga e faatatau “i le faailoga” o lona “toe afio mai” ma le iuga o lenei faiga o mea. Sa fetalai Iesu: “E faalauiloaina foi lenei Tala Lelei o le malo i le lalolagi aoao e fai ma molimau i nuu uma. Ona oo mai lea o le iuga.”—Mataio 24:3, 14. The Jerusalem Bible.

² O le mea moni, i aso nei ua lata tele mai “le iuga.” O le mea lea, o molimau taitoatasi tuuina atu a Ieova e ono fesili: O le a sou lagona e uiga i le galuega talai o le Malo? Pe o ou auai e le aunoa i lea galuega? Ma pe o tauaveina lau faiva ma i le uta ma le maelega.?

O le Tofiga ia Talai

3. O upu a Iesu ua faamauina i le Mataio 5:14-16 ua faaalia ai le ā le uiga i ona soo?

³ E leai se Kerisiano faamaoni na te eueuesea le galuega ua avea ma faaeaga o le faalauiloaina atu o le “tala lelei” i isi. Na faapea atu Iesu i ona soo: “O outou, o le malamalama o le lalolagi outou. E le mafai ona lilo le aai ua tu i luga o le mauga. Latou te le tutuina foi le lamepa i le tuu ai i lalo o le mea e fua ai saito, a e tuu i luga lava o le tuugalamepa ia pupula atu ai i e o i le fale uma. Ia faapea ona pupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tamā o i le lagi.” (Mataio 5:14-16) Sa faailoa ai i lena mea faapea o soo o Iesu o le a avea ma tagata talai o le Malo.

4. O le a fa a tala e uiga i le folafolaga sili o le Malo?

⁴ E tusa ai ma le tagata talai sili o le Malo, ua tautalagia faapea: “A o talai e lo tatou Alii le malo sa Ia agai atu . . . ina ia sauniuni ma faamaopoopoina lana Faiva . . . Sa ia amataina le faiva faavaloaga . . . ma na faataatia foi le Toasefululua ma le toʻa fitusefulu ma e tauaveina lea lava mea. A o Ia talai le oo mai o le malo ma ‘faailoga’ taualoa, sa Ia auina i latou mai Ona luma ma se feau faapena ma le malosi tutusa. E ala i auala ofoofogia o ni aʻoaʻoga auiliili . . . Sa ia toleniina i latou i lena taimi mo ni tulaga e maualuga lona faatuatuaina e tuuina atu i se taimi mulimuli.”—A Church History, by Milo Mahan.

5. E tusa ai ma le talaiina o le Malo, o le a sa faia e Iesu?

⁵ Sa faataatia e Iesu ni faatonuga lelei mo ona aposetolo ma soo e toa 70 na ia aauina atu. (Luka 6:12-16; 10:1-22) E faaopoopo i lea, o lo tatou Faaaʻoaʻo lava ia sa “faataamilo o ia i aai, ma faoa aai, au talai ma folafola le tala lelei o le malo o le Atua.” Sa faatasi ma ia le au aposetolo ma nisi o fafine o “e na auauna atu ia te ia i a latou mea.”  (Luka 8:1-3) Ioe, o Iesu o se na faalauiloa ma le maelega le tala lelei ma na ia faataatia ni laasaga e amataina ai se faalapotopotoga o le Malo.

6. A o lei afio atu i le lagi, o le a le tofiga sa tuuina atu e Iesu i ona soo?

⁶ Ina ua mavae le tolu ma le afa tausaga o lana faiva, ona faaumaina lea e Iesu lona tofiga faalelalolagi. Ae peitai a o lei afio atu o ia i le lagi, sa tuuina atu i ona soo lenei tofiga: “Ia outou o atu e fai nuu uma lava ma soo, ma papatiso atu ia te i latou i le suafa o le Tama, ma le Atalii, ma le Agaga Paia; ia outou aʻoaʻo atu ia te i latou ia tausi i mea uma ua ou fai atu ai ia te outou; faauta foi, ou te ia te outou i aso uma lava, e oo lava i le gataaga o le lalolagi.” (Mataio 28:19, 20) O i latou moni lava nei, o ē e talaia le Malo.

7. E ui lava ina sa faaleatoa i soo o Iesu i le amataga le poto saʻo e uiga i le Malo, ai se a sa taulau ai ona avea o i latou o ni ana molimau?

