Mea Taua Mai Le Tusi Paia—Neemia 1:1–13:31

Manumalo Le Tapuaiga Moni

E manumalo le tapuaiga moni ona o gaoioiga mautinoa ma le faalagolago le maluelue ia Ieova. O le autu lena o le tusi a Neemia. O se faamatalaga ola o le toe fausia o pa o Ierusalema, i lalo le taʻitaʻiga loto tele a Neemia.

O loo aofia ai i le tusi se vaitaimi faailogaina, o le amataga o le 70 vaiasosa e oo atu ai i le aliaʻi mai o le Mesia i le taimi atofaina. (Tanielu 9:24-27) O le fuaiupu amataNe 1:1 ma faaupuga e taitasi ua faaalia manino ai o Neemia o le tusitala. O lenei tusi e o faatasi ma Esera, o loo amata lana tala pe tusa ma le 12 tausaga ina ua uma ona faamauina e Esera mea na tutupu.

A o tatou faitauina lenei faamatalaga, tatou te iloa ai le taʻitaʻiga ofoofogia a Ieova o mea tutupu na ia taunuu ina ai lona finagalo. Ua tatou iloa ai foi le auala na ia faamalosia ma faamafanafanaina ai ana auauna faamaoni.

Malaia o Ierusalema

Faamolemole faitau le Neemia 1:1–2:20. O Neemia o le tautu uaina a le tupu o Peresia, ua ia faalogo faapea o pa o Ierusalema o loo tumau pea ona lepetia ma o tagata “ua tele le puapuaga.” Sa tele le faanoanoa o Neemia, ma tuu atu lona loto ia Ieova i tatalo faatauanau. Na silafia mai e le tupu lona faanoanoa, ma o lea na tatala ai le ala mo Neemia e malaga atu i Ierusalema ina ia vaaia le toe fausia o pa o le aai.

◆ 1:1— O le a le tausaga lena?

O lona 20 tausaga o le tupu o Aretaseta (Longimanus). (2:1) Ona o Kiselu (Novema-Tesema) e muamua ia Nisani (Mati-Aperila) i lenei faamatalaga, e amataina e tupu o Peresia le faitauina o tausaga taitasi o a latou nofoaiga mai le tau e afu ai mea seia oo atu i le isi foi tau e afu ai mea, pe mai le taimi e amata ai ona soloai ane i le nofoalii. Ua faasino mai e mea moni na tutupu ma valoaga faataunuuina o le Tusi Paia o le 455 T.L.M. o le tau lena ia Nisani na pau ia i le atoaga o le 20 tausaga o le nofoaiga a Aretaseta. Peitai o le faamatalaga a Neemia na amata i le 456 T.L.M. i le tau e afu ai mea, ma o le poloaiga ia toe fausia pa o Ierusalema na tuuina atu i le tau e totogo ai mea o le 455 T.L.M.

◆ 2:4—Sa avea ea lenei mea o se tatalo i le taimi mulimuli o le atuatuvale?

E leai, aua o le tulaga faaleagaina o Ierusalema sa avea o se mataupu autu o tatalo a Neemia “i le ao ma le po” mo se taimi umi. (1:4, 6) Ina ua maua le avanoa e faailoa atu ai i le Tupu o Aretaseta e uiga i lona manao ina ia toe fausia pa o le Ierusalema, sa toe tatalo foi Neemia, e pei ona sa ia faia pea e le aunoa. O le tali manaomia mai ia Ieova na iu i le tuuina atu o le faatagaina ia toe tausia pa o le aai.

Lesona mo i Tatou: Sa vaavaai atu Neemia ia Ieova mo le taʻitaʻiga. Pe a fesagai ma filifiliga mamafatū e tatau foi ia i tatou ona “finafinau i le tatalo” ma gaoioi e tusa ma le taʻitaʻiga a Ieova.—Roma 12:12.

Fausia Pa e ui ina Foua

Faitau 3:1–6:19. A o amataina le fausia o pa, sa tauemu ma faifai le fili ia i latou. Mulimuli ane sa latou faamataʻu mai i se osofaiga. Sa lei fefe Neemia, sa faamalosi atu i e galulue: “Ia outou manatunatu i le Alii Silisili ma le mataʻutia [O Ieova].” O le afa o i latou ua tutu ma tao, ma au, a o isi ua galulue ma auupega ua sauniuni. E ui lava i le faamataʻu ma isi teteega, a e na mafai lava ona faaumaina e Siu le fausia o pa i aso e 52!

◆ 3:5—O ai nei “alii”?

O i latou o alii malolosi o Siu sa faatasi ma e ainaina po o uluai tagatanuu o Tikoa, o se aai e tusa ma le sefulu maila (16 km) saute o Ierusalema. O nei “alii” malolosi e foliga mai sa loto faamaualuga e lei fia faamaulalo i latou ma galulue i lalo o avega a ovasia sa tofia e Neemia.—Faatusatusa le Ieremia 27:11.