⁷ Ina o le a tuua e Iesu le lalolagi, sa fesili atu ona soo: “Le Alii e, o ona po nei ea e te toe fuatai mai ai le malo ia Isaraelu?” A ua tali atu o ia te i latou ua faapea atu: “E le tusa ona outou iloa o ona po ma ona tausaga ua tuu e le Tama i lana lava pule.” E ui lava la ina lei atoa le poto sao i le au soo e uiga i le Malo, a e sa tofia i latou e Iesu e avea o e e faalauiloa le Malo, aua o le a latou maua le fesoasoani manaomia ina ia faaauau ai lo latou tofiga. “A e maua e outou le mana, pe a afio ifo le Agaga Paia i luga ia te outou” Sa faaopoopo atu Iesu “e fai foi outou ma molimau ia te au i Ierusalema, ma Iutaia uma lava, ma Samaria, e oo lava i tuluiga o le lalolagi.” (Galuega 1:6-8) I lalo o le taʻitaʻiga a le agaga paia, sa lei pine a e iloa e soo o Iesu faapea o le Malo o le malo faalelagi. (Ioane 16:12, 13) Ma i le taimi atofa o le a faalauiloa atu ai mea moni e uiga i lena Malo i “tuluiga uma lava o le lalolagi.”

8. Na faapefea ona faamanuiaina le galuega talai i le uluai senituri?

⁸ Sa matua faia lelei le galuega a na molimau. O le mea moni, sa faatasi Ieova ma i latou, ma sa ia i latou foi le lagolagosua a Iesu Keriso faamamaluina. (Galuega 8:1-8; 11:19-21) E le tioa ona faapea mai le aposetolo o Paulo i le amataga lava o le 60-61 T.A. faapea o le “tala lelei” na outou faalogologo i ai, ‘sa talaiina atu foi i mea uma lava na faia i lalo ifo o le lagi’!—Kolose 1:23.

9. E pei ona faalia i inei, o le a le galuega sili a le faapotopotoga Kerisiano?

⁹ E tusa ai ma le galuega o le molimau atu, ua tusia: “O le faalauiloa atu o le tala lelei . . . e le o se galuega e tasi i totonu o le toatele lea o le a auai i le Lotu o le F[eagaiga] F[ou], ae peitai o lona faavae, o lana galuega e tatau ona faia . . . Matau lelei, e lei faapea mai Iesu [i le Galuega 1:8] E fai outou ma molimau ia te aʻu, po o, o le a e tauaveina le molimau ia te aʻu, peitai, E fai foi outou ma  molimau ia te aʻu. O le faaaogaina o le veape ‘o le a fai’ i inei e i ai sona faitaulia lea e tatau ona faatino i le atoatoa ma le uigā. O le faamatalaga i le [gagana Eleni] e le na ona faatulagaina ma i ai se mea pea a faia e lotu, a e o le mea o le a avea ai le lotu . . . O le Lotu a Iesu Keriso o . . . se tino e molimau atu.” (Pentecost and the Missionary Witness of the Church, a Harry R. Boer, itulau 110-14) Ioe, o le molimau atu o le galuega sili lea a le faapotopotoga Kerisiano moni.

E Ala i le Taʻitaʻiga Tauatua

10, 11. (a) I le tulaga autu, sa faapefea ona faamaopoopoina ē folafola le Malo i le uluai senituri? (e) O le a na tupu ina ua aliai mai tulaga fou?

¹⁰ O e sa faalauiloa le Malo i le uluai senituri sa latou maua taʻitaʻiga mai le vaega pule. O toeaina asiasi sa auauna i le faia o tiute tau le faalapotopotoga ma o tiute faalefaapotopotoga sa tauaveina e ovasia ma auauna o le faiva. (Galuega 15:1, 2, 22-36; Filipi 1:1) Ae peitai o le ā le mea sa tupu pe a oo ina taualumaga fou?

¹¹ Ia, sei manatu po o le a na tupu a e lei leva lava talu ona mavae le aso Penetekoso i le 33 T.A. O Iutaia sa iloa le gagana Eleni na amata ona latou muimui faasaga i tagata Iutaia e tautala i le gagana Eperu “aua ua galo o latou fafine ua oti a latou tane i le tufatufaina o mea i aso fai soo.” Ina ia foia le faafitauli, sa tofia e le au aposetolo ni “tane se toafitu e taʻuleleia” ina ia vaaia le tufatufaina o nei mea ʻai. (Galuega 6:1-8) E tusa ai ma lenei mea ua tatou faitau: “Muamua lava, ina ua mavae le vaaia lelei o le tufatufaina atu ma le tusa o mea e ʻai i aso fai soo, e pei ona faatonuina ai i matou, lea ua vavaeeseina ai le ‘toafitu,’ a e peitai, o le mea moni ua toe faaopoopo mai foi ma isi tiute a o latou tulai mai, aua e lē masuia mataupu silisili a le tapuaiga fou, o gaoioiga ma auala e faaalia ai, e i latou nei atonu e sili atu ona uiga lona faatuina ma faalauteleina, sa tuu atu i le atamai ma le poto loloto o tupulaga sa fāimai . . . o fesuiaiga ma le faafetauiga o faamatalaga auiliili lē aoga . . . e manaomia i soo se faalapotopotoga tele.” Hours With the Bible, New Testament Series, Volume ll, a Cunningham Geikie.

12. (a) O le a na saosaolaumea i le agaigai i luma o le uluai faa-Kerisiano? (e) I fea ma na faapefea ona taʻua uluai soo o Iesu o Kerisiano?

¹² O le faalagolago i le tatalo i le Atua, faatasi ai ma le “atamai ma le poto loloto” o le vaega pule, sa faaopoopo lea i le agaigai i luma o le uluai faa-Kerisiano. Ma sa faapea ona tutupu ai o mea i le taʻitaʻiga tauatua. Mo se faataitaiga, o uluai soo o Iesu sa faapea ona taʻua o i latou o “Le Ala.” (Galuega 9:1, 2 N.W.) Ae peitai atonu e mai lava i le 44 T.A. i Anetioka i Suria, “sa taʻua ai le au soo o Kerisiano ona o le tofiga tauatua.” (Galuega 11:26 N.W.) O le igoa lenei na tuuina atu e mai le Atua ma na latou talia ma le fiafia.—1 Peteru 4:16. *

13. A o faaaogaina e Molimau a Ieova i aso nei auala e lomia ma faasalalauina ai faaonaponei, o le a na faaaogaina e uluai Kerisiano i la latou galuega talai o le Malo?

¹³ I totonu lava o na uluai Kerisiano, sa i ai foi nisi mea tutupu ona o le taʻitaʻiga tauatua. Mo se faataitaiga, a o faaaoga nei e Molimau a Ieova auala faaonaponei e lomia ai, o lea foi la sa uluai maua e Kerisiano anamua le faaaogaina o faamaumauga—o se faamanuiaga moni i la latou galuega talai maelega o le Malo. E tusa ai ma lenei mea, sa tusia e C.C. McCown: “O tusi faatapuaiga a Kerisiano, le Feagaiga Tuai ma le Tusitusiga Fou . . . e le mo se faitauga tusi paganoa a i latou e mau mea. Sa manaomia e tagata faipisinisi faigaluega mamafa le tele latou te mafaia i totonu o le tusi atoa. O i latou atoa ma misionare Kerisiano naunau faamaoni o e mananao e faasino vave i lenei po o o lena mau, e aunoa ma le tau tatalaina, o ni futu se tele o tusi taai.”—The Biblical Archaeologist Reader, itulau 261.

14. Sa naunau aposetolo o Iesu e talai i lalo o a tulaga?

 ¹⁴ I le mafai ona “faasino vave i lenei po o lena mau mo le faamaoniga,” sa sili ona taua aua o auala na sa talaia ai le Malo na faaaogaina e uluai Kerisiano. I ni taimi, o le mea moni, sa latou molimau atu e lei fuafuaina i tagata, e pei lava ona faia e Molimau a Ieova i aso nei. Ma i lenei sa faapea mai ai: “O se tasi o mea uiga ese o le talaiga faaaposetolo o ona uiga e faagaee ai. Sa leai se faatali o se aposetolo mo se avanoa tele. Na pau lava lona tulaga i le mea na tupu, sa pei o Paulo na taʻitaʻiina atu o ia o se pagota i luma o Filiki o le pule e lavalava viole ina ia avatu se molimau o ia lava ma tali atu i le moliaga o le solia o ni tulafono. Sa lei aunoa o ia ma ni avanoa, a e peitai na maua a o i ai o ia i le falepuipui, i tafatafa o le ala ma aiga matitiva sa malolo ai o ia i le po . . . Sa ia lagona o lana feau sa falala tele i tagata taitoatasi, e iu ina sa nofo sauni e āaoina atu i motu o tagata. Sa faigofie foi mo ia ona tautala i se aiga. Sa lei galo lava ia te ia le faaaʻoaʻoga a Keriso . . . [o le] o lana poutu o auala pefua, po o magaala tumutumu, po o matafaga gaoā o Iutaia Kalilaia . . . Sa lei faagaloina e le [au aposetolo] faapea i uluai taimi a o latou auau faatasi ma sa tuuina mai faatonuga faapitoa o auala sili e talaia ai ana aʻoaʻoga, sa tataoina ai isi ana uluai lesona, ma a o lei afio atu i le lagi, sa faasino atu ia i latou le lalolagi e avea ma a latou oganuu ma mea faiola uma o a latou au faalogologo.”—History of the Christian Church, a John F. Hurst, Tusi 1, itulau 96.