◆ 4:17—Na faapefea ona latou galulue lima tasi?

O e na atia le pa ma ave avega e tatau ona faaaoga o latou lima e lua mo la latou galuega. O i latou nei e sulu aū i o latou sulugatiti. (4:18) O e ave avega e faigofie ona uu le auupega i le tasi lima ma ave avega i luma o o latou ulu po o tauau foi.—Kenese 24:15, 45.

◆ 5:7—Ai se a e sese ai le totogi po o se mea faasili?

E matua solia tuusao ai le tulafono a Ieova. (Levitiko 25:36; Teuteronome 23:19) “O le taitasi e selau o tupe” a faatatau i masina taitasi, e tusa ma le 12 pasene i le tausaga. (5:11) Talu ai ona sa i se tulaga faigata ona o le oge ma le mamafa o lafoga a Peresia. (5:3, 4) Ui i lea, o tagata mauoa le alolofa ua faaee atu faasiliga maoae i luga o o latou uso matitiva.

◆ 6:5—Ai se a “o se tusi ai e lei faamauina?

O tusi e le faalauteleina e masani lava ona tuuina ma le faaeteete i totonu o taga silika ua faamauina lelei. Ae peitai o le auina mai e Sanepalata “o se tusi e lei faamauina,” atonu sa fuafuaina e avea o se le faaaloalo. Po o faamatauga i se “tusi e lei faamauina” e mafai ona faitauina e nisi, atonu sa manatu o le a ita tele ai Neemia ona ia tuua ai lea o Ierusalema a e sau i ina ia taʻumamaina o ia i ona moliaga. Atonu sa faamoemoe foi Sanepalata faapea o le a faatupu e le tusi se vevesi ona taofia ai lea o Siu la latou galuega.

Lesona mo i Tatou: E le tatau ia i tatou ona manatu o se galuega mamafa e i lalo o lo tatou tulaga mamalu ma taofia ai e pei o “alii” o Tikoa. Na i lo lea, e ao ona tatou faaaoga i tatou e pei o tagata a lautele o Tikoa o e na faaluaina la latou galuega.

Ua Toe Amataina le Tapuaiga Moni

Faitau 7:1–10:39. Na faia le galuega uma mo le fuafuaga e  tasi: o le toe faafoisia o le tapuaiga moni. Ina ua uma le tusiga igoa, ona faapotopoto lea o le nuu e faalogologo ia Esera ma sa Levi o faitau ma faamatala ia te i latou le Tulafono. Ina ua uma ‘ona aʻoaʻoina’ i latou sa latou tausia ma le fiafia le Tausamiga o Faleapitaga. Sa vave ona gaoioi le nuu ma faailoa atu a latou agasala, ma faia loa laasaga e faasaʻoina ai nei sese.

◆ 7:6—Ai se a ua ese ai le lisi lenei mai ia Esera?

E malilie faatasi nei faamatalaga faapea, e ese ai na i lo o pologa ma tagata pepese, e toa 42,360 i latou na toe foi atu. (Esera 2:64, 65; Neemia 7:66, 67) Ae peitai e eseese fuainumera o aiga taitasi na toe foi atu. E pei lava ona masani ai, sa eseese auala na faaaoga e Esera ma Neemia e tusia ai a la lisi. Mo se faaaoaoga, atonu sa tusia e le tasi le lisi o i latou ua uma ona resitarina e toe foi atu. A o le isi na o igoa lava o i latou na foi moni atu. O nisi ositaulaga atonu ma isi foi, sa lei mafai ona maua faasologa o o latou tupuaga. (7:64) Atonu ua faamalamalamaina ai i lenei faamatalaga le auala ua lē tutusa ai fuainumera i lisi a i laua ia ma ua le maua atoa ai le fuainumera faamauina e 42,360.

◆ 8:8—Na faapefea ona ‘faaiuga’ le Tulafono?

Na i lo le fai atu o a la upu ma faamamafa atu, sa faamatalaina e Esera ma lona fesoasoani ma faatatauina mataupu o le Tulafono ina ia sili atu ona pue gofie e tagata. O tusi e faavae mai le Tusi Paia ma sauniga a Molimau a Ieova ua faapena foi ona faia ina ia uiga ia le Afioga a le Atua.

◆ 9:1—Ai se a na lavalava ai le fanau a Isaraelu i le ie talatala ma tuu i le eleele i o latou luga?

O le lavalava i le ie talatala—o le ie uliuli ua lalagaina i fulufulu oti—o se faailoga o le faanoanoa. E faapena foi pe a tuu le palapala po o le lefulefu i luga o le ulu po o le tino e faaalia ai le faanoanoa tele po o le maasiasi. (1 Samuelu 13:19) Sa faia faapena e Siu e faaalia ai lo latou faanoanoa ma le lotomaulalo e faailoa atu a latou agasala. Na mulimuli ane ai i lea le “osia o se feagaiga moni.” (9:38) E faapena foi i tatou, e tatau ona tatou lotomaulalo e iloa ma faaalia tatou agasala pe afai tatou te manao e leoleo maluina la tatou faia ma le Atua.—Ioane 1:6-9.