Mai lea Fale i lea Fale

15. Na faapefea ona tauaveina e le au aposetolo le galuega talai i taimi ina ua mavae le aso Penetekoso i le 33 T.A.?

¹⁵ I aso mulimuli ane ai i le Penetekoso o le 33 T.A. ua leva ona faaaoga e soo o Iesu se auala sili mo le talaiina o le “tala lelei.” Ina ua uma ona taʻufaatauvaaina le au aposetolo ua faaleagaina ona o le suafa o Iesu Keriso, o le a sa latou faia? Ioe, “ua le mapu foi i latou i aso uma ona aʻoaʻo atu, ma talai atu i le malumalu, ma i lea fale ma lea fale i le tala lelei ia Iesu Keriso.”! (Galuega 5:41, 42) Ioe, sa molimau atu le au aposetolo i lea fale ma lea fale.

16. O le a le ituaiga o le talaiga sa aʻoaʻoina ai e Paulo le au toeaina o Efeso?

¹⁶ Mulimuli ane, sa mafai ona faamanatu atu e le aposetolo o Paulo i le au toeaina tofia mai Efeso: “Ma loʻu lei natia se mea aoga, ina nei le faailoa atu ma aʻoaʻo atu ia te outou i luma o le nuu, atoa foi ma lea fale ma lea fale; ua ou molitino ia Iutaia atoa ma  Eleni le salamo i le Atua, ma le faatuatua i lo tatou Alii o Iesu Keriso.” (Galuega 20:10, 21) E lē o le uiga o upu a Paulo sa ia aʻoaʻo le au toeaina tofia i o latou fale. Na i lo o lea, sa ia molimau atu i Iutaia le talitonu ma Eleni e uiga i le salamo ia Ieova le Atua ma le faatuatua ia Iesu Keriso. E aunoa ma se fesili, sa aʻoaʻo foi e Paulo lena au toeaina i le auala e molimau atu ai mai lea fale i lea fale.

17. O le a ua fai mai ai le tele o tagata aʻoga eseese e uiga i le faiva a Paulo mai lea fale i lea fale i Efeso?

¹⁷ E tusa ai ma le faiva a le au aposetolo i Efeso, ua faapea mai: “O le masani lautele a Paulo sa galue i lana galuega mai le oso aʻe o le la seia oo i le 11 i le taeao (Galuega 20:34-35) O lena foi itula sa faaiu ai e Turano lana aʻoaʻoga; mai le 11 i le taeao e oo i le 4 i le afiafi sa talai atu i le maota fai ni fonotaga ma e fesoasoani ma talanoaga patino ma tagata taitoatasi, fuafua ni malaga i nuu i tua, ma mulimuli lava faia se galuega faaevagelia mai lea fale i lea fale e amata mai le 4 i le afiafi seia oo i le leva o le po. (Galuega 20:20-21, 31).” (A. E Bailey) Fai mai isi tagata aʻoga suesue: “Sa lei loto malie o ia i le na ona avatu o lauga i fonotaga lautele, ae lafoai isi auala o le talaiga, ae peitai e tausia ma le maelega lana galuega sili totino, mai lea fale i lea fale, ma avatu i le aiga le upu moni mai le lagi i le aiga ma loto i tagata Efeso.” (A. A. Livermore) “I le lautele ma mai lea fale i lea fale, i le aai ma le malo atoa sa ia talai atu ai le tala lelei.” (E. M. Blaiklock) “E sili ona aoga le maitauina o lenei tagata talai silisili mai lea fale i lea fale sa lei faia ana asiasiga ia na o ni asiasiga e tafatafao.”—A. T. Robertson.

18. (a) Ai se a e te fai mai ai e i ai se faavae mautu faale-Tusi Paia mo le faiva mai lea fale i lea fale a Molimau a Ieova? (e) E pei o Iesu ma ona uluai soo, o fea ma e faapefea ona talaia e Molimau a Ieova le feau o le Malo?

¹⁸ O le molimau atu mai lea fale i lea fale sa faia e le au aposetolo o Iesu i le 33 T.A. Sa avea ma vaega o le faiva a Paulo i Efeso ma e mautinoa lava i soo se mea. O lea la, e i ai se faavae mautu faale-Tusi Paia mo le faiva a Molimau a Ieova mai lea fale i lea fale. Ma e moni lenei e faatatau i isi auala eseese ua latou faaaogaina i le faasalalauina atu o le feau o le Malo. E fiafia lava, ona o faamatalaga i le Cyclopedia a McClintock ma Strong e faapea: “Sa maua e lo tatou Alii ma ana aposetolo nofoaga mo le talaiga i soo se mea e faapotopoto ai tagata. I auvae mauga, i matafaga o sami, ma auvai o vaitafe, i ala tetele, i fale totino, i faapaologa o le malumalu, i sunako Iutaia, ma isi lava nofoaga e mafai ai ona faalauiloa atu i le Tala Lelei.” (Tusi Vlll, itulau 483) E pei lava o Iesu ma ona uluai soo, e talai atu e Molimau a Ieova le feau o le Malo i “ala tetele, i fale totino, . . . ma isi lava nofoaga. Mo se faataitaiga, latou te auai i galuega mekasini i le auala (ma le mekasini lenei faatasi ai ma lona soa o le Awake!) ma e iloa faapitoa i latou ona o la latou molimau atu mai lea fale i lea fale.

19. E faapefea ona faia filifiliga e faatatau i auala o le talaiga ua faaaogaina nei e Molimau a Ieova?

¹⁹ O tulaga faavae o le faiva lea ua faaaogaina nei e Molimau a Ieova sa matua lelei ona faatuina i le uluai senituri, ma e le gata i lea, o se mea ua tonu i le Vaega Pule o Kerisiano faauuina i aso nei e filifili po o a auala tatau mo le talaiga. O nei filifiliga e  faavae sona vaega i le “atamai ma le poto loloto” o nei tane. Ae peitai, latou te faia filifiliga e pei lava ona faia e le vaega pule Kerisiano o le uluai senituri. E sailia faatonuga mai le Atua ma le taʻitaʻiga a lona agaga paia i le tatalo, ma faapea ona mulimuli i mea sa faia ua tusia i le Tusi Paia pe a maea ona iloiloina po o ā auala sili ona lelei mo le talaiga i nei “aso e gata ai.”—2 Timoteo 3:1; Galuega 15:23, 28).

20. (a) Ai se a tatou te mautinoa ai o loo i ai le faamaoniga tauatua i auala o loo faaaogaina e Molimau a Ieova i aso nei mo le talaiga? (e) O a uiga e ao ona i auauna uma a Ieova agai i le galuega talai o le Malo?

²⁰ Ua mautinoa lava pea o auala ua faaaogaina e Molimau a Ieova i aso nei mo le talaiga ua i lalo o le taʻitaʻiga tauatua, aua ua faapaleniina e le Atua nei taumafaiga i le anoanoai o mea lelei ma faamanuiaga. (Faataoto 10:22) O le toatele ua latou maua le tapuaiga moni ma ua aufaatasi atu nei ma le vaega totoe o soo faauuina o Iesu e avea o se vaega o le faalapotopotoga ua na o i latou o viia le suafa paia o Ieova ma faalauiloaina atu ma le lē mataʻu le tala lelei i le faavaeina o le Malo faalelagi. O le mea lea tau ina ia tumau pea ona faaauau e auauna uma a Ieova ona tuuina i latou i le galuega o le faia o soo a o tulata atu lenei faiga o mea i lona iuga. E tatau ona tatou faia lenei mea ma le faamaoni, aua o Kerisiano moni e lē ma fesiligia le avea o i latou o ni e talai le Malo.

[Faaopoopoga i lalo]

O le a Lou Malamalamaga?

□ Ai se ā e ao ai ona faalauiloa atu nei le feau o le Malo i le lalolagi atoa?

□ O le ā le galuega sili a Kerisiano moni uma?

□ Ai se ā ua faapea ai i totonu o auauna a Ieova e mafai ona tutupu ni mea ona o le taʻitaʻiga tautala?

□ O le ā le faavae mautu o le galuega talai mai lea fale i lea fale a Molimau a Ieova?

[Fesili mo le Suʻesuʻega]

[Ata i le itulau 11]

Sa taʻu atu e Iesu i ona soo: ‘Ia outou o atu e fai soo.’ Po o e faia ma le maelega lenei galuega autu mo Kerisiano moni uma?

[Ata i le itulau 13]

O e molimau atu e le aunoa mai lea fale i lea fale? Sa faia faapena e uluai aposetolo o Iesu. Sa faapena foi le faalauiloa maelega o le Malo o Paulo