◆ 10:34—Pe na poloaiina e le Tulafono taulaga o fafie?

E leai, a e manaomia le tele o fafie mo le afi i luga o le fatafaitaulaga. O lea, ona o le lē lava o Netini—o e e lē ni Isaraelu sa auauna i le malumalu o “e na fai fafie”—sa faatasi ai ma i latou o e na toe foi atu i Ierusalema mai le tafeaga. (Iosua 9:23, 27) O lea, ina ia mautinoa o loo lelei pea le aumaia o fafie, sa fai le vili ina ia iloa ai po o le fea ituaiga o le a aumaia fafie i lo latou taimi ua faatonuina ai.

Lesona mo i Tatou: O le “fiafia ia Ieova” e maua mai lea i malamalama o le Afioga a le Atua, ma faatatauina e le tagata lava ia, ma gauai atu i le taʻitaʻiga faatiokarate (8:10) E faapena foi ona talisapaia e Molimau a Ieova le taua o le suesue o le tagata lava ia, auai e le aunoa i sauniga, ma le faiva i le fanua ina ia maua ai le olioli.

Faaulufalega i le Olioli

Faitau 11:1–12:47. E manaomia se faitau aofai tele ina ia tumau ai pea ona avea Ierusalema ma ogatotonu o le tapuaiga moni. E le gata i e tau ofo, a e na sailia foi i le taitoatasi mai tagata taitoasefulu uma o e nonofo i tua o le aai ina ia o mai i totonu. O lea, na umusa ai pa o le aai i se solo fiafia. Ua ofoina atu taulaga e tele, ma na mafai ona lagona mamao mai le olioli o tagata.

◆ 11:2—Ai se a na “faamanuia” ai i e sa tau ofo?

O le tuua o mea totino ma o atu i Ierusalema atonu e iu i le tele o tupe e alu ai ma se fesuiaiga. Atonu sa tele foi ni mataʻutia na oo ia i latou o e na nonofo ai i le aai. I lalo o ia tulaga, sa manatu ai nisi o e tau ofo e faaamuiaina ma sa le taumatea na tatalo ina ia faamanuiaina i latou e Ieova.

◆ 12:27—O anafea na umusa ai le pa?

Na faaumaina ona fausia le pa i le aso 25 o le masina e ono, o Elula, i le 455 T.L.M. ma faia ni faatasitasiga mataina i le isi masina. (6:15; 8:2; 9:1) Atonu na sosoo ai lava ma le umusaina o le pa i le taualuga o faatasiga fiafia.

Lesona mo i Tatou: O le agaga tau ofo ma le faaalia o le faafetai ia Ieova i pese ma musika sa avea o se faamafanafana loto. I aso nei i tauaofiaga ma isi mafutaga, e tau ofo ai e Molimau a Ieova la latou auaunaga mo le lelei o isi ma vivii atu ai ma le loto atoa i pesega ia Ieova.

Faia le Faamamaina

Faitau 12:1-31. Ina ua toe foi mai i le maota o le tupu o Peresia, sa faateia Neemia i mea na tutupu a o toesea o ia. Sa ia gaoioi vave loa ina ia toe faasaʻoina ia faafitauli.

◆ 13:3—O ai na faia ae ai lenei motu o “tagata ese”?

O “tagata ese” sa aofia ai tagata e pei o sā Moapi, sā Amoni, ma atalii afaafa o Isaraelu i fafine ese. (13:1, 2) Ua faailoa lenei mea e le mea moni faapea i le taimi muamua sa faatea ai e Siu a latou ava ese ma a latou fanau. (Esera 10:44) A o lenei foi ua toe faia e Siu isi ava ese, ma ua tatau ai ona faateaeseina nei fafine ma a latou fanau mai le nuu, le laueleele, ma faaeaga o le tapuai faatasi ma tagata o Ieova.—Neemia 13:23-31.

Lesona mo i Tatou: O Siu vaogata o se lapataiga faaaʻoaʻo mo i tatou. E manomia ona tatou matua mataala e leoleoina i tatou faasaga i le faaseseina o i tatou ona o mea faitino, iuvale, ma le aposetasi.

I le tele o taimi ua toe faamamafa mai foi e le tusi a Neemia le mataupu sili faapea: “Afai e le atiina ae e Ieova le fale, e galulue fua o i latou.” (Salamo 127:1) O le lesona autu mo i tatou faapea, i mea uma lava tatou te faia, e tatau pe a tatou maua le faamanuiaga a Ieova. Ma o lena faamanuiaga e faalagolago i lo tatou tuu o le tapuaiga moni e faamuamua i o tatou olaga